aj Jose Smith

15–21 marzo

Tzol’leb’ ut Sumwank 27–28

“Chixjunil li k’a’aq re ru tento taab’aanumanq chi tustu”

Li Elder D. Todd Christofferson kixye naq wi taatzoleb’ li loq’laj hu ut taatz’iib’a li nakak’oxla, “taak’e xna’aj li raatin li Dios sa’ laa ch’ool, ut a’an yooq chi aatinak aawik’in” (“Cuando te hayas convertido,” Liahona, mayo 2004, 11).

Tz’iib’a li nakak’oxla

Xk’ulb’al li na’leb’ chi k’utb’esinb’il a’an jun ak’ na’leb’ choq’ reheb’ laj santil paab’anel naq yoo chaq chi k’ulmank li k’ojob’ank wi’chik. Eb’ li xb’eenil komon sa’ li Iglees ke’xnaw naq laj Jose Smith naru chixk’ulb’al li k’utb’esinb’il na’leb’ choq’ re li Iglees, a’b’an ma wankeb’ chik li neke’ru chixk’ulb’al? Tz’aqal aajeleb’ ru li patz’om jo’ a’an naq laj Hiram Page, jun reheb’ li waqxaqib’ chi aj yehol nawom chirixeb’ li perel ch’iich’ oor, kixpaab’ naq wan li k’utb’esinb’il na’leb’ kixk’ul choq’ re li Iglees. Ke’wan naab’aleb’ aj santil paab’anel li ke’xk’oxla naq re li Dios li k’utb’esinb’il na’leb’ a’an. Li Qaawa’ kisumen rik’in xk’utb’al naq sa’ lix Iglees “chixjunil li k’a’aq re ru tento taab’aanumanq chi tustu” (Tzol’leb’ ut Sumwank 28:13), li kiraj xyeeb’al naq jun ajwi’ li “taaxaqab’amanq chixk’ulb’aleb’ li taqlahom ut k’utb’esinb’il na’leb’ ” choq’ re chixjunil li Iglees (Tzol’leb’ ut Sumwank 28:2). A’ut jo’kan ajwi’, jalaneb’ chik te’ruuq chixk’ulb’al li k’utb’esinb’il na’leb’ choq’ re li xe’tz’aq wi’ sa’ lix k’anjel li Qaawa’. Relik chi yaal, li raatin li Qaawa’ re laj Oliver Cowdery naxk’e chi jultiko’k qe chiqajunil: “Taak’eemanq aawe … k’a’ru taab’aanu” (Tzol’leb’ ut Sumwank 28:15).

Chi’ilmanq ajwi’ “Es preciso que todas las cosas se hagan con orden,” Revelaciones en contexto, 54–57.

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzol’leb’ ut Sumwank 27:1–4

Tento tink’ul li loq’laj wa’ak chi junaj ru lix sa’ wu sa’ lix loq’al li Dios.

Li xSally Knight ut li xEmma Smith ke’kub’e xha’ sa’ li po junio re 1830, a’b’an kirame’ ru lix k’ojob’ankileb’ choq’ komon xb’aan jun ch’uut chi winq. Wiib’ po chirix a’an, li xSally ut lix b’eelom, laj Newel, kole’rula’ani li xEmma ut laj Jose, ut kisik’man ru naq sa’ li hoonal a’an te’k’ojob’aaq choq’ komon, ut sa’ komonil te’xk’ul li loq’laj wa’ak. Naq yoo chi xik chixtawb’al li viin choq’ re li loq’laj wa’ak, kixaqab’aak laj Jose xb’aan jun li anjel. K’a’ru kixk’ut li anjel chiru chirix li loq’laj wa’ak? (chi’ilmanq Tzol’leb’ ut Sumwank 27:1–4).

