Ako Modala Kaninyo sa Ibabaw Pag-usab Gikan sa mga Kahiladman, ni Jonathan Arthur Clarke

Nobiyembre 18–24: “Nga ang Daotan Mahunong”

Ether 6–11

Gatosan ka tuig human sa pagkalaglag sa mga Jaredite, nadiskobrihan sa mga Nephite ang mga guba sa ilang karaang sibilisasyon. Taliwala niining mga guba mao ang usa ka misteryosong rekord—mga palid sa “lunsay nga mga bulawan” nga “napuno sa mga kinulit,” ug ang mga Nephite “matinguhaon sa hilabihan” sa pagbasa niini (Mosiah 8:9; 28:12). Karon ikaw adunay minubo niini nga rekord, ug gitawag kini og ang basahon ni Ether. Sa dihang nabasa kini sa mga Nephite, “sila napuno uban sa kasubo” nga nakahibalo sa masulub-on nga pagkapukan sa mga Jaredite. “Bisan pa niana kini nakahatag kanila og daghan nga kahibalo, diin sila nalipay” (Mosiah 28:18). Ikaw, usab, mahimong makakaplag og masulub-on nga mga higayon niini nga basahon. Apan ikaw mahimong malipay usab niining gasa sa kahibalo. Sama sa gisulat ni Moroni, “kini kaalam diha sa Dios nga kini nga mga butang kinahanglan mapakita nganha kaninyo … nga ang daotan mahunong, ug nga ang panahon mahimo nga moabot nga si Satanas wala untay gahom diha sa mga kasingkasing sa anak sa mga katawhan” (Ether 8:23, 26).

Mga Ideya alang sa Pagkat-on diha sa Panimalay ug sa Simbahan

Ether 6:1–12

Ang Ginoo mogiya kanako latas sa akong mortal nga panaw.

Mahimo kang makakaplag og espirituwal nga mga panabot kon imong itandi ang paglawig sa mga Jaredite tabok sa lawod diha sa imong panaw latas sa kinabuhi. Sama pananglit, unsa ang gihatag sa Ginoo nga nagbanwag sa imong agianan sama sa mga bato diha sa mga kasko sa mga Jaredite? Unsa kaha ang girepresentar sa mga kasko, o sa mga hangin nga “[n]aghuyop padulong sa gisaad nga yuta”? (Ether 6:8). Unsay imong nakat-onan gikan sa mga lihok sa mga Jaredite kaniadto, atol sa, ug human sa paglawig? Sa unsang paagi ikaw gigiyahan sa Ginoo padulong sa imong gisaad nga yuta?

“Miawit og mga pagdayeg ngadto sa Ginoo.” Ang mga Jaredite mipahayag sa ilang pagpasalamat ug gugma alang sa Dios pinaagi sa awit ug pagdayeg (tan-awa sa Ether 6:9). Mahimo kang mangita o mohimo og mga kahigayonan sa paggamit sa musika ug kinasingkasing nga pagpamatuod sa pagdayeg sa Dios diha sa panimalay ug sa simbahan. Sama pananglit, mahimong tukma ang pagkanta og himno sa pagdayeg sama sa “Daygon ang Dios, nga Gamhanan” (Mga Himno, nu. 39) kon magtuon sa Ether 6:1–12.

Baby on Board [Bata Sakay sa Kasko], ni Kendal Ray Johnson

Ether 6:5–18, 30; 9:28–35; 10:1–2

“Naglakaw nga mapainubsanon sa atubangan sa Ginoo.”

Bisan og ang garbo ug ang kadaotan ingon og nagpatigbabaw sa kasaysayan sa Jaredite, usab adunay mga ehemplo sa pagpaubos dinhi niini nga mga kapitulo—ilabi na diha sa Ether 6:5–18, 30; 9:28–35; ug 10:1–2. Ang pagpamalandong sa mosunod nga mga pangutana makatabang kanimo sa pagkat-on gikan niini nga mga ehemplo: Ngano nga ang mga Jaredite nagpaubos sa ilang kaugalingon dinhi niini nga mga sitwasyon? Giunsa nila sa pagpakita ang ilang pagpaubos? Sa unsa nga paagi nga gipanalangian sila sa Dios isip resulta? Hunahunaa kon unsay imong mahimo aron andam “sa paglakaw nga mapainubsanon sa atubangan sa Ginoo” (Ether 6:17) kay sa mapugos sa pagpaubos (tan-awa sa Mosiah 4:11–12; Alma 32:14–18).

