Ena Tekiduru na Duru Kecega, mai vei J. Kirk Richards

22–28 ni Maji

Vunau kei na Veiyalayalati 29

O Jisu Karisito Ena Vakasoqoni Ira Vata na Nona Tamata

E dua na inaki ni vulici ni ivolanikalou o ya me da vulica na ivunau, se na dina ni kosipeli ka sa bibi sara ena noda vakabulai. Ni o vulica na Vunau kei na Veiyalayalati 29 ena macawa oqo, vakaraica na raititobu vakaivunau eso e vakaibalebale vei iko.

Vola na Veika o Vakauqeti Kina

E dina ga ni a tauyavutaki na Lotu i Jisu Karisito ena 1830, e vuqa na dina ni kosipeli a se bera ni vakatakilai mai, ka so na lewe taumada ni Lotu era a lomatarotaro. Era a wilika na parofisai ena iVola i Momani me baleta na vakasoqoni vata i Isireli kei na kena taraicake o Saioni (raica na 3 Nifai 21). Ena yaco vakacava na ka oya? Na ivakatakila a kaya o Airame Peji ni a ciqoma a vosa tiko ena ulutaga oqori, ka ra sa qai lomatarotaro ga kina vakalevu na lewenilotu (raica na Vunau kei na Veiyalayalati 28). Eso tale era a vakataroga me baleta na Lutu i Atama kei Ivi kei na mate vakayalo. A ciqoma na Turaga na taro oqo ena 1830: “A ka kecega dou sa kerea ena vakabauta,” a kaya vei ira na Yalododonu, “ni dou sa duavata ena masu me vaka na noqu ivakaro, dou na rawata vakaidina” (Vunau kei na Veiyalayalati 29: 6). Ka na ciqoma oKoya na noda taro edaidai; E sa wawa tu ga me da kerea Vua ena masu. Na ka dina, me vaka e vakaraitaka na ivakatakila vutuniyau vakaivunau ena Vunau kei na Veiyalayalati 29 , ni so na gauna e dau sauma mai oKoya ena wasei ni dina kei na kila e lako sivita sara na noda taro taumada.

Vakasama eso ni Vuli iVolanikalou ni Tamata Yadua

Vunau kei na Veiyalayalati 29

Sa vakarautaka tu na Tamada Vakalomalagi na ituvatuva vinaka sara ni noda vakabulai.

Na Vunau kei na Veiyalayalati 29 e vakavulica e vuqa na dina me baleta na ituvatuva ni Kalou baleti ira na Luvena. Ni o wilika, vaqara na dina o sa vulica me baleta na veitiki oqo ni ituvatuva yadua:

• Bula taumada (raica na tikina e 36–37)

• Veibuli (raica na tikina 31–33)

• Na Lutu i Atama kei na Ivi (raica na tikina e 40–41)

• Bula vakayago (raica na tikina e 39, 42–45)

• Na Veisorovaki i Jisu Karisito (raica na tikina e 1, 42–43, 46–50)

• Na Tucaketale mai na mate (raica na tikina e 13, 26.)

• Na iOtioti ni Veilewai (raica na tikina e 12–13, 27–30)

Na raititobu vou cava o rawata mai kina? Ena duidui vakacava na nomu bula kevaka o sega ni kila me baleta na veidina oqo?

E rawa ni o vulica vakalevu me baleta na ituvatuva nei Tamada Vakalomalagi ena “Na Yavu ni Veivakabulai” (Vunautaka na Noqu Kosipeli: iDusidusi ki na Veiqaravi ni Daukaulotu, rev. ed. [2018], ChurchofJesusChrist.org/manual/missionary)

Vunau kei na Veiyalayalati 29:1–8

O Jisu Karisito ena vakasoqoni ira na Nona tamata ni bera na iKarua ni Nona Lako Mai.

E vosa o Jisu Karisito me baleta na vakasoqoni ni Nona tamata “me vaka na toa yalewa sa vakasoqoni ira vata na luvena e ruku ni tabana” (Vunau kei na Veiyalayalati 29:2). Na cava e vakavulica na tikina oqo me baleta na gagadre ni iVakabula me vakasoqoni iko? Ni o wilika na Vunau kei na Veiyalayalati 29:1–8, vakaraica na raititobu eso me baleta na vuna eda vakasoqoni vata kina, o cei me na vakasoqoni vata, kei na sala e rawa ni da veivuke kina me vakasoqoni ira vata na “digitaki” (tikina e 7).

Ena noda siga nikua, na vakasoqoni vata mai ki Saioni sa kena ibalebale na cokotivata ni vei iteki kei Saioni e vuravura raraba. E vukei keda vakacava na vakasoqoni vata vaka Yalododonu me “vakarautaki [keda] ena veika kece” me baleta na veivakatovolei ka na yaco mai ni bera na iKarua ni Lako Mai ni iVakabula? (tikina e 8; raica talega na tikina 14–28).

