Faaopoopoga A

Mo Mātua—Sauniaina o Lau Fanau mo se Olaga Atoa i luga o le Ala o Feagaiga a le Atua

Ona e alofa o Ia ia te oe, faatuatuaina oe, ma silafia lou gafatia, ua tuuina mai ai e le Tama Faalelagi ia te oe le avanoa e fesoasoani ai i lau fanau ia ulu atu ma alualu i luma i luga o Lana ala o feagaiga, le ala i le ola e faavavau (tagai i le Mataupu Faavae ma Feagaiga 68:25–28). E aofia ai le fesoasoani ia i latou e saunia e osia ma tausia feagaiga paia, e pei o le feagaiga o le papatisoga ma feagaiga e osia i le malumalu. E ala i nei feagaiga, o le a mafai ai e lau fanau ona fusia ma le fiafia i latou lava i le Faaola, o Iesu Keriso.

E tele auala e saunia ai lau fanau mo lenei malaga i luga o le ala o feagaiga, ma o le a fesoasoani le Tama Faalelagi ia te oe ia iloa le auala sili e fesoasoani ai ia i latou. A o e sailia musumusuga, ia manatua e le o aoaoga uma e tutupu i le taimi o lesona faatulagaina. O le mea moni, o se vaega o le mea e matua’i mamana ai le aoaoina i le aiga, o le avanoa lea e aoao ai e ala i faataitaiga ma e ala i avanoa laiti, ma faatauvaa e aoao atu ai—o le ituaiga lea e tupu lava i le gasologa o le olaga i aso taitasi. E pei lava o le mulimuli i le ala o feagaiga o se faagasologa faifai pea, i le olaga atoa, e faapena foi le aoao e uiga i le ala o feagaiga. (Tagai i le “Fale ma le Aiga,” Aoao Atu i le Ala a le Faaola [2022], 30–31.)

O nisi nei o manatu e ono taitai atu ai i nisi musumusuga. E mafai ona e maua ni manatu faaopoopo mo le aoaoina o tamaiti i le tausaga o le Peraimeri i le “Faaopoopoga E: Mo le Peraimeri—Sauniaina o Fanau mo se Olaga Atoa i luga o le Ala o Feagaiga a le Atua.”

Papatisoga ma le Faamauga

Na aoao mai Nifae e faapea “o le faitotoa lea e tatau ona [tatou] ulu atu ai” i le ala o feagaiga “o le salamo ma le papatisoga i le vai” (2 Nifae 31:17). O au taumafaiga e fesoasoani i lau fanau ia saunia mo le papatisoga ma le faamauga e mafai ona faatulaga mausali ai o latou vae i luga o lena ala. O nei taumafaiga e amata i le aoao atu e uiga i le faatuatua ia Iesu Keriso ma le salamo. E aofia ai foi le aoao atu e uiga i le auala tatou te faafouina ai a tatou feagaiga o le papatisoga e ala i le aai ma feinu i le faamanatuga i vaiaso taitasi.

Na aoao mai Nifae e faapea “o le faitotoa lea e tatau ona [tatou] ulu atu ai” i le ala o feagaiga “o le salamo ma le papatisoga i le vai” (2 Nifae 31:17).

O nisi nei o punaoa e mafai ona fesoasoani ia te oe: 2 Nifae 31; o le lomiga faapitoa o le mekasini o le Uo e uiga i le papatisoga; Autu ma Fesili, “Papatisoga,” Gospel Library.

• Soo se taimi lava e te maua ai se aafiaga e faamalosia ai lou faatuatua i le Tama Faalelagi ma Iesu Keriso, faasoa atu i lau tama. Fesoasoani ia i latou ia malamalama o le faatuatua o se mea e mafai ona tuputupu a’e malosi ma malosi atu i le olaga atoa. O a nisi o mea e mafai e lau tama ona fai e atiina a’e ai se faatuatua malosi atu ia Keriso a o lei papatisoina i latou?

• Pe a faia e lau tama se filifiliga sese, ia tautala fiafia e uiga i le meaalofa o le salamo. Ma pe a e faia se filifiliga sese, faasoa atu le olioli e oo mai pe a e salamo. Molimau atu e faapea ona na puapuagatia Iesu Keriso ma maliu mo a tatou agasala, e mafai ona tatou salamo i aso taitasi, faamagaloina, ma maua le mana e sui ai. A saili e lau tama le faamagaloga, faamagalo atu ma le saoloto ma le olioli.

