Navu le Lalelei, saunia e Larry C. Winborg. Puletaofia 2023

27 Oketopa–2 Novema: “Se Fale i Lo’u Igoa”

Mataupu Faavae ma Feagaiga 124

E ui i le faigata sa i ai tausaga mulimuli e ono mo le Au Paia, ae sa amata ona foliga lelei mea i le tautotogo o le 1839: Sa maua e le Au Paia sulufai le agaalofa o tagatanuu o Quincy, Ilinoi. Na faataga e leoleo falepuipui le Perofeta o Iosefa Samita ma isi taitai o le Ekalesia e sosola ese mai le faafalepuipuiina i Misuri. Ma na faatoā faatauina mai foi e le Ekalesia se fanua i Ilinoi ia mafai ona toe faapotopoto i ai le Au Paia. Ioe, sa o se fanua faataufusi, ma sa tumu i namu, ae a faatusatusa atu i luitau ua leva ona feagai ma le Au Paia, o lenei mea sa foliga mai na mafai lava ona taulimaina. O lea na latou faamamaina ai le faataufusi ma tusia se lisi mo se aai fou, lea sa latou faaigoaina o Navu. O lona uiga i le faa-Eperu o le “lalelei” lea sa sili atu ona avea o se faailoaga o le faatuatua nai lo o se faamatalaga sa’o, i le taimi muamua lea. O le taimi lea, sa tuuina mai ai e le Alii i Lana Perofeta se agaga o le faanatinati. Sa tele atu ana upumoni ma sauniga e toefuatai mai, ma sa Ia manaomia se malumalu paia lea e mafai ai ona Ia “faapaleina [Lana Au Paia] i le mamalu, ola pea, ma le ola e faavavau” (Mataupu Faavae ma Feagaiga 124:55). I le tele o itu, o nei lava foi lagona o le faatuatua ma le faanatinati, ua vaaia foi i le galuega a le Alii i aso nei.

Tagai i le Au Paia, 1:399–427; “Faatulagaina o le Ekalesia i Navu,” i le Revelations in Context, 264–71.

Aoao atili e uiga i nofoaga faasolopito o le Ekalesia i Ilinoi.

Manatu mo le Aoaoina i le Aiga ma i le Ekalesia

Mataupu Faavae ma Feagaiga 124:2–11

E mafai ona ou valaaulia isi tagata e o mai ia Keriso.

Na ta’u atu e le Alii i le Perofeta o Iosefa Samita e “tuuina atu se folafolaga aloaia o [Lana] talalelei” i “tupu uma o le lalolagi” (tagai i le Mataupu Faavae ma Feagaiga 124:2–11). Afai e te mauaina lenei tofiga, o le a se faaupuga o lau folafolaga e uiga ia Iesu Keriso ma Lana talalelei toefuataiina? Ia mafaufau loloto foi pe mafai faapefea ona e faasoa atu lau molimau masani e pei ona e masani ai lava i tagata tou te fegalegaleai faatasi i aso taitasi.

Tagai foi i le “O le Toefuataiga o le Atoatoaga o le Talalelei a Iesu Keriso: O le Folafolaga i le Lalolagi mo le Lua Selau Tausaga,” Gospel Library.

Mataupu Faavae ma Feagaiga 124:12–21

E mafai ona avea a’u ma se soo e faatuatuaina e le Alii.

Mafaufau e faasoa atu i isi, e pei ona sa faia e le Faaola i le Mataupu Faavae ma Feagaiga 124:12–21, ia uiga faa-Keriso e te vaaia ia i latou. Na faapefea ona Ia faailoa atu ia te oe Lona alofa ma le faatuatuaina?

Tagai foi i le Richard J. Maynes, “Mauaina o le Faatuatuaga o le Alii ma Lou Aiga,” Liahona, Nov. 2017, 75–77.

Mataupu Faavae ma Feagaiga 124:22–24, 60–61

E finagalo le Alii ina ia ou faafeiloaia ma talia isi.

A o e mafaufau loloto i faatonuga a le Alii i le Mataupu Faavae ma Feagaiga 124:22–24, 60–61, mafaufau pe mafai faapefea ona e faia lou aiga ma lau uarota o se nofoaga e pei o le mea na muai silafia e le Alii mo Navu.

Tagai foi i le “A Friend to All” (vitiō), ChurchofJesusChrist.org.

A Friend to All

Elder Ulisses Soares talks of the need for kindness and acceptance.

Faamatalaga mai le Iosefa Samita i le Malumalu o Navu, saunia e Gary E. Smith

Mataupu Faavae ma Feagaiga 124:25–45, 55

Tatou te fausia malumalu i le Alii ina ia maua ai sauniga paia.

