Li Kristo ut li saaj aj b’ihom, xb’aan laj Heinrich Hofmann

19–25 julio

Tzolʼlebʼ ut Sumwank 81–83

B’ar “k’eeb’il naab’al, naab’al li teneb’anb’il”

Naq yooqat chixtzolb’al Tzol’leb’ ut Sumwank 81–83, k’e reetaleb’ li na’leb’ naru tate’xtenq’a chixb’aanunkil li chaab’il sa’ laa junkab’al, chiruheb’ laa wamiiw, ut chiruheb’ xkomon li kristiaan.

Tz’iib’a li nakak’oxla

Sa’ marzo re 1832, li Qaawa’ kixk’e xb’oqb’al laj Jesse Gause chi wank choq’ aj tenq’ aj k’ehol na’leb’ chiru laj Jose Smith sa’ li Awa’b’ejil re li Taqenaqil Tijonelil (a’an li Xb’eenil Awa’b’ejil jo’ nayeeman re anajwan). Tzol’leb’ ut Sumwank 81 a’an jun k’utb’esinb’il na’leb’ choq’ re li Hermano Gause, li naxk’e xna’leb’ chirix lix ak’ b’oqb’al ut li naxyeechi’i re naq taa’osob’tesiiq naq taak’anjelaq chi tiik xpaab’aal. A’b’an laj Jesse Gause ink’a’ kik’anjelak chi tiik xpaab’aal. Jo’kan naq laj Frederick G. Williams kib’oqe’ choq’ ruuchil a’an, ut kijale’ ru lix k’ab’a’ li Hermano Gause rik’in lix k’ab’a’ li Hermano Williams sa’ li k’utb’esinb’il na’leb’.

Maare chanchan naq yal ch’ina na’leb’ a’in, a’b’an a’an naxk’ut jun xnimal ru yaal: Lix k’ihaleb’ li k’utb’esinb’il na’leb’ sa’ li Tzol’leb’ ut Sumwank k’eeb’ileb’ choq’ re kristiaan sa’ junjunqal, a’b’an junelik naru naqasik’ xjuntaq’eetankileb’ qik’in (chi’ilmanq 1 Nefi 19:23). Lix na’leb’ li Qaawa’ choq’ re laj Frederick G. Williams naq “tixk’e xmetz’ew li xb’een aqej li maak’a’ xmetz’ew” naru tooxjayali rik’ineb’ li ani naru te’qakawob’resi (Tzol’leb’ ut Sumwank 81:5). Lix na’leb’ li Qaawa’ choq’ reheb’ li komon sa’ li Molam sa’ Junajil naq “te’xb’ak’ rib’ rik’in li sumwank a’in” re xk’eeb’al li ajb’il ru xb’aan li Iglees naru tooxjayali rik’ineb’ li qasumwank laa’o. Ut lix yeechi’ihom li Qaawa’ naq taawanq “chi teneb’anb’il naq nekeb’aanu li k’a’ru ninye” naru tixjultika qe li k’a’ru naxyeechi’i qe naq too’ab’inq chiru (Tzol’leb’ ut Sumwank 82:10, 15). Ut us ajwi’ a’an, xb’aan naq li Qaawa’ kixye ajwi’, “Li k’a’ru ninye re li jun ninye re chixjunil” (raqal 5).

Chi’ilmanq “Newel K. Whitney y la Firma Unida,” “Jesse Gause: Consejero del Profeta,” Revelaciones en contexto, 151–157, 165–168.

Li na’leb’ re xtzolb’aleb’ li loq’laj hu aajunes

Tzolʼlebʼ ut Sumwank 81

Naru naq tiikaqin chixb’aanunkil li naxpatz’ li Dios naq tinb’aanu.

Ma wan naq nakatk’oxlak chirix chan ru naru taatz’aqob’resiheb’ ru li xninqal ru teneb’ahom sa’ laa yu’am? Jo’ tenq’ aj k’ehol na’leb’ chiru li Profeet aj Jose Smith, kiwan naab’al li k’a’ru aajel ru teneb’anb’il sa’ xb’een laj Frederick G. Williams. Sa’ li tasal 81, li Qaawa’ kixk’e xna’leb’ chirix chan ru xtz’aqob’resinkil ru. K’a’ru nakataw sa’ li tasal a’in li naru tatxtenq’a chixtz’aqob’resinkil ru li k’a’ru naxteneb’ li Qaawa’ sa’ aab’een?

