Minerva Teichert (1888–1976), Moronae: O le Toe Tagata sa Nifae, 1949–1951, suauu i le laupapa, 34 3/4 × 47 inches. Falemataaga mo Faatufugaga a le Iunvesite a Polika Iaga, 1969

9-15 Tesema: “Talosia Ia Sii Ae Oe i Luga e Keriso”

Moronae 7–9

A o le’i faaumaina e Moronae le faamaumauga ua tatou iloa nei o le Tusi a Mamona i ana upu mulimuli, sa ia faasoa mai ni savali se tolu mai lona tamā o Mamona: o se saunoaga i “soo fifilemu o Keriso” (Moronae 7:3) ma ni tusi se lua sa tusia e Mamona ia Moronae. Atonu sa faaaofia ai e Moronae nei savali i le Tusi a Mamona ona sa ia muai vaaia ni mea e tutusa ai i le va o faigata i ona aso ma o tatou aso. I le taimi na tusia ai nei upu, o le nuu atoa o sa Nifae, sa liliuese mai le Faaola. O le toatele o i latou na “toesea lo latou alofa, o le tasi i le isi” ma sa fiafia “i mea uma, vagana ai le mea lelei” (Moronae 9:5, 19). Ae peitai sa maua pea e Mamona le mafuaaga mo le faamoemoe, ma aoaoina i tatou o le faamoemoe e le faapea o le le amanaiaina po o le faatamala e uiga i faafitauli o le lalolagi. O le faamoemoe o lona uiga o le i ai o le faatuatua i le Tama Faalelagi ma Iesu Keriso, o lo la mana e malosi atu ma sili atu ona faavavau nai lo na faafitauli. O lona uiga o le “taofi mau i mea lelei uma” (Moronae 7:19). O lona uiga o le tuu o le Togiola a Iesu Keriso “ma talosia ia mau e faavavau i lou mafaufau, … le faamoemoe o lona mamalu ma le ola faavavau” (Moronae 9:25).

Ua Aoao Atu e Mamona le Faatuatua, Faamoemoe, ma le Alofa Mama

Ua vaaia e Mamona le amataga o le amioleaga ae ua valaau atu i lona nuu ia faatuatua, salamo, ma faamoemoe ia Iesu. Ua aoaoina e soo fifilemu o Keriso le ala e iloa ai le lelei mai le leaga. O le agaga o le Atua e faatosina ia faia mea lelei.

Manatu mo le Aoaoina i le Aiga ma i le Lotu

Moronae 7:12–20

E fesoasoani le Malamalama o Keriso ia ou iloa le mea moni mai le mea sese.

E toatele tagata e taumanatunatu, “E mafai faapefea ona ou iloa o se uunaiga e sau mai le Atua pe mai o’u lava mafaufauga?” po o le “Faatasi ai ma le tele o le taufaasese i aso nei, e mafai faapefea ona ou iloa le mea e sa’o pe sese?” Ua tuuina mai e upu a Mamona i le Moronae 7 ni nai mataupu faavae e mafai ona tatou faaaogaina e tali ai nei fesili. Vaavaai mo na [mataupu faavae] aemaise lava i fuaiupu 12–20. E mafai ona e faaaogaina nei upumoni e fesoasoani ia te oe e iloilo ai savali e te fetaiai ai ma aafiaga e te maua i lenei vaiaso.

Tagai foi Taiala i Tusitusiga Paia, “Malamalama, Malamalama o Keriso,” Gospel Library; “Patterns of Light: Discerning Light” (vitio) Gospel Library.

Moronae 7:20–48

Ona o Iesu Keriso, e mafai ai ona ou “taofi mau i mea lelei uma.”

Sa fesili Mamona i se fesili e foliga mai e sili ona taua i aso nei: “E mafai faapefea ona taofi mau i mea lelei uma?” (Moronae 7:20). Ona ia aoao atu lea e uiga i le faatuatua ia Iesu Keriso, faamoemoe, ma le alofa mama. A o e faitauina fuaiupu 20–48, vaavaai pe faapefea e uiga auaumama taitasi ona fesoasoani ia te oe e saili ma “taofi mau” i le agalelei lea e sau mai ia Iesu Keriso. Aisea e taua ai nei uiga mo se soo o Iesu Keriso?

