Aphentekise A

Ya Batsadi—Go Baakanyetsa Bana ba Gago Botshelo jotlhe jwa Tsela ya Kgolagano le Modimo

Gonne O a go rata, O a go tshepha, ebile O itse bokgoni jwa gago, Rara wa Legodimo o go neetse tshono ya go thusa bana ba gago go tsena le go tswelela mo tseleng ya kgolagano ya Gagwe, tsela ya botshelo jo bosakhutleng (bona Dithuto le Dikgolagano 68:25–28). Se se akaretsa go ba thusa go baakanyetsa go dira le go tshegetsa dikgolagano tse di boitshepo, jaaka kgolagano ya kolobetso le dikgolagano tse di dirwang mo tempeleng. Ka dikgolagano tse, bana ba gago ka boitumelo ba tlaa itshwaraganyang le Mmoloki, Jeso Keresete.

Go na le ditsela tse dintsi tse o ka baakanyetsang bana ba gago mosepele yo mo tseleng ya kgolagano, e bile Rara wa Legodimo o tlaa go thusa go lemoga tsela e e botoka go ba thusa. Jaaka o batla tlhotlheletso, itse gore ga se go ithuta gotlhe mo go diragalang ka nako e beilweng ya thuto. Ka nnete, karolo ya se se dirang go ithuta mo gae maatla ke tshono ya go ithuta ka sekai le ka menyetla e e mennye, e e motlhofo—e e diragalang ka tlholego mo go tsheleng ga letsatsi le letsatsi. Fela jaaka go sala tsela ya kgolagano e le tswelelopele, thulaganyo ya botshelo jotlhe, go jalo le go ithuta ka ga tsela ya kgolagano. (bona “Home and Family,” Teaching in the Savior’s Way [2022], 30–31.)

Fa tlase ke megopolo e e ka gogelang go tlhotlheletso. O ka bona megopolo e e tlalaletsang ya go ruta bana ba dingwaga tsa Poraemari mo “Aphentekise B: Ya Poraemari—Go Baakanyetsa Bana ba Gago Botshelo jotlhe jwa Tsela ya Kgolagano le Modimo.”

Kolobetso le Tlhomamiso

Nefi o rutile gore “kgoro e [lo]tshwanetseng go tsena ka yone” tsela ya kgolagano “ke boikotlhao le kolobetso ka metsi” (2 Nefi 31:17). Matsapa a gago a go thusa bana ba gago go ipaakanyetsa kolobetso le tlhomamiso go ka baya dikgato tsa bone di thepame mo tseleng eo. Matsapa a a simolola ka go ruta ka ga tumelo mo go Jeso Keresete le boikotlhao. Le gone di akaretsa go ruta ka fa re ka ŝhafatsang dikgolagano tsa rona tsa kolobetso ka go ja sakaramente beke le beke.

Nefi o rutile gore “kgoro e [lo] tshwanetseng go tsena ka yone” tsela ya kgolagano “ke boikotlhao le kolobetso ka metsi” (2 Nefi 31:17).

Fano ke dingwe tsa didirisiwa tse di ka go thusang: 2 Nefi 31; kgatiso e e kgethegileng ya makasine wa Friend ka kolobetso; Topics and Questions, “Baptism,” Motlobo wa Efangele.

• Fa o na le maitemogelo a a nonotshang tumelo ya gago mo go Rara wa Legodimo le Jeso Keresete, e abelane le bana ba gago. Ba thuse go tlhaloganya gore tumelo ke sengwe se se ka golang ka thata thata mo tsamaong ya botshelo. Ke dilo di fe tse bana ba gago ba ka di dirang go tokafatsa tumelo e thata mo go Keresete pele fa ba kolobediwa?

• Fa ngwana wa gago a dira phoso, bua ka boitumelo ka ga neo ya boikotlhao. Mme fa o dira phoso, abelana ka boitumelo jo bo tlang fa o ikwatlhaya. Paka gore gonne Jeso Keresete o bogile le go swela dibe tsa rona, re ka ikwatlhaya letsatsi le letsatsi, re itshwarelwe, le go amogela thata ya go fetoga. Fa ngwana wa gago a batla boitshwarelo, mo itshwarele ka tshosologo le boitumelo.

