22–28 Setema: “O le Faatulagaga a le Alo o le Atua”

Mataupu Faavae ma Feagaiga 106–108

I se uluai vaaiga, o le Mataupu Faavae ma Feagaiga 107 e foliga mai e na ona faatatau i le faatulagaga o tofi o le perisitua i se faatulagaga faaleautaitai mo le Ekalesia a le Alii. E oo mai i le taimi na lomiaina ai lenei faaaliga, ua sili atu le toatele o tagata auai o le Ekalesia nai lo o le toatele o nai taitai sa faatulagaina. O le faataatitiaina o matafaioi ma tiutetauave o le Au Peresitene Sili, le Korama a Aposetolo e Toasefululua, le Au Fitugafulu, epikopo ma au peresitene o korama, sa mautinoa lava le manaomia ma le aogā. Ae e matuai tele lava mea o loo i faatonuga faalelagi i le vaega 107 nai lo na’o le ala e faatulaga ai tofi ma korama o le perisitua. O iinei, ua aoao mai ai i tatou e le Alii e uiga i Lona mana ma le pule, ‟o le Perisitua Paia, e tusa ma le Faatulagaga a le Alo o le Atua” (fuaiupu 3). O le faamoemoega o le perisitua o le tatalaina lea o ‟faamanuiaga faaleagaga uma o le ekalesia” ina ia mafai e fanau uma a le Atua ona ‟tatala mai le lagi ia te i latou” ma ‟olioli i le mafutaga ma le afio ai o le Atua le Tamā, ma Iesu le puluvaga o le feagaiga fou” (fuaiupu 18–19). I le aoaoina o i tatou e uiga i Lana perisitua, o loo aoao ai i tatou e le Faaola e uiga ia te Ia lava ma le ala e mafai ai ona tatou o atu ia te Ia.

Tagai i le “Restoring the Ancient Order,” Revelations in Context, 208–12.

Manatu mo le Aoaoina i le Aiga ma i le Lotu

Mataupu Faavae ma Feagaiga 106; 108

E lagolagoina a’u e le Alii pe a Ia valaauina a’u e auauna atu.

I le Mataupu Faavae ma Feagaiga 106 ma le 108, na tuuina mai ai e le Alii le fautuaga ma folafolaga i ni tagata se toalua o le ekalesia o e na valaauina e auauna i Lana Ekalesia. A o e suesue i Lana fautuaga, atonu e te mafaufau e uiga i ou lava avanoa e auauna atu ai i le Alii—atonu o se tofiga faaleauaunaga, se valaauga i le Ekalesia, tiutetauave i lou aiga, po o uunaiga faaleagaga e fai ai mea lelei.

O le a sou lagona i le sāvali a le Alii ia te oe atonu o loo i ai i nei faaaliga? O a ni fasifuaitau e faapitoa le taua ia te oe? O ni nai faitauga nei e mafaufau i ai:

• O anafea na tuuina atu ai e le Alii ia te oe le ‟alofa tunoa [po o le fesoasoani faalelagi] ma le faamautinoaga” ina ia mafai ona auauna atu ia te Ia? (Mataupu Faavae ma Feagaiga 106:8).

• O le a sou manatu i le uiga o le faamalosia o isi ‟i au mea uma e fai”? (Mataupu Faavae ma Feagaiga 108:7).

Ina ua maua e Elder Carl B. Cook se tofiga faigata o le Ekalesia, sa ia maua le malosi mai le aafiaga o se tuaa. Faitau i ai i lana sāvali ‟Auauna Atu” (Liahona, Nov. 2016, 110–12). Mafaufau e tusi se tusi e faamalosiau ai i e tupuaga mai ia te oe—po o lou tagata i le lumanai—e talia ai avanoa e auauna atu ai i le Alii. Ia aofia i lau tusi ia upumoni ua e aoaoina mai le sāvali a Elder Cook, Mataupu Faavae ma Feagaiga 106 ma le 108, ma ou lava aafiaga.

Tagai foi i le Henry B. Eyring, ‟Savali Faatasi ma A’u,” Liahona, Me 2017, 82–85; Autu ma Fesili, ‟Auauna Atu i Valaauga o le Ekalesia,” Gospel Library; ‟Warren Cowdery” ma le ‟‘Wrought Upon’ to Seek a Revelation,” i le Revelations in Context, 219–23, 224–28.

