Jun réplica re li xb’eenil xtz’iib’ankil lix Hu laj Mormon.

1–7 febrero

Tzol’leb’ ut Sumwank 10–11

“Re taaruuq tat-elq jo’ aj q’axonel u”

Xtz’iib’ankil li nakak’oxla naq yookat chirilb’aleb’ ru li loq’laj hu a’an chanchan rawb’aleb’ li iyaj; li kok’ k’oxlahom naru neke’xk’am sa’ li xnimal ru k’utb’esinb’il na’leb’ choq’ aawe.

Tz’iib’a li nakak’oxla

Naq yoo chi uxmank lix jaltesinkil ru lix Hu laj Mormon, kichal jun patz’om: K’a’ raj ru tento te’xb’aanu laj Jose Smith ut laj Oliver Cowdery chirixeb’ li perel jaltesinb’ileb’ ru li ke’sachman? Maare us raj naq te’sutq’iiq ut te’xjaltesi wi’chik ru li raqal a’an, a’b’an li Qaawa’ kiru chirilb’al li k’a’ru ink’a’ ke’ru chirilb’al—naq eb’ li maa’us aj winq ak xe’xk’oxla xjalb’aleb’ li aatin sa’eb’ li perel a’an re xsachb’al xwankil lix musiq’anb’il k’anjel laj Jose. Li Dios ak kixk’uub’ jun na’leb’ re xramb’al ru lix k’anjel laj Satanas ut re xk’eeb’al reeqaj li k’a’ru sachb’il. Li na’leb’ a’in ak k’uub’anb’il chaq k’iila mil chihab’ chaq naq li profeet aj Nefi kimusiq’aak chixtz’iib’ankil jun xkab’il esil li ki’aatinak ajwi’ chirix li hoonal tz’iib’anb’il resil sa’ li xb’een. Moqon, laj Mormon kimusiq’aak chiroksinkil li esil a’in sa’ lix Hu laj Mormon “choq’ re jun li chaab’il ajom” nawb’il ru xb’aan li Qaawa’ (chi’ilmanq Raatin laj Mormon 1:3–7).

“Nim wi’chik xchaab’ilal in na’leb’,” chan li Qaawa’ re laj Jose, “chiru lix seeb’al xb’alaq’ laj tza” (Tzol’leb’ ut Sumwank 10:43). A’an jun na’leb’ li naxk’ojob’ qach’ool sa’eb’ li kutan a’in, naq laj tza yoo chixnimob’resinkil lix k’anjel re xq’unob’resinkil li paab’aal. Jo’ laj Jose, naru naq laa’o “tiikaqo chi paab’ank ut tookanaaq” sa’ li k’anjel b’oqb’ilo wi’ xb’aan li Dios (raqal 3). Toja’ naq taqataw naq a’an ak kixkawresi jun b’e re naq “li rokebʼaal xbʼalbʼa inkʼaʼ taanumtaaq” saʼ qab’een (raqal 69).

Chi’ilmanq Santos, 1:51–61.

Li na’leb’ re xtzolb’aleb’ li loq’laj hu aajunes

Tzol’leb’ ut Sumwank 10:1–33

Laj Satanas naxsik’ xsachb’al lix k’anjel li Dios.

Laj Satanas taawulaq raj chiru naq ink’a’ taajultiko’q qe naq yo’yo a’an—malaj ut naq ink’a’ taqak’e reetal lix yalb’al xq’e chiqeek’asinkil (chi’ilmanq 2 Nefi 28:22–23). A’b’an li raatin li Qaawa sa’ Tzol’leb’ ut Sumwank 10 naxk’utb’esi naq laj Satanas junelik yoo chixka’pak’alinkil ru lix k’anjel li Dios. Naq yookat chirilb’aleb’ ru li raqal 1–33, k’e reetal chan ru naq laj Satanas kixyal xsachb’al xk’anjel li Dios sa’ xk’utankil laj Jose Smith (che’ilmanq ajwi’ li raqal 62–63). K’a’ru nakawil li juntaq’eet rik’in chan ru nak’anjelak laj Satanas sa’ li kutan a’in? Taaruuq taapatz’ re li Qaawa’ nax tatxtenq’a chixk’eeb’al reetal chan ru naq laj Satanas maare yoo chawaalenkil. K’a’ru nakatzol sa’ li tasal 10 li naru tatxtenq’a chixyalb’al aawu rik’in laj Satanas?