• Ta’u atu i lau tama e uiga i lou papatisoga. Faaali atu ata ma faasoa atu manatuaga. Talanoa e uiga i ou lagona, pe na faapefea ona fesoasoani le tausia o au feagaiga o le papatisoga ia te oe e iloa atili ai Iesu Keriso, ma pe faapefea ona faaauau pea ona faamanuiaina lou olaga e au feagaiga. Faamalosiau i lau tama e fai ni fesili.

• A i ai se papatisoga i lou aiga po o lau uarota, ave lau tama e vaai i ai. Talanoa faatasi e uiga i mea na lua vaaia ma lagonaina ma lau tama. Afai e mafai, talanoa i le tagata o loo papatisoina ma fai atu fesili e pei o nei: “Na faapefea ona e faia lenei faaiuga? Na faapefea ona e saunia?”

• Soo se taimi lava e te matauina ai lau tama o faia se mea na latou folafola mai e fai, ia tuuina atu le viia faamaoni. Ta’u i ai o le tausia o tautinoga e fesoasoani tatou te saunia ai e tausia feagaiga tatou te osia pe a tatou papatiso. O le a le mea tatou te folafola atu i le Atua pe a tatou papatiso? O le a le mea ua Ia folafola mai ia i tatou? (Tagai i le Mosaea 18:8–10, 13.)

• Talanoa e uiga i le auala ua faamanuiaina ai oe ina ua faamauina ma avea ma se tagata O Le Ekalesia a Iesu Keriso o le Au Paia o Aso e Gata Ai. Mo se faataitaiga, na faapefea ona e latalata atili atu i le Tama Faalelagi ma Iesu Keriso a o e auauna atu i isi ma a o auauna mai isi ia te oe? Fesoasoani i lau tama e mafaufau i auala e auauna atu ai ma faamalosia isi o se tagata o le Ekalesia. Ia fesoasoani foi ia i latou e maua ni aafiaga ma iloa le olioli lea e sau mai le auauna atu.

• Pe a maua e oe ma lau tama se aafiaga paia (e pei o le i ai i le lotu, a o faitauina tusitusiga paia, pe a o e auauna atu i se tasi), ta’u atu ia te i latou e uiga i lagona po o uunaiga faaleagaga o ia te oe. Valaaulia lau tama e faasoa mai o latou lagona. Matau auala eseese e mafai ai e le Agaga ona talanoa atu i tagata, e aofia ai auala e fetalai mai ai o Ia ia te oe lava ia. Fesoasoani i lau tama ia iloa ma faasoa mai ia te oe taimi atonu na latou oo ai i le mauaina o ni aafiaga o uunaiga a le Agaga Paia.

• Matamata faatasi ni nai vitio i le faaputuga o le Potutusi o le Talalelei ua faaautuina “Faalogo ia te Ia!” Talanoa faatasi e uiga i auala eseese e faalogo ai auauna a le Alii i Lona siufofoga. Valaaulia lau tama e tusi se ata pe fai se vitiō pe faapefea ona latou faalogo i le siufofoga o le Faaola.

• Ia avea le faamanatuga o se mea paia ma fiafia i lou aiga. Faasoa atu i lau tama pe faapefea ona e taulai atu ia Iesu Keriso i le taimi o le faamanatuga. Fesoasoani i lau tama e fai se fuafuaga e faaali atu ai e paia le faamanatuga ia i latou. Mo se faataitaiga, o le faalogologo i upu o tatalo o le faamanatuga e mafai ona faamanatu mai ai ia i tatou a tatou feagaiga o le papatisoga.

• E tele lomiga o le mekasini o le Uo ua aofia ai tusiga, tala, ma gaoioiga e fesoasoani ai i tamaiti e saunia mo le papatisoga ma le faamauga. Tuu atu i lau tama e filifili nisi e faitau ma fiafia faatasi ma oulua. (Tagai foi i le faaputuga “Preparing for Baptism” i le vaega a tamaiti o le Potutusi o le Talalelei.)

