Auiliiliga mai le Afi o le Tolauapiga i le Misuri, saunia e Bryan Mark Taylor

9–15 Iuni: ‟Ua Ou Faatasi Ma e Faamaoni i Taimi Uma”

Mataupu Faavae ma Feagaiga 60–63

I le amataga o Aokuso 1831, sa sauniuni ai Iosefa Samita ma isi toeaina o le Ekalesia e toe foi atu i Katelani ina ua mavae se asiasiga puupuu i le “laueleele o Siona” (Mataupu Faavae ma Feagaiga 59:3). Sa finagalo le Alii ia i latou e talai atu le talalelei i le taimi o la latou malaga (tagai i le Mataupu Faavae ma Feagaiga 52:10), ma o nisi o i latou sa faia ma le filiga tele. Ae o isi sa mumusu. ‟Ua latou natiaina taleni ua Ou tuu atu ia te i latou,” na fetalai mai ai le Alii, ‟ona o le fefefe i tagata” (Mataupu Faavae ma Feagaiga 60:2). E toatele i tatou e iloa lagona o nei toeaina. E ui lava tatou te alolofa i le talalelei, o le fefe ma le masalosalo e ono taofia ai i tatou mai le faasoa atu. Ae e alofa mutimutivale le Alii. Ua Ia “silafia vaivaiga o le tagata ma le ala e fesoasoani ai ia i [tatou]” (Mataupu Faavae ma Feagaiga 62:1). O loo salalau solo i nei faaaliga i uluai faifeautalai ia faamautinoaga ia e mafai ona fesoasoani ia i tatou e faatoilalo ai o tatou popolega ma vaivaiga: ‟Ua mafai ona ou faia outou ia paia.” “Ua i ai tagata uma i loʼu lima.” ‟Ua Ou faatasi pea ma ē faamaoni.” Ma “O ia o lē e faamaoni ma tumau o le a manumalo i le lalolagi.” (Mataupu Faavae ma Feagaiga 60:7; 61:6; 62:9; 63:47.)

Manatu mo le Aoaoina i le Aiga ma i le Lotu

Mataupu Faavae ma Feagaiga 60; 62

E mafai ona ou faasoa atu lo’u alofa ma le molimau ia Iesu Keriso.

E faapefea ona pei lau molimau o le talalelei o se “taleni,” po o se oa taua mai le Atua? O a ni auala tatou te “natia [ai a tatou] taleni” i nisi taimi? (Mataupu Faavae ma Feagaiga 60:2; tagai fo’i i le Mataio 25:14–30).

O a ni sāvali faamalosiau mai le Alii e te maua i le vaega e 60 ma le 62? E faapefea ona atina’e e nei sāvali lou talitonu ia te oe lava ia i le faasoaina atu o le talalelei? A o e mafaufau loloto i nei fesili, mafaufau e usu pe faitau upu o le “Ou Te Fia Avea Nei ma Faifeautalai” (Tusipese a Tamaiti, 90). O le a se mea ua e aoaoina mai le pese lenei a tamaiti e uiga i le faasoaina atu o le talalelei?

Tagai foi i le tuufaatasiga o le “Faasoaina Atu o le Talalelei” i le Gospel Library.

E mafai ona ou talanoa e uiga i le faasoa atu o lo’u faatuatua ia Keriso.

Mataupu Faavae ma Feagaiga 60:2–4; 61:1–2, 20, 36–38; 62:1, 6

Ua aoao mai tusitusiga paia e uiga ia Iesu Keriso.

A o Ia aoaoina Ana faifeautalai, sa faaali mai e le Alii upumoni taua e uiga ia te Ia lava. Vaavaai mo nei upumoni i le Mataupu Faavae ma Feagaiga 60:2–4; 61:1–2, 20, 36–38; 62:1, 6. O a tala mai tusitusiga paia e faaalia ai matafaioi ma uiga mama o le Faaola ua e maua? (mo se faataitaiga, Ioane 8:1–11; Eteru 2:14–15).

Mataupu Faavae ma Feagaiga 62

O a’u faaiuga e tatau ona faapaleni ai le ”faamasinoga ma le taitaiga a le Agaga.”

Ua tuuina mai e le Alii le taitaiga e uiga i upumoni ma mataupu faavae e faavavau, ae e masani ona Ia tuuina mai ia i tatou e fuafua ai faamatalaga patino e uiga i le ala e faatino ai nei mataupu faavae. E faapefea ona e vaai i lenei mataupu faavae o loo faaalia i le Mataupu Faavae ma Feagaiga 62? (tagai foi i le Mataupu Faavae ma Feagaiga 60:5; 61:22). O faapefea ona e vaaia lenei mataupu faavae i lou olaga? Aisea e lelei ai mo i tatou le faia o ni faaiuga e aunoa ma le faamoemoe e ta’u mai e le Atua ia i tatou le mea tonu e fai?