Aisea e te lagona ai ua “poloaiina” e le Alii Lona nuu “e fausia [malumalu] i [Lona] suafa paia”? Mafaufau e fai se lisi o mafuaaga e te maua i le Mataupu Faavae ma Feagaiga 124:25–45, 55. Atonu e te mauaina isi i se viiga e pei o le “We Love Thy House, O God” (Hymns, nu. 247) po o le vitio “What Is a Temple?” (Potutusi o le Talalelei). E faapefea ona avea le galuega o le fausiaina o malumalu o se faailoga o le alofa o le Alii mo oe?

O le a le Malumalu?

O le eseesega o falesa, lea e feiloai ai le Au Paia o Aso e Gata Ai mo tapuaiga i Aso Sa, ma malumalu o loo faamatalaina foi.

Talu mai ona fausia le Malumalu o Navu i le vaitausaga 1840, ua silia ma le 300 malumalu ua fausia pe faasilasilaina. Na aoao mai Peresitene Russell M. Nelson: “Ua tatou iloa o o tatou taimi i totonu o malumalu e tāua tele i lo tatou faaolataga ma le faaeaga faapea ai ma o tatou aiga. … O sauaga a le fili ua matuā faateteleina le saoasaoa, i le malolosi ma le eseese na’uā. O le manaomia ona tatou i ai soo i le malumalu e le aunoa ua matuā sili ona manaomia i le taimi nei” (“Avea ma Faataitaiga Lelei o le Au Paia o Aso e Gata Ai,” Liahona, Nov. 2018, 114). Ua faapefea ona fesoasoani le malumalu e te tetee atu ai i “sauaga a le fili”? O le a se mea ua musuia oe e fai e mulimuli ai i le fautuaga a Peresitene Nelson?

Tagai foi i le “Why Latter-day Saints Build Temples,” temples.ChurchofJesusChrist.org.

Mataupu Faavae ma Feagaiga 124:45–55

E faamanuiaina e le Alii i latou o e tauivi e usitaia Ana poloaiga.

Na poloaiina le Au Paia e fausia se malumalu i le Itumalo o Siakisone, Misuri, ae na “taofia e o latou fili” (Mataupu Faavae ma Feagaiga 124:51.). Ofuaiupu 49–55 o loo i ai se sāvali faamautinoa mo tagata o loo mananao e usitai i poloaiga a le Atua ae o loo taofia mai le faia ona o aiga po o nisi tulaga. O le a se fautuaga e te maua i nei fuaiupu e mafai ai ona fesoasoani i se tasi o loo i ai i se tulaga faapea?

Mataupu Faavae ma Feagaiga 124:91–92

E mafai ona taialaina a’u e le Alii e ala mai i lo’u faamanuiaga faapeteriaka.

E lei leva ona maliu le tamā o le Perofeta, Iosefa Samita le Matua, ae valaauina e le Alii ia Ailama Samita i le valaauga sa umia e lona tamā—o le Peteriaka i le Ekalesia. E mafai ona e faitau e uiga i lenei mea i le Mataupu Faavae ma Feagaiga 124:91–92.

Ina ia aoao atili e uiga i le talafaasolopito o peteriaka ma faamanuiaga faapeteriaka, kiliki iinei.

E faapefea ona e faamatalaina se faamanuiaga faapeteriaka i se tasi e lei faalogo lava i ai? O le a sau tala e fai atu e uunaia ai se tasi ina ia maua sona faamanuiaga? Vaavaai mo tali i nei fesili i le sāvali a Elder Randall K. Bennett’s “O Lou Faamanuiaga Faapeteriaka—Taitaiga Musuia mai le Tama Faalelagi” (Liahona, Me 2023, 42–43) po o Autu o le Talalelei, “Faamanuiaga Faapeteriaka” (Gospel Library).

E faavae i mea sa e suesueina ma oo i ai, mafaufau pe faapefea ona e faaumaina lenei fuaiupu: “O se faamanuiaga faapeteriaka e faapei o se .” Aisea e finagalo ai le Tama Faalelagi i Ana fanau ia maua se faamanuiaga faapeteriaka?

Afai e te lei mauaina se faamanuiaga faapeteriaka, o le a se mea e mafai ona e faia e saunia ai ia maua? Afai ua e mauaina se faamanuiaga faapeteriaka, e mafai faapefea ona e faaali atu i le Atua e te faatāuaina lenei meaalofa?

Tagai foi Kazuhiko Yamashita, “O Afea e Tatau Ona Maua Ai Lou Faamanuiaga Faapeteriaka,” Liahona, Me 2023, 88–90; Tusitaulima Aoao, 18.17, Gospel Library.

