Stap Yusum Kam Folem Mi—Blong Hom mo Jos

?Buk Ia Hem I blong Huia?

Buk ia i blong eniwan we i wantem blong lanem samting insaed long Buk blong Momon—olsem wanwan man, woman, o olsem wan famli mo insaed long ol klas long Jos. Sapos yu no bin stap stadi long ol skripja oltaem long bifo, buk ia i save helpem yu blong statem. Sapos yu gat finis wan gudfala evri dei fasin blong stadi long skripja, buk ia i save helpem yu blong gat ol eksperiens we oli gat moa mining.

Wanwan Man, Woman mo Famli long Hom

Nambawan ples blong lanem gospel hem i hom. Ol tija blong yu long Jos oli save sapotem yu, mo yu save kasem toktok blong leftemap tingting long ol narafala memba blong wod. Be blong stap laef yet long saed blong spirit, yu mo famli blong yumi i nidim evri dei kaekae we i kam tru long “gud toktok blong God,” (Moronae 6:4; luk tu long Russell M. Nelson, “Fas Toktok,” Liahona, Novemba 2018, 6–8).

Yusum buk ia long eni wei we i save helpem yu. Ol aotlaen oli haelaetem sam long ol trutok we i no save finis, we oli stap insaed long Buk blong Momon mo givim ol aedia mo ol aktiviti blong helpem yu blong stadi long ol skripja, yuwan, wetem famli o wetem ol fren. Taem yu stap stadi, folem Spirit blong i lidim yu blong faenem ol trutok we i no save finis we oli gat bigfala mining long yu. Lukaotem ol mesej blong God we i blong yu, mo folem ol kwaet toktok blong Spirit we yu kasem.

Ol Tija mo Olgeta we Oli Stap Lanem Samting long Jos

Sapos yu tijim wan Praemeri klas, wan yut o adalt Sandei Skul klas, wan kworom blong Aronik Prishud, o wan Yang Woman klas, oli stap leftemap tingting blong yu blong yusum ol aotlaen we i stap insaed long lesen buk ia taem yu stap rere blong tij. Kam Folem Mi—Blong Hom mo Jos hem i kurikulom blong Sandei klas blong yu. Ol aedia we oli stap insaed long lesen buk ia oli disaenem blong stap lanem samting long hom mo long jos. Taem yu stap rere blong tij, stat wetem eksperiens blong yuwan long ol skripja. Fasin blong yu, blong rere we i impoten moa, bae i hapen taem yu luklukgud insaed long ol skripja mo taem yu stap lukaotem insperesen blong Tabu Spirit. Lukaotem ol trutok we i no save finis we i save helpem yu blong kam moa olsem Papa long Heven mo Jisas Kraes. Kam Folem Mi i save helpem yu blong poenemaot sam long ol trutok ia mo andastanem wanem we i hapen insaed long ol skripja.

Kipim long maen blong se blong stap lanem gospel, long bes wei, i long hom senta mo Jos i sapotem. Long ol narafala toktok, stamba responsabiliti blong yu i blong sapotem ol pipol we yu stap tijim long ol efot blong olgeta blong lanem samting mo laef folem gospel long hom. Givim long olgeta ol janis blong serem ol eksperiens blong olgeta, ol tingting mo ol kwestin blong olgeta abaot ol paragraf blong ol skripja. Invaetem olgeta blong serem ol trutok we i no save finis we oli bin faenem. Hemia i moa impoten bitim blong stap ridim wan bigfala pat blong lesen buk ia.

Praemeri

Fasin blong yu blong stap rere blong tijim Praemeri i stat taem yu stadi long Buk blong Momon yuwan mo wetem famli blong yu. Taem yu mekem olsem, letem tingting blong yu i open long ol tingting mo filing long saed blong spirit mo oli niu tingting we oli kam tru long Tabu Spirit abaot ol pikinini insaed long Praemeri klas blong yu. Stap prea oltaem, mo Spirit i save givim insperesen long yu wetem ol aedia blong helpem olgeta blong lanem gospel blong Jisas Kraes.

Taem yu stap rere blong tij, yu save kasem moa insperesen taem yu stap lukluk tru long ol tijing aotlaen insaed long lesen buk ia. Wanwan aotlaen insaed long Kam Folem Mi—Blong Hom mo Jos i gat wan seksen we taetol, “Ol Aedia blong Stap Tijim Ol Pikinini.” Tingting long ol aedia ia olsem sam tingting nomo blong mekem yu luksave insperesen blong yu. Yu save ol pikinini insaed long Praemeri klas blong yu—mo bae yu kam blong save olgeta, iven moa gud taem yu stap mitim olgeta. God i save olgeta tu; mo bae Hem i givim insperesen long yu blong yu save ol bes wei blong tijim mo blesem olgeta.

