Faamatalaga mai le Ata o le Fanau mai o Iesu i le Lanu Kopa ma le Enaena, saunia e J. Kirk Richards

22–28 Tesema: O le Meaalofa Lē Mafaatusalia o le Alo Paia o le Atua

Kerisimasi

Sa folafola mai e le Perofeta o Iosefa Samita, “O mataupu faavae autu o lo tatou talitonuga o molimau a Aposetolo ma Perofeta, e faatatau ia Iesu Keriso, e faapea, na maliu o Ia, ma tanumia, ma toetu mai i le aso tolu, ma afio a’e i le lagi; ma o isi mea uma e faatatau i lo tatou talitonuga ua na o ni faaopoopoga i ai” (Aoaoga a Peresitene o le Ekalesia: Iosefa Samita [2011], 49). I le silia ma le 160 tausaga mulimuli ane, na musuia ai e lenei saunoaga le Au Peresitene Sili ma le Korama a Aposetolo e Toasefululua e lolomi le “O Le Keriso Soifua: O Le Molimau a le Au Aposetolo” e faamamaluina ai le 2,000 tausaga o le soifua mai o le Faaola (tagai i le savali a Russell M. Nelson, “Mauaina o le Mana o Iesu Keriso i o Tatou Olaga,” Liahona, Me 2017, 40).

I le avea ai ma Au Paia o Aso e Gata Ai, ua tatou olioli i faamanuiaga o faaaliga faifaipea e ala mai i perofeta ma aposetolo i ona po nei. Tatou te faafetai mo a latou saunoaga musuia o fautuaga, lapataiga, ma faamalosiauga. Ae o le mea sili lava, ua faamanuiaina i tatou i a latou molimau mamana e uiga ia Iesu Keriso—i le vaitau o le Kerisimasi ma le tausaga atoa. O nei saunoaga e sili atu nai lo na’o ni saunoaga musuia a tusitala atamamai po o failauga i tagata lautele po o ni malamalamaaga loloto mai polofesa o tusitusiga paia. O saunoaga a [perofeta ma aposetolo] ua filifilia, valaauina, ma faatagaina e le Atua o “molimau faapitoa o le suafa o Keriso i le lalolagi atoa” (Mataupu Faavae ma Feagaiga 107:23).

Manatu mo le Aoaoina i le Aiga ma i le Ekalesia

“E leai lava se tasi na i ai sona faatosinaga loloto.”

O le a sau tala e fai e lagolago ai le faamatalaga “e leai lava se isi ua i ai se faatosinaga matuā loloto na’uā [e pei o Iesu Keriso] ia i latou uma na soifua ma o le a soifua ai i luga o le fogaeleele”? Vaavaai mo fuaitau i le- “O Le Keriso Soifua” ua molimau i le faatosinaga matuā loloto na’uā a le Faaola. Na faapefea ona ia faatosinaina oe?

Manatu faapea o se tasi e le masani i le faaKerisiano na fesili atu ia te oe pe aisea e te faamanatuina ai le Kerisimasi. E faapefea ona e tali atu i ai? Iloilo le “O Le Keriso Soifua” ma mafaufau i lenei fesili, ma mafaufau e tusi i lalo soo se manatu po o uunaiga e oo mai ia te oe.

Tagai foi i le “Why We Need a Savior” (vitiō), Gospel Library.

Why We Need a Savior

What would life be like without a Savior? There would be no joy, no forgiveness, no hope for the future. This Christmas, learn more about the hope, peace and happiness our Savior Jesus Christ can bring into our lives at christmas.mormon.org.

“Na toe tu mai o Ia mai le tuugamau.”

I le “O Le Keriso Soifua,” o loo molimau mai ai le Au Aposetolo e uiga i le Toetu o le Faaola, ma ta’ua ai ni faailoaga mai e tolu o le Alii toetu (tagai i le parakalafa 5). Mafaufau e faitau ni nai tala e uiga i nei asiasiga i le Ioane 20; 3 Nifae 11; ma le Iosefa Samita—Talafaasolopito 1:14–20. O le a se mea ua e aoaoina e uiga i le Faaola mai Ana fetalaiga ma faatinoga i le taimi o nei faailoaga mai?