Mana, Pule, ma Ki o le Perisitua

O le perisitua o le pule ma le mana o le Atua lea Na te faamanuiaina ai Ana fanau. O loo i ai le perisitua a le Atua i luga o le fogaeleele i aso nei i Le Ekalesia a Iesu Keriso o le Au Paia o Aso e Gata Ai. “O tagata uma o le Ekalesia o e tausia a latou feagaiga—tamaitai, alii, ma le fanau—ua faamanuiaina i le mana o le perisitua a le Atua i o latou aiga e faamalosia ai i latou lava ma o latou aiga” (Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 3.6, Gospel Library). O le a fesoasoani lenei mana i le au paia i le faiga o le galuega a le Atua o le faaolataga ma le faaeaga i o latou lava olaga faaletagata lava ia ma aiga (tagai i leTusitaulima Aoao, 2.2).

A galulue alii ma tamaitai i valaauga o le Ekalesia, latou te faia i le pule o le perisitua, i lalo o le taitaiga a i latou o e umia ki o le perisitua. O fanau uma a le Tama Faalelagi—Ona atalii ma Ona afafine—o le a faamanuiaina a o latou malamalama lelei i le perisitua.

Tatou te maua sauniga e ala i le pule o le perisitua. “O tamatane agavaa o le Ekalesia e mauaina le pule o le perisitua e ala i le faaee atu o le perisitua ma le faauuga i tofi o le perisitua” (Tusitaulima Aoao, 3.4). O i latou o e umia tofi o le perisitua e mafai ona faatagaina e se tasi e umia ki o le perisitua e faatino ai sauniga o le perisitua.

Ina ia aoao atili e uiga i le perisitua, tagai i le Russell M. Nelson, “O Oa Faaleagaga,” Liahona, Nov. 2019, 76–79; Russell M. Nelson, “O Le Tau o le Mana o le Perisitua,” Liahona, Me 2016, 66–69; “Mataupu Faavae o le Perisitua,” mataupu 3 i le Tusitaulima Aoao.

• Ia avea sauniga o le perisitua o se vaega faifai pea o lou olaga faaleaiga. Mo se faataitaiga, fesoasoani i lau tama e saunia faaleagaga mo le faamanatuga i vaiaso taitasi. Uunaia lau tama e saili faamanuiaga faaleperisitua pe a latou mama’i pe manaomia le faamafanafanaga po o le taitaiga. Fai o se mausa le faailoa atu o auala o loo faamanuiaina ai e le Alii lou aiga e ala i le mana o le perisitua.

• A o outou faitau faatasi i tusitusiga paia, vaavaai mo avanoa e talanoaina ai pe faapefea ona faamanuiaina e le Atua tagata e ala i Lona mana. Faasoa atu ou lava aafiaga o se taimi na faamanuiaina ai oe e le Atua e ala i Lana perisitua. Mo faataitaiga o faamanuiaga tatou te maua mai le Atua e ala i le perisitua, tagai i le Tusitaulima Aoao, 3.2, 3.5.

• Aoao lau tama a uma le papatisoga, e mafai ona latou maua le mana o le perisitua e ala i le tausia o feagaiga o le papatisoga. Toe faamanatu faatasi le savali a Peresitene Russell M. Nelson “Oa Faaleagaga” (Liahona, Nov. 2019, 76–79). Ta’u atu i lau tama pe na faapefea ona aumaia e sauniga o le perisitua le mana o le Atua i lou olaga. Mo se lisi o nisi o auala ua faamanuiaina ai i tatou i le mana o le perisitua, tagai i le Tusitaulima Aoao, 3.5.

• Talanoaina le fesili “E faape’i se auauna a le Alii?” Faitau faatasi le Mataupu Faavae ma Feagaiga 121:36–42, ma vaavaai mo tali. Soo se taimi lava e te matauina ai lau tama (po o se isi) o faaaogaina se tasi o mataupu faavae po o uiga o loo i nei fuaiupu, ia faailoa atu.

• Pe a e faaaogaina pe faaaoga foi e lau tama ia ki e tatala ai se faitotoa pe faaola ai se taavale, faaalu sina taimi e faatusatusa ai na ki i ki o loo umia e taitai perisitua. (Mo se faauigaga o ki o le perisitua, tagai i le Tusitaulima Aoao, 3.4.1). O a mea e “tatala” pe “faaola” e ki o le perisitua mo i tatou? Tagai foi i leGary E. Stevenson, “O Fea o i ai Ki ma le Pule o le Perisitua?,” Liahona, Me 2016, 29–32; “O Fea o I Ai Ki? (vitiō), Gospel Library.

