Li rochoch laj Peter Whitmer, xb’aan laj Al Rounds

1–7 marzo

Tzol’leb’ ut Sumwank 20–22

“Lix waklijik lix Iglees li Kristo”

Naq yookat chirilb’al ru Tzol’leb’ ut Sumwank 20–22, k’e reetal lix musiq’ahom li Santil Musiq’ej. K’oxla xtz’iib’ankil re naq taaruuq taawileb’ ru moqon.

Tz’iib’a li nakak’oxla

Lix k’anjel li Profeet aj Jose Smith re xjaltesinkil ru lix Hu laj Mormon ak choyb’il chik. A’b’anan li k’anjel re li k’ojob’ank wi’chik toje’ yoo chi tiklaak. Rik’in li k’a’ru ak k’utb’esinb’il, ch’olch’o ru naq rochb’een xk’ojob’ankil wi’chik li tzol’leb’ ut li wankilal re li tijonelil, li Qaawa’ kiraj ajwi’ xk’ojob’ankil wi’chik jun k’uub’anb’il ch’uut—a’ lix Iglees (chi’ilmanq Tzol’leb’ ut Sumwank 10:53; 18:5). Jo’kan naq sa’ li 6 xb’e li po abril, 1830, numenaq 40 chi aj paab’anel ke’xch’utub’ rib’ sa’ rochoch li junkab’al Whitmer aran Fayette, Nueva York, re rilb’al lix k’uub’lajik lix Iglees li Jesukristo.

A’ut, wankeb’ li neke’xpatz’, k’a’ut naq aajel ru jun k’uub’anb’il Iglees? Jun raqal re lix sumenkil a’an naru natawman sa’eb’ li k’utb’esinb’il na’leb’ wankeb’ rilom rik’in li xb’eenil ch’utam a’an re li Iglees sa’ 1830. Arin, yeeb’ileb’ resil li osob’tesink maajaruj raj te’uxq wi ta ink’a’ “k’uub’anb’il ut xaqab’anb’il chi ch’olch’o” lix Iglees li Jesukristo sa’ roso’jikeb’ li kutan (Tzol’leb’ ut Sumwank 20:1).

Chi’ilmanq ajwi’ Santos, 1:84–87, ut “Edifica mi iglesia,” Revelaciones en contexto, 32–35.

Li na’leb’ re xtzolb’aleb’ li loq’laj hu aajunes

Tzol’leb’ ut Sumwank 20:1–36

K’ojob’anb’il lix Iglees li Jesukristo reheb’ laj Santil Paab’anel sa’ Roso’jikeb’ li Kutan sa’ xb’een li yaalil tzol’leb’.

Naxye sa’ xtiklajik li tasal 20 naq a’an jun “k’utb’esinb’il na’leb’ chirix lix k’uub’lajik ut lix b’eresinkil li Iglees” (aatin sa’ xtiklajik li tasal). A’ut rub’elaj naq na’aatinak chirix li taab’eresimanq wi’ li Iglees, li opiis re li tijonelil, ut chan ru xb’aanunkileb’ li k’ojob’anb’il k’anjel, li k’utb’esinb’il na’leb’ a’in natikla rik’in xk’utb’al li tzol’leb’ jwal aajel ru. Naq yookat chirilb’aleb’ ru li 36 raqal sa’ xtiklajik li k’utb’esinb’il na’leb’ a’in, patz’ aawib’ k’a’ut naq tusub’anb’il chi jo’kan. Naru ajwi’ taatz’iib’a chi tustu eb’ li yaalil na’leb’ re li evangelio nakataw. Wahe’ junjunqeb’:

• Lix Hu laj Mormon ut lix k’anjel sa’ li k’ojob’ank wi’chik (eb’ li raqal 8–12)

• Chan ru naq wan li Dios (eb’ li raqal 17–19)

• Lix tojb’al rix li maak xb’aan li Jesukristo (eb’ li raqal 20–27)

K’a’ut naq aajel ru xka’jultikankileb’ li yaalil na’leb’ a’in naq yoo chaq chi xaqab’amank li Iglees?