Wahe’ junjunq li patz’om re aatenq’ankil chixk’oxlankil rix li raqal 5:

• Chan ru naq junaq kristiaan naru nawan chi “q’un xmetz’ew”? K’a’ru naraj naxye “xk’eeb’al xtenq’ankileb’ ” li ani q’uneb’ xmetz’ew?

• K’a’ raj ru tixk’eheb’ chi “luktaak li ruq’ ” junaq kristiaan? Chan ru naru “te’qataqsi” li uq’ej a’an?

• K’a’raj xyaalalil li ch’ol aatin “li xb’een aqej li maak’a’ xmetz’ew”? Chan ru naru “taqak’e xmetz’ew” li ani wan xb’een raq li maak’a’ xmetz’ew?

Maare sa’ xtzolb’al li raqal a’in chalenaq sa’ aak’a’uxl anihaq li taaruuq “taak’e xtenq’ankil,” “taataqsi,” malaj “taak’e xmetz’ew.” K’a’ru taab’aanu re xtenq’ankil li kristiaan a’an?

Li Xb’eenil Awa’b’ejil: aj Sidney Rigdon, aj Jose Smith, aj Frederick G. Williams

Tzol’leb’ ut Sumwank 82:1–7

Li Qaawa’ naxk’e inb’oqb’al chixjalb’al ink’a’uxl ut chixkanab’ankil inmaak.

Naq yooqat chirilb’al ru Tzol’leb’ ut Sumwank 82:1–7, k’oxla xyiib’ankil wiib’ xtusulal li k’a’ru taatzol: eb’ li tijom chirix li maak ut eb’ li yaalil na’leb’ chirix li kuyuk maak. Chan ru naq eb’ li yaalil na’leb’ a’in taaruuq tatex’tenq’a chixq’axb’al ru li raalehom laj tza?

Tzol’leb’ ut Sumwank 82:8–10

Eb’ li taqlahom wankeb’ re inkolb’al ut re xtojb’al wix.

Wi laa’at—malaj anihaq nakanaw ru—wanjenaq aapatz’om chirix k’a’ut naq k’a’jo’ xk’ihaleb’ lix taqlahom li Qaawa’, Tzol’leb’ ut Sumwank 82:8–10 naru natenq’an. K’a’ruheb’ li na’leb’ sa’eb’ li raqal a’in li taaruuq tate’xtenq’a chixch’olob’ankil chiru anihaq chik k’a’ut naq nakasik’ ru xtaaqenkileb’ lix taqlahom li Qaawa’? Naru ajwi’ tatk’oxlaq chirix chan ru naq jalb’il aayu’am xb’aaneb’ lix taqlahom. K’a’ru nakatzol chirix li Qaawa’ naq yooqat chirilb’al ru li raqal 10?

Chi’ilmanq ajwi’ Tzol’leb’ ut Sumwank 130:20–21; Carole M. Stephens, “Wi nikineera, teepaab’ lin chaq’rab’,” Jolomil ch’utub’aj-ib’ re octubre 2015.

Tzolʼlebʼ ut Sumwank 83

“Eb’ li xmalka’an ut li maak’a’eb’ xyuwa’ taak’eemanq li k’a’ru taak’anjelaq reheb’.”

Sa’ abril re 1832, jo’ taqlanb’il xb’aan li Qaawa’, laj Jose Smith kib’eek haye’ 1300 kiloom re rula’aninkileb’ laj santil paab’anel li ke’xch’utub’ chaq rib’ sa’ Missouri (chi’ilmanq Tzol’leb’ ut Sumwank 78:9). Sa’ jun na’ajej kirula’ani ke’wan li xmalka’an li yookeb’ chixk’iresinkileb’ lix kok’al xjuneseb’ rib’. Sa’ xyanqeb’ wankeb’ li xPhebe Peck ut li xAnna Rogers, li nawb’ileb’ ru xb’aan li Profeet. Aran Missouri sa’eb’ li chihab’ chirix 1830, lix chaq’rab’ li tenamit kixk’e b’ayaq ajwi’ xk’ulub’ileb’ li xmalka’an chirix li k’a’ru reheb’ lix b’eelom kamenaqeb’. K’a’ru nakatzol sa’ li tasal 83 chirix chan ru nareek’a li Qaawa’ chirixeb’ li xmalka’an ut li maak’a’eb’ xyuwa’? Ma nakanaw ru anihaq li wan chi jo’kan li taa’usaaq raj xyu’am xb’aan laa rahom malaj laa ch’olanihom?

