Li xam chire li nima’ Missouri, xb’aan laj Bryan Mark Taylor

31 mayo–6 junio

Tzol’leb’ ut Sumwank 60–62:

“Chixjunil li tz’ejwalej wan sa’ wuq’ ”

Li Awa’b’ej Ezra Taft Benson kixk’ut naq sa’ xtzolb’aleb’ li loq’laj hu, “taanimanq li xnawom ch’oolej. Xk’eeb’al ch’oolej te’nimaaq. Eb’ li junkab’al te’kawresiiq. Li musiq’anb’il na’leb’ taawulaq” (“El poder de la palabra,” Liahona, julio 1986, 74).

Tz’iib’a li nakak’oxla

Sa’ junio re 1831, laj Jose Smith kixb’oq jun ch’utub’aj-ib’ rik’ineb’ li xb’eenil re li Iglees aran Kirtland. Aran li Qaawa’ kixk’uub’eb’ li xb’eenil ut kixtaqlaheb’ chi ka’kab’ toj sa’ li Condado Jackson, Missouri, rik’in li chaq’rab’ihom a’in: “Che’jultikanq aatin chire li b’e” (Tzol’leb’ ut Sumwank 52:10). Ke’wan li xb’eenil li ke’xb’aanu chi k’eek’ookeb’ xch’ool, ut ke’wan li ink’a’. Naq kiwulak xq’ehil naq te’sutq’iiq aran Kirtland, li Qaawa’ kixye, “A’b’an wankeb’ li [xb’eenil] moko nasaho’ ta wi’ chi tz’aqal inch’ool, xb’aan naq ink’a’ te’xte xtz’uumal re; neke’xmuq b’an li maatan li kink’e reheb’, xb’aan xxuwankil ru li winq” (Tzol’leb’ ut Sumwank 60:2). Naab’al qe laa’o naru naqeek’a li ke’reek’a li xb’eenil a’an—laa’o ajwi’ maare naqab’ay qib’ chixteeb’al xtz’uumal li qe ut chixwotzb’al li evangelio. Maare laa’o ajwi’ ramrooko xb’aan “xxuwankil ru li winq.” Maare naqak’oxla naq moko k’ulub’ejo ta, malaj ink’a’ naru chiqu. Maak’a’ naxye k’a’ru naramok qe, li Qaawa’ “naxnaw lix q’unal xmetz’ew li winq ut chan ru xk’eeb’al qatenq’ankil” (Tzol’leb’ ut Sumwank 62:1). Chi jek’inb’il sa’eb’ li k’utb’esinb’il na’leb’ a’in choq’ reheb’ li misioneer, wankeb’ chaab’il na’leb’ li naru toohe’xtenq’a chixq’axb’al ru li qaxiw chirix xwotzb’al li evangelio—malaj jalaneb’ chik li qaxiw: “Laa’in, li Qaawa’, nintaqlan sa’ li choxa taqe’q.” “Laa’in naruhan chiwu xk’eeb’al eesantilal.” “Chixjunil li tz’ejwalej wan sa’ wuq’.” Ut “chiwanq xsahil eech’ool, ex kok’al, xb’aan naq laa’in wankin sa’ eeyi.” (Tzol’leb’ ut Sumwank 60:4, 7; 61:6, 36.)

Li na’leb’ re xtzolb’aleb’ li loq’laj hu aajunes

Tzolʼlebʼ ut Sumwank 60; 62

Li Qaawa’ nasaho’ xch’ool naq ninte xtz’uumal we re xwotzb’al li evangelio.

Chiqajunil wanjenaq hoonal naq xooru raj chixwotzb’al li evangelio, a’b’an ink’a’ xqab’aanu. Naq yooqat chirilb’al ru li raatin li Qaawa’ choq’ reheb’ li misioneer li ink’a’ “ke’xte xtz’uumal re,” k’oxlan chirixeb’ laa hoonal laa’at re xwotzb’al li evangelio. Chan ru naq lix nawom aach’ool chirix li evangelio chanchan jun li “maatan,” malaj jun b’ihomal naxk’e li Dios? Chan ru naq wan naq “naqamuq li qamaatan”? (Tzol’leb’ ut Sumwank 60:2; chi’ilmanq ajwi’ Mateo 25:14–30).