• Bolelela ngwana wa gago ka kolobetso ya gago. Supa dinepe mme o abelane dikgopolo. Bua ka fa o ikutlwileng ka teng, ka fa go tshegetseng dikgolagano tsa kolobetso di go thusitseng ka teng go itse Jeso Keresete botoka, le ka fa dikgolagano di tsweletseng ka go segofatsa botshelo jwa gago. Rotloetsa ngwana wa gago go botsa dipotso.

• Fa go na le kolobetso mo lelwapeng la gago kgotsa wate, tsaya ngwana wa gago go ya go e bona. Buisana mmogo ka ga se wena le ngwana wa gago le se boneng le go se utlwa. Fa go kgonega, bua le motho yo o kolobediwang mme o mmotse dipotso jaaka tse: “O dirile jang tshwetso e? O ipaakantse jang?”

• Fa o lemoga ngwana wa gago a dira sengwe se a solofeditseng go se dira, mo galaletse ka tlhwaafalo. Supa gore go tshegetsa maitlamo go re thusa go tshegetsa dikgolagano tse re di dirang fa re kolobediwa. Re solofetsa Modimo eng fa re kolobediwa? O re solofetsa eng? (Bona Mosia 18:8–10, 13.)

• Buang ka fa go tlhomamisiwa le go nna leloko la Kereke ya ga Jeso Keresete ya Baitshepi ba Malatsi a Bofelo go go segofaditseng ka teng. Ka sekai, o atumalane jang le Rara wa Legodimo le Jeso Keresete jaaka o diretse ba bangwe le jaaka ba bangwe ba go diretse? Thusa ngwana wa gago go akanya ditsela tsa go direla le go nonotsha ba bangwe jaaka maloko a Kereke. Le gone ba thuse go itemogela le go lemoga boitumelo jo bo tlang ka go direla.

• Fa wena le bana ba gago le na le maitemogelo a a boitshepo mmogo (jaaka kwa Kerekeng, fa le bala dikwalo tse di boitshepo, kgotsa le direla mongwe), ba bolelele ka ga maikutlo a semowa kgotsa ditlhotlheletso tse o nnang le tsone. Laletsa ngwana wa gago go abelana ka fa a ikutlwang ka teng. Kaya ditsela tse dingwe tse Mowa o ka buang go batho, go akaretsa ditsela tse a buang le wena ka tsone. Thusa ngwana wa gago go lemoga le go abelana le wena menyetla ya fa a itemogela kgothatso ya Mowa o o Boitshepo.

• Lebelelang mmogo ditshwantsho tsa motshikinyego di se kae mo Motlobo wa Efangele tsa setlhogo sa “Hear Him!” Buang mmogo ka ga ditsela tse di farologanyeng tse batlhanka ba Morena ba utlwang lentswe la Gagwe. Laletsa ngwana wa gago go tshwantsha kgotsa go dira setshwantsho sa motshikinyego ka ga ka fa ba utlwang lentswe la Mmoloki.

• Dira sakaramente tiragalo e boitshepo le boitumelo ya lelwapa. Abelana le ngwana wa gago ka fa o tlhomamang mo go Jeso Keresete ka nako ya sakaramente. Thusa bana ba gago go dira togamaano go supa gore sakaramente e boitshepo mo go bone. Ka sekai, go reetsa mafoko a dithapelo tsa sakaramente go ka re gakolola ka dikgolagano tsa rona tsa kolobetso.

• Dikgatiso tse dintsi tsa makasine wa Friend di akaretsa mekwalo, dipolelo le ditiragalo go thusa bana go ipaakanyetsa kolobetso le tlhomamiso. A ngwana wa gago a tlhophe dingwe go di bala le go di itumelela la wena. (Bona le gone kgobokanyo “Preparing for Baptism” mo tsetlaneng ya bana ya Motlobo wa Efangele.)

