Independence, Missouri, xb’aan laj Al Rounds

24–30 mayo

Tzol’leb’ ut Sumwank 58–59

“K’eeb’ilaqeb’ rib’ chi anchaleb’ xch’ool sa’ jun chaab’il k’anjel”

Li Awa’b’ej Dallin H. Oaks kixk’ut, “Eb’ li loq’laj hu toohe’xtenq’a chixsumenkil chixjunileb’ li qapatz’om xb’aan naq rik’in rilb’aleb’ ru, naqab’oq ut naru naqak’ul lix musiq’ahom li Santil Musiq’ej, li tooxb’eresi rik’in chixjunil li yaal” (sa’ David A. Edwards, “Are My Answers in There?” New Era, mayo 2016, 42).

Tz’iib’a li nakak’oxla

Naq eb’ li xb’eenil re li Iglees ke’ril xb’een sut li tenamit Sion—Independence, Missouri—maawa’ a’an li ke’royb’eni chaq. Ke’wan li ke’xk’oxla naq te’xtaw raj jun nimla tenamit q’axal chaab’il, nujenaq rik’in jun kawil ch’uut chi aj santil paab’anel. Ke’xtaw b’an jun ch’ina k’aleb’aal, maak’a’eb’ wi’ li k’a’aq re ru k’aynaqeb’ wi’ sa’ xyu’ameb’, ut sa’ xna’aj jun ch’uut chi aj santil paab’anel, ke’wan aran yal junjunqeb’ li kristiaan moko tzolb’ileb’ ta. Li Qaawa’ ink’a’ yal kixpatz’ reheb’ naq te’chalq aran Sion—kiraj ajb’an wi’ naq te’xkab’la Sion.

Naq li k’a’ru naqoyb’eni ink’a’ naxk’am rib’ rik’in li yoo chi k’ulmank, naru taajultiko’q qe li kixye li Qaawa’ reheb’ laj santil paab’anel sa’ 1831: “Ink’a’ naru nekeril rik’in ruchich’och’il xnaq’ eeru, sa’ li kutan a’in, lix k’oxlahom lee Dios … ut li loq’alil li taawanq chirix xnumsinkil naab’al li rahilal” (Tzol’leb’ ut Sumwank 58:3). Yaal naq li qayu’am nujenaq chi ch’a’ajkilal, ut wan naq rik’in ajwi’ maa’usilal, a’b’an naru “taqak’e chi uxliik naab’al li tiikilal; xb’aan naq wan wankilal qik’in” (eb’ li raqal 27–28).

Chi’ilmanq ajwi’ Santos, 1:130–136.

Li na’leb’ re xtzolb’aleb’ li loq’laj hu aajunes

Tzol’leb’ ut Sumwank 58:1–5, 26–33, 44; 59:23

Eb’ li osob’tesink neke’chal sa’ li hoonal k’oxlanb’il xb’aan li Dios, a’ yaal lix yalb’al qaq’e.

Eb’ laj santil paab’anel ke’xk’e xk’ojob’ankil Sion aran sa’ li Condado Jackson, Missouri, b’ar wi’ ke’xkuy naab’al li ch’a’ajkilal. Ke’royb’eni naq chiru lix yu’ameb’ a’an, li na’ajej a’an taa’atz’umaq jo’ jun na’ajej taaruuq te’xch’utub’ wi’ rib’ chixjunileb’ laj santil paab’anel. A’b’anan, eb’ laj santil paab’anel ke’isiik chaq sa’ li Condado Jackson chirix xnumik junjunq chihab’, ut li Qaawa’ kixk’utb’esi naq lix tenamit toj tento “te’oyb’eninq chiru jarub’aq kutan re taatojmanq rix Sion” (Tzol’leb’ ut Sumwank 105:9).

Naq yooqat chixtzolb’aleb’ li raqal a’in, sik’ k’a’ut naq wan naq neke’rame’ li osob’tesink chiru jun hoonal. Eb’ li patz’om a’in naru tate’xtenq’a chixk’oxlankil a’an.

