Evri Ni Bae I Bodaon, i kam long J. Kirk Richards

22–28 Maj

Doktrin mo Ol Kavenan 29

Jisas Kraes Bae I Karem I Kam Wanples Ol Pipol blong Hem

Wan long ol stamba tingting blong stap stadi long ol skripja, hem i blong lanem doktrin, o ol trutok blong gospel we yumi nidim blong Lod i sevem yumi. Taem yu stap stadi long Doktrin mo Ol Kavenan 29 long wik ia, lukaotem ol niu samting long saed blong doktrin, we oli gat mining long yu.

Raetemdaon Ol Filing mo Tingting blong Yu

Nomata we Jos Ia blong Jisas Kraes i bin oganaes long 1830, plante long ol trutok blong gospel oli bin stap yet blong God i talemaot, mo plante long ol fasfala memba blong Jos, oli bin gat kwestin. Oli bin ridim ol profesi insaed long Buk blong Momon abaot kam tugeta blong Isrel mo abaot wok blong bildimap Saeon (luk long 3 Nifae 21). ?Olsem wanem samting ia bae i hapen? Ol revelesen we Haeram Pej i bin klemem blong kasem, i tokbaot topik ia, we i mekem se ol memba oli wantem save moa (luk long Doktrin mo Ol Kavenan 28). Ol nara pipol oli bin gat kwestin abaot Foldaon blong Adam mo Iv, mo ded long saed blong spirit. Lod i bin glad long ol kwestin ia we oli askem long 1830: “Wanem samting we yufala i askem wetem fet, taem yufala i joen tugeta long prea folem oda blong mi, bambae yufala i kasem” (Doktrin mo Ol Kavenan 29:6). Mo Hem i welkamem ol kwestin blong yumi tedei; Hem i jes stap wet long yumi, blong yumi askem Hem tru long prea. Wanem we i stap, i we, olsem we revelesen long Doktrin mo Ol Kavenan 29 we i rij long doktrin i soem se, samtaem Hem i ansa mo givim trutok mo save we i go i bitim ol kwestin we yumi bin askem.

Sam Aedia blong Skripja Stadi blong Yuwan

Doktrin mo Ol Kavenan 29

Papa long Heven i bin rere long wan plan we i stret evriwan blong yumi kam olsem wan god.

Doktrin mo Ol Kavenan 29 i stap tijim plante trutok abaot plan we God i gat long ol pikinini blong Hem. Taem yu stap rid, lukaotem ol trutok we yu lanem abaot wanwan long olgeta pat ia blong plan:

• Laef bifo laef long wol ia (luk long ol ves 36–37)

• Kriesen (luk long ol ves 31–33)

• Foldaon blong Adam mo Iv (luk long ol ves 40–41)

• Laef long wol ia (luk long ol ves 39, 42–45)

• Atonmen blong Jisas Kraes (luk long ol ves 1, 42–43, 46–50)

• Laef Bakegen long Ded (luk long ol ves 13, 26)

• Las Jajmen (luk long ol ves 12–13, 27–30)

?Wanem niu lukluk nao yu bin kasem? ?Bae long wanem wei nao laef blong yu i defren sapos yu no bin save abaot ol trutok ia?

Yu save stadi moa abaot plan blong Papa long Heven insaed long “Plan blong Fasin blong Sevem Man” (Prijim Gospel blong Mi: Wan Gaed long Misinari Seves, rev. ed. [2018], ChurchofJesusChrist.org/manual/missionary).

Doktrin mo Ol Kavenan 29:1–8

Jisas Kraes bae i karem ol pipol blong Hem oli kam wanples bifo Seken Kaming blong Hem.

Jisas Kraes i tokbaot wok blong tekem ol pipol blong Hem oli kam wanples “olsem wan mama faol i stap karem i kam wan ples ol pikinini blong hem andanit long ol wing blong hem” (Doktrin mo Ol Kavenan 29:2). ?Pikja ia i tijim yu wanem abaot tingting blong Sevya blong wantem tekem yu i kam wanples? Taem yu stap ridim Doktrin mo Ol Kavenan 29:1–8, lukaotem ol niu tingting abaot from wanem yumi kam tugeta wanples, hu bae i kam tugeta wanples, mo olsem wanem yumi save help blong mekem “olgeta we [Hem] i jusum” oli kam tugeta wanples” (ves 7).

Long taem blong yumi tedei, blong kam tugeta wanples long Saeon, i minim blong yunaet insaed long ol stek blong Saeon raon long wol. ?Olsem wanem nao, blong stap kam tugeta long wanples, olsem Ol Sent, i stap helpem yumi rere “long saed blong evri samting” from ol hadtaem we bae oli kam bifo Seken Kaming blong Lod? (ves 8; luk tu long ol ves 14–28).