Thata ya Boperesiti, Taolo, le Dilotlele

Boperesiti ke taolo le thata ya Modimo e ka yone a segofatsang bana ba Gagwe. Boperesiti jwa Modimo bo mo lefatsheng gompieno mo Kerekeng ya ga Jeso Keresete ya Baitshepi ba Malatsi a Bofelo. “Maloko otlhe a Kereke ba ba tshegetsang dikgolagano tsa bone—basadi, banna, le bana—ba segofadiwa ka thata ya boperesiti mo malwapeng a bone go ba nonotsha le malwapa a bone” (General Handbook: Serving in The Church of Jesus Christ of Latter-day Saints, 3.6, Motlobo wa Efangele). Thata e e tlaa thusa maloko mo go direng tiro ya Modimo ya poloko le ya kgalalelo ya bosakhutleng mo matshelong le malwapa a bone (bona General Handbook, 2.2).

Fa banna le basadi ba direla mo dipitsong tsa Kereke, ba dira jalo ka taolo ya boperesiti, ka fa tlase ga taolo ya bao ba tshegeditseng dilotlele tsa boperesiti. Bana botlhe ba ga Rara wa Legodimo—Barwa ba Gagwe le barwadie ba Gagwe—ba tlaa segofala jaaka ba tlhaloganya botoka boperesiti.

Re amogela ditao ka taolo ya boperesiti. Maloko a a itekanetseng a banna a Kereke ba amogela taolo ya boperesiti ka go neelwa boperesiti le go tlhomiwa go ofisi ya boperesiti” (General Handbook, 3.4). Bao ba ba tshegetsang di ofisi tsa boperesiti ba ka laolwa ke mongwe yo o tshegetsang dilotlele tsa boperesiti go dira ditao tsa boperesiti.

Go ithuta mo gontsi ka ga boperesiti, bona Russell M. Nelson, “Spiritual Treasures,” Liahona, Nov. 2019, 76–79; Russell M. Nelson, “The Price of Priesthood Power,” Liahona, May 2016, 66–69; “Priesthood Principles,” chapter 3 in General Handbook.

• Dira ditao tsa boperesiti karolo e e tswelelang ya botshelo jwa lelwapa la gago. Ka sekai, thusa bana ba gago go ipaakanyetsa sakaramente beke le beke ga semowa. Rotloetsa bana ba gago go batla ditshegofatso tsa boperesiti fa ba lwala kgotsa ba tlhoka kgomotso kgotsa kaelo. Itlwaetse go supa ditsela tse Morena a segofatsang lelwapa la gago ka thata ya boperesiti.

• Jaaka le bala dikwalo tse di boitshepo mmogo, lebelela ditshono tsa go buisana ka fa Modimo a segofatsang batho ka thata ya Gagwe. Abelana maitemogelo a gago fa Modimo a go segofatsa ka boperesiti jwa Gagwe. Ka dikai tsa ditshegofatso tse re di amogelang go tswa go Modimo ka boperesiti, bona General Handbook, 3.2, 3.5.

• Ruta ngwana wa gago gore morago ga kolobetso, ba ka amogela thata ya boperesiti ka go tshegetsa kgolagano ya kolobetso. Sekasekang mmogo molaetswa wa ga Poresidente Russell M. Nelson “Spiritual Treasures” (Liahona, Nov. 2019, 76–79). Bolelela ngwana wa gago ka fa ditao tsa boperesiti di tlisitseng thata ya Modimo mo botshelong jwa gago. Ka nankolo ya dingwe ditsela tse re segofadiwang ka thata ya boperesiti, bona General Handbook, 3.5.

• Buisanang potso “Motlhanka wa Morena o ntse jang?” Bala mmogo Dithuto le Dikgolagano 121:36–42, mme batla dikarabo. Gangwe le gape fa o lemoga ngwana wa gago (kgotsa mongwe o sele) a diragatsa nngwe ya melao kgotsa mekgwa mo ditemaneng tse, go supe.

• Fa wena kgotsa ngwana wa gago a dirisa dilotlele go lotlolola lebati kgotsa go simolodisa koloi, tsaya nako go tshwantshanya dilotlele tseo le dilotlele tse baeteledipele ba boperesiti ba di tshegeditseng. (Go tlhaloso ya dilotlele tsa boperesiti, bona General Handbook, 3.4.1). Dilotlele tsa boperesiti di “lotlolola” kgotsa di “simolodisa” eng go rona? Bona le gone Gary E. Stevenson, “Where Are the Keys and Authority of the Priesthood?,” Liahona, May 2016, 29–32; “Where Are the Keys?” (setshwantsho sa motshikinyego), Motlobo wa Efangele.