  Where Are the Keys?

  Priesthood authority and keys start the engine, open the gates of heaven, facilitate heavenly power, and pave the covenant pathway back to our Heavenly Father.

• Pe a vaetofiaina oe mo se valaauga, valaaulia lau tama e auai, pe a mafai. Ia vaai lau tama o e faataunuuina lou valaauga. E mafai foi ona e vaavaai mo ni auala talafeagai e mafai ona latou fesoasoani mai ai ia te oe. Faamatala auala o e lagona ai le mana o le Alii i lou valaauga.

Papatisoina ma Faamauina mo Tuaa

O malumalu o se vaega o le fuafuaga a le Tamā Faalelagi mo Ana fanau. I totonu o le maota o le Alii, tatou te osia ai feagaiga paia ma le Tama Faalelagi a o tatou auai i sauniga paia, o mea uma ia e faasino atu ia Iesu Keriso. Ua saunia e le Tama Faalelagi se ala mo Ana fanau uma e osia ai feagaiga ma auai i sauniga, e aofia ai tagata e lei mauaina [sauniga] i lenei olaga. I le amataga o le tausaga e atoa i ai le 12 tausaga o lau tama, ua lava lo latou matutua e papatiso ai ma faamauina i le malumalu mo tuaa ua maliliu (tagai foi i le 1 Korinito 15:29).

• Alu soo i le maota o le Alii pe a faatagaina ai e ou tulaga. Talanoa i lau tama e uiga i le mafuaaga ua e alu ai ma pe faapefea ona fesoasoani le malumalu ia te oe ia lagona le latalata atili atu i le Tama Faalelagi ma Iesu Keriso.

• Toe faamanatu ma talanoa faatasi ia fesili o le pepa faataga o le malumalu. E mafai ona e maua fesili o le faatalanoaga o le pepa faataga o le malumalu i itulau 36–37 o le Mo Le Malosi o le Autalavou: O Se Taiala mo le Faia o Filifiliga (2022). Talanoa i lau tama e uiga i le mea e tupu i se faatalanoaga o se pepa faataga o le malumalu. Faasoa atu pe aisea e taua ai ia te oe le i ai o se pepa faataga o le malumalu.

• Faitau faatasi le Malaki 4:6. Talanoa pe mafai faapefea ona liliu atu o outou loto i ou tuaa. Aoao atili e uiga i ou tuaa e ala i le suesue faatasi o le talafaasolopito o lou aiga i luga o le FamilySearch.org. Vaavaai mo tuaa o e manaomia ona papatisoina ma faamauina. E mafai ona fesoasoani atu le faufautua a le uarota mo le malumalu ma talafaasolopito o aiga ia te oe.

• Toe faamanatu faatasi nisi o punaoa i le faaputuga ua faaautuina “Temple” i le vaega a tamaiti o le Gospel Library. (Tagai foi i le “Preparing Your Child for Temple Baptisms and Confirmations” i luga o le ChurchofJesusChrist.org.)

Mauaina o se Faamanuiaga Faapeteriaka

O se faamanuiaga faapeteriaka e mafai ona avea o se punavai o le taitaiga, faamafanafanaga, ma musumusuga. O loo i ai fautuaga patino ia i tatou mai le Tama Faalelagi ma e fesoasoani tatou te malamalama ai i lo tatou faasinomaga ma le faamoemoega e faavavau. Fesoasoani i lau tama e saunia e maua se faamanuiaga faapeteriaka e ala i le aoaoina o i latou i le tāua ma le natura paia o faamanuiaga faapeteriaka.

Ina ia aoao atili, tagai i Autu ma Fesili, “Faamanuiaga Faapeteriaka,” Gospel Library; Julie B. Beck, “E I Ai Sou Tofi Tamalii,” Liahona, Me 2006, 106–8.

• Faasoa atu i lau tama lou aafiaga o le mauaina o se faamanuiaga faapeteriaka. E mafai ona e faasoa atu mea e pei o le auala na e saunia ai e maua, pe na faapefea ona fesoasoani ia te oe e latalata atili atu ai i le Atua, ma le auala o loo faaauau ona Ia taitaiina oe e ala mai i lenei faamanuiaga. E mafai foi ona e valaaulia lau tama e talanoa i isi tagata o le aiga o e ua mauaina o latou faamanuiaga faapeteriaka.