Tzolʼlebʼ ut Sumwank 10:34–52

Lix chaab’ilal xna’leb’ li Qaawa’ “nim wi’chik chiru lix seeb’al xb’alaq’ laj tza.”

Numenaq 2400 chihab’ chaq, li Qaawa’ kixkawresi chan ru taak’eemanq reeqajeb’ li perel hu sachsookeb’ re lix Hu laj Mormon (chi’ilmanq 1 Nefi 9). K’a’ru nakatzol chirix li Qaawa’ sa’ Tzol’leb’ ut Sumwank 10:34–52? K’a’ruheb’ li reetalil lix chaab’ilal xna’leb’ ut lix nawom chi junxilaj li Qaawa’ li aawilom sa’ laa yu’am laa’at?

Li tz’iib’anb’il esil kixkawresi li Dios re xk’ulb’al xna’aj li tz’iib’anb’il esil sachso naru natawman sa’ li hu 1 Nefi toj sa’ li hu Omni. Chan ru naq eb’ li seraq’ ut li k’utum sa’ li tz’iib’anb’il esil a’in “q’axal wi’chik neke’xkutanob’resi li evangelio” choq’ aawe laa’at? (Tzol’leb’ ut Sumwank 10:45).

Laj Mormon naxk’oseb’ ru li perel ch’iich’, xb’aan laj Tom Lovell

Tzolʼlebʼ ut Sumwank 11

Wi tintz’aamanq chiru li Dios, tink’uluq.

Wankeb’ junjunq reheb’ lix junkab’al ut li ramiiw laj Jose Smith li ke’xpatz’ re naq tixsik’ li rajom xch’ool li Dios choq’ reheb’. Laj Jose sa xch’ool chixb’aanunkil, a’ut li Qaawa’ kiwan ajwi’ xch’ool chixk’utb’esinkil li na’leb’ reheb’ a’an. Sa’ Tzol’leb’ ut Sumwank 11, jun k’utb’esinb’il na’leb’ kixk’ul laj Jose choq’ re laj Hyrum, li ras, li Qaawa’ kixye, “Tinjek’i aawe xkomon inMusiq’, … toja’ ut naq taanaw … chixjunil li kʼaʼaq re ru li bʼarwan nakawaj wikʼin” (Tzol’leb’ ut Sumwank 11:13–14).

Li Qaawa’ kixye naq li raatin wan choq’ re “chixjunileb’ li chaab’il li rajomeb’, ut ke’xch’ik lix setleb’ ch’iich’ chi q’olok” (raqal 27). Sa’ Tzol’leb’ ut Sumwank 11, k’a’ru yoo li Qaawa’ chixyeeb’al aawe chirix li k’utb’esinb’il na’leb’ choq’ re li junjunq? chirix tz’aqonk sa’ lix k’anjel li Dios? K’a’ chik ru li esil wan rik’in choq’ aawe?

Tzolʼlebʼ ut Sumwank 11:15–26

Naq ninsik’ “xtawb’al li raatin” li Dios, tink’ul lix Musiq’ ut lix wankil.

Us ta maji’ jaltesinb’il ru lix Hu laj Mormon, laj Hyrum Smith ak kiraj ok chixjultikankil li evangelio. Naq yookat chirilb’al ru lix sumehom li Qaawa’ chirix li rajom, k’oxla k’a’ru xyaalalil “xtawb’al li raatin” li Dios (raqal 21). Chan ru naq xtawb’al li raatin li Dios nakatxtenq’a chi k’anjelak sa’ li Iglees? Chan ru naq naxk’am lix wankil li Dios sa’ laa yu’am?