  Where Are the Keys?

  Priesthood authority and keys start the engine, open the gates of heaven, facilitate heavenly power, and pave the covenant pathway back to our Heavenly Father.

• Fa o tshwaelwa pitso, laletsa ngwana wa gago go nna teng, fa go kgonega. A ngwana wa gago a bone fa o diragatsa pitso ya gago. Le gone o ka lebelela ditsela tse di siameng tse ba ka go thusang. Tlhalosa ka fa o ikutlwang ka teng ka thata ya Morena mo pitsong ya gago.

Go Kolobediwa le go Tlhomamisetswa Bagologolo

Ditempele ke karolo ya togamaano ya ga Rara wa Legodimo go bana ba Gagwe. Mo ntlong ya Morena, re dira dikgolagano le Rara wa Legodimo jaaka re tsaya karolo mo ditaong tse di boitshepo, tsotlhe e le tse di supang kwa go Jeso Keresete. Rara wa Legodimo o tlametse tsela go botlhe bana ba Gagwe go dira dikgolagano le go tsaya karolo mo ditaong, go akaretsa batho ba ba iseng ba di amogele mo botshelo jo. Kwa tshimologong ya ngwaga e ngwana wa gago a dirang 12, o lekane mo go siameng go kolobeletswa le go tlhomamisetswa bagologolo ba ba tlhokafetseng mo tempeleng (bona le gone 1 Bakorinthe 15:29).

• Ya kwa ntlong ya Morena kgapetsa kgapetsa jaaka diemo di letla. Bua le ngwana wa gago gore ke eng o ya teng le ka fa tempele e go thusang go ikutlwa o atumalane le Rara wa Legodimo le Jeso Keresete.

• Sekaseka le go buisana mmogo dipotso tsa tetlelelo ya tempele. O ka di bona mo ditsebe 36–37 tsa For the Strength of Youth: A Guide for Making Choices (2022). Bua le ngwana wa gago ka ga se se diragalang mo potsolotsong ya puisano ya tetlelelo ya tempele. Abelana gore ke eng go le botlhokwa go nna le tetlelelo ya tempele.

• Balang mmogo Malaki 4:6. Buisanang ka fa dipelo tsa lona di ka sokologelang go bagologolo ba lona. Ithute mo gontsi ka bagologolo ba gago ka go sekaseka ditso tsa lelwapa la lona mmogo mo FamilySearch.org. Batla bagologolo ba ba tlhokang go kolobediwa le go tlhomamisiwa. Modiri wa wate wa tempele le ditso tsa lelwapa o ka go thusa.

• Sekasekang mmogo dingwe tsa di dirisiwa mo kgobokanyong ya setlhogo sa “Temple” mo karolong ya bana ya Motlobo wa Efangele. (Bona le gone “Preparing Your Child for Temple Baptisms and Confirmations” on ChurchofJesusChrist.org.)

Go amogela Tshegofatso ya Bopatiriaka

Tshegofatso ya bopatiriaka e ka nna motswedi wa kaelo, kgomotso, le tlhotlheletso. E na le kgakololo go rona go tswa go Rara wa Legodimo mme e re thusa go tlhaloganya bokao jwa rona le maikemisetso a rona a bosakhutleng. Thusa ngwana wa gago go amogela tshegofatso ya bopatiriaka ka go mo ruta botlhokwa le tlholego e e boitshepo ya tshegofatso ya bopatiriaka.

Go ithuta mo gontsi, bona Topics and Questions, “Patriarchal Blessings,” Motlobo wa Efangele; Julie B. Beck, “You Have a Noble Birthright,” Liahona, May 2006, 106–8.