• Iloilo faatasi le savali a Elder Randall K. Bennett “O Lou Faamanuiaga Faapeteriaka—Taitaiga Musuia mai le Tama Faalelagi” ma le savali a Elder Kazuhiko Yamashita “O Afea e Tatau ona Maua ai Lou Faamanuiaga Faapeteriaka” (Liahona, Me 2023, 42–43, 88–90). Faasoa atu i le tasi ma le isi mea ua e aoaoina mai nei savali e uiga i le mafuaaga e finagalo ai le Tama Faalelagi ia tatou maua se faamanuiaga faapeteriaka. Ina ia aoao e uiga i le faagasologa o le mauaina o se faamanuiaga faapeteriaka, tagai i le Tusitaulima Aoao, 18.17.

• Afai e i ai ni ou tuaa na mauaina faamanuiaga faapeteriaka, atonu e musuia le faitauina o nisi o na faamanuiaga ma lau tama. Ina ia talosagaina faamanuiaga o tuaa ua maliliu, saini i totonu i le ChurchofJesusChrist.org, oomi le Tools i le tulimanu taumatau pito i luga o le lau, ma filifili Patriarchal Blessing.

• A uma ona maua e lau tama se faamanuiaga faapeteriaka, valaaulia soo se tagata o le aiga o loo auai e tusifaamaumau o latou lagona ma faasoa atu i lau tama.

Mauaina o le Faaeega Paia

E finagalo le Atua e faaee, pe faamanuia, Ana fanau uma i le “mana mai luga” (Mataupu Faavae ma Feagaiga 95:8). E nao le faatasi ona tatou o i le malumalu ina ia maua o tatou lava faaeega paia, ae o feagaiga tatou te osia ma le Atua ma le mana faaleagaga Na te tuuina mai ia i tatou o se vaega o le faaeega paia e mafai ona faamanuiaina ai i tatou i aso uma o o tatou olaga.

• Faaali se ata o le malumalu i totonu o lou fale. Ta’u atu i lau tama e uiga i lagona e te maua i totonu o le maota o le Alii. Talanoa soo e uiga i lou alofa mo le Alii ma Lona maota ma feagaiga na e osia iina. Vaavaai mo avanoa e o ai i le malumalu ma lau tama e faatino papatisoga ma faamauga mo o latou tuaa.

• Suesue faatasi i le temples.ChurchofJesusChrist.org. Faitau faatasi tusitusiga e pei o le “E Uiga i Le Faaeega Paia o le Malumalu” ma le “Saunia mo le Maota o le Alii.” Tuu atu i lau tama e fai atu soo sana fesili e uiga i le malumalu. Mo le taitaiga e uiga i mea e mafai ona e talanoa i ai i fafo atu o le malumalu, tagai i le savali a Elder David A. Bednar “Saunia e Maua Mea Manaomia Uma” (Liahona, Me 2019, 101–4; tagai faapitoa lava i le vaega ua faaautuina “Aoaoina ma le Sauniuniga mo le Malumalu e Faatotonugalemu-i-le-Aiga ma Lagolagoina-e-le-Ekalesia”).

• A o e auai ma lau tama pe molimauina isi sauniga (e pei o le faamanatuga po o se faamanuiaga o le faamalologa), faaalu sina taimi e talanoa ai i faatusa o loo aofia ai i le sauniga. O a mea e suitulaga i faatusa? E faapefea ona latou molimau ia Iesu Keriso? E mafai ona fesoasoani lenei mea i lau tama e saunia ai e mafaufau loloto i le uiga faafaatusa o sauniga o le malumalu, lea foi e molimau ia Iesu Keriso.

• Fesoasoani i lau tama ia iloa le ala o loo latou tausia ai feagaiga o le papatisoga o loo faamatalaina i le Mosaea 18:8–10, 13. Fesoasoani foi i lau tama ia iloa le auala o loo faamanuia ai i latou e le Alii. Fausia le talitonuga o lau tama i lo latou gafatia e tausia feagaiga.

• Talanoa soo ma faifai pea e uiga i le auala e taiala ai e au feagaiga o le malumalu au filifiliga ma fesoasoani e te ola latalata atili atu ai ia Iesu Keriso. E mafai ona e faaaogaina le Tusitaulima Aoao, 27.2, e toe faamanatu ai feagaiga tatou te osia i le malumalu. Afai ua e mauaina le faaeega paia, tau atu i lau fanau e uiga i le auala e fesoasoani ai le ofusa o le malumalu ia te oe e manatua au feagaiga ma Iesu Keriso (tagai i le “Ofu Paia o le Malumalu” [vitiō], Gospel Library).

