Nakala ya muswada halisi wa Kitabu cha Mormoni

Februari 10–16: “Kwamba Uweze Kutoka Mshindi”

Mafundisho na Maagano 10–11

Wakati tafsiri ya Kitabu cha Mormoni ikiendelea, swali liliibuka: Joseph Smith na Oliver Cowdery wanapaswa kufanya nini kuhusu kurasa zile za muswada wa tafsiri ambazo zilikuwa zimepotea? Kitu cha mantiki kinaweza kuwa kurudi nyuma na kutafsiri tena sehemu ile, lakini Bwana aliweza kuona kitu fulani ambacho wao hawakuweza kukiona—maadui zao walikuwa wanakula njama ya kubadilisha maneno kwenye kurasa zile ili kutilia shaka kwenye kazi ya Joseph yenye mwongozo wa kiungu. Mungu alikuwa na mpango wa kuzuia tatizo lile na kufanya kazi ile isonge mbele. Maelfu ya miaka kabla, alimshawishi Nefi kuandika rekodi ya pili ambayo inachukua kipindi cha muda ule ule “kwa kusudi la hekima katika Yeye” (1 Nefi 9:5).

“Hekima Yangu,” Bwana alimwambia Joseph, “ni kuu kuliko hila ya ibilisi” (Mafundisho na Maagano 10–43). Huo ni ujumbe wa hakikisho katika siku kama ya kwetu, wakati adui akiongeza kuimarisha juhudi zake za kudhoofisha imani. Kama Joseph, tunaweza kuwa “waaminifu na kuendelea” katika kazi ambayo Mungu ametuita kufanya (mstari wa 3). Kisha tutakuta kwamba Yeye tayari amekwisha toa njia ili kwamba “milango ya jehanamu haitashinda” dhidi yetu (mstari wa 69).

Ona Saints, 1:51–61.

Mawazo kwa ajili ya Kujifunza Nyumbani na Kanisani

Mafundisho na Maagano 10:1–33

Mungu “hatakubali kwamba Shetani atimize mpango wake mwovu.”

Shetani angependa tusahau kwamba yupo—au kwamba angalau tushindwe kutambua majaribio yake ya kutushawishi (ona 2 Nefi 28:22–23). Lakini maneno ya Bwana katika Mafundisho na Maagano 10 yanathibitisha kwamba Shetani yupo—na kwa dhati hupinga kazi ya Bwana. Katika mstari wa 1–33, tambua kitu gani Mungu alijua kuhusu juhudi za Shetani (ona pia mstari wa 62–63). Ungeweza pia kumwomba Bwana akusaidie kuona jinsi Shetani anavyoweza kuwa anakujaribu. Unaposoma sehemu ya 10, tafakari jinsi Mwokozi anaweza kukusaidia kupinga juhudi za Shetani.

Mafundisho na Maagano 10:34–52

“Hekima ya Bwana ni kuu kuliko hila ya ibilisi.”

Nefi hakujua kwa nini alikuwa anashawishiwa kutengeneza seti mbili za kumbukumbu ya watu wake. Na Mormoni hakujua kwa nini alishawishika kuijumuisha seti ile ya pili takatifu na mabamba ya dhahabu. Lakini manabii wote wawili walitumaini kwamba Mungu analo “dhumuni la busara” (1 Nefi 9:5; Maneno ya Mormoni 1:7). Leo tunajua angalau sehemu ya dhumuni hilo la busara: ili kuchukua nafasi ya zile kurasa 116 zilizopotea za Kitabu cha Mormoni. Unafikira Bwana anakutaka wewe ujifunze nini kutokana na haya yote? Tafakari swali hilo unaposoma Mafundisho na Maagano 10:34–52. Unaweza pia kutengeneza orodha ya kweli unazojifunza kuhusu Bwana kutoka kwenye mistari hii. Ni kwa jinsi gani kweli hizi zinagusa uhusiano wako na Yeye? Nini kinakuvutia kuhusu busara ya Bwana na kuona kwake mbele katika maandalizi ya kupotea kwa zile kurasa 116?

Ungeweza pia kuhisi kushawishika kutafuta ushahidi wa busara Yake na kuona mbele katika maisha yako. Soma simulizi katika ujumbe wa Mzee Ronald A. Rasband “Kwa Usanifu Mtakatifu”—unaweza kuleta mifano akilini mwako (Liahona, Nov. 2017, 55–57). Fikiria kuiandika inapokuja kwako. Ni kwa namna gani Bwana amefanya kazi maishani mwako? Kwa mfano, ni “bahati nasibu” gani ambazo Yeye aliziandaa? Je, ni misingi gani Yeye aliyoiweka kwa ajili ya baraka zako? Je, ni lini Yeye alikuongoza kwenye kumtumikia mtu aliye katika shida.

Ona pia Warumi 8:28; Mafundisho na Maagano 90:24; Mada na Maswali, “Mpango wa Wokovu,” Maktaba ya Injili.

Maelezo kutoka Mormoni Akifupisha Mabamba, na Tom Lovell

Mafundisho na Maagano 11

“Weka tumaini lako katika Roho [wa Bwana].”