Li Qaawa’ kixtijeb’ li misioneer a’an, a’ut jo’kan ajwi’ kixwaklesiheb’ xch’ool. K’a’ruheb’ li na’leb’ naxk’e sa’eb’ li tasal 60 ut 62 li neke’xwaklesi aach’ool? Chan ru naq eb’ li na’leb’ a’in neke’xk’e xkawil aach’ool chixwotzb’al li evangelio? Chiruheb’ li kutan chalkeb’ re, sik’eb’ hoonal re xteeb’al xtz’uumal laa we ut xwotzb’al li k’a’ru k’eeb’il aawe xb’aan li Dios.

Chi’ilmanq ajwi’ Tzol’leb’ ut Sumwank 33:8–10; 103:9–10; Dieter F. Uchtdorf, “Li misioneerik: xwotzb’al li wan sa’ laa ch’ool,” Jolomil ch’utub’aj-ib’ re abril 2019.

Li Dios naraj naq tinwotz li evangelio rik’ineb’ li was wiitz’in.

Tzolʼlebʼ ut Sumwank 61:5–6, 14–18

Ma majewanb’il chixjunileb’ li ha’ xb’aan li Qaawa’?

Lix tijom li Qaawa’ sa’ Tzol’leb’ ut Sumwank 61 a’an jun tijom chirix li xiwxiw naru te’xnumsi lix tenamit naq yookeb’ chi nume’k chiru li nima’ Missouri toj aran Sion, jun nima’ li xiwxiw sa’ li kutan a’an. Li tijom a’in ink’a’ naraj naxye naq ink’a’ nokoru chi xik chiru li ha’. Li Qaawa’ wan re “anchal li wankilal,” jo’ ajwi’ wankilal sa’ xb’eeneb’ li ha’ (raqal 1).

Tzolʼlebʼ ut Sumwank 61–62

Numtajenaq xwankilal li Qaawa’ ut naru tixkol wix.

Naq yookeb’ chi sutq’iik aran Kirtland, laj Jose Smith ut li rech aj jolominel re li Iglees ke’xk’ul nimla xiwxiw naq yookeb’ chi xik chiru li nima’ Missouri (chi’ilmanq Santos, 1:136–137). Li Qaawa’ kiroksi li hoonal a’an re xtijb’aleb’ ut xtzolb’aleb’ lix moos. K’a’ru nakataw sa’ Tzol’leb’ ut Sumwank 61 li naxwaklesi aach’ool chixkanab’ankil aawib’ sa’ ruq’ li Qaawa’ naq yookat chixk’ulb’al ch’a’ajkilal? Qayehaq, k’a’ut naq aajel ru xnawb’al naq li Dios “junelik wanjenaq ut junelik taawanq”? (raqal 1).

Wankeb’ xkomon li na’leb’ a’in sa’ li tasal 62. K’a’ru naxk’ut li Qaawa’ chawu chirix ani a’an ut chirix lix wankilal sa’ li k’utb’esinb’il na’leb’ a’in?

K’oxlaheb’ laa numsihom li xe’xkawob’resi laa paab’aal naq li Qaawa’ xatxtenq’a chixq’axb’al ru li yale’k-ix sa’ musiq’ej malaj sa’ tz’ejwalej.

Tzolʼlebʼ ut Sumwank 62

Li Qaawa’ naraj naq tinsik’ ru li k’a’aq re ru “jo’ nink’oxla naq us.”