Raica talega na Yavu ni Vakabauta 1:10; Russell M. Nelson kei Wendy W. Nelson, “iNuinui kei Isireli” (na lotu baleti ira na itabagone e vuravura raraba, 3 ni June, 2018, ChurchofJesusChrist.org).

E Vica Na Gauna, mai vei Liz Lemon Swindle

Vunau kei na Veiyalayalati 29:31–35

“Au sa okata na ka kecega me ka vakayalo.”

Ena ituvaki cava era sa vakayalo na ivakaro kecega? Na cava e vakavulica vei iko baleta na inaki ni ivakaro na nomu kila tu ni sa vakayalo na ivakaro kece sara? O na rawa ni vola e vica na ivakaro ka vakasamataka na ivakavuvuli vakayalo e semati vei ira yadua.

Na cava ena rawa ni veisau kevaka o raica ena ibalebale se inaki vakayalo na nomu cakacaka ena veisiga, o ira sara mada ga e rairai vakayago se vakavuravura?

Raica talega na Roma 8:6; 1 Nifai 15:30–32.

Vunau kei na Veiyalayalati 29:36–50

A vueti keda o Jisu Karisito mai na Lutu.

E dolavi na ivakatakila oqo ena Nona vakamacalataki koya na Turaga me noda Dauveivueti, ka sa “sorovaka na [noda] ivalavala ca” (tikina 1). E vakamacalataka talega na ivakatakila oqo eso na vuna eda gadreva kina e dua na Dauveivueti. Vakasamataka mo na vakayagataka vakacava na tikina e 36–50 mo vakamacalataka kina se cava eda gadreva kina na veivueti mai vua na iVakabula o Jisu Karisito. E vuqa na vakabauta, era raica na Lutu me vaka e dua na leqa levu dina; na cava o sa raica ena veitikina oqo e vakavulica na veika vinaka ni Lutu? (Raica talega na 1 Korinica 15:22; 2 Nifai 2:6–8, 15–29; Mosaia 3:1–19; Mosese 5:9–12.)

Eso na Vakasama me baleta na Vuli iVolanikalou Vakavuvale kei na Lotu Vakavuvale

Vunau kei na Veiyalayalati 29.Sa rawa mo vakayagataka na iyaloyalo ena mua ni ituvatuva oqo vata kei na Vunau kei na Veiyalayalati 29 mo vakavulica kina na nomu matavuvale me baleta na yavu ni veivakabulai. Me ivakaraitaki, era rawa ni vulica na veitiki duidui ni yavu na lewe‑ni‑matavuvale ena nodra wilika ka veivosakitaka na veitikina e vakaturi tiko. Era na rawa ni kunea na ikuri ni dina eso ena Ulutaga Vakosipeli (topics.ChurchofJesusChrist.org) se na iDusidusi Vakaivolanikalou (scriptures.ChurchofJesusChrist.org). Vola na veika o sa vulica. Na cava eda vakavinavinaka kina meda kila baleta na yavu ni veivakabulai? E vakayarayarataka vakacava na noda bula e veisiga na noda kila oqori?

Vunau kei na Veiyalayalati 29:2, 7–8.Na cava na kena ibalebale me ra vakasoqoni vata mai Vua na iVakabula? Eda na vukei Koya vakacava me vakasoqoni ira na digitaki?

Vunau kei na Veiyalayalati 29:3–5.Na cava eda vulica me baleta na iVakabula ena tikina eso oqo ka vukei keda me “laveta cake na [yaloda] ka marau”? (tikina e 5). Na vidio “Eda Rawa ni Kunea na Bula Marau” (ChurchofJesusChrist.org) ena rawa ni vukei iko me veivosakitaka na kena sa kauta mai na bula marau ki na nomu vakamatavuvale na nomu kila na yavu ni veivakabulai.

Vunau kei na Veiyalayalati 29:34–35.Na wiliki ni veitikina oqo e rawa ni solia ki na nomu matavuvale e dua na madigi me veitalanoataka me baleta na inaki vakayalo e tu ena so na ivakaro se ivakasala vaka-parofita o saga tiko mo muria. Me ivakaraitaki, na cava e vinakata kina na Turaga meda wilika vakamatavuvale na ivolanikalou? Na kena yaga vakayalo cava so eda sa raica mai na noda talairawarawa ki na ivakaro?

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Isireli Bau Rogoca,” Sere ni Lotu, naba 6.

Vakatorocaketaki Noda Veivakavulici

Vakaraici Jisu Karisito. E vakavulica vei keda na ivolanikalou ni ibulibuli kece ni Kalou sa vakadinadinataki Jisu Karisito (raica na Mosese 6:62–63), io mo vakaraici koya ni o wilika na ivolanikalou. Vakasamataka mo vola se ka makataka na tikina era vakavulica na veika e baleti koya.