kaq’nab’ ha’ sa’ eq’la

10–16 mayo

Tzol’leb’ ut Sumwank 49–50

“Li k’a’ru re li Dios a’an saqen”

“Ani nak’uluk re li saqen, ut nakana rik’in li Dios, naxk’ul chik li saqen; ut li saqen a’an yoo chi nimank xlemtz’unkil toj reetal li tz’aqal kutan” (Tzol’leb’ ut Sumwank 50:24). K’oxlan chirix chan ru nakak’ul li saqen naq nakatkana rik’in li Dios.

Tz’iib’a li nakak’oxla

Li Kolonel a’an “li chaab’il aj ilol karneer” choq’ qe (Tzol’leb’ ut Sumwank 50:44). A’an naxnaw naq wan naq neke’b’eek chi najt li karneer ut naq xiwxiw li yamyookil ch’och’. Jo’kan naq rik’in rahok naxk’am qab’e sa’ li kolb’a-ix naxk’e lix tzol’leb’, najt rik’in li k’a’ru xiwxiw, jo’ li “musiq’ej li aj b’alaq’eb’, li xikenaqeb’ sa’ li ch’och’, chixb’alaq’inkil li ruchich’och’ ” (Tzol’leb’ ut Sumwank 50:2). Xtaaqenkil li Qaawa’ naraj naq taqakanab’ li b’alaq’il na’leb’ malaj xna’leb’il li ruchich’och’. Yaal chaq a’in choq’ re laj Leman Copley ut xkomoneb’ chik aran Ohio li ke’xk’ulub’a li evangelio li k’ojob’anb’il wi’chik, a’ut toj neke’xpaab’ junjunq na’leb’ li moko yaaleb’ ta. Sa’ Tzol’leb’ ut Sumwank 49, li Qaawa’ kixch’olob’eb’ li yaalil na’leb’ li ke’xtuqub’eb’ li na’leb’ kixpaab’ laj Leman chirix li sumlaak ut li xkab’ xk’ulunik li Kolonel. Ut naq li ak’ komon aran Ohio “ke’xk’uleb’ li musiq’ej li ink’a’ ke’ru chixtawb’al ru,” li Qaawa’ kixk’ut chiruheb’ chan ru xtz’ilb’al rix b’ar wan lix yaalil k’utb’esihom li Musiq’ej (Tzol’leb’ ut Sumwank 50:15). Li Chaab’il aj Ilol Karneer kiwan xkuyum; kixnaw naq eb’ laj santil paab’anel sa’ xtiklajik li Iglees—jo’ chiqajunilo—“toj kok’aleb’,” ut “tento te’k’iiq sa’ li usilal ut sa’ xnawb’al li yaal” (Tzol’leb’ ut Sumwank 50:40).

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzolʼlebʼ ut Sumwank 49:5–23

Eb’ li yaalil na’leb’ re li evangelio naru nikine’xten’qa chixk’eeb’al reetaleb’ li b’alaq’il k’utum.

Rub’elaj naq ki’ok sa’ li Iglees, laj Leman Copley a’an chaq xkomon jun ch’uut chi aj paab’anel nawb’il ru jo’ li Xch’utamileb’ laj Paab’ahom re li Xkab’ Xk’utunik li Kristo, malaj eb’ laj Shaker (chi’ilmanq “Leman Copley y los tembladores,” Revelaciones en contexto, 124–129). Chirix naq ki’aatinak rik’in laj Leman, laj Jose Smith kixsik’ xna’leb’ li Qaawa’ chirix lix k’utumeb’ laj Shaker, ut li Qaawa’ kixsume rik’in li k’utb’esinb’il na’leb’ sa’ li tasal 49.

Naru taataw li neke’xpaab’ laj Shaker sa’ xjolomil li tasal 49. Naru taajuch’eb’ malaj taak’e reetaleb’ li yaalil na’leb’ sa’eb’ li raqal 5–23 li neke’xtuqub’eb’ li paab’ahom a’an. K’oxlaheb’ jalaneb’ chik li b’alaq’il k’utum malaj na’leb’ wankeb’ sa’ li ruchich’och’ anajwan. K’a’ruheb’ li na’leb’ re li evangelio li naru tate’xtenq’a chixkolb’al aawix chiruheb’ li na’leb’ a’an?