Aoao atu mai le loto. O le aoao atu e sili ona anoa pe a aofia ai aafiaga patino ma molimau. Mo se faataitaiga, afai ua e mauaina se faamanuiaga faapeteriaka, toe iloilo a o e sauni e aoao atu e uiga i nei faamanuiaga faapitoa. Aisea e te faafetai ai mo lou faamanuiaga? O le a faapefea ona e musuia isi e saunia e maua o latou faamanuiaga faapeteriaka pe suesue soo i ai?

Tagata, Nofoaga, Mea e Tutupu

• Mataupu Faavae ma Feagaiga Punaoa o Talafaasolopito: Lilburn W. Boggs

• Poloaiga ia Faaumatia

• Navu (Komese), Ilinoi

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 124:15, 20

E fiafia Iesu Keriso i le loto faamaoni.

• Ina ia fesoasoani i lau fanau ia manatua mea na latou aoaoina mai le Mataupu Faavae ma Feagaiga 124:15, 20, e mafai ona e fesoasoani ia i latou e tusi ma ’oti’oti ni fatu pepa. I luga o fatu, e mafai ona e fesoasoani ia i latou e tusi fuaitau autu mai nei fuaiupu. O se pese e pei o le “Tu mo le Mea Tonu” (Tusipese a Tamaiti, 81) e mafai ona fesoasoani e faamalosia afioga a le Alii.

• A uma ona faitau faatasi le Mataupu Faavae ma Feagaiga 124:15, 20, atonu e mafai ona e fesoasoani i lau fanau ia iloa le uiga o le ola faamaoni i le itulau 31 o le Mo le Malosi o le Autalavou: O Se Taiala i le Faia o Filifiliga. O le a le fetalaiga patino a le Alii e uiga ia George Miller i le fuaiupu 20 “ona o le faamaoni o le loto [o George]’? E mafai foi ona e faasoa ni faataitaiga o se tamaitiiti o loo faatinoina le faamaoni mai lou oe lava aafiaga pe mai mekasini o le Uo . Valaaulia lau fanau e faatu se sini e faaali atu le faamaoni i lenei vaiaso ma ta’u atu ia te oe o latou lagona pe a latou faia.

Mataupu Faavae ma Feagaiga 124:28–29, 39

Ua poloaiina e Iesu Ona tagata ina ia fausia malumalu.

• Atonu e fiafia lau fanau e matamata i ata o malumalu, e aofia ai se malumalu anamua ma se malumalu e latalata i le mea latou te nonofo ai (tagai i le ChurchofJesusChrist.org/temples/list). E mafai ona e faaaogaina nei ata ma le Mataupu Faavae ma Feagaiga 124:39 e faamalamalama atu ai sa poloaiina pea e Iesu Keriso Lona nuu e fausia malumalu—i aso anamua ma i o tatou aso (tagai foi i le itulau o gaoioigao lenei vaiaso).

• Afai e te nofo latalata i se malumalu, mafaufau e ave lau fanau iina ma savalia ma le migao lotoā o le malumalu. Valaaulia i latou e sue ia upu “E Paia i le Alii—O Le Maota o le Alii’ i fafo o le malumalu. Talanoa ma lau fanau pe o le a le uiga o nei upu.

• Mafaufau e faaaoga manatu i le “O Le Papatisoina ma Faamauina mo Tuaa’ i le faaopoopoga A e fesoasoani ai i lau fanau ia tulimatai atu i le aso e mafai ai ona latou ulu atu i le malumalu (tagai foi i le “O Le Malumalu ma le Fuafuaga o le Fiafia’ i le faaopoopoga E).

Malumalu o Solomona, saunia e Sam Lawlor

Mataupu Faavae ma Feagaiga 124:91–92

O le a faamanuiaina a’u e le Alii e ala i se faamanuiaga faapeteriaka.

• A o outou faitau faatasi i le Mataupu Faavae ma Feagaiga 124:91–92, fesoasoani i lau fanau e sue le mea na valaauina e le Alii ia Ailama Samita e fai. Talanoa po o le a le faamanuiaga faapeteriaka: o se faamanuiaga faapitoa lea e aoao ai i tatou e le Alii e uiga ia i tatou lava ma mea e finagalo o Ia tatou te faia ma avea ai. Mafaufau e faaaoga le vaega “Mauaina o se Faamanuiaga Faapeteriaka” i le faaopoopoga A e fesoasoani ai i lau fanau ia saunia e maua se faamanuiaga faapeteriaka.

Mo nisi manatu, tagai i le lomiga o lenei masina o le mekasini o le Uo .

O le Malumalu o Navu, saunia e George D. Durrant