Taulai atu i le Faaola. “O le faitauina ma le agaga tatalo ‘O Le Keriso Soifua’ e pei lava o le faitauina o molimau a Mataio, Mareko, Luka, Ioane, ma perofeta o le Tusi a Mamona. O le a faateleina ai lou faatuatua i le Faaola ma fesoasoani ai ia te oe e faatumau lou taulaiga ia te Ia” (M. Russell Ballard, “Toe Foi Atu ma Mauaina,” Liahona, Me 2017, 65).

“Ua toefuataiina mai i le fogaeleele Lana perisitua ma Lana Ekalesia.”

I lau suesuega o le Mataupu Faavae ma Feagaiga i le tausaga lenei, sa e maua ai le avanoa e aoao atili ai e uiga i le ala na “toefuataiina mai ai le perisitua [a le Faaola] ma Lana Ekalesia.” O fea o nei upumoni po o mataupu faavae e faapitoa le anoa ia te oe? Mafaufau e toe faamanatu nisi o mau nei o loo aoao mai e uiga i le Toefuataiga: Mataupu Faavae ma Feagaiga 1:17–23; 13; 20:1–12; 65; 110; 112:30–32; 124:39–42; 128:19–21. Mafaufau loloto pe faapefea e upumoni o le talalelei toefuataiina ona fesoasoani ia te oe ia iloa ma alofa ia Iesu Keriso.

“O le a i ai se aso e toe afio mai ai o Ia i le lalolagi.”

O le Kerisimasi o se taimi e toe tepa ai i tua i le aso na soifua mai ai Iesu Keriso ma ia tulimatai atu ai i luma i le aso o le a Ia toe afio mai ai. O le a se mea ua e aoaoina e uiga i Lona toe afio mai mai le parakalafa lona lua mai le faaiuga o le “O Le Keriso Soifua”? Atonu foi e te manatu e faitau, pesepese, pe faalogologo i viiga o le Kerisimasi o loo aoao mai e uiga i le Afio Mai Faalua, e pei o le “Le Lalolagi ia Fiafia” po o le “O se Itupo Maninoa Lava” (Viiga, nu. 113, 118).

“O Ia o le malamalama, o le ola, ma le faamoemoega o le lalolagi.”

I le parakalafa mulimuli o le “O Le Keriso Soifua,” ia maitau uiga auaumama ma faalagiga na tuuina mai mo le Faaola. Mafaufau e faaalu se taimi e aoao ai e uiga i nisi o na mea. Mo se faataitaiga:

Malamalama: E faapefea ona pei Iesu Keriso o se malamalama ia te oe? Atonu e te mafaufau e tusi se ata po o le pueina o se ata, ia te oe, e faatusa i le malamalama Na te tuuina atu ia te oe. O le a se mea ua musuia oe e fai e faasoa atu ai Lona malamalama? (Tagai foi i le Ioane 8:12; 3 Nifae 18:24; Mataupu Faavae ma Feagaiga 50:24.)

Ola: Aisea e te manatu ai o le ola o se upu lelei e faamatala ai Iesu Keriso? O le a le uiga o Lona tuuina atu ia te oe o le ola? O le a faapefea ona ese lou olaga e aunoa ma Ia ma Lana talalelei? (Tagai foi i le Ioane 10:10; 1 Korinito 15:19–23; Mataupu Faavae ma Feagaiga 66:2.)

Faamoemoe: O le a se mea o e faamoemoe i ai ona o Iesu Keriso ma Lana talalelei? E te iloa se tasi e lagonaina le leai o se faamoemoe e uiga i le lumanai? Mafaufau loloto pe faapefea ona e faasoa atu i lena tagata le faamoemoe e te lagonaina ia Iesu Keriso. (Tagai foi i le Roma 8:24–25; Eteru 12:4; Moronae 7:41.)

Tagai foi i Autu ma Fesili, “Iesu Keriso,” Potutusi o le Talalelei.

“Ia faafetaia le Atua mo [Lana] meaalofa lē mafaatusalia.

I le “O Le Keriso Soifua,” ua faatatau Aposetolo i le Faaola o se “meaalofa” mai lo tatou Tama Faalelagi. E faavae i mea e te maua i le “O Le Keriso Soifua,” e faapefea ona e faaumaina lenei fuaiupu: “E ala mai ia Iesu Keriso, ua tuuina mai ai e le Atua ia te au meaalofa o le …” Mafaufau loloto i mea e mafai ona e faia ia maua atoatoa atili ai nei meaalofa.