Tzolʼlebʼ ut Sumwank 58:1–5; 59:23. K’a’ruheb’ li na’leb’ sa’eb’ li raqal a’in li neke’xkawob’resi aach’ool chixkuyb’al li rahilal chi nim chik aakuyum? K’a’ruheb’ li osob’tesink ak xak’ul chirix xkuyb’al li rahilal? K’a’ut nakak’oxla naq wankeb’ li osob’tesink li neke’chal ka’ajwi’ chirix li rahilal?

Tzol’leb’ ut Sumwank 58:26–33. K’a’ru xk’anjel li wank chi “k’eeb’ilaq qib’ chi anchal qach’ool sa’ jun chaab’il k’anjel” sa’ xtz’aqob’resinkileb’ ru lix yeechi’ihom li Dios? K’a’ru xk’anjel li ab’ink chiru li Dios?

Tzol’leb’ ut Sumwank 58:44. Chan ru naxk’am rib’ li “tijok chi wan paab’aal” rik’in li rajom li Qaawa’ choq’ qe?

Tzol’leb’ ut Sumwank 59, xtiklajik li tasal

Ani li xPolly Knight?

Li xPolly Knight ut lix b’eelom, aj Joseph Knight, yuwa’b’ej, a’aneb’ junjunq reheb’ li xb’een ke’xpaab’ naq laj Jose Smith a’an profeet. Li xPolly ut laj Joseph k’a’jo’ naq ke’xtenq’a li profeet sa’ li k’anjel re xjaltesinkil ru lix Hu laj Mormon. Li junkab’al Knight ke’el chaq Colesville, Nueva York re xch’utub’ankil rib’eb’ rik’ineb’ laj santil paab’anel aran Ohio, ut moqon ke’taqlaak chi xik sa’ li Condado Jackson, Missouri. Naq yookeb’ chaq chi b’eek, kiyajer li xPolly, a’b’an k’eek’o xch’ool chirilb’al Sion rub’elaj naq taakamq. Kixnumsi yal junjunq li kutan aran Missouri toja’ naq kikam (chi’ilmanq Santos, 1:130–131, 135–136). Tzo’leb’ ut Sumwank 59 kik’ule’ sa’ li kutan kikam wi’, ut eb’ li raqal 1 ut 2 chanchan naq yookeb’ chi aatinak chirix tz’aqal a’an.

Tzol’leb’ ut Sumwank 59:9–19

Roxloq’inkil li hilob’aal kutan naxk’am chaq li osob’tesink re li yu’am a’in jo’ ajwi’ re musiq’ej.

Chirix xyeechi’inkil naq taarosob’tesiheb’ laj santil paab’anel aran Sion rik’in “li taqlahom chi maaka’ch’in xk’ihal,” li Qaawa’ kixka’suti jun reheb’ li taqlahom: li taqlahom re roxloq’inkil lix “santil kutan” (Tzol’leb’ ut Sumwank 59:4, 9). Naq yooqat chixtzolb’al Tzol’leb’ ut Sumwank 59:9–19, k’oxlan chirix k’a’ut naq roxloq’inkil li hilob’aal kutan q’axal aajel chaq ru choq’ reheb’ laj santil paab’anel a’in naq ke’xsik’ xwaklesinkil Sion.

Taaruuq ajwi’ taak’oxlaheb’ li patz’om jo’eb’ a’in: Ma yookin chiroksinkil li hilob’aal kutan jo’ naraj li Qaawa’? Chan ru naq roxloq’inkil li hilob’aal kutan nikinxtenq’a chi kanaak “chi maak’a’ intz’ajnil xb’aan li ruchich’och’ ”? (raqal 9). K’a’ru naru tinb’aanu re xq’axtesinkil “inloq’onihom chiru li Q’axal Taqenaq Xwankil”? (raqal 10).

Chirix rilb’aleb’ ru li raqal a’in, k’a’ru musiq’anb’ilat chixb’aanunkil re roxloq’inkil li hilob’aal kutan chi chaab’il wi’chik? Genesis 2:2–3; Exodo 20:8–11; 31:13, 16; Deuteronomio 5:12–15; Isaias 58:13–14; Markos 2:27; Jwan 20:1–19; Hechos 20:7.