Tagai foi i le Eteru 2:18–25; Mataupu Faavae ma Feagaiga 58:27–28.

Mataupu Faavae ma Feagaiga 63:7–12

E oo mai faailoga e ala i le faatuatua ma le finagalo o le Atua.

I le faaiuga o lenei otootoga, o loo i ai se faataitaiga o se vavega na matuā faagaeetia ai Ezra Booth: Sa faamaloloina faavavega le lima o Elsa Johnson. Ina ua uma ona vaai i lena mea, sa papatisoina ai loa ma le naunautai Ezra. Ae peitai, i totonu lava o ni nai masina, na aluese le faatuatua o Booth ma faapea ona faitio ai lava i le Perofeta. E faapefea ona tupu lenei mea, pe a mafaufau atu i le vavega sa ia molimauina?

Mafaufau loloto i le mea lenei a o e faitau i le Mataupu Faavae ma Feagaiga 63:7–12. O a upumoni ua e aoaoina e uiga i faailoga ma le faatuatua?

Tagai foi i le Mataio 16:1–4; Ioane 12:37; Mamona 9:10–21; Eteru 12:12, 18.

Mataupu Faavae ma Feagaiga 63:16

E mafai ona ou mamā i o’u mafaufauga ma amioga.

I le Mataupu Faavae ma Feagaiga 63:16, sa toe faamautu mai ai e le Faaola mea sa Ia aoao mai i le Feagaiga Fou—e faapea o le tulafono o le ola mamā e tatau ona pulea e lē na o a tatou amioga ae faapea foi o tatou mafaufauga (tagai i le Mataio 5:27–28). A o e faitauina le Mataupu Faavae ma Feagaiga 63:16, tusi i lalo lapataiga na tuuina mai e le Faaola e uiga i mafaufauga tuinanau. E mafai foi ona e mafaufau loloto i le faafeagai o lapataiga taitasi. Mo se faataitaiga, o a nisi o upu po o fasifuaitau e faafeagai ma le fefe? O a isi faamanuiaga e maua mai le i ai o mafaufauga ma amioga mamā?

E toatele tagata e manatu o tulaga faatonuina a le Alii o le ola mamā i mafaufauga ma faatinoga o ni faiga ua tuai pe faatiga foi. O le a le eseesega o le a i ai pe afai o loo taumafai fanau uma a le Atua e ola i lenei tulafono? E mafai ona e vaavaai mo tali i lenei fesili i le sāvali a Elder David A. Bednar “Matou Te Talitonu i le Nofomama” (Liahona, Me 2013, 41–44) po o le “E paia lou tino” (Mo le Malosi o le Autalavou: O Se Taiala mo le Faia o Filifiliga, 23–26). O a sāvali o le faamoemoe ua e mauaina?

E tusa lava pe tatou te iloa faamanuiaga o le nofomama i o tatou mafaufauga ma amioga, e le faapea ai e faigofie. Atonu e te faaaluina sina taimi e mafaufau loloto ai po o le a le mea e faigata ai ia te oe ona tausia le tulaga faatonuina a le Faaola o le ola mamā—ma pe o le a le mea e faafaigofie ai. O a ni fautuaga e mafai ona e faasoa atu i isi e uiga i le mea e fai pe a faaosoosoina oe i mafaufauga lē mamā?

Lagolago le tasi ma le isi. O se tasi o faamanuiaga sili o le potopoto faatasi i sauniga a le Ekalesia ma vasega o le avanoa lea e maua ai le lagolago mai uso a Au Paia i a tatou taumafaiga e mulimuli i le Faaola. O le toatele o i tatou e feagai ma luitau faapena, ma o o tatou aafiaga masani e mafai ona avea ma se malosiaga sili. Aua e te fefe e tautino atu o loo i ai ni ou luitau. Faasoa atu i le tasi ma le isi mea e fesoasoani ia te oe e ola ai i tulafono a le Atua ma faatoilalo ai faaosoosoga.

Tagai foi i le Mataupu Faavae ma Feagaiga 121:45; Autu ma Fesili, ‟Mamā,” Gospel Library; ‟Standards: Sexual Purity and Modesty—True Confidence” (vitiō), Gospel Library; AddressingPornography.ChurchofJesusChrist.org.

Tulaga Faatonuina: Mama i Feusuaiga ma le Tauagafau - Talitonuga Moni

Ua faasoa mai e ni tamaitai talavou se toalua la laua mealilo mo le talitonu ia te oe lava ma le taua o le tagata lava ia: o le mafutaga a le Agaga Paia.