Luk tu long Ol Toktok blong Bilif 1:10; Russell M. Nelson and Wendy W. Nelson, “Hope of Israel” (wol yut divosen, 3 Jun 2018, ChurchofJesusChrist.org).

Hamas Taem i kam long Liz Lemon Swindle

Doktrin mo Ol Kavenan 29:31–35

“Long mi, evri samting oli long saed blong spirit.”

?Long wanem wei nao, evri komanmen, oli long saed blong spirit? Taem yu save se, evri komanmen, oli long saed blong spirit, ?wanem nao hemia i tijim yu abaot stamba tingting blong gat ol komanmen? Yu save mekem wan lis blong samfala komanmen mo tingting long ol prinsipol, long saed blong spirit, we i go wetem wanwan long olgeta.

?Wanem nao bae i jenis sapos yu lukaotem mining long saed blong spirit, o stamba tingting ia biaen long ol smol wok we yu gat blong mekem evri dei, iven olgeta smol wok ia we yu luk se i blong laef ia nomo, o i blong wol ia nomo?

Luk tu long Rom 8:6; 1 Nifae 15:30–32.

Doktrin mo Ol Kavenan 29:36–50

Jisas Kraes i pemaot yumi long Foldaon.

Revelesen ia i stat wetem Lod we i stap presentem Hemwan olsem Ridima blong yumi, we i bin “pemaot ol sin” blong yumi (ves 1). Revelesen i gohed blong eksplenem sam long ol risen from wanem yumi nidim wan Ridima. Tingting long wei we bae yu yusum ol ves 36–50 blong eksplenem from wanem yumi nidim fasin ia blong pemaot man, we i kam tru long Sevya Jisas Kraes. Long plante tradisen blong ol defren fet, Foldaon, i wan taem blong trabol; ?Wanem nao yu faenem insaed long ol ves ia we i stap tijim ol gudfala risal blong fasin blong Foldaon? (Luk tu long 1 Korin 15:22; 2 Nifae 2:6–8, 15–29; Mosaea 3:1–19; Moses 5:9–12.)

Sam Aedia blong Famli Skripja Stadi mo Famli Haos Naet

Doktrin mo Ol Kavenan 29.Yu save yusum ol pikja we oli stap long en blong aotlaen ia wetem skripja ia long Doktrin mo Ol Kavenan 29 blong tijim famli blong yu abaot plan ia blong fasin blong sevem man. Eksampol: ol memba blong famli oli save lanem abaot ol defren pat blong plan ia taem oli ridim mo toktok raon long ol ves we oli putum i stap. Oli save faenem moa trutok insaed long Gospel Topics (topics.ChurchofJesusChrist.org) o long Gaed long Ol Skripja (olskripja.ChurchofJesusChrist.org). Raetemdaon wanem we yu lanem. ?From wanem yumi talem tangkyu we yumi save abaot plan blong fasin blong sevem man? ?Olsem wanem, taem yumi save abaot plan ia, i lidim yumi long evri dei laef blong yumi?

Doktrin mo Ol Kavenan 29:2, 7–8.?I minim wanem blong Sevya i karem yumi i kam wanples? ?Olsem wanem nao yumi save helpem Hem blong karem i kam wanples olgeta ia we Hem i bin jusum?

Doktrin mo Ol Kavenan 29:3–5.?Wanem nao yu lanem abaot Sevya insaed long ol ves ia we i helpem yumi blong “leftemap hat blong [yumi] mo stap glad”? (ves 5). Vidio ia, “We Can Find Happiness” (ChurchofJesusChrist.org) i save helpem yufala blong toktokraon long, hao nao, taem yufala i bin save plan blong fasin blong sevem man, i bin mekem famli blong yufala i hapi.

Doktrin mo Ol Kavenan 29:34–35.Taem yufala i stap ridim ol ves ia, i save givim wan janis, long famli blong yu, blong tokbaot ol risen, long saed blong spirit, biaen sam long olgeta komanmen ia, o biaen long sam kaonsel blong ol profet we yu stap traem blong folem. Eksampol: ?From wanem nao Lod i wantem yumi blong ridim ol skripja olsem wan famli? ?Wanem gud, long saed blong spirit, yumi bin luk from se yumi bin obei ol komanmen?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Israel, Israel, God Is Calling,” Hymns, no. 7.

Stap Kam Antap long Fasin blong Yumi blong Stap Tij

Lukaotem Jisas Kraes. Ol skripja oli stap tijim yumi se evri kriesen blong God, oli stap testifae abaot Jisas Kraes (luk long Moses 6:62–63); so, lukaotem Hem taem yu stap ridim ol skripja. Tingting blong notem daon, o makem olgeta ves we oli stap tijim yu abaot Hem.