Tzol’leb’ ut Sumwank 49:15–17

Lix sumlajik li winq rik’in li ixq aajel ru sa’ lix junelik k’uub’anb’il na’leb li Dios.

K’a’ruheb’ li yaalil na’leb’ nakatzol chirix li sumlaak sa’ Tzol’leb’ ut Sumwank 49:15–17? K’a’ut nakak’oxla naq aajel ru xsumlajik li winq rik’in li ixq sa’ lix k’uub’anb’il na’leb’ li qaChoxahil Yuwa’? Li Elder David A. Bednar kixk’ut wiib’ li na’leb’ chirix a’an: “Li xb’een: Lix wanjikeb’ lix musiq’eb’ li winq ut li ixq neke’xtz’aqob’resi rib’, jo’kan naq na’ajman naq li winq ut li ixq neke’xik chi uub’ej sa’ komonil re te’taqsiiq xloq’aleb’. … Li xkab’: Chi k’oxlanb’il xb’aan li Dios, neke’ajman ru li winq rochb’een li ixq re xk’amb’aleb’ chaq li kok’al sa’ ruchich’och’ ut re xk’iresinkileb’ ut xch’olaninkileb’ chi chaab’il” (“El matrimonio es esencial para Su plan eterno,” Liahona, junio 2006, 51–52).

Chi’ilmanq ajwi’ Genesis 2:20–24; 1 Korintios 11:11; “Li Junkab’al: Jun Jek’inb’il Aatin choq’ re li Ruchich’och’,” ChurchOfJesusChrist.org.

jun sumal chirix li santil ochoch

Li sumlaak wan wiʼ jun winq rikʼin jun ixq, kʼojobʼanbʼil xbʼaan li Dios.

Tzolʼlebʼ ut Sumwank 50

Lix k’utum li Qaawa’ naru tixkol wix chiru xb’alaq’il na’leb’ laj Satanas.

Eb’ li ak’ komon re li Iglees aran Ohio ke’raj xk’ulb’aleb’ li musiq’ejil k’utb’esihom li yeechi’inb’ileb’ sa’eb’ li loq’laj hu, a’b’an laj Satanas kiraj ajwi’ xb’alaq’inkileb’. Ke’xk’oxla, naq junaq naxjap re malaj nat’ane’ chi ch’och’, ma a’an lix wankil li Musiq’ej?

K’oxla naq patz’b’ilaq raj aawe naq taatenq’aheb’ li ak’ komon a’in chixtawb’al ru chan ru xk’eeb’al reetaleb’ li yaalil k’utb’esihom re li Santil Musiq’ej ut xq’axb’al ru lix b’alaq’il na’leb’ laj Satanas. K’a’ruheb’ li na’leb’ li nakataw sa’ Tzol’leb’ ut Sumwank 50 li taaruuq raj taawotz? (che’ilmanq li raqal 22–25, 29–34, 40–46).

Chi’ilmanq ajwi’ 2 Timoteo 3:13–17.

Tzolʼlebʼ ut Sumwank 50:13–24

Neke’waklesiik raameb’ sa’ komonil li ani neke’tzolok ut li ani neke’k’utuk xb’aan li Musiq’ej.