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 10:5.K’a’ru naqatzol sa’ li raqal a’in chirix lix wankilal li tijok? Chan ru naq “junelik tootijoq”? (Re xtawb’al junjunq na’leb’, ch’ilmanq David A. Bednar, “Ora siempre,” Liahona, noviembre 2008, 41–44.)

Tzol’leb’ ut Sumwank 10:38–46.Re xtenq’ankil laa junkab’al chi aatinak chirix chan ru naq li Qaawa’ kixk’e reeqajeb’ li perel hu li ke’sach sa’ xjaltesinkil ru lix Hu laj Mormon, maare eb’ li komon sa’ li junkab’al taaruuq te’aatinaq chirix k’a’ruhaq li toje’ xsach chiruheb’. K’a’ru ke’reek’a naq ke’xk’e reetal naq sachso? K’a’ru ke’reek’a naq ke’xtaw? Us ta maajun wa ke’tawman li perel hu sachsookeb’ re lix Hu laj Mormon, chan ru naq li Qaawa’ kixk’e reeqajeb’, jo’ yeeb’il sa’ Tzol’leb’ ut Sumwank 10:38–46?

Tzol’leb’ ut Sumwank 10:55–70.Kanab’eb’ li komon sa’ li junkab’al chixtawb’al malaj chixjuch’b’aleb’ li ch’ol aatin li neke’tikla rik’in li aatin “Laa’in” malaj rik’in jun aatin naxch’olob’ naq a’an tixb’aanu k’a’ruhaq. K’a’ru naqatzol rik’ineb’ li ch’ol aatin neke’tikla rik’in “Laa’in” chirix ani li Jesukristo ut chan ru a’an? K’a’ru naqatzol rik’ineb’ li ch’ol aatin neke’aatinak chirix li tixb’aanu a’an? Waklesi xch’ooleb’ li komon sa’ li junkab’al chixwotzb’al chan ru naq eb’ li yaalil na’leb’ a’in neke’xkawob’resi lix paab’aaleb’ chirix li Jesukristo.

Tzol’leb’ ut Sumwank 11:12–14.Rilb’aleb’ ru li raqal a’in naru tixtenq’aheb’ li komon sa’ laa junkab’al chixk’eeb’al reetal jo’q’e yoo chi aatinak li Musiq’ej rik’ineb’. Taaruuq taak’ut jun li pook chiru li tz’ak ut taaye re jun komon sa’ li junkab’al naq taaxik b’ar wi’ nalemtz’un li saqen. Chan ru naq a’in chanchan xtaaqenkil lix b’eresihom li Santil Musiq’ej? K’a’ru aak’ulum li taaruuq raj taawotz?

Tzol’leb’ ut Sumwank 11:15–30.Taaruuq taatz’iib’a chi tustu li k’a’ru kixye li Qaawa’ re laj Hyrum Smith naq tixb’aanu re naq kawresinb’ilaq re xwotzb’al li evangelio. K’a’ru tento taqab’aanu jo’ junkab’al?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Tintzol, tink’oxla, tintijoq,” B’ichleb’aal choq’ reheb’ li Kok’al, 66; chi’ilmanq “Li na’leb’ re xchaab’ilob’resinkil li tzolok sa’ junkab’al.”

Xchaab’ilob’resinkil li qak’utum

Junta’qeetaheb’ li loq’laj hu rik’in laa yu’am. Chirix rilb’al ru jun raqal sa’eb’ li loq’laj hu, patz’ reheb’ li komon sa’ li junkab’al naq te’xwotz chan ru naru xk’anjelankil li raqal a’an sa’ lix yu’ameb’. Qayehaq, te’ruuq chixwotzb’al chan ru naq li Musiq’ej xreek’asiheb’ jo’ chanru yeeb’il resil sa’ Tzol’leb’ ut Sumwank 11:12–13.

Laj Jose ut laj Hyrum Smith, xb’aan laj Ken Corbett