Tzol’leb’ ut Sumwank 20:37, 75–79

Tz’aqal aajeleb’ ru li santil k’ojob’anb’il k’anjel sa’ li Iglees k’ojob’anb’il wi’chik.

Naq kik’uub’aman li Iglees, li Qaawa’ kixtzoleb’ lix santil paab’anel chirixeb’ li santil k’ojob’anb’il k’anjel, jo’ li kub’iha’ ut li loq’laj wa’ak. Naq yookat chirilb’aleb’ ru li na’leb’ “chirix chan ru taa’uxq li kub’iha’ ” sa’ li raqal 37, k’oxla laa kub’iha’ laa’at. Ma xaweek’a junaq reheb’ li eek’ahom yeeb’ileb’ resil sa’ li raqal a’in? Ma toj nakaweek’a anajwan? K’oxla k’a’ru naru taab’aanu re naq junelik “k’eek’ooq aach’ool chi k’anjelak chiru li Jesukristo toj sa’ roso’jik.”

Naq yookat chirilb’al ru resil li loq’laj wa’ak sa’ Tzol’leb’ ut Sumwank 20:75–79, yal rilb’aleb’ li loq’laj tij a’in jo’ taarileb’ raj ru anihaq li maajun wa rab’ihomeb’. K’a’ruheb’ li na’leb’ nakak’ul chirix li loq’laj wa’ak? chawix laa’at? Chan ru naq eb’ li na’leb’ a’in naru te’xjal chan ru nakakawresi aawib’ re xk’ulb’al li loq’laj wa’ak sa’ li xamaan a’in?

Li loq’laj wa’ak a’an jun santil k’ojob’anb’il k’anjel.

Tzolʼlebʼ ut Sumwank 20:38–60

Li k’anjelak sa’ li tijonelil narosob’tesiheb’ li komon sa’ li Iglees ut lix junkab’aleb’.

Wi anihaq tixpatz’ raj aawe naq taaye k’a’ruheb’ lix k’anjel jun aj k’amol re li tijonelil, k’a’ raj ru taaye? Il ru Tzol’leb’ ut Sumwank 20:38–60, tustu wi’ lix k’anjeleb’ junjunqeb’ li opiis re li tijonelil. Ma wan k’a’ruhaq sa’eb’ li raqal a’in li naxjal chan ru nakak’oxlaheb’ li k’anjel re li tijonelil ut chan ru naq li Kolonel naxb’aanu xk’anjel? Chan ru xat-osob’tesiik xb’aan li k’anjel yeeb’il resil sa’eb’ li raqal a’in?

Re xtzolb’al chan ru naq eb’ li ixq neke’xk’anjela lix wankilal li tijonelil sa’ xk’anjel li Iglees, chi’ilmanq Dallin H. Oaks, “Eb’ li laaw ut wankilal re li tijonelil,” Jolomil ch’utub’aj-ib’ re abril 2014.

Tzolʼlebʼ ut Sumwank 21

B’eresinb’il lix Iglees li Jesukristo xb’aan jun yo’yookil profeet.

K’a’ru nakatzol sa’ Tzol’leb’ ut Sumwank 21:4–9 chirix li raatineb’ lix profeet li Dios? K’oxlaheb’ li yeechi’ihom yeeb’ileb’ resil sa’ li raqal 6 choq’ reheb’ li neke’k’uluk re li raatin li Dios sa’ xtz’uumal re lix profeet. K’a’ru xyaalalileb’ li yeechi’ihom a’in choq’ aawe?

Chan ru naru taak’ul li raatin li yo’yookil profeet “chanchan sa’ tz’aqal xtz’uumal re” li Dios? (raqal 5). K’a’ruheb’ li na’leb’ naxk’e li profeet anajwan li naru te’k’amoq sa’eb’ li osob’tesink wankeb’ sa’ li raqal 6?

