Mawazo ya Kuboresha Kujifunza Nyumbani na Kanisani

Unapojifunza injili ya Mwokozi nyumbani na kanisani, fikiria maswali yafuatayo:

• Unawezaje kumwalika Roho katika kujifunza kwako?

• Unawezaje kufokasi juu ya Mwokozi katika kujifunza kwako?

• Unawezaje kutumia vyema nyakati za kujifunza za kila siku?

• Unawezaje kuwatia moyo wanafamilia na washiriki wa darasa ili wasome maandiko peke yao na kushiriki kile wanachojifunza?

Hizi ni baadhi ya njia rahisi za kuboresha kujifunza kwako neno la Mungu.

Sali kwa ajili ya mwongozo wa kiungu

Maandiko ni neno la Mungu, kwa hiyo mwombe Yeye kwa ajili ya msaada ili kuyaelewa.

Tafuta kweli kuhusu Yesu Kristo

Vitu vyote humshuhudia Kristo (ona 2 Nefi 11:4; Musa 6:63), kwa hivyo fikiria kuweka kumbukumbu au alama mistari ambayo inashuhudia juu ya Mwokozi, ongeza upendo wako kwa ajili Yake, na fundisha jinsi ya kumfuata Yeye. Wakati mwingine kweli kuhusu Mwokozi na injili Yake zinasemwa wazi wazi na wakati mwingine zinatolewa kupitia mfano au hadithi. Jiulize mwenyewe, “Ni kweli zipi za milele zinafundishwa katika mistari hii?” Kweli hizi zinanifundisha nini kuhusu Mwokozi?

Msikilize Roho

Kuwa makini kwenye mawazo na hisia zako, hata kama hazihusiani na kile unachokisoma. Misukumo hii inaweza kuwa kile ambacho Baba yako wa Mbinguni anakutaka ujifunze.

Andika Misukumo Yako.

Kuna njia nyingi za kuandika misukumo ambayo inakujia wakati unapojifunza. Kwa mfano, unaweza kuona kwamba maneno fulani au virai katika maandiko vinakuvutia; unaweza kuwekea alama na kuandika mawazo yako kama neno la kukumbuka katika maandiko yako. Unaweza pia kutunza shajara ya umaizi, hisia na misukumo unayoipata.

Shiriki na wengine kile unachojifunza

Kujadili umaizi kutokana na kujifunza kwako binafsi ni njia nzuri ya kuwafundisha wengine na pia husaidia kuimarisha uelewa wako katika kile ambacho umesoma. Shiriki kile unachojifunza pamoja na wanafamilia na marafiki (bayana au kidijitali), na waalike kufanya vivyo hivyo.

Linganisha maandiko na maisha yako

Fikiria jinsi hadithi na mafundisho unayoyasoma yanavyotumika na maisha yako. Kwa mfano, ungeweza kujiuliza, “Je, ni uzoefu gani nilioupata ambao unafanana na kile ninachokisoma?”

Uliza maswali wakati unapojifunza.

Unapojifunza maandiko, maswali yanaweza kuja akilini. Maswali haya yanaweza kuhusiana na kile unachokisoma au maisha yako kwa ujumla. Tafakari maswali haya na tafuta majibu kadiri unavyoendelea kujifunza maandiko.

Tumia visaidizi vya kujifunza maandiko

Ili kupata umaizi wa ziada katika mistari unayoisoma, tumia tanbihi, Mwongozo wa Mada, Kamusi ya Biblia, Mwongozo wa Maandiko, na visaidizi vingine vya kujifunza.

Zingatia muktadha wa maandiko

Unaweza kupata umaizi wa maana kuhusu kifungu cha maandiko unapozingatia muktadha wake, ikijumuisha mazingira au mpangilio uliyotokea. Kwa mfano, kufahamu chimbuko na imani za watu ambao Mungu alizungumza nao kunaweza kukusaidia kuelewa vyema dhamira ya maneno Yake. Unaweza kujifunza kuhusu wao katika Watakatifu, Ufunuo katika Muktadha, vichwa vya habari vya sehemu katika Mafundisho na Maagano, na nyenzo nyinginezo.

Jifunze maneno ya manabii na mitume wa siku za mwisho.

Soma kile ambacho manabii na mitume wa siku za mwisho wamefundisha kuhusu kanuni unazopata ndani ya maandiko.

Ishi kulingana na kile unachojifunza

Kujifunza maandiko hakupaswi tu kututia moyo lakini pia kunapaswa kutuongoza kwenye kubadilisha jinsi tunavyoishi. Sikiliza kile ambacho Roho anakushawishi ufanye wakati unaposoma na kisha azimia kuitendea kazi misukumo hii.

Tumia muziki

Nyimbo za dini zilizopendekezwa na nyimbo za watoto zinapatikana kote katika Njoo, Unifuate. Tumia muziki mtakatifu ili kumwalika Roho na kuongeza imani yako na ushuhuda juu ya kweli za injili.

Kariri maandiko

Chagua kifungu cha maandiko ambacho kina maana kwako, familia yako au darasa lako na wakikariri kwa kurudia kila siku au kucheza mchezo wa kukariri.

Shiriki masomo ya vitendo

Tafuta vitu ambavyo vinahusiana na milango na mistari ambayo mnaisoma. Zingatia jinsi gani kila kitu kinavyohusiana na mafundisho katika maandiko.

Chora, tafuta, au piga picha

Someni mistari michache na kisha choreni kitu kinachohusiana na kile mnachokisoma. Au unaweza kutafuta picha katika Kitabu cha Sanaa za Injili au popote katika Maktaba ya Injili. Ungeweza pia kupiga picha ambayo inaonyesha kile mnachojifunza.

Kuigiza hadithi

Baada ya kusoma hadithi, waalike wanafamilia au washiriki wa darasa kuiigiza. Baadaye, zungumzieni kuhusu jinsi gani hadithi hiyo inavyohusiana na mambo mnayopitia.

Kuwa mwenye kubadilika ukiwa nyumbani

Kama una mwanafamilia ambaye hayupo tayari kushiriki katika kujifunza maandiko kifamilia, tafuta njia nyingine ya kuunganika naye. Kwa mfano, je, unaweza kushiriki ukweli wa milele katika njia ya kawaida katika mazungumzo yenu au kushiriki andiko lenye maana katika njia ambayo haionekani kuwa ya kimahubiri au ya kulazimisha? Kujifunza maandiko hakutakiwi kuonekane sawa katika kila familia. Baadhi ya watoto wanaweza kuitikia vizuri zaidi kwenye kujifunza maandiko wakiwa mmoja kwa mmoja. Kuwa mwenye kusali na kufuata misukumo ya Roho.

Mikutano ya baraza la mwalimu kwa ajili ya wazazi. Kama ungetaka msaada ya ziada katika jitihada zako ili kuwafundisha watoto, tafuta kama kata yako inafanya mikutano ya baraza la mwalimu kwa ajili ya wazazi (ona Kitabu cha Maelezo ya Jumla, 17.5). Mikutano hii ni fursa kwa wazazi kushauriana na kujifunza pamoja kuhusu jinsi ya kuboresha ufundishaji wao. Wanaweza kujifunza kanuni katika Kufundisha Katika Njia ya Mwokozi, mawazo katika kurasa hizi za kuboresha kujifunza maandiko kama familia, na mapendekezo ya kujifunza na kufundisha yanayopatikana kote katika Njoo, Unifuate.