“22–28 febrero. Tzol’leb’ ut Sumwank 18–19: “Nim lix loq’aleb’ li aamej,” ” Kim, Taaqehin—Choq’ reheb’ li komon ut li junkab’al: Li Tzol’leb’ ut Sumwank 2021 (2020)
“22–28 febrero. Tzol’leb’ ut Sumwank 18–19,” Kim, Taaqehin—Choq’ reheb’ li komon ut li junkab’al: 2021
Lix ch’och’ laj Martin Harris, xb’aan laj Al Rounds
22–28 febrero
Tzol’leb’ ut Sumwank 18–19
“Nim lix loq’aleb’ li aamej”
Eb’ li k’utb’esinb’il na’leb’ sa’ li Tzol’leb’ ut Sumwank ke’k’ehe’ jo’ xsumenkil li k’a’ru yoo chi k’ulmank haye’ 200 chihab’ chaq, a’b’an maak’a’ roso’jik x’aajelileb’ ru li na’leb’ neke’xk’ut. Sik’eb’ li na’leb’ a’an naq yookat chirilb’al ru, ut k’oxla chan ru neke’k’anjelak sa’ laa yu’am.
Tz’iib’a li nakak’oxla
Q’axal chaab’il lix ch’och’ laj Martin ut li xLucy Harris aran Palmyra, Nueva York. Chiru naab’al chihab’ ke’k’anjelak re xloq’b’al, ke’xk’iresi lix junkab’aleb’ aran, ut chaab’il xwanjikeb’ sa’ li tenamit xb’aan. A’b’an sa’ 1829 ke’xk’e reetal naq ka’ajwi’ taaruuq raj taapuktesimanq lix Hu laj Mormon wi laj Martin tixk’e chi to’ lix ch’och’ re xtojb’al laj k’uub’anel hu. Laj Martin wan xnawom xch’ool chirix lix Hu laj Mormon, a’b’an xLucy ink’a’. Wi laj Martin tixk’e xch’och’ chi to’ ut moko naab’aleb’ ta lix Hu laj Mormon te’k’ayiiq, taasachq xch’och’ chiru ut maare lix sumlajik ajwi’. Wan naq chiqajunilo naqapatz’ li k’a’ru kixpatz’ tana’ laj Martin: K’a’ru xtz’aq lix evangelio li Jesukristo choq’ we? K’a’ raj tu tinmayeja re tenq’ank chixkab’lankil li rawa’b’ejihom li Dios? Us raj naq taajultiko’q qe naq maa’ani kixtoj jun tz’aq q’axal wi’chik nim re rosob’tesinkileb’ li ralal xk’ajol li Dios chiru li kixtoj li Jesukristo, “li q’axal nim wi’chik chiru chixjunil” (Tzol’leb’ ut Sumwank 19:18).
Laj Martin kixk’e xch’ool chixk’eeb’al lix ch’och’ chi to’. Rik’in li mayej a’in li kixk’e, kitojman xtz’aq xpuktesinkil oob’ mil lix Hu laj Mormon. Ut anajwan, chirix naq ak puktesinb’il 190 millon chi hu, ke’osob’tesiik k’iila millon chi aamej chiru li ruchich’och’.
Re xtzolb’al xkomon chik li na’leb’ chirix lix puktesinkil lix Hu laj Mormon, chi’ilmanq Santos, 1:76–84.
Li na’leb’ re xtzolb’aleb’ li loq’laj hu aajunes
Li Qaawa’ nasaho’ xch’ool naq naqajal qak’a’uxl.
K’e reetal naq k’iila sut neke’oksiman li aatin jalok ch’oolej ut jalb’a-k’a’uxlej sa’ Tzol’leb’ ut Sumwank 18 ut 19, ut k’oxlan chirix k’a’ru naru taatzol rik’ineb’ li aatin a’in rajlal sut naq neke’oksiman. K’oxla chi us Tzol’leb’ ut Sumwank 18:10–16; k’a’ru naxk’e chaweek’a chirix li jalb’a-k’a’uxlej—lix jalb’al aak’a’uxl laa’at ut li teneb’ank chixb’oqb’aleb’ jalan re te’xjal xk’a’uxl?
Chi’ilmanq ajwi’ Alma 36:18–21; Dale G. Renlund, “Li jalb’a-k’a’uxlej: jun sahil ch’oolejil,” Jolomil ch’utub’aj-ib’ re noviembre 2016.
Naru nawab’i lix yaab’ xkux li Qaawa’ sa’ li Tzol’leb’ ut Sumwank.
Wi ta tixpatz’ anihaq aawe chan ru xyaab’ xkux li Qaawa’, k’a’ raj ru taaye? K’oxla li patz’om a’in naq yookat chirilb’al ru Tzol’leb’ ut Sumwank 18:34–36. K’a’ru xatzol chirix lix yaab’ xkux li Qaawa’ rik’in rilb’al ru li Tzol’leb’ ut Sumwank? K’a’ru naru taab’aanu re rab’inkil lix yaab’ xkux chi saqen wi’chik ru?
Li Jesukristo kixk’ul rahilal re naq laa’in tinruuq chixjalb’al ink’a’uxl ut chi chalk rik’in.
Li Ak’ Chaq’rab’ naxye resil lix rahilal li Kolonel sa’ Getsemani jo’ ilb’il xb’aaneb’ li ke’ilok re. Sa’ Tzol’leb’ ut Sumwank 19:15–20, li Jesukristo kiroksi tz’aqal li raatin re xch’olob’ankil li rahilal kinume’ wi’. Naq yookat chirilb’al ru li loq’laj esil a’in, sik’eb’ li aatin ut ch’ol aatin li neke’xch’olob’ lix rahilal li Kolonel. K’oxla k’a’ru naxk’ut li junjunq aatin malaj ch’ol aatin chawu. K’a’ut naq kiwan xch’ool li Kolonel chixk’ulb’al li rahilal? K’oxla xtz’iib’ankil li nakaweek’a chirix li Jesukristo ut lix mayej choq’ aawe.