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzolʼlebʼ ut Sumwank 20.K’a’ raj ru taaye wi anihaq tixpatz’ k’a’ut naq naqaj ru li Iglees? K’a’ruheb’ lix sumenkil a’an naqataw sa’ Tzol’leb’ ut Sumwank 20? Chi’ilmanq ajwi’ D. Todd Christofferson, “K’a’ut naq wan li Iglees,” Jolomil ch’utub’aj-ib’ re octubre 2015.

Tzol’leb’ ut Sumwank 20:69.K’a’ru naraj naxye “b’eek sa’ santilal chiru li Qaawa’ ”? Maare taawulaq chiruheb’ li komon sa’ li junkab’al xyiib’ankil xjalam-uuch malaj xtz’iib’ankil chiru hu li k’a’ru taaruuq tixtenq’aheb’ chi b’eek sa’ santilal malaj li k’a’ru taaruuq tixrameb’ sa’ xb’aanunkil. Chirix a’an taaruuq te’xyiib’ jun b’e rik’ineb’ li hu ut te’xyal b’eek chiru li b’e, ka’ajwi’ sa’ xb’eeneb’ li jalam-uuch li te’k’amoq reheb’ rik’in li Kristo.

Tzol’leb’ ut Sumwank 20:37, 71–74.Wi wan anihaq sa’ laa junkab’al maji’ kub’enaq xha’, eb’ li raqal a’in taruuq te’xtikib’ li aatinak chirix chan ru xkawresinkil qib’ choq’ re li kub’iha’ (chi’ilmanq li raqal 37) ut chan ru nekeb’aanuman li kub’iha’ (che’ilmanq li raqal 71–74). Eb’ li komon sa’ li junkab’al taaruuq te’xwotz li jalam-uuch malaj li najultiko’ reheb’ chirix li kutan naq xe’kub’e xha’.

Tzol’leb’ ut Sumwank 20:75–79.Chan ru taaruuq laa junkab’al chiroksinkileb’ li raqal a’in re xkawresinkileb’ rib’ re xk’ulb’al li loq’laj wa’ak chi tiikeb’ xk’a’uxl ut rik’in oxloq’? Maare eb’ li raqal a’in neke’xye resil k’a’ru naru xk’oxlankil sa’ xhoonalil li loq’laj wa’ak, ut eb’ li komon sa’ li junkab’al taaruuq te’xtaw malaj te’xyiib’ xjalam-uuch li k’a’aq re ru a’an. Jo’ na’ajman, maare taaruuq taak’ameb’ chaq li jalam-uuch a’an sa’ li ch’utam re li loq’laj wa’ak re xjultikankil aawe k’a’ru tento taak’oxla sa’ xhoonalil li loq’laj wa’ak.

Tzol’leb’ ut Sumwank 21:4–7.K’oxla xk’eeb’al xb’oqb’aleb’ li komon sa’ li junkab’al chixsik’b’aleb’ li aatin ut ch’ol aatin sa’eb’ li raqal 4–5 li nokohe’xtzol chirix xtaaqenkil lix profeet li Qaawa’. K’a’ru naraj naxye xk’ulb’al li raatin li profeet rik’in kuyuk? rik’in paab’aal? Jo’q’e xqak’uleb’ li osob’tesink li yeeb’ileb’ resil sa’ li raqal 6?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Lix iglees li Jesukristo,” B’ichleb’aal choq’ reheb’ li Kok’al, 48.

Xchaab’ilob’resinkil li qak’utum

B’aanu jo’ li kixb’aanu li Kolonel. “Lix wankil li Kolonel chi k’utuk ut chi waklesink ch’oolej kichal rik’in chan ru xyu’am, ut chan ru a’an jo’ winq. Wi yalyo wi’chik aaq’e chi wank sa’ laa yu’am jo’ chanru kiwan li Jesukristo, q’axal wi’chik tatruuq chi k’utuk jo’ chanru kik’utuk a’an” (Li k’utuk jo’ li Kolonel, 13).

Laj Oliver Cowdery naxk’ojob’ laj Jose Smith, xb’aan laj Walter Rane