Tagai foi “Mormon’s Teachings about Faith, Hope, and Charity” (vitio), Gospel Library.

Moronae 7:44–48

“O le alofa mama o le alofa le pona lea o Keriso.”

Na matauina e Mamona o lo tatou faatuatua ma le faamoemoe ia Iesu Keriso e taitai atu ai i tatou ia maua le alofa mama. Ae o le a le alofa mama? E mafai ona e tusia le Alofa mama o le … ona faitau lea o le Moronae 7:44–48, ma vaavaai mo upu po o fasifuaitau e mafai ona faauma ai le fuaiupu. A uma, mafaufau e sui le upu Alofa Mama i le suafa o Iesu Keriso. O le a se mea ua aoao atu e lenei mea ia te oe e uiga i le Faaola? Na faapefea ona faaalia e Iesu Keriso Lona alofa mama? Mafaufau i faataitaiga mai tusitusiga paia ma lou lava olaga.

Sa maitauina e Peresitene Dallin H. Oaks: “O le mafuaaga e le uma ai le alofa mama ma le mafuaaga e sili atu ai le alofa mama nai lo gaoioiga lelei … ona o le alofa mama, ‘le alofa le pona o Keriso’ [Moronae 7:47], e le o se gaoioiga ae o se tulaga po o le aga o le avea ai. … O le alofa mama o se mea e avea ai se tasi” (“The Challenge to Become,” Liahona, Nov. 2000, 34). Faatasi ma lenei fuaitau i le mafaufau, e mafai ona e faitau le savali a Elder Massimo De Feo “Alofa Mama: O Le Faailoga Moni o Soo Moni Uma o Iesu Keriso” (Liahona,, Me 2018, 81–83). E faapefea e le alofa mama ona aafia ai lou avea ma soo? E mafai faapefea ona e “fusi mau ai i le alofa mama”? (fuaiupu 46).

Tagai foi 1 Korinito 13:1–13; Eteru 12:33–34; “Ia Fealofani,” Viiga, nu. 195; “Charity: An Example of the Believers” (vitio), Gospel Library; Autu o le Talalelei, “Alofa Mama,” Potutusi o le Talalelei.

Charity: An Example of the Believers

A group of young women reach out in kindness and charity to a student with a disability, fulfilling her dream and giving everyone something to cheer about. To read more about this inspiring example, visit: http://bit.ly/a5AjWz

Faaaoga lesona faatino. Atonu o le mafaufau i se nofoa e tolu vae e mafai ona fesoasoani e te malamalama atili ai e uiga i le sootaga i le va o le faatuatua, faamoemoe, ma le alofa mama (tagai Dieter F. Uchtdorf “O Le Mana e Le Iu o le Faamoemoe,” Liahona, Nov. 2008, 21–24).

Moronae 9:3–5

O le ita e taitai atu i le faanoanoa ma puapuaga.

I se faatusatusaga i le savali o le alofa a Mamona i le Moronae 7:44–48, o le tusi lona lua a Mamona ia Moronae na aofia ai lapataiga e faasaga i se mea o loo tauivi ma le toatele i le asō—ita. E tusa ai ma le Moronae 9:3–5, o a nisi o taunuuga o le ita o sa Nifae? O a lapataiga e mafai ona tatou maua mai fuaiupu 3–5, 18–20, 23?

Tagai foi Gordon B. Hinckley, “Slow to Anger,” Liahona, Nov. 2007, 62–66.

Moronae 9:25–26

E mafai ona ou maua le faamoemoe ia Keriso, e tusa lava po o a o’u tulaga.

Ina ua uma ona faamatalaina se amioleaga na ia vaaia, sa ta’u atu e Mamona i lona atalii e aua le faanoanoa. O le a le mea ua faagaeetia ai oe i le savali o le faamoemoe a Mamona? O le a le uiga ia te oe o le “sii a’e oe” e Keriso? O a ni uiga auaumama o Keriso ma ni mataupu faavae o Lana talalelei e “mau i lou mafaufau” ma tuu atu ia te oe le faamoemoe? (Moronae 9:25).