Chi’ilmanq Jwan15:13; Mosiah 3:7; Alma 7:11–12; Tzol’leb’ ut Sumwank 18:10–13.
Lix loq’al jun aamej, xb’aan xLiz Lemon Swindle
Tzol’leb’ ut Sumwank 19:26–27, 34–41
Eb’ li rosob’tesihom li Dios ninqeb’ wi’chik chiru xb’ihomal li ruchich’och’.
Moko naab’aleb’ ta lix Hu laj Mormon ke’k’ayiik sa’ Palmyra, ut xmaak a’an, laj Martin Harris tento naq kixk’ayi jun nimla raqal re lix ch’och’ re xtojb’al li k’as (chi’ilmanq “La contribución de Martin Harris,” Revelaciones en contexto, 8–9). K’oxla li mayej a’an—ut’ eb’ li osob’tesink xak’ul laa’at xb’aan—naq yookat chirilbaleb’ ru li raqal a’in. Naru ajwi’ tatk’oxlaq chirix k’a’ru xpatz’ li Qaawa’ naq taamayeja laa’at. K’a’ru nakataw sa’eb’ li raqal a’in li nareek’asi aach’ool chi mayejak “chi sa aach’ool” ut rik’in “sahilal”? (che’ilmanq ajwi’ li raqal 15–20).
Li tuqtuukilal nachal rik’in tzolok chirix li Jesukristo ut xtaaqenkil a’an.
K’oxla lix b’oqom li Qaawa’: “Chattzoloq chiwix.” K’a’ru nakatzol chirix li Jesukristo sa’ Tzol’leb’ ut Sumwank 19? Tz’iib’a li nakak’oxla, ut k’oxlan chirix chan ru naq eb’ li yaalil na’leb’ a’in chirix li Kolonel nakate’xtenq’a chixtawb’al li tuqtuukilal. K’a’ru xyaalalil choq’ aawe li “b’eek sa’ xtuulanil lix Musiq’ ”?
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Tzol’leb’ ut Sumwank 18:1–5.Maare eb’ li komon sa’ li junkab’al taaruuq te’xwotz junjunq reheb’ li “k’iila sut” (raqal 2) naq li Musiq’ej xk’utb’esi chiruheb’ naq yaaleb’ li loq’laj hu, jo’ kixb’aanu choq’ re laj Oliver Cowdery. Chan ru naq laa junkab’al taaruuq “te’xkanab’ rib’ chiru li k’a’aq re ru tz’iib’anb’il” (raqal 3) sa’eb’ li loq’laj hu? Chan ru naru taakab’la lix k’ojleb’aal laa junkab’al sa’ xb’een li “saqoonaq” (raqal 4) re li evangelio?
-
Tzol’leb’ ut Sumwank 18:10–13; 19:16–19.Li junjunq komon sa’ li junkab’al taaruuq taaril ru Tzol’leb’ ut Sumwank 18:10–13, ut tixk’e xk’ab’a’ sa’ xna’ajeb’ li aatin “li aamej,” “eb’ li aamej,” ut “chixjunileb’ li winq.” Chirix a’an texruuq chi aatinank chirix chan ru naq eb’ li raqal a’in nokohe’xtenq’a chixtawb’al ru li qaloq’al sa’ rilob’aal li Yuwa’b’ej ut li K’ajolb’ej (chi’ilmanq Tzol’leb’ ut Sumwank 19:16–19).
-
Tzol’leb’ ut Sumwank 18:21–25.Ma wan li k’a’ru naraj naxye junjunq reheb’ lix k’ab’a’eb’ li komon sa’ li junkab’al? Maare texruuq chi aatinank chirix k’a’ut naq aajeleb’ ru li k’ab’a’ej ut k’a’ru naraj naxye xk’ulb’al sa’ qab’een lix k’ab’a’ li Jesukristo (chi’ilmanq Mosiah 5:7). A’in jun chaab’il hoonal re xtenq’ankileb’ li komon sa’ li junkab’al chixkawresinkileb’ rib’ re xk’ulb’al sa’ xb’eeneb’ lix k’ab’a’ li Jesukristo naq te’kub’eeq xha’.
-
Tzolʼlebʼ ut Sumwank 19:15–20.Re naq laa junkab’al tixtaw chaab’ilal rik’ineb’ li raqal a’in, maare taaruuq taawileb’ ru naq yookat chixk’utb’al jun xjalam-uuch li Jesukristo (wan jun sa’ li tusleb’ aatin a’in). Chirix a’an, eb’ li komon sa’ li junkab’al taaruuq te’xwotz li neke’reek’a chirix li Kolonel. Jun b’ich nawulak cheru taaruuq ajwi’ tixk’e xb’oqb’al li Musiq’ej.
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Sachso ninkana,” Eb’ li B’ich, 118.
Xchaab’ilob’resinkil li tzolok aajunes
Oksiheb’ li patz’om. Li Tzol’leb’ ut Sumwank a’an naxk’ut xyaalal naq eb’ li patz’om neke’xk’am sa’ li k’utb’esinb’li na’leb’. Naq yookat chixtzolb’aleb’ li loq’laj hu, tz’iib’aheb’ li patz’om nakak’oxla. Toja’ naq taak’oxlaheb’ ut tattijoq re xsik’b’al xsumenkileb’.
Li Jesus natijok sa’ li Awimq Getsemani, xb’aan laj Hermann Clementz