• Abelana le bana ba gago maitemogelo a gago a go amogela tshegofatso ya bopatiriaka. O ka abelana dilo jaaka ka fa o ipaakantseng ka teng go bo amogela, le gore e go thusitse jang go atumalana le Modimo, le ka fa a tsweletseng ka go go kaela ka tshegofatso e. Le gone o ka laletsa ngwana wa gago go bua le maloko a mangwe a lelwapa ba ba amogetseng ditshegofatso tsa bopatiriaka.

• Sekasekang mmogo molaetsa wa ga Mogolwane Randall K. Bennett “Your Patriarchal Blessing—Inspired Direction from Heavenly Father” le molaetsa wa ga Mogolwane Kazuhiko Yamashita’s “When to Receive Your Patriarchal Blessing” (Liahona, May 2023, 42–43, 88–90). Abelanang ka ga se o se ithutang go tswa mo melaetseng e gore ke eng Rara wa Legodimo a batla re amogela tshegofatso ya bopatiriaka. Go ithuta ka tsamaiso ya go amogela tshegofatso ya bopatiriaka, bona General Handbook, 18.17.

• Fa o na le bagologolo ba ba amogetseng ditshegofatso tsa bopatiriaka, go ka rotloetsa go bala dingwe tsa tsone le bana ba gago. Go kopa ditshegofatso tsa bagologolo ba ba suleng, tsena mo ChurchofJesusChrist.org, tobetsa Tools mo sekhutlong se se kwa godimo kafa mojeng ga sesiro, o tlhophe Patriarchal Blessing.

• Morago ga ngwana wa gago a amogela tshegofatso ya bopatiriaka, laletsa mongwe wa maloko a lelwapa yo a neng a le teng go gatisa maikutlo a gagwe le go a abelana le ngwana wa gago.

Go amogela Endaomente

Modimo o batla go re apesa nonofo, kgotsa go re segofatsa, rotlhe bana ba Gagwe ka “thata go tswa kwa godimo” (Dithuto le Dikgolagano 95:8). Re ya kwa tempeleng go amogela endaomente ya rona gangwe, mme dikgolagano tse re di dirang le Modimo le thata ya semowa e A re e neelang jaaka karolo ya endaomente di ka re segofatsa letsatsi le letsatsi la matshelo a rona.

• Supa setshwantsho sa tempele mo legaeng la gago. Bolelela bana ba gago ka ga maikutlo a o a itemogelang mo ntlong ya Morena. Bua kgapetsa kgapetsa ka lorato la gago go Morena le ntlo ya Gagwe le dikgolagano tse o di dirileng koo. Batla ditshono tsa go ya tempeleng le bana ba gago go dira dikolobetso le ditlhomamiso tsa bagologolo.

• Batlisisang mmogo temples.ChurchofJesusChrist.org. Balang mmogo mekwalo jaaka “About the Temple Endowment” le “Prepare for the House of the Lord.” A ngwana wa gago a botse dipotso dingwe le dingwe tse a nang le tsone ka ga tempele. Ka kaelo ya se o ka se buang kwantle ga tempele, bona molaetsa wa ga Mogolwane David A. Bednar “Prepared to Obtain Every Needful Thing” (Liahona, May 2019, 101–4; o bone bogolo jang tsetlana ya setlhogo “Home-Centered and Church-Supported Learning and Temple Preparation”).

• Jaaka wena le ngwana le tsaya karolo mo kgotsa le lebeletse ditao tse dingwe (jaaka sakaramente kgotsa tshegofatso ya pholo), tsaya nako go buisana ka dikao tse di mo taong. Dikao di raya eng? Di paka jang ka ga Jeso Keresete? Se se ka thusa ngwana wa gago go ipaakanyetsa go tlhatlhanya ka tlhaloso ya sekao sa ditao tsa temepele, tse le tsone di pakang ka ga Jeso Keresete.

• Thusa ngwana wa gago go lemoga ka fa a tshegetsang kgolagano ya kolobetso e e tlhalosiwang mo Mosia 18:8–10, 13. Le gone thusa ngwana wa gago go lemoga ka fa Morena a mo segofatsang ka teng. Aga boikanyo jwa ngwana wa gago mo bokgoning jwa gagwe jwa go tshegetsa dikgolagano.