Sacred Temple Clothing

From ancient times, men and women have embraced sacred music, different forms of prayer, religious vestments full of symbolism, gestures and rituals to express their innermost feelings of devotion to God.

Auauna Atu i se Misiona

Na aoao mai Elder David A. Bednar: “O le mea sili ona taua e tasi e mafai ona e faia ina ia saunia ai mo se valaauga e auauna atu, o le avea lea ma se faifeautalai a o lei taitai ona e alu i se misiona. … O le autu e le o le alu i le misiona; ae, o le autu o le avea ma se faifeautalai ma auauna atu i o tatou olaga atoa ma o tatou loto atoa, mafaufau atoa, manatu atoa, ma le malosi atoa. … O loo outou sauniuni atu mo se galuega faafaifeautalai o le olaga atoa” (“Avea ma se Faifeautalai,” Liahona, Nov. 2005, 45–46). O aafiaga ua i ai i lau tama i le avea ai ma se faifeautalai o le a faamanuiaina ai i latou e faavavau, e le mo na o le vaitaimi e mafai ona ia auauna atu ai o se faifeautalai.

Ina ia aoao atili, tagai i le savali Russell M. Nelson, “Talai Atu o le Talalelei o le Filemu,” Liahona, Me 2022, 6–7; M. Russell Ballard, “O Le Galuega Faafaifeautalai ua Faamanuiaina ai Lo’u Olaga e Faavavau,” Liahona, Me 2022, 8–10; “Valaauga o le Misiona: Fetuunai i le Olaga Faafaifeautalai,” Potutusi o le Talalelei.

• Faataitai pe faapefea ona faasoa atu le talalelei i ni auala masani. Ia mataala i taimi uma i avanoa e faasoa atu ai i isi ou lagona e uiga i le Tama Faalelagi ma le Faaola ma faamanuiaga ua e maua mai se talalelei toefuataiina a le Faaola ma le avea ai ma se tagata o Lana Ekalesia. Valaaulia isi e auai faatasi ma lou aiga i gaoioiga e faatatau i le Ekalesia ma le aiga.

• Vaavaai mo avanoa mo lou aiga e fegalegaleai ai ma faifeautalai. Valaaulia i latou e aoao au uo, pe ofo atu e tuu atu ia i latou e aoao tagata i lou aiga. Fesili atu i faifeautalai e uiga i aafiaga o loo latou mauaina ma pe faapefea ona fesoasoani le galuega faafaifeautalai ia i latou e faalatalata atili atu ai ia Iesu Keriso. Fesili atu foi po o a mea na latou faia (pe moomoo na latou faia) e saunia ai e avea ma faifeautalai.

• Afai na e auauna atu i se misiona, talanoa pea ma talanoa soo e uiga i ou aafiaga. Pe valaaulia ni uo po o tagata o le aiga o e na auauna atu i ni misiona e talanoa e uiga ia latou misiona. E mafai foi ona e talanoa e uiga i auala na e faasoa atu ai le talalelei i isi i lou olaga atoa. Fesoasoani i lau tama e mafaufau i ni auala e mafai ai ona latou faasoa atu le talalelei.

• Tuu atu i lau tama ni avanoa e aoao atu ai mataupu faavae o le talalelei i lou aiga. E mafai foi e lau tama ona faataitai le faasoa atu o o latou talitonuga i isi. Mo se faataitaiga, e mafai ona tou talanoaina fesili e pei o le “E faapefea ona tatou faailoa atu le Tusi a Mamona i se tasi e lei faalogo lava i ai?” po o le “E faapefea ona tatou faamatalaina le manaomia o le Faaola e se tasi e le o se Kerisiano?”

• Fesoasoani i lau tama ia maua se lagona lelei e talanoa atu ai i tagata. O a nisi o auala lelei e amata ai se talanoaga? Uunaia lau tama e aoao pe faapefea ona faalogo i tala a isi, malamalama i mea o loo i o latou loto, ma faasoa atu upumoni o le talalelei e mafai ona faamanuiaina ai o latou olaga.

