Kam Miting, i kam long Worthington Whittredge

3–9 Mei

Doktrin mo Ol Kavenan 46–48

“Lukaotem Wetem Strong Tingting, Ol Presen Ia we Oli Moa Gud Bitim Ol Narawan”

Taem yu stap ridim Doktrin mo Ol Kavenan 46–48raetemdaon eni filing mo tingting we yu kasem. Afta, yu save askem, olsem we Elda Richard G. Scott i talem: “?I gat moa samting we mi mas save?”(“To Acquire Spiritual Guidance” Ensign o Liahona, Nov. 2009,8).

Raetemdaon Ol Filing mo Tingting blong Yu

Taem we Parli P. Prat, Oliva Kaodri, Siba Pitasen, mo Pita Witma Junia oli aot long Ketlan mo oli muv i go long ol nara ples blong go wok long ol, oli bin livim biaen wan handred konvet, we oli bin gat plante strong tingting, be oli no gat eksperiens, o daereksen. I no gat instraksen hanbuk, i no gat lidasip trening miting, i no gat brodkas blong jeneral konfrens—wanem i stap, i we, i no bin gat plante kopi blong Buk blong Momon blong sendem i goraon. Plante long ol niufala konvet ia, oli bin kam long gospel ia we i bin kambak from promes ia nomo se bae Spirit i soemaot plante samting long olgeta, speseli olgeta we oli bin save long olgeta taem oli bin stap stadi long Niu Testeman (eksampol, luk long 1 Korin 12:1–11). I no longtaem, i gat sam defren kaen fasin blong wosip—wetem hemia blong foldaon long graon o seksek olsem snek—we oli bin tekem i kam insaed long ol miting blong Jos. Plante oli bin faenem i had blong luksave wijwan i Spirit we i soemaot samting, mo wijwan i no Spirit. Taem hem i luk fasin blong konfius we i stap, Josef Smit i bin prea blong kasem help. Ansa blong Lod i impoten semmak tedei, taem we ol pipol oli stap sakemaot o no wantem save long ol samting long saed blong Spirit. Lod i bin talemaot se ol samting we Spirit i stap soemaot, oli ril, mo hem i talem i klia se oli wanem—ol presen we oli kam long wan Papa long Heven we i gat lav, we Hem i bin “givim blong gud blong olgeta we oli lavem [Hem] mo oli stap obei ol komanmen blong Hem” (Doktrin mo Ol Kavenan 46:9).

Sam Aedia blong Skripja Stadi blong Yuwan

Doktrin mo Ol Kavenan 46:1–6

Evriwan we oli rili wantem lukaotem trutok, oli welkam blong wosip insaed long Jos blong Lod.

Ol miting blong Jos Ia blong Jisas Kraes Ia blong Ol Lata-dei Sent, oli mas stap olsem wan long ol miting long wol, we oli welkamem gud man mo oli givim moa insperesen. ?Olsem wanem nao, Lod i stap givim advaes long yumi long Doktrin mo Ol Kavenan 46:1–6 blong welkamem olgeta we oli stap kam long ol miting blong yumi? ?Ol fren mo ol pipol raonabaot long yu oli fil se oli welkam blong kam long ol wosip seves blong wod blong yu? ?Wanem nao yu stap mekem blong mekem se ol miting blong Jos oli ol ples we ol pipol oli wantem kambak long hem? Tingting hevi long, olsem wanem nao ol hadwok blong yu blong stap folem Tabu Spirit insaed long ol miting blong Jos oli save jenisim ol eksperiens blong yu.

Luk tu long 3 Nifae 18:22–23; Moronae 6:5–9; “Welcome,” vidio, ComeUntoChrist.org; “Religious Enthusiasm among Early Ohio Converts,” Revelations in Context, 105–11.

Doktrin mo Ol Kavenan 46:7–33

God i bin givim ol presen long saed blong spirit blong blesem ol pikinini blong Hem.

Ol fasfala Sent oli bin biliv long ol presen long saed blong spirit, be oli bin nidim blong oli eksplenem olgeta abaot stamba tingting blong olgeta. Taem yu stap stadi abaot ol presen we oli kam long Spirit, mo yusum Doktrin mo Ol Kavenan 46:7–33, blong mekem hemia, tingting hevi long from wanem nao hem i impoten blong yu “tingbaot oltaem se from wanem nao [Hem i] stap givim ol samting ia long yufala” (ves 8). Tingting long olsem wanem ol ves ia oli go wetem toktok ia blong Elda Robert D. Hales: “Olgeta presen ia, oli givim long olgeta we oli fetful long Kraes. Bae i helpem yumi blong save mo tijim ol trutok blong gospel. Bambae oli helpem yumi blong blesem ol narawan. Bae oli helpem yumi blong gobak long Papa blong yumi long Heven” (“Gifts of the Spirit,” Ensign, Feb. 2002, 16). ?Wanem moa yu lanem aot long ol ves ia abaot ol samting we Spirit i stap soemaot? ?Olsem wanem nao, ol trutok ia oli helpem yu blong “oli no trikim yufala”? (ves 8).