K’a’ru neke’xk’ut chawu li raqal a’in chirix chan ru naq li Qaawa’ naraj naq tatwanq naq taak’ul li loq’laj wa’ak? K’a’ru nakatmusiq’aak chixb’aanunkil xb’aan li k’a’ru nakatzol?

li kaxlan wa ut ha’ choq’ re li loq’laj wa’ak

Li loq’laj wa’ak naxk’e chi jultiko’k qe lix mayej li Kolonel.

Tzol’leb’ ut Sumwank 27:15–18

Li kolb’a-ib’ aq’ej re li Dios tinixtenq’a chixxaqab’ankil wib’ chiru li maa’usilal.

Li Awa’b’ej M. Russell Ballard kixye: “Maak’a’ junaq xnimal ru b’aanuhom naru taqab’aanu re xk’eeb’al chiqix li qamusiq’ejil kolb’a-ib’ aq’ej. Li tz’aqal musiq’ejil wankilal natawman sa’ k’iila kok’ b’aanuhom li kemb’ileb’ rib’ jo’ xt’ikrul li musiq’ejil kawilal li naxkol qix chiru chixjunil li maa’usilal” (“Be Strong in the Lord,” Ensign, julio 2004, 8).

Naq yookat chirilb’al ru Tzol’leb’ ut Sumwank 27:15–18, taaruuq taayiib’ jun kaaxukuut jo’ li wan rub’el a’in. K’a’ru yookat chixb’aanunkil re xk’eeb’al chawix li junjunq xcha’al lix kolb’a-ib’ aq’ej li Dios?

Li paay chi kolb’a-ib’ aq’ej	Lix cha’al li tib’elej li kolb’il rix b’aan	K’a’ru nareetali li cha’alej a’an
Li ramb’al ru ch’oolej re tiikilal	Li ch’oolej	Li rajom li qach’ool ut li reek’ob’aal li qach’ool
Li xramb’al jolomej re li kolb’a-ib’	Li jolom malaj li ulul

Chi’ilmanq ajwi’ Efesios 6:11–18; 2 Nefi 1:23.

Tzolʼlebʼ ut Sumwank 28

Li yo’yookil profeet a’an aj k’amol aatin re li Dios choq’ re lix Iglees.

K’oxla chan raj ru toowanq wi ta yalaq ani taaruuq chixk’ulb’aleb’ li taqlahom ut k’utb’esinb’il na’leb’ choq’ re chixjunil li Iglees. Naq laj Hiram Page kixye naq kixk’ul li k’utb’esinb’il na’leb’ jo’ a’an, kiwan chi sachso xna’leb’eb’ li komon sa’ li Iglees. Sa’ Tzol’leb’ ut Sumwank 28, li Qaawa’ kixk’utb’esi chan ru naq taak’ule’q li k’utb’esinb’il na’leb’ sa’ lix Iglees. K’a’ru nakatzol sa’ li tasal a’in chirix lix k’anjel li Awa’b’ej re li Iglees? K’a’ru nakatzol rik’in li raatin li Qaawa’ re laj Oliver Cowdery sa’ li raqal 3? K’a’ru nakatzol sa’ li tasal a’in chirix chan ru naq naru tatxb’eresi li Dios?

Chi’ilmanq ajwi’ Dallin H. Oaks, “Dos líneas de comunicación,” Liahona, noviembre 2010, 83–86.

Tzolʼlebʼ ut Sumwank 28:8–9

K’a’ut naq nim ru lix mision laj Oliver Cowdery rik’ineb’ laj Lamanita?

Jun rajom lix Hu laj Mormon, a’an “naq eb’ laj Lamanita te’k’ame’q chixnawb’al chirixeb’ lix yuwa’eb’, ut re naq te’xnaw lix yeechi’ihom li Qaawa’ ” (Tzolʼlebʼ ut Sumwank 3:20). A’in naxk’am rib’ rik’ineb’ lix yeechi’ihom li Qaawa’ reheb’ li profeet sa’ lix Hu laj Mormon (chi’ilmanq, jo’ eetalil, 1 Nefi 13:34–41; Enos 1:11–18; Helaman 15:12–13). Eb’ laj paab’anel sa’ xtiklajik li Iglees ke’xk’oxla naq eb’ laj ral ch’och’ sa’ li ch’och’ America a’aneb’ li riyajileb’ li tenamit ke’wan sa’ lix Hu laj Mormon. (Lix na’leb’ li Iglees sa’ li kutan a’in, a’an naq eb’ laj Lamanita “aʼanebʼ xkomon lix xeʼtoonilebʼ li ral chʼochʼ saʼ li chʼochʼ America” [Xtikib’ankil re lix Hu laj Mormon].)