Naru taatzol Tzol’leb’ ut Sumwank 50:13–24 rik’in xyiib’ankil xjalam-uuch jun aj k’utunel ut jun aj tzolom, ut chixk’atq li junjunq taatz’iib’a chi tustu eb’ li aatin ut ch’ol aatin sa’eb’ li raqal a’in li neke’xk’ut chawu li na’leb’ chirix li tzolok ut li k’utuk sa’ li evangelio. Jo’q’e xanumsi k’a’ruhaq li xk’ut chawu lix aajelil ru li Musiq’ej sa’ li k’utuk ut li tzolok? K’oxla li naru taab’aanu re xchaab’ilob’resinkil lix yalb’al aaq’e jo’ aj k’utunel ut aj tzolonel sa’ li evangelio.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 49:2.K’a’ru naraj naxye “neke’raj xnawb’al li yaal, chi jun raqal, a’b’an moko chixjunil ta”? Maare taaruuq taak’ut jun jalam-uuch li tz’aptz’o ru jun xjachal ut taakanab’eb’ li komon sa’ li junkab’al chixq’ehinkil k’a’ru a’an. K’a’ru nak’ulman naq ka’ajwi’ naqak’ulub’a jun raqal re li yaal? (chi’ilmanq 2 Nefi 28:29). Chan ru naq lix tz’aqalil li evangelio a’an jun qosob’tesinkil?

Tzol’leb’ ut Sumwank 49:26–28.Chan ru noko’osob’tesiik xb’aan lix yeechi’ihom li Qaawa’, “Laa’in tinxik cheru ut tinwanq choq’ aj k’aak’alenel cherix, ut laa’in tinwanq sa’ eeyi”? Eb’ li komon sa’ li junkab’al taaruuq te’xwotz lix numsihomeb’ naq xe’reek’a naq li Qaawa’ “naxik chiruheb’ ” malaj naq “wan sa’ xyiheb’.”

Tzol’leb’ ut Sumwank 50:23–25.Maare naru teech’utub’ eerib’ sa’ jun na’ajej q’ojyin ru re rilb’al ru Tzol’leb’ ut Sumwank 50:23–25, ut chi timil timil taakutanob’resi li na’ajej rik’in xlochb’aleb’ li kandeel malaj li saqen chi junjunqal. Taaruuq ajwi’ teerileb’ ru li raqal a’in naq yoo chi saqewk li kutan. K’a’ru naru taqab’aanu re xk’eeb’al chi nimank rajlal li qasaqenkil re li evangelio? Naq eb’ li komon sa’ li junkab’al te’xtzol k’a’ruhaq ak’ chirix li evangelio chiru li xamaan, waklesi xch’ooleb’ chixwotzb’al a’an rik’in li junkab’al rik’in xtz’iib’ankil jun li ch’ina perel chi hu ut chixletzb’al chiru jun li saqen sa’ li ochoch.

Tzol’leb’ ut Sumwank 50:40–46.Chirix rilb’al ru Tzol’leb’ ut Sumwank 50:40–46, taaruuq taak’ut xjalam-uuch li Kolonel li wan sa’ li tusleb’ aatin a’in ut taawoksiheb’ li patz’om jo’eb’ a’in: Chan ru naru taak’e reetal naq li Kolonel naxraheb’ li karneer? Chan ru nak’anjelak li Kolonel jo’ aj ilol qe? K’a’ruheb’ li ch’ol aatin sa’eb’ li loq’laj hu li neke’xk’ut naq li Kolonel a’an aj ilol karneer ut laa’o lix karneer?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Lemtz’un,” B’ichleb’aal choq’ reheb’ li Kok’al, 96.

Xchaab’ilob’resinkil li qak’utum

Yo’on wanqat chi jalok. Naab’al sut li k’utuk q’axal chaab’il, tz’aqal wi’chik sa’ li ochoch, nak’ulman chi ink’a’ nawb’il rub’elaj: li wa’ak sa’ komonil jo’ junkab’al naru texxmusiq’a chi aatinak chirix xtzekankil xsahil li raatin li Dios, ut naq yoo li hab’ naru taach’olob’ xyaalalil li yo’yookil ha’. Wi kawresinb’ilat sa’ musiq’ej, li Qaawa’ naru tixk’e aawe “sa’ tz’aqal ajwi’ li jun k’amok a’an, li k’a’ru taaye” (Tzol’leb’ ut Sumwank 100:6).

li Jesus rik’in jun li karneer

Li q’unil aj ilol karneer, xb’aan laj Kim Yongsung