Tan-awa usab diha sa Dale G. Renlund, “Pagbuhat sa Kaangayan, Pagpakita sa Makanunayong Gugma, ug Pagkinabuhi diha sa Mapaubsanong Pakig-uban sa atong Dios,” Liahona, Nob. 2020, 109–12.

Ether 7–11

Ako mamahimong usa ka Kristohanon nga lider.

Ang mga kapitulo 7–11 sa Ether naglangkob sa labing minos 28 ka henerasyon. Bisan og gamay ra nga detalye ang ikahatag sa ingon nianang gamay nga luna, usa ka sundanan ang daling migula mahitungod sa mga sangpotanan sa matarong ug daotan nga pagpangulo. Unsay imong makat-onan mahitungod sa pagpangulo gikan sa mga ehemplo—negatibo ug positibo—sa mga hari nga gilista sa ubos?

• Orihah—Ether 6:30; 7:1

• Shule—Ether 7:23–27

• Jared—Ether 8:1–7, 11–15

• Emer ug Coriantum—Ether 9:21–23

• Heth—Ether 9:26–30

• Shez—Ether 10:1–2

• Riplakish—Ether 10:5–8

• Morianton––Ether 10:9–11

• Lib—Ether 10:19–28

• Ethem—Ether 11:11–13

• Jesukristo—Mateo 18:1–4; 20:20–28; 23:11

Si Elder Dieter F. Uchtdorf mihatag og makatabang nga tambag mahitungod sa pagpangulo sa iyang mensahe, “Ang Labing Dako Kaninyo” (Liahona, Mayo 2017, 78–81). Ikonsiderar ang pagtuon niini nga mensahe—ilabi na ang mga istorya nga iyang gisugilon—mangita alang sa mga baroganan o mga sundanan sa Kristohanon nga pagpangulo. Kanus-a nimo nakita nga natuman kini nga mga baroganan o mga sundanan nga gipakita sa mga tawo nga nangulo?

Samtang ikaw mamalandong sa unsay imong nakat-onan, paghunahuna mahitungod sa mga oportunidad nga ikaw aduna sa pagpangulo o sa pag-impluwensiya sa uban diha sa imong panimalay, imong komunidad, imong calling sa Simbahan, ug uban pa. Unsaon nimo sa pagpalambo og mga hiyas sa Kristohanon nga pagpangulo, bisan kon ikaw walay piho nga gimbuhaton sa pagpangulo?

Tan-awa usab sa “Mga Baroganan sa Pagpangulo diha sa Simbahan,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 4.2 (ChurchofJesusChrist.org).

Ether 8:7–26

Ang Ginoo dili magbuhat diha sa kangitngit.

Kon ang mga tawo nagkunsabo sa pagtago sa ilang daotang mga buhat, sila nalambigit sa usa ka tinago nga kalihokan. Agig dugang sa tinago nga kalihokan nga gihulagway diha sa Ether 8:7–18, ang ubang mga ehemplo makita diha sa Helaman 1:9–12; 2:2–11; 6:16–30; Moises 5:29–33. Hunahunaa ang pagtandi niini nga mga bersikulo ngadto sa 2 Nephi 26:22–24, diin gihulagway ni Nephi kon giunsa paghimo sa Ginoo ang Iyang buhat. Ngano kaha nga gisugo si Moroni sa pagsulat sa unsay iyang gibuhat mahitungod sa tinago nga mga kalihokan?

Unsay imong nakat-onan gikan sa basahon ni Ether nga makatabang nimo sa pag-angkon sa mga panalangin nga gihulagway sa Ether 8:26?

Mga Ideya sa Pagtudlo sa mga Anak

Ether 6:1–12

Makasalig ako sa Langitnong Amahan aron sa paghupay kanako kon ako mahadlok.