Chi’ilmanq ajwi’ Isaias 1:17; Santiago 1:27.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 81:3.Taaruuq taak’e kok’ hu setb’il jo’ aamej reheb’ li komon sa’ li junkab’al ut taakanab’eb’ chixyiib’ankil xjalam-uuch malaj chixtz’iib’ankil k’a’ruhaq te’raj wi’ tijok. Aatinan chirix lix yaalalil li tijok “junelik, rik’in xyaab’ aakux ut sa’ laa ch’ool.”

Tzol’leb’ ut Sumwank 81:5.Re tzolok chirixeb’ li na’leb’ sa’ li raqal a’in, maare eb’ li komon sa’ li junkab’al taaruuq te’xwotz hoonal naq “q’uneb’ xmetz’ew” malaj “maak’a’eb’ xmetz’ew” ut anihaq chik kixtenq’aheb’ malaj kixkawob’resiheb’. Taaruuq ajwi’ teerileb’ li video chirix k’anjelak chiru qas qiitz’in li wankeb’ sa’ ChurchofJesusChrist.org. Aatinanqex chirix chan ru naru teetenq’a eerib’ cherib’il eerib’ rik’in kok’ b’aanuhom sa’ lee junkab’al.

Tzol’leb’ ut Sumwank 82:8–10.Maare jun ch’ina b’atz’unk tixtenq’a laa junkab’al chixb’antioxinkileb’ lix taqlahom li Dios. Jun komon sa’ li junkab’al taaruuq tixch’olob’ chiru junaq chik li tz’apb’il rilob’aal chan ru xyiib’ankil jun tzakemq malaj chan ru b’eek sa’ xyiheb’ junjunq li ramleb’. K’uub’ k’a’ruhaq li taawulaq cheru! Chirix a’an, aatinan chirix chan ru naq lix taqlahom li Dios chanchan li ch’olob’ank sa’ li b’atz’unk a’in.

Tzolʼlebʼ ut Sumwank 82:18–19.K’a’ru naru tixb’aanu li junjunq komon sa’ li junkab’al re “xchaab’ilob’resinkil li maatan k’eeb’il re” ut “xk’ulb’al chik xkomon li maatan”? Maare taawulaq cheru xwotzb’aleb’ lee maatan cherib’il eerib’ jo’ junkab’al. K’oxlan chirix chan ru naru te’wotzmanq li maatan li ch’a’aj b’ayaq xk’utb’aleb’ (jo’eb’ li musiq’ejil maatan; chi’ilmanq Tzol’leb’ ut Sumwank 46:11–26). Chan ru naq te’qoksi li qamaatan ut taqawotz li k’a’ru wan qe re rosob’tesinkil li qajunkab’al ut eb’ li qas qiitz’in? K’a’ru naraj naxye roksinkileb’ li qamaatan “chi junaj ru lix sa’ li qu sa’ lix loq’al li Dios”?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Ma chaabʼil anajwan xinbʼaanu arin?” Eb’ li B’ich, 143; chi’ilmanq ajwi’ “Li na’leb’ re xchaab’ilob’resinkil li tzolok sa’ junkab’al.”

Xchaab’ilob’resinkil li qak’utum

Oksiheb’ li patz’om li te’reeka’siheb’ chi k’anjelak. K’oxlaheb’ li patz’om li te’xb’oqeb’ li komon sa’ laa junkab’al chi k’oxlak chirix chan ru naq te’ruuq chik chixyu’aminkil li evangelio. “Chi kok’ aj xsa’, ink’a’ te’sumeeq li patz’om a’in; a’aneb’ b’an re naq li junjunq tixtz’il rix sa’ xch’ool” (Li k’utuk jo’ li Kolonel, 31).

Xjalam-uuch li Jesus naq naxk’irtesi jun winq, xb’aan laj Dan Burr