Mataupu Faavae ma Feagaiga 107:1–4, 18–20

O le perisitua “e tusa ma le Faatulagaga o le Alo o le Atua.”

Ua amata e le Alii Lana “faaaliga e uiga i le perisitua” (Mataupu Faavae ma Feagaiga 107, faaulutala o le vaega) e ala i le aoaoina o i tatou i le uluai igoa o le Perisitua Mekisateko (tagai i fuaiupu 1–4). Aisea e te manatu ai e taua le iloa o lena mea? E faapefea e lenei igoa ona aafia ai le ala e te mafaufau ai e uiga i le perisitua?

Ia manatua nei manatu a o e faitau e uiga i le perisitua, aemaise lava i fuaiupu 18–20. O le a le uiga o le “tatala mai ai le lagi”? E faapefea ona fesoasoani ia i tatou ia “olioli i le mafutaga ma le afio ai o le Atua le Tama ma Iesu”? E faapefea e le mana ma le pule o le perisitua a le Faaola ona faaavanoa atu nei mea uma ia te oe?

Tagai foi i le Alema 13:2, 16; Mataupu Faavae ma Feagaiga 84:19–27.

Taulai ia Iesu Keriso. “E tele mea e aoao atu e uiga i le talalelei toefuataiina a Iesu Keriso—mataupu faavae, poloaiga, valoaga, ma tala o tusitusiga paia. Ae o lālā uma nei o le laau lava e tasi, aua e tasi lo latou faamoemoega: ia fesoasoani i tagata uma ia o mai ia Keriso ma ia faaatoatoaina ia te Ia (tagai i le Iaroma 1:11; Moronae 10:32). E tusa lava po o a mea o loo e aoaoina atu, ia manatua o loo e aoao moni atu e uiga ia Iesu Keriso ma le ala e avea ai e faapei o Ia” (Aoao Atu i le Ala a le Faaola, 6). Mo se faataitaiga, a o e aoao atu—ma aoao—e uiga i le perisitua i le Mataupu Faavae ma Feagaiga 107, ia fesili soo, “O le a se mea ua tatou aoaoina e uiga i le Faaola?”

Mataupu Faavae ma Feagaiga 107:22

O auauna a le Alii e “lagolagoina i le talitonuga, faatuatua, ma le tatalo a le Ekalesia.”

O le a sou manatu i le uiga o le lagolagoina o auauna a le Alii e ala i lou talitonuga? e ala i lou faatuatua? e ala i lau tatalo?

Tagai foi i le “Fa’amanuia le Atua i le Perofeta Soifua,” Viiga, nu. 9.

Mataupu Faavae ma Feagaiga 107:23–24, 33–35, 38, 91–92

O Perofeta ma Aposetolo e molimau ia Iesu Keriso.

Na faasoa atu e Iosefa Samita le vaega 107 i le 1835 ma le Korama a Aposetolo e Toasefululua faatoa valaauina (tagai i le faaulutala o le vaega). O le a le mea na aoao atu e le Alii ia i latou e uiga i lo latou valaauga i fuaiupu 23–24, 33–35, 38? Na faapefea ona faamalosia lau molimau ia Iesu Keriso e ala i aoaoga ma le auaunga a Ana Aposetolo soifua?

I fuaiupu 91–92, o loo aoao mai ai le Alii e uiga i Lana Aposetolo sinia, le Peresitene o le Ekalesia. E faapefea ona ‟pei o Ia o Mose”? (tagai i le Taiala i Tusitusiga Paia, ‟Mose,” Gospel Library).

Tagai foi David A. Bednar, “Ua Filifilia e Molimau Atu i Lo’u Igoa,” Liahona, Nov. 2015, 128–31.

Mataupu Faavae ma Feagaiga 107:27–31, 85–89

E faataunuuina e le Alii Lana galuega e ala i aufono.

Maitau mea na aoao mai e le Alii e uiga i aufono i le Mataupu Faavae ma Feagaiga 107:27–31, 85–89. O le a le mea e aoga lelei ai se aufono? E mafai faapefea ona e faaaogaina nei mataupu faavae i lou valaauga i le Ekalesia, lou aiga, po o isi ou tiutetauave?

Tagai foi i le sāvali a M. Russell Ballard, ‟Aufono Faaleaiga,” Liahona, Me 2016, 63–65; Tusitaulima Aoao, 4.3–4.4, Gospel Library.