Kaka mkubwa wa Joseph, Hyrum alikuwa na hamu ya kujua mapenzi ya Bwana kwake yeye, kwa hiyo akamwomba Joseph kutafuta ufunuo kwa niaba yake. Nabii alifurahi kufanya hivyo, lakini angalau ujumbe mmoja katika ufunuo ule (Mafundisho na Maagano 11) ni kwamba Hyrum pia angeweza kutafuta ufunuo kwa ajili yake mwenyewe. Na ndivyo ilivyo kwa “wale wote walio na matamanio yaliyo mema, na wameingiza mundu zao kuvuna” (mstari wa 27). Unaposoma sehemu ya 11, unahisi Bwana anakufundisha nini kuhusu ufunuo binafsi? Ni kwa namna gani hii inahusiana na kile Yeye alichomfundisha Oliver Cowdery katika sehemu za 6–9? Je, ni jumbe gani zingine Yeye alizonazo kwa ajili yako?

Ona pia “Mwache Roho Alinde,” Nyimbo za Dini, na. 75.

Waalike wanafunzi kuuliza maswali. Maswali mara nyingi yanaongoza kwenye ufunuo? Kama unaifundisha familia yako au darasa Kanisani, wahimize kuuliza maswali, na wasaidie kutafuta majibu katika maandiko. Kwa mfano, kama wanayo maswali kuhusu ufunuo binafsi, tafuteni kwa pamoja majibu katika Mafundisho na Maagano11:12–14.

Mafundisho na Maagano 11:15–26

Ninapotafuta “kupata neno [la Mungu,]” nitapokea Roho Wake na nguvu Yake.

Hata kabla Kitabu cha Mormoni hakijatafsiriwa, Hyrum Smith alikuwa na hamu ya kusaidia katika kazi ya Urejesho. Unaposoma jibu la Bwana kwa matamanio yake, fikiria inamaanisha nini kwako “kupata neno [la Mungu]” (mstari wa 21). Je, ni kwa jinsi gani kupata neno la Mungu kunakusaidia kutumikia Yeye kwa nguvu?

Kwa mawazo zaidi, ona matoleo ya mwezi huu ya majarida ya Liahona na Kwa ajili ya Nguvu kwa Vijana.

Mawazo kwa ajili ya Kuwafundisha Watoto

Mafundisho na Maagano 10:5.

Ninapoomba daima, ninapokea nguvu kutoka kwa Mungu.

• Ili kutambulisha mstari huu kwa watoto wako, ungeweza kuwauliza kuhusu mambo ambayo “daima” wanafanya. Bwana anasema daima tunapaswa kufanya nini katika Mafundisho na Maagano 10:5? Ni kwa nini Yeye anataka sisi tufanye hili?

• Ni kwa jinsi gani unaweza kuwasaidia watoto wako kukumbuka kusali daima? Labda wangekusanya mawe machache madogo madogo, laini na kupaka rangi juu yake “Mafundisho na Maagano 10:5” au “Kusali Daima”. Wangeweza kuweka mawe yao mahali tofauti tofauti ambapo wanataka yawakumbushe kusali, kama vile karibu na kitanda chao, pamoja na vitabu vyao vya shule au mahali wanapokula vyakula vyao. Kulingana na Mafundisho na Maagano 10:5, ni kwa namna gani Mungu anatubariki tunaposali? Watoto wako wangeweza kupata majibu ya ziada katika nyimbo kama vile “I Will Be Valiant” (Kitabu cha Nyimbo za Watoto, 13).

Mafundisho na Maagano 11:12–13

Roho Mtakatifu huniongoza kutenda mema.

• Watoto wanaweza kujifunza kutambua wakati Roho anapozungumza nao. Ili kuwasaidia, ungeweza kuficha balbu ya umeme au tochi na picha ya uso wa furaha mahala fulani katika chumba, kisha waombe watoto wako kutafuta vitu hivyo. Soma Mafundisho na Maagano 11:13, na wasaidie watoto wako kutambua maneno ambayo yanahusiana na vitu walivyopata. Ni nini maneno haya hutufundisha kuhusu jinsi Roho Mtakatifu anavyotusaidia?

• Kushiriki uzoefu wako wewe mwenyewe kunaweza kuwasaidia watoto wako kutambua ushawishi wa Roho Mtakatifu katika maisha yao. Unaposhiriki waombe nao kushiriki uzoefu wao pia. Mngeweza pia kusoma pamoja Mafundisho na Maagano 11:12–13, mkitafuta jinsi gani tunaweza kutambua wakati Roho Mtakatifu anapotuongoza. Shuhudia kwamba Baba wa Mbinguni anataka kutuongoza kupitia Roho Mtakatifu.

Mafundisho na Maagano 11:21, 26

Ninahitaji kujua injili ili niweze kuwasaidia wengine kupata ukweli.

• Kama Hyrum Smith tu, watoto wako pengine watakuwa na fursa nyingi za kushiriki injili pamoja na wengine. Mngeweza kusoma kwa pamoja Mafundisho na Maagano 11:21, 26 na uwaombe watoto kutafuta kile ambacho Bwana alimwambia Hyrum alihitajika kufanya ili kuweza kufundisha injili. Inamaanisha nini “kupata” neno la Bwana? Je, tunawezaje kufanya hili? Ni kwa jinsi gani “tunatunza hazina” neno la Mungu katika mioyo yetu? Labda watoto wako wangeweza kuigiza kushiriki kitu fulani kuhusu Yesu Kristo au Kitabu cha Mormoni na watu wengine.

Kwa ajili ya mawazo zaidi, ona toleo la mwezi huu la jarida la Rafiki.

Joseph na Hyrum Smith, na Ken Corbett