O faapefea ona aafia lou faatuatua i le, ma le alofa mo le Faaola ona o le suesueina o le “O Le Keriso Soifua”

Tagai foi Russell M. Nelson, “Four Gifts That Jesus Christ Offers to You” (Faigalotu o le Kerisimasi a le Au Peresitene Sili, 2 Tes. 2018), Gospel Library; “Fuaitau e sii mai le ‘O Le Keriso Soifua: O le Molimau a Aposetolo’” (vitiō), ChurchofJesusChrist.org.

Excerpts from "The Living Christ: The Testimony of the Apostles"

As special witnesses of Jesus Christ, the First Presidency and the Quorum of the Twelve shared their testimony of Christ by recording excerpts from the original document, "The Living Christ: The Testimony of the Apostles."

Mo nisi manatu, tagai i le lomiga o lenei masina i mekasini o le Liahona ma le Mo le Malosi o le Autalavou .

Fautuaga mo le Aoaoina o Tamaiti

E mafai ona ou “ofoina atu [laʻu] molimau” e faamanatu ai le fanau mai o Iesu.

• Mafaufau pe mafai faapefea ona e faailoa atu lau fanau i le “O Le Keriso Soifua.” Atonu e mafai ona e fesoasoani ia i latou e faasino i le suafa o Keriso i le ulutala ma saini a le Au Peresitene Sili ma le Toasefululua. E mafai ona e faamalamalama atu o la latou molimau lenei ia Iesu Keriso sa latou mananao e faasoa atu i le lalolagi.

• E mafai ona e tuu atu i tamaiti taitasi se fasifuaitau mai le “O Le Keriso Soifua” ma fai atu ia i latou e sue pe tusi se ata o lena fasifuaitau. Ona mafai lea ona e fesoasoani ia i latou e sue le fasifuaitau i totonu o le “O Le Keriso Soifua.” E mafai foi ona outou tuufaatasia na ata ma fuaitau e fai ai se tusi.

• Faasoa atu i le tasi ma le isi le auala na e maua ai lau molimau ia Iesu Keriso. Atonu e mafai ona e pasi faataamilo se ata o le Faaola ma auauai e faasoa atu se mea e te iloa e uiga ia te Ia (e aofia ai upumoni o loo aoao mai i le “O Le Keriso Soifua”).

“Sa femaliuai o Ia ma agalelei.”

• A o outou faitauina ma lau fanau le parakalafa lona lua o le “O Le Keriso Soifua,” talanoa ma i latou e uiga i nisi o mea na faia e Iesu. E mafai foi ona e tilotilo i ata mai Lona soifuaga (tagai i le itulau o gaoioiga o lenei vaiaso ma le Tusiata o le Talalelei). Valaaulia lau fanau e talanoa e uiga i mea o loo faia e le Faaola i ata. E mafai faapefea ona tatou auauna atu i isi e pei ona sa Ia faia? O vitiō o le “Light the World” i le Gospel Library e mafai ona tuuina atu ia te oe ni manatu.

“O Ia o le malamalama, o le ola, ma le faamoemoega o le lalolagi.”

• Fesoasoani i lau fanau e su’e ni viiga o le Kerisimasi o faamatala ai le malamalama, olaga, ma le faamoemoe na aumaia e le fanau mai o le Faaola i le lalolagi—mo se faataitaiga, “Peteleema e, le ‘A‘ai” (Viiga, nu. 122). Usu faatasi viiga, ma tuu atu i lau fanau e faasoa mai pe o faapefea ona aumaia e Iesu le malamalama, ola, ma le faamoemoe i o latou olaga.

“Ia faafetaia le Atua mo le meaalofa lē mafaatusalia o Lona Alo paia lea.”

• O a ni meaalofa ua tatou maua ona o Iesu Keriso? Atonu e mafai e oe ma lau fanau ona vaavaai mo nei meaalofa i le “O Le Keriso Soifua” po o se pese e pei o le “Na Ia Auina Mai Lona Alo” (Tusipese a Tamaiti, 20). Ona mafai lea ona latou afifiina se mea e fai ma sui o na meaalofa. E mafai ona e fautuaina lau fanau e tatala meaalofa i le Aso Kerisimasi e fesoasoani ia i latou e manatua ai le Faaola ma Ana meaalofa ia i tatou.

Mo nisi manatu, tagai i le lomiga o lenei masina i le mekasini o le Uo .