Ua valaaulia e le Alii aiga e fefautuaai faatasi.

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Tagata, Nofoaga, Mea e Tutupu

• Mataupu Faavae ma Feagaiga Punaoa o Talafaasolopito: Lyman Sherman

• Korama a Fitugafulu

• Korama a le Toasefululua

Kiliki e vaai i isi mea

Manatu mo le Aoaoina o Tamaiti

Mataupu Faavae ma Feagaiga 107:18–20

Ua faamanuia a’u e Iesu Keriso e ala i Lona mana o le perisitua.

• A o outou faitauina faatasi ma lau fanau le Mataupu Faavae ma Feagaiga 107:18–19, faamamafa atu le fasifuaitau ‟faamanuiaga uma faaleagaga.” Atonu e mafai e oe ma lau fanau ona lisiina faamanuiaga e maua mai le perisitua. Atonu e te faia se taaloga—vaai po o ai e mafai ona faia se lisi e sili ona umi. E mafai foi e lau fanau ona tusi ni ata pe sue ni ata e suitulaga i nei faamanuiaga (tagai i le itulau o gaoioigao lenei vaiaso). Ona mafai lea ona e talanoa e uiga i le auala e fesoasoani ai sauniga o le perisitua (e pei o le papatisoga po o le faamanatuga) ia i tatou ia maua faamanuiaga a le Atua.

Mataupu Faavae ma Feagaiga 107:21–26, 33–35, 91–92

O auauna filifilia a le Alii e taitaia Lana Ekalesia.

• O lomiga uma o konafesi o le Liahona e aofia ai se itulau o ata o le Au Pulega Aoao. Mafaufau e vaavaai i nei ata ma lau fanau a o e faitau e uiga i o latou tiutetauave i le Mataupu Faavae ma Feagaiga 107:21–26, 33–35, 91–92. E mafai e oe ma lau fanau ona talanoa e uiga i le mafuaaga ua e faafetai ai ua tuuina atu e le Alii ia i latou nei tiutetauave.

• E mafai e lau fanau ona aoao atili e uiga i auauna a le Alii i le ‟Taitaiga Aoao o le Ekalesia” i le ChurchofJesusChrist.org. Atonu e mafai e lau fanau taitoatasi ona aoao e uiga i se tasi o nei taitai ma aoao e le tasi le isi e uiga ia te ia. Faasoa atu i le tasi ma le isi le auala e te iloa ai o nei taitai o ni auauna moni a Iesu Keriso.

• A uma ona faitau faatasi le Mataupu Faavae ma Feagaiga 107:22 , e mafai e oe ma lau fanau ona feauauai i le uuina i luga o se ata o le Au Peresitene Sili ma faasoa atu auala e mafai ona e lagolagoina ai i latou o ni auauna a le Alii.

O Le Au Peresitene Sili

Mataupu Faavae ma Feagaiga 108:3

E mafai ona ou faaeteete i le ola ai i a’u feagaiga.

• Ina ia amata se talanoaga e uiga i lenei fuaiupu, e mafai ona e valaaulia lau fanau e fai se mea e manaomia ai le gauai atu ma le faaeteete, e pei o le faatumuina o se ipu e aunoa ma le masaa. O le a le mea e tupu pe a tatou lē faaeteete? Ona mafai lea ona tou faitauina le Mataupu Faavae ma Feagaiga 108:3 e saili ai po o le a le mea e finagalo le Alii tatou te faia ma le faaeteete. O a ‟tautoga” (folafolaga po o feagaiga) tatou te osia ma le Atua? E mafai faapefea ona tatou faaeteete atili i le tausiga o i latou? E mafai ona e faasoa atu ni vaega o le sāvali a Sister Becky Craven “Faaeteete ma le Faasamasamanoa” (Liahona, Me 2019, 9–11) e te lagona e mafai ona musuia ai lau fanau e tausia a latou feagaiga. E mafai foi ona outou usuina se pese e uiga i le lototele, e pei o le “O Le a Ou Lototoa” (Tusipese a Tamaiti, 85).

O le sasaa atu ma le faaeteete o le vai e mafai ona faatusatusa i le tausia ma le faaeteete o a tatou feagaiga.

Mo nisi manatu, tagai i le lomiga o lenei masina o le mekasini o le Uo .

Ua Faamanuia e Mekisateko ia Aperamo, saunia e Walter Rane.