Tingting hevi long wanem nao oli ol presen blong yu long saed blong spirit—mo olsem wanem yu save yusum olgeta “blong gud blong ol pikinini blong God” (ves 26). Sapos yu gat wan petriakel blesing, plante taem bae i talemaot ol presen we God i bin givim long yu.

Luk tu long Gospel Topics, “Spiritual Gifts,” topics.ChurchofJesusChrist.org.

Doktrin mo Ol Kavenan 47

Lod i wantem Jos blong Hem blong kipim wan histri i stap.

Koling blong Jon Witma i blong kipim wan histri blong Jos, mo i kam afta long wan longfala laen blong ol man we oli stap kipim ol rekod, hemia long medel blong ol pipol blong God 2 Nifae 29:11–12; Moses 6:5; Ebraham 1:28, 31). Wanem we i stap, i we, posisen ia blong Man blong Raetem Jos Histri, mo Kipim Jos Histri, i stap yet tedei. ?Long tingting blong yu, long Lod, from wanem i impoten blong kipim wan histri? Tingting hevi long hemia taem yu stap ridim ol instraksen blong Hem i go long Jon Witma abaot wok blong hem, we i stap long Doktrin mo Ol Kavenan 47. Mo tu, tingting long ol eksperiens blong yu we yu nidim blong raetemdaon. Eksampol: ?Wanem nao Lod i bin tijim yu we yu wantem holemtaet?

Taem yu stap tingting hevi long ol kwestin ia, tingting long niu tingting ia we i kam long Elda Marlin K. Jensen blong Olgeta Seventi, we i bin stap olsem Man blong Raetem mo Kipim Histri blong Jos stat long 1005 i go kasem 2012.

“Yumi kipim ol rekod blong helpem yumi blong tingbaot … Yumi wantem blong helpem ol memba blong tingbaot ol bigfala samting we God i bin mekem blong ol pikinini blong Hem. … Ol lesen blong bifo oli stap helpem yumi blong gohed wetem wanem yumi stap fesem tedei, mo i givim yumi hop from fiuja blong yumi” (“There Shall Be a Record Kept among You,” Ensign, Dec. 2007, 28, 33).

Blong lanem moa abaot wok we oli stap mekem naoia anda long daereksen blong Man blong Raetem Jos Histri, luk long history.ChurchofJesusChrist.org.

Lod i bin singaotem Jon Witma blong hem i raetem wan histri blong Jos.

Sam Aedia blong Famli Skripja Stadi mo Famli Haos Naet

Doktrin mo Ol Kavenan 46:2–6.?Wanem nao yumi save mekem olsem wan famli blong meksua se ol narawan oli filim se oli welkam long ol miting blong Jos? (luk long 3 Nifae 18:22–23). Pikja ia i go wetem aotlaen ia mo i gud blong yusum blong toktok raon long hem.

Doktrin mo Ol Kavenan 46:7–26.?Wanem presen we i kam long Spirit we yumi luk long wanwan long yumi? ?Olsem wanem nao ol presen ia oli blesem famli blong yumi?

Doktrin mo Ol Kavenan 47.?Olsem wanem yu leftemap tingting blong famli blong yu blong raetemdaon ol histri blong olgetawan truaot long wik? Yu save serem sam pat blong jenol blong yuwan, o yu save serem wan stori abaot wan bubu blong yu (luk long FamilySearch.org). Sam famli oli stap putum smol minit evri wik blong evriwan i raet insaed long jenol blong olgeta. Yu save givim stat blong sam sentens blong raet long jenol, olsem: “?Wanem i hapen long wik ia we yu wantem blong serem wetem ol apupikinini blong yu? O ?olsem wanem nao yu luk han blong Lod insaed long laef blong yu long wik ia Ol yangfala pikinini oli save droem ol pikja blong eksperiens blong olgeta, o yu save rekodem olgeta we oli stap talem stori blong olgeta. ?Wanem blesing i kamaot taem yumi stap kipim wan jenol oltaem? (Vesves 1).

Doktrin mo Ol Kavenan 48.Ol Sent long Ohaeo oli bin kasem komanmen blong serem graon blong olgeta wetem olgeta we oli stap muv i go long Ohaeo, long Is blong Yunaeted Stet. ?Wanem nao yumi save serem we i go stret wetem ol nid blong ol narawan?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Have I Done Any Good?” (Hymns, namba. 223).

Stap Kam Antap long Fasin blong Yumi blong Stap Tij

Yusum ol stori mo ol eksampol. Plante taem, Sevya i yusum ol stori mo ol parabol blong tijim ol prinsipol blong gospel. Tingting long sam eksampol mo stori blong laef blong yuwan we i save mekem wan prinsipol blong gospel i laef insaed long famli blong yu (luk long Teaching in the Savior’s Way,22).

Papa long Heven i givim ol presen long saed blong spirit long ol pikinini blong Hem, blong oli blesem laef blong olgeta narawan.