• Bua o phuthulogile ka metlha ka fa dikgolagano tsa tempele di kaelang ditshwetso tsa gago le go go thusa go atumalana le Jeso Keresete. O ka dirisa General Handbook, 27.2, go sekaseka dikgolagano tse re di dirang mo tempeleng. Fa o amogetse endaomente ya gago, bolelela bana ba gago ka fa dighamente di go thusang ka teng go gakologelwa dikgolagano tsa gago le Jeso Keresete tsa (bona “Sacred Temple Clothing” [setshwantsho sa motshikinyego], Motlobo wa Efangele).

Sacred Temple Clothing

From ancient times, men and women have embraced sacred music, different forms of prayer, religious vestments full of symbolism, gestures and rituals to express their innermost feelings of devotion to God.

Go Direla Thomo

Mogolwane David A. Bednar o rutile: “Selo se le sengwe se se botlhokwa se o ka se dirang go ipaakanyetsa go bitswa go direla ke go nna moanamisa efangele sebaka se se leele pele fa o tsena mo thomong. … Kgang ga se go ya thomong; gone, kgang ke go nna moanamisa efangele le go direla botshelo jwa rona jotlhe ka dipelo, maatla, tlhaloganyo, le nonofo tsa rona tsotlhe. … O ipaakanyetsa botshelo jotlhe jwa boanamisa efangele” (“Becoming a Missionary,” Liahona, Nov. 2005, 45–46). Maitemogelo a ngwana wa gago a nang le one a go nna moanamisa efangele a tlaa mo segofatsa ka bosakhutleng, e seng fela ka nako ya a direla jaaka moanamisa efangele.

Go ithuta mo gontsi, bona Russell M. Nelson, “Preaching the Gospel of Peace,” Liahona, May 2022, 6–7; M. Russell Ballard, “Missionary Service Blessed My Life Forever,” Liahona, May 2022, 8–10; “Missionary Preparation: Adjusting to Missionary Life,” Motlobo wa Efangele.

• Dira ditsela tsa tlholego tse o ka abelanang efangele. Ka metlha nna o lebeletse ditshono tsa go abelana le ba bangwe maikutlo a gago ka ga Rara wa Legodimo le Mmoloki le ditshegofatso tse o di amogelang go tswa mo efangeleng ya Mmoloki e e tsosolositsweng le jaaka leloko la Kereke ya Gagwe. Laletsa ba bangwe go tsenelela le lelwapa la gago Kereke le ditiragatso tse di amanang tsa lelwapa.

• Batla ditshono tsa lelwapa la gago go kopana le baanamisa efangele. Ba laletse go ruta ditsala tsa gago, kgotsa ba letle go rutela batho mo legaeng la gago. Botsa baanamisa efangele ka ga maitemogelo a ba nang le one le ka fa tirelo ya boanamisa efangele e ba thusang ka teng go atumalana le Jeso Keresete. Le gone ba botse gore ba dirileng (kgotsa ba eletsa ba ka bo ba dirile eng) go ipaakanyetsa go nna baanamisa efangele.

• Fa o diretse thomo, bua o phuthologile le kgapetsa kgapetsa ka ga maitemogelo a gago. Kgotsa laletsa ditsala kgotsa maloko a lelwapa ba ba diretseng dithomo go bua ka ga a bone. Le gone o ka bua ka ditsela tse o abelaneng efangele le ba bangwe mo botshelong jwa gago. Thusa ngwana wa gago go akanya ka ditsela tse a ka abelanang efangele.

• Neela ngwana wa gago ditshono tsa go ruta lelwapa lwa gago melawana ya efangele. Ngwana wa gago le gone o ka diragatsa go abelana tse a di dumelang le ba bangwe. Ka sekai, le ka buisana dipotso jaaka “Re ka simolodisa Buka ya ga Momone jang go mongwe yo a iseng a utlwe ka yone?” kgotsa “Re ka tlhalosa jang letlhoko la Mmoloki go mongwe yo e seng Mokeresete?”

• Thusa ngwana wa gago go phuthologa fa a bua le batho. Ke ditsela di fe tse di molemo tsa go simolola puisano? Kgothatsa ngwana wa gago go ithuta go reetsa se ba bangwe ba se buang, go tlhaloganya se se mo dipelong tsa bone, le go abelana boammaaruri jwa efangele jo bo ka segofatsang matshelo a bone.