Wan naq li Qaawa’ naxye tz’aqal k’a’ru tento taqab’aanu, ut wan naq nokoxkanab’ chixsik’b’al ru laa’o. Chan ru nakawil chi k’utmank li na’leb’ a’in sa’ Tzol’leb’ ut Sumwank 62? (chi’ilmanq ajwi’ Tzol’leb’ ut Sumwank 60:5; 61:22). Chan ru naq xawil chi kʼanjelak li naʼlebʼ aʼin saʼ laa yuʼam laaʼat? K’a’ut naq us choq’ qe xsikb’al ru k’a’ru taqab’aanu chi ink’a’ yeeb’il chi tz’aqal xb’aan li Dios?

Chi’ilmanq ajwi’ Eter 2:18–25; Tzol’leb’ ut Sumwank 58:27–28.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 60:2–3.K’a’ut naq junjunq reheb’ li misioneer sa’ xtiklajik li Iglees ke’xb’ay rib’ chixwotzb’al li evangelio? K’a’ut naq wan naq naqab’ay qib’? K’oxla xb’aanunkil jun k’utb’esink chirix chan ru naq eb’ li komon sa’ li junkab’al te’ruuq chixwotzb’al li evangelio sa’ jalan jalanq chi hoonal malaj na’ajej.

Tzol’leb’ ut Sumwank 61:36–39.K’a’ut naq naru “taawanq xsahil qach’ool,” jo’ naxye sa’eb’ li raqal a’in? (chi’ilmanq ajwi’ Jwan 16:33). Maare laa junkab’al taaruuq te’xtz’iib’a malaj te’xyiib’ xjalam-uuch li k’a’ru naxk’e xsahileb’ xch’ool, ut te’xk’eheb’ sa’ jun sek’ re “sahil ch’oolejil.” (Us raj naq te’wanq xjalam-uuch li Kolonel ut li k’a’ru naxjultika qe lix rahom choq’ qe.) Chiru li xamaan, naq eb’ li komon sa’ li junkab’al te’raj ru xjultikankil k’a’ru xyaalal naq te’saho’q xch’ool, taaruuq te’xxok k’a’ruhaq wan sa’ li sek’.

Tzol’leb’ ut Sumwank 61:36.Chan ru naru taatenq’aheb’ li komon sa’ laa junkab’al chixjultikankil naq li Kolonel wan “sa’ qayi”? Taaruuq teesik’ ru sa’ komonil b’ar teek’e jun xjalam-uuch a’an sa’ lee rochoch. Chan ru naru taqak’e xb’oqb’al li Kolonel sa’ li qayu’am wulaj wulaj?

Tzol’leb’ ut Sumwank 62:3.Maare taaruuq teewotz xnawom eech’ool cherib’il eerib’ chirix rilb’al ru li raqal a’in. Re xch’olob’ankil k’a’ru jun xnawom ch’oolej, taaruuq taawotz junjunq raqal re li raatin li Awa’b’ej M. Russell Ballard “Testimonio puro” (Liahona, noviembre 2004, 40–43). K’a’ut naq us naq taqatz’iib’a lix nawom qach’ool?

Tzol’leb’ ut Sumwank 62:5, 8.K’a’ut naq li Qaawa’ ink’a’ naxk’ehatqeb’ taqlahom chirix chixjunil li naqab’aanu sa’ li qayu’am? Jo’ naxye sa’ li raqal 8, chan ru naq toosik’oq u?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Lix nawom inch’ool,” Eb’ li B’ich, 78.

Xchaab’ilob’resinkil li tzolok aajunes

Kanab’ li Musiq’ej chixk’amb’al aab’e sa’ li tzolok. Kanab’ li Santil Musiq’ej chab’eresinkil. Chawab’i lix hasb’ naq yoo chixk’amb’al aab’e sa’ li k’a’ru tento taatzol rajlal kutan, us ta naxhasb’a aawe naq taawil ru malaj taatzol jun na’leb’ ink’a’ raj taatzol malaj jalan chan raj ru taatzol.

Li chaab’il aj Ilol Karneer, xb’aan laj Del Parson