Tagai foi Russell M. Nelson, “Olioli ma le Ola ai Faaleagaga,” Liahona, Nov. 2016, 81–84.

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Manatu mo le Aoaoina o Tamaiti

Moronae 7:33

Afai e i ai loʻu faatuatua ia Iesu Keriso, e mafai ona ou faia soo se mea e finagalo o Ia ou te faia.

• Mafaufau e vaavaai faatasi i ni nai ata o faaali ai se tasi mai tusitusiga paia o faataunuu se mea taua (tagai, mo se faataitaiga, Tusi Ata o le Talalelei, nu.19, 70, 78,81). Na faapefea e le faatuatua ia Keriso ona faia se eseesega i nei faataitaiga? Ona mafai lea e oe ma lau fanau ona faitau le Moronae 7:33, ma vaavaai mo mea e mafai ona tatou faia pe a tatou faatuatua ia Iesu Keriso. E mafai foi ona e faasoa atu ni aafiaga i le tasi ma le isi ina ua faamanuiaina oe e le Atua i le mana e faia ai Lona finagalo.

Moronae 7:41

O le talitonu ia Iesu Keriso e mafai ona aumaia ia te au le faamoemoe.

• A o e faitau atu le Moronae 7:41 i tamaiti, atonu e mafai ona latou sii o latou lima pe a latou faalogo i se mea na fai mai Mamona e tatau ona tatou faamoemoe i ai. Taʻu atu i tamaiti e uiga i le faamoemoe e te lagona ona o Iesu Keriso.

• E mafai foi e oe ma lau fanau ona mafaufau i se tasi atonu o loo i ai se taimi faigata i se mea. Atonu e mafai e tamaiti ona tusi se ata mo le tagata e mafai ona faamanatu atu ia te ia, ia maua le faamoemoe ia Iesu Keriso.

Moronae 7:40–41; 9:25–26

E mafai ona ou maua le faamoemoe ia Iesu Keriso, e oo lava i taimi faigata.

• Ina ia aoao lau fanau e uiga i le faamoemoe ia Iesu Keriso, e mafai ona e faatumuina se koneteina malamalama i le vai ma tuu ni mea faitino se lua i totonu—o se mea e opeopea ma le tasi e magoto. A o outou faitau faatasi i le Moronae 7:40–41 ma le 9:25–26, e mafai e lau fanau ona vaavaai mo mea e faia e le faamoemoe mo i tatou. E mafai ona latou faatusatusa le mea faitino i se tagata o loo i ai le faamoemoe ia Keriso. E faapefea ona Ia “siitia [i tatou]” pe a tatou feagai ma tofotofoga faigata? Fesoasoani i tamaiti e mafaufau i auala e mafai ai ona latou tausia aoaoaga a le Faaola ma Ana faamalosiau “i [o latou] mafaufau e faavavau.”

Moronae 7:45–48

“O le alofa mama o le alofa le pona lea o Keriso.”

• O se pese e faatatau i le alofa, e pei ole “Ia Fealofani” (Tusipese a Tamaiti, 195), e mafai ona amata ai se talanoaga e uiga i le alofa mama. E mafai ona e faitauina pe otooto le Moronae 7:47 ma valaaulia lau fanau e tusi ni ata o i latou lava o faaalia le alofa i se tasi. Fautua atu ia latou tuu a latou ata i mea o le a faamanatu ai ia i latou le alofa i isi e pei o Iesu.

• E mafai faapefea ona e musuia lau fanau e saili ma atiina ae le alofa mama o Keriso i o latou olaga? Atonu e te fesoasoani ia i latou e mafaufau i auala na faaalia ai e Iesu le mama (tagai, mo se faataitaiga, Luka 23:34; Ioane 8:1–11; Eteru 12:33–34). E mafai faapefea ona tatou mulimuli i Lana faataitaiga?

Mo nisi manatu, tagai i le lomiga o lenei masina o le mekasini o le Uo .

Atatusi o Keriso le Faaola, saunia e Heinrich Hofmann