• Batlela bana ba gago ditshono tsa go ithuta ka ga ditso le ditumelo tse dingwe. Ba thuse go lemoga le go tlotla melawana ya di tumelo tsa ba bangwe e molemo le boammaaruri.

Go Amogela Tao ya go Kana

Mo tempeleng, monna le mosadi ba ka nyadisiwa ka bosakhutleng. Se se diragala mo taong e e bidiwang “kano.” Le ntswa tao e e ka tswa e le dingwaga tse dikgala tsa morwadio kgotsa morwa wa gago, dilo tse dinnye, tse di motlhofo, tse lo tswelelang lo di dira mmogo dingwaga tseo di ka ba thusa go ipaakanyetsa tshegofatso e gakgamatsang e.

• Balang mmogo “Lelwapa: Kanamiso go Lefatshe” (Motlobo wa Efangele). Kanamiso e e ruta eng ka boitumelo jwa botshelo jwa lelwapa le ga katlego ya manyalo? Le ngwana wa gago, tlhopha melao e nankotsweng mo kanamisong go e ithutuntsha. O ka lebelela dikwalo tse di boitshepo tse di amanang le melao eo mo Kaedi ya Dikwalo tse di Boitshepo. Le gone o ka baya seelo sa go diragatsa melao eo ka botlalo mo lelwapeng la gago. Jaaka fa o baya seelo, buisanang mmogo gore melao e ka ama jang botshelo jwa lelwapa.

• Le ngwana wa gago, balang molaetsa wa ga Poresidente Dieter F. Uchtdorf “In Praise of Those Who Save” (Liahona, May 2016, 77–80). Fa o tsena kwa setlhogong sa karolo “A Society of Disposables,” o ka leba dilo mo gaeng la gago tse di ka ŝhafadiwang le tse dingwe tse di ka sekeng. Bua ka fa o tshwarang dilo ka teng mo go farologanyeng fa o batla di tsaya lebaka le le leele. Se se akanyetsa eng ka fa re ka tsayang dikamano tsa lenyalo le lelwapa? Re ithuta eng gape go tswa mo molaetseng wa ga Poresidente Uchtdorf ka fa Mmoloki a ka re thusang go aga manyalo le malwapa a nonofileng?

• Bulegela ngwana wa gago ka ga dilo tse wena le mokapelo wa gago le di ithutang ka go nna le lenyalo la bosakhutleng le le ikaegileng ka Keresete le ditsela tse lo lekang go itokafatsa. Fa wena le mokapelo wa gago le kannwe mo tempeleng, bontsha ngwana wa gago ka sekai ka fa lo lekang ka teng go tshegetsa dikgolagano le Morena. Bolelela ngwana wa gago ka fa o lekang ka teng go dira Rara wa Legodimo le Mmoloki boremelelo jwa botsalano jwa lona le ka fa Ba le thusang ka teng (bona le gone Ulisses Soares, “In Partnership with the Lord,” Liahona, Nov. 2022, 42–45).

• Fa ditshwetso tsa lelwapa di tlhoka go dirwa, nnang le dikgakololano le dipuisano tsa lelwapa. Netefatsa gore megopolo ya maloko otlhe a lelwapa e utlwilwe le go tsewa tsia. Dirisa dipuisanyo tse jaaka tshono ya go supa mokgwa wa puisanyo o itekanetseng le bopelontle mo botsalanong jwa lelwapa, le e leng fa mongwe a sa bone dilo ka tsela e tshwanang. (Bona M. Russell Ballard, “Family Councils,” Liahona, May 2016, 63–65.)

• Fa go sa dumalanwe kgotsa go na le kgotlhang mo lelwapeng, supa bopelotelele le bopelontle. Thusa bana ba gago go bona ditsela tse o tshwarang kgotlhang ka Bokeresete ka teng go ka ba thusang go ipaakanyetsa lenyalo le le itumetseng. Balang mmogo Dithuto le Dikgolagano 121:41–42, mme le buisanye ka fa melao mo ditemaneng tse e ka diragadiwang mo lenyalong.