• Vaavaai mo avanoa mo lau tama e aoao ai e uiga i isi aganuu ma faatuatuaga. Fesoasoani ia i latou ia iloa ma faaaloalo i mataupu faavae lelei ma moni i talitonuga o isi.

Mauaina o le Sauniga o le Faamauga

O totonu o le malumalu, e mafai ona faaipoipoina ai se tane ma se ava mo le faavavau. E faia lenei mea i se sauniga e ta’ua o le “faamauga.” E ui lava o lenei sauniga atonu e tele ni tausaga e mamao ese ai mo lou afafine po o lou atalii, o mea laiti, faatauvaa, ma faifai pea e mafai ona fesoasoani ia te i latou e saunia ai mo lenei faamanuiaga matagofie.

• Faitau faatasi le “O Le Aiga: O Se Folafolaga i le Lalolagi” (Potutusi o le Talalelei). O le a se mea o aoao mai e lenei folafolaga e uiga i le fiafia i le olaga faaleaiga ma e uiga i faaipoipoga faamanuiaina? Faatasi ai ma lau tama, filifili se tasi o mataupu faavae o loo lisi atu i le folafolaga e suesue. E mafai ona e sueina mau e fesootai i lena mataupu faavae i le O le Taiala i Tusitusiga Paia. E mafai foi ona e faatuina ni sini e faaaoga atoatoa ai lena mataupu faavae i lou aiga. A o e galue i au sini, talanoaina faatasi le aafiaga o le ola ai i lena mataupu faavae i le olaga faaleaiga.

• Faatasi ai ma lau tama, faitau le savali a Peresitene Dieter F. Uchtdorf “I Le Viia ai o i Latou o E Laveai” (Liahona, Me 2016, 77–80). Pe a e oo atu i le vaega ua faaautuina “O Se Malo o Mea e Faaaoga ma Toe Lafoa’i,” e mafai ona e vaavaai mo mea i lou fale e mafai ona faaaoga ma isi mea e leai. Talanoa pe faapefea ona ese lou taulimaina o mea pe a e manao ia umi se taimi e aoga ai. O le a se mea o loo fautuaina mai e lenei mea i le auala e tatau ona tatou taulimaina ai faaipoipoga ma sootaga faaleaiga? O le a se isi mea ua tatou aoao mai le savali a Peresitene Uchtdorf e uiga i le ala e mafai ai e le Faaola ona fesoasoani ia i tatou e fausia ni faaipoipoga ma ni aiga malolosi?

• Ia talanoa ma lau tama e uiga i mea o loo e aoaoina ma lou toalua e uiga i le i ai o se faaipoipoga e faavavau e faatotonugalemu ia Keriso ma auala o loo e taumafai e faaleleia atili ai. Afai ua faamauina oe ma lou toalua i le malumalu, faaali atu i lau tama e ala i faataitaiga pe faapefea ona oulua taumafai e tausia a oulua feagaiga ma le Alii. Ta’u i lau tama pe faapefea ona e taumafai e avea le Tama Faalelagi ma le Faaola ma totonugalemu o la oulua sootaga ma le auala o loo La fesoasoani ai ia te oulua (tagai foi i le savali a Ulisses Soares, “I Le Faipaaga ai ma le Alii,” Liahona, Nov. 2022, 42–45).

• Pe a manaomia ona faia ni faaiuga faaleaiga, fai fonotaga faaleaiga ma talanoaga. Ia mautinoa ua faafofogaina ma faatauaina manatu o tagata uma o le aiga. Faaaoga nei talanoaga o se avanoa e faataitai ai fesootaiga lelei ma le agalelei i sootaga faaleaiga, e tusa lava pe le o vaai tagata uma i mea i le ala lava e tasi. (Tagai i le M. Russell Ballard, “Fonotaga Faaleaiga,” Liahona, Me 2016, 63–65.)

• Pe a i ai se feeseeseaiga po o se feteenaiga i le aiga, ia faaalia le onosai ma le agaalofa. Fesoasoani i lau tama ia iloa le auala e mafai ai e le taulimaina o feteenaiga i auala faa-Keriso ona fesoasoani ia i latou ia saunia ai mo se faaipoipoga fiafia. Faitau faatasi le Mataupu Faavae ma Feagaiga 121:41–42, ma talanoa pe mafai faapefea ona faaaoga mataupu faavae o loo i nei fuaiupu i le faaipoipoga.