Naru ajwi’ te’k’anjelaq aawe li video malaj xkomon chik li k’anjeleb’aal chirix li hilob’aal kutan sa’ sabbath.ChurchofJesusChrist.org.

Chi’ilmanq ajwi’ Russell M. Nelson, “Li hilob’aal a’an sahil kutan,” Jolomil ch’utub’aj-ib’ re abril 2015; K’utul Raqal reheb’ li Loq’laj Hu, “Hilob’aal kutan.”

Xk’ulb’al li loq’laj wa’ak a’an xcha’alil roxloq’inkil li hilob’aal kutan.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 58:26–29.Maare eb’ li komon sa’ li junkab’al taaruuq te’xtz’iib’a chi tustu junjunqeb’ li k’anjel “k’eeb’ileb’ wi’ rib’ chi anchaleb’ xch’ool.” Ma “chaab’il k’anjeleb’ ” chixjunileb’? K’a’ut naraj li Qaawa’ naq taqab’aanu “k’iila k’a’aq re ru chi yal ajb’il qab’aan”? Patz’ re li junjunq komon sa’ li junkab’al naq tixk’oxla li naru tixb’aanu chiru li xamaan a’in re “xk’eeb’al chi uxliik naab’al li tiikilal.” Moqon te’ruuq chixyeeb’al resil li xe’xb’aanu.

Tzol’leb’ ut Sumwank 58:42–43.K’a’ru neke’reek’a li komon sa’ li junkab’al naq neke’rileb’ ru li raqal a’in? Chan raj ru naq eb’ li raqal a’in te’ruuq chixtenq’ankil anihaq li naraj ru xjalb’al xk’a’uxl?

Tzol’leb’ ut Sumwank 59:3–19.K’a’ru xyaalalil li ch’ol aatin “te’xk’ul choq’ xkorooneb’ … li taqlahom”? (raqal 4). Naq yooqex chirilb’aleb’ ru li taqlahom sa’eb’ li raqal 5–19, aatinanqex chirixeb’ li osob’tesink xek’ul rik’in xpaab’ankileb’ li junjunq chi taqlahom a’in.

Taaruuq ajwi’ teek’e reetal chan ru neke’oksiman li aatin jo’ “xsahil aach’ool,” “saho’k ch’oolej,” “xsahil,” ut “sa” re xch’olob’ankil li taqlahom re roxloq’inkil li hilob’aal kutan. K’a’ru naru taab’aanu re naq numtajenaq xsahil aach’ool sa’ li hilob’aal kutan? Maare laa junkab’al taawulaq chiruheb’ jun b’atz’unk re xk’ulinkileb’ rib’ li kok’ setb’il hu li neke’xk’uteb’ li k’a’aq re ru naru taqab’aanu re roxloq’inkil li hilob’aal kutan.

Tzol’leb’ ut Sumwank 59:18–21K’a’ru naru taqab’aanu re “rilb’al … li ruq’ li Dios sa’ chixjunil li k’a’aq re ru”? (raqal 21). Maare naru texxik chi b’eek malaj teerileb’ li jalam-uuch, ut teek’e reetal li k’a’ru “naxsahob’resi li uhej ut naxk’e xsahil xch’ool li aamej” (raqal 18). Taaruuq teerisi malaj teeyiib’ xjalam-uuch li k’a’ru neketaw, ut chirix a’an tex’aatinaq chirix chan ru naru teek’ut lee b’antioxihom xb’aan li k’a’aq re ru a’in. Chan ru naqil li ruq’ li Dios sa’ li qayu’am?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Sik’ li us,” Eb’ li B’ich, 151.

Xchaab’ilob’resinkil li qak’utum

Wotzeb’ li raqal sa’eb’ li loq’laj hu. K’e xhoonaleb’ li komon sa’ li junkab’al chixwotzb’aleb’ raqal chi loq’laj hu nawulak chiruheb’, li xe’xtaw naq xe’tzolok sa’ junesal.

Jalam-uuch xb’aan li xMarti Major