Re rilb’al ru xkomon chik li na’leb’ chirix lix mision laj Oliver rik’ineb’ li teep chi aj ral ch’och’ re America, chi’ilmanq “Una misión a los lamanitas” (Revelaciones en contexto, 49–53). K’a’ru naxk’ut li mision a’in chawu chirix li Qaawa’ ut lix k’anjel?

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 27:1–2.Chan ru naq naru taqajultika chi chaab’il wi’chik lix mayej li Kolonel choq’ qe naq naqak’ul li loq’laj wa’ak?

Tzol’leb’ ut Sumwank 27:5–14.K’a’ru naqatzol chirixeb’ li profeet sa’eb’ li raqal a’in? Taaruuq taasik’ aana’leb’ chirixeb’ sa’ li K’utul Raqal reheb’ li Loq’laj Hu. K’a’ruheb’ li osob’tesink li teeb’ileb’ chiqu xb’aaneb’ li laaw neke’xk’am? Re xtawb’al xkomon chik li na’leb’ chirixeb’ li laaw a’an, chi’ilmanq Mateo 16:16–19; Tzol’leb’ ut Sumwank 110:11–16.

Tzol’leb’ ut Sumwank 27:15–18.Maare laa junkab’al taawulaq chiruheb’ xb’aanunkil jun ch’ina pleet jo’ b’atz’unk rik’in xkomon chik li aq’ej li nareetali lix kolb’a-ib’ aq’ej li Dios, jo’eb’ li punit, li kamiis, li ramleb’ sa’, malaj li xaab’. Chan ru nokoxtenq’a li kolb’a-ib’ aq’ej chixkolb’al qix sa’ li pleet? Aatinanqex chirix junjunq reheb’ li maa’usilal nekek’ul jo’ junkab’al ut li naru teeb’aanu re xk’eeb’al cherix li musiq’ejil kolb’a-ib’ aq’ej. K’oxla xk’utb’al li video, “La armadura de Dios” (ChurchofJesusChrist.org).

Tzol’leb’ ut Sumwank 28:2–7.K’a’ru naqatzol sa’eb’ li raqal a’in chirix lix b’oqb’al jun li profeet? Maare eb’ li komon sa’ li junkab’al taaruuq te’ril wi’chik ruheb’ li esil ak k’eeb’ileb’ xb’aan li qayo’yookil profeet ut te’xwotz chan ru naq li raatin nokoxtenq’a chixtaaqenkil li Jesukristo.

Tzol’leb’ ut Sumwank 28:11.Naq naqaj xq’usb’al anihaq, k’a’ut naq aajel ru xb’aanunkil “aajunes aawochb’een a’an”?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Xyaab’ xkux jun li profeet ab’i,” Eb’ li B’ich, 11.

Xchaab’ilob’resinkil li tzolok aajunes

Tzol li raatineb’ li profeet ut li apostol re roso’jikeb’ li kutan. Il ru li k’a’ru neke’xk’ut li profeet ut li apostol re roso’jikeb’ li kutan chirixeb’ li raqal chi na’leb’ nakataw sa’eb’ li loq’laj hu. K’oxla rilb’al ru wi’chik li tusleb’aal na’leb’ reheb’ li jolomil ch’utub’aj-ib’ sa’ conference.ChurchofJesusChrist.org, malaj sa’ li aplicación Biblioteca del Evangelio.

li kolb’a-ib’ aq’ej re li Dios