Mataupu Faavae ma Feagaiga 63:58–64

E tatau ona tatou taulimaina mea paia ma le faaaloalo.

O mataupu faavae o loo i le Mataupu Faavae ma Feagaiga 63:58–64 e sili atu nai lo o le ta’u fua o le suafa o le Alii. O a isi mea paia e oo mai ‟mai lugā,” pe mai le Atua? O le a le uiga mo oe o le tautala i nei mea “ma le faaeteete”?

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Tagata, Nofoaga, Mea e Tutupu

• Mataupu Faavae ma Feagaiga Punaoa o Talafaasolopito: Ezra Booth

Kiliki e vaai i isi mea

Manatu mo le Aoaoina o Tamaiti

Mataupu Faavae ma Feagaiga 60:4; 61:1–2, 36; 62:1

Ua aoao mai tusitusiga paia e uiga ia Iesu Keriso.

• Atonu e mafai ona e tusia nisi o faamatalaga e uiga i le Faaola o loo maua i le Mataupu Faavae ma Feagaiga 60–62 i ni fasipepa laiti. Ona mafai lea e lau fanau ona faafetaui nei faamatalaga i ata o Iesu mai Lana galuega i le lalolagi (tagai Tusi Ata o le Talalelei, nu. 34–61) lea e faaalia mai ai nei uiga. E faapefea ona Ia faailoa mai o Ia lava ia i tatou i aso nei?

  

Auiliiliga mai le For This Purpose, saunia e Yongsung Kim

Mataupu Faavae ma Feagaiga 60:7; 61:1–2; 62:1

O le a faamagalo e le Alii a’u pe a ou salamo.

• A o e faitauina le Mataupu Faavae ma Feagaiga 60:7; 61:2 faatasi ma lau fanau, fesoasoani ia i latou e su’e upu e tutusa ai nei fuaiupu. Faamanatu atu i a i latou o nei faaaliga na tuuina atu ia Iosefa Samita ma isi taitai o le Ekalesia. O le a le mea na finagalo le Alii latou te iloa? E mafai foi ona e talanoa e uiga i lagona o le Faaola e uiga ia i tatou pe a tatou faia ni mea sese ma le uiga o le salamo. E tusa ai ma le Mataupu Faavae ma Feagaiga 62:1, e mafai faapefea ona fesoasoani Iesu pe a faaosoosoina i tatou?

Mataupu Favae ma Feagaiga 62:3, 9

E finagalo Iesu Keriso ou te faasoa atu Lana talalelei.

• E mafai ona e fesili atu i lau fanau po o le a se latou tala e fai atu pe a fesili mai se tasi po o le a le mea latou te fiafia ai e uiga ia Iesu Keriso ma Lana Ekalesia. O le usuina faatasi o se pese e faatatau i le faasoaina atu o le talalelei, e pei o le “Ou Te Fia Avea Nei Ma Faifeautalai” (Tusipese a Tamaiti, 90), e mafai ona avatu ai ia i latou ni manatu. Ona mafai lea ona e faitauina le Mataupu Faavae ma Feagaiga 62:3 ma fai atu i lau fanau e faalogo mo le mea e tupu pe a faasoa atu a tatou molimau. E mafai faapefea e le folafolaga i le fuaiupu 9 ona fesoasoani pe a tatou lagona le popole?

Mataupu Faavae ma Feagaiga 63:64

E mafai ona ou faaaloalo.

• Ina ia folasia atu le Mataupu Faavae ma Feagaiga 63:64, e mafai ona e usuina se pese e uiga i le migao ma lau fanau, e pei o le “Faaaloalo o le Alofa Lea” (Tusipese a Tamaiti, nu. 12). Ona mafai lea ona outou talanoa e uiga i auala eseese e faaalia ai le migao mo le Tama Faalelagi ma Iesu Keriso.

• E mafai ona e fesoasoani i lau fanau ia malamalama po o le a le migao e ala i le talanoa ma i latou e uiga i se mea e faapitoa ia i latou, e pei o se meataalo, tusi, po o se palanikeke e sili ona fiafia i ai. Fesili atu ia i latou pe faapefea ona latou tausia ma puipuia mea e faapitoa ia i latou. Ona tou faitau faatasi lea o le Mataupu Faavae ma Feagaiga 63:64. O a mea e faapitoa—pe paia—i le Tama Faalelagi? (tagai, mo se faataitaiga, fuaiupu 61 ma le itulau o gaoioigao lenei vaiaso). E faapefea ona tatou taulimaina nei mea—ia tatou upu ma a tatou faatinoga?

Mo nisi manatu, tagai i le lomiga o lenei masina o le mekasini o le Uo .

Faamalologa o le Tauau o Elsa Johnson, saunia e Sam Lawlor