• Ang tanan adunay lisod nga mga adlaw—bisan ang gagmay nga mga bata. Tingali matabangan ninyo ang inyong mga anak sa pagpangita og mga pulong ug mga hugpong sa mga pulong diha sa Ether 6:1–12 nga nagpakita kon sa unsang paagi ang mga Jaredite misalig sa Dios atol sa pipila ka lisod gayod ug makahadlok nga mga adlaw. Ikonsiderar ang pagpakigbahin sa usag usa ang pipila ka kasinatian sa dihang ang Dios mitabang kanimo atol sa malisod nga mga panahon sa imong kinabuhi.

Ether 6:9, 12, 30; 7:27; 10:2

Ang paghinumdom unsa ang nahimo sa Ginoo magdala og pagpasalamat ug kalinaw.

• Sa pag-abot nila nga luwas didto sa gisaad nga yuta, ang mga Jaredite mapasalamaton kaayo nga sila “mihilak sa kalipay” (Ether 6:12). Mahimong madasig ninyo ang inyong mga anak nga mobati nga mapasalamaton alang sa mga panalangin sa Dios pinaagi sa pagtabang kanila sa pagpangita og mga hugpong sa mga pulong gikan sa Ether 6:9, 12 nga nagpakita kon giunsa sa mga Jaredite pagpahayag sa ilang pasalamat ngadto sa Dios. Mahimong malingaw sila sa pagkanta, sama sa gibuhat sa mga Jaredite, og usa ka awit nga nagpahayag og pasalamat, sama sa “Gihigugma Ako sa Langitnong Amahan” (Songbook sa mga Bata, 16). Hangyoa ang inyong mga anak sa pagsulti kaninyo og pipila ka butang nga sila mapasalamaton.

• Tingali ang inyong mga bata makabasa sa Ether 6:30; 7:27; ug 10:2 ug mangita sa unsay nahinumdoman niining matarong nga mga hari. Sa unsang paagi kini nakaapekto sa paagi nga sila nangulo sa ilang katawhan? Kamo ug ang inyong mga anak mahimong maghisgot sa mga paagi sa pagpahinumdom sa inyong kaugalingon sa unsay nabuhat sa Dios alang kaninyo. Sama pananglit, tingali makasulat sila mahitungod niini o makadrowing og mga hulagway. Mahimo ninyong isugyot nga maghimo sila og regular nga kinaiya sa pagsulat sa mga panalangin nga ilang namatikdan gikan sa Ginoo.

Ether 7:24–27

Ako mapanalanginan kon ako mosunod sa propeta sa Dios.

• Tingali kamo ug ang inyong mga anak malingaw sa pagdrama-drama sa pipila ka butang nga gitudlo sa propeta nga atong buhaton. Mahimo gani ninyong himoon kining usa ka dula diin tag-anon ninyo kon unsa ang girepresentar sa mga aksiyon. Kini makaandam sa inyong mga anak sa paghisgot kon nganong importante nga mosunod sa propeta sa Dios. Mahimo dayon ninyong basahon ang Ether 7:24–27 aron masuta kon unsay nahitabo sa dihang ang mga tawo misunod sa propeta sa Dios. Sa unsang paagi kita mapanalanginan pinaagi sa pagsunod sa propeta karon?

Ether 9:28–35; 11:5–8

Ang Ginoo maluluy-on kon ako maghinulsol.

• Ang pagpangita alang sa mga sundanan usa ka bililhon nga kahanas sa pagtuon sa kasulatan. Ang basahon ni Ether naglangkob og usa ka gibalik-balik nga sundanan nga naghatag og gibug-aton sa kaluoy sa Ginoo. Aron sa pagtabang sa inyong mga anak sa pagpangita niini nga sundanan, dapita sila sa pagbasa sa Ether 9:28–35 ug Ether 11:5–8, mangita alang sa mga pagkasusama tali sa duha ka asoy. Unsa ang atong makat-onan gikan niini nga mga istorya? Tingali mahimo silang mangita og mga hulagway diha sa Libro sa mga Hulagway sa Ebanghelyo sa ubang mga tawo diha sa mga kasulatan kinsa naghinulsol ug napasaylo.

Alang sa dugang nga mga ideya, tan-awa ang isyu karong bulana sa Higala nga magasin.

Jaredite Barges [Mga Kasko sa Jaredite], ni Gary Ernest Smith