Hem i posibol se ol pikinini long klas blong yu oli bin mekem sam long ol aktiviti long Kam Folem Mi wetem ol famli blong olgeta. Hemia i ORAET. Blong ripripitim samting, hem i gud. Tingting blong stap invaetem ol pikinini blong serem wetem wanwan long olgeta wanem oli lanem long hom—be yu mas mekem ol plan tu blong wei blong ol pikinini oli tekpat iven sapos oli no stap lanem samting long hom. Ol pikinini oli lanem ol trutok blong gospel moa gud taem oli ripripitim tijing blong ol trutok ia tru long ol defdefren aktiviti. Sapos yu faenem se wan aktiviti blong lanem samting i wok gud long ol pikinini, tingting blong ripitim aktiviti ia, speseli sapos ol pikinini we yu stap tijim oli ol smol pikinini. Yu save luklukbak tu long wan aktiviti we yu bin mekem long wan lesen bifo.

Long ol manis we oli gat faef Sandei, ol tija blong Praemeri oli save jusum blong putum wan o moa long ol aktiviti ia blong stap lanem samting, blong i tekem ples blong Kam Folem Mi aotlaen blong namba faef Sandei wetem wan o moa long ol aktiviti blong stap lanem samting insaed long “Apendiks B: Blong Praemeri—Stap Rere Ol Pikinini blong Yu blong Stap long Kavenan Rod blong God blong wan Laef Taem.”

Yut mo Adalt Sandei Skul Klas

Wan stamba tingting blong from wanem yumi kam tugeta long Sandei Skul klas i blong sapotem mo leftemap tingting blong wanwan long yumi taem yumi traehad blong folem Jisas Kraes. Wan simpol wei blong mekem hemia i blong askem wan kwestin olsem “?Wanem nao Tabu Spirit i bin tijim long yu long wik ia taem yu bin stadi long Buk blong Momon wetem Kam Folem Mi?” Ol ansa long kwestin ia i save lidim evriwan blong toktok raon long ol samting we oli gat mining we oli bildimap fet long Jisas Kraes mo gospel blong Hem.

Afta, yu save invaetem evriwan blong toktok raon long sam tingting we oli putum i stap long Kam Folem Mi. Eksampol, wan aedia blong stadi i save givim sam tingting blong go lukaotem Alma 36 mo mekem wan lis blong ol toktok we oli tijim abaot rol blong Sevya long fasin blong sakem sin. Yu save askem ol memba blong klas blong serem mo tokbaot ol toktok we oli faenem. O yu save yusum smoltaem blong mekem lis ia tugeta olsem wan klas.

Ol Aronik Prishud Kworom mo Ol Yang Woman Klas

Taem kworom blong ol Aronik Prishud Kworom mo Ol Yang Woman Klas oli mit long Sandei, i tru, stamba tingting blong olgeta bae i defren long wan Sandei Skul klas. Sam moa tingting blong stap helpem yumi wanwan blong lanem abaot gospel blong Jisas Kraes, hem i we ol grup ia oli mit blong kaonsel tugeta tu abaot ol wei blong mekem i hapen wok blong sevem man mo fasin blong kam olsem God (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent, 1.2). Oli mekem hemia tru long daereksen blong ol presidensi blong klas mo kworom.

From risen ia, wan memba blong presidensi blong kworom o klas i mas stap lidim ol toktok raon long wanwan miting blong kworom o klas abaot ol efot blong, eksampol, laef folem gospel, givhan long ol pipol we oli stap long nid, serem gospel, ol tekpat long tempol mo famli histri wok.

Afta long taem ia blong kaonsel tugeta, wan tija bae i lidim klas o kworom blong stap lanem gospel tugeta. Oli save asaenem ol lida blong adalt o ol memba blong klas o kworom blong oli save tij. Ol presidensi blong klas o kworom oli wok tugeta wetem ol lida blong adalt blong mekem ol asaenmen ia.

Ol pipol we oli asaenem olgeta blong tij, oli mas yusum sam tingting blong stap lanem samting insaed long aotlaen blong evri wik long Kam Folem Mi. Long wanwan aotlaen, pikja aekon ia i soem wan aktiviti we i stret blong ol yut. Be, eni tingting we oli putum long aotlaen ia, oli save yusum olsem wan aktiviti blong stap lanem samting we i blong ol yut.

Blong kasem wan eksampol blong ajenda blong ol miting blong kworom mo klas, long apendiks D.