K’ojob’ank wi’chik, xb’aan xLiz Lemon Swindle

26 julio–1 agosto

Tzolʼlebʼ ut Sumwank 84

“Li wankilal re choxahilal”

Naq yooqat chirilb’al ru Tzol’leb’ ut Sumwank 84, k’oxla li aatin naq “taawanq aayu’am rik’in li junjunq chi aatin li na’el chaq sa’ xtz’uumal re li Dios” (raqal 44). Chan ru taayu’ami li aatin sa’ li k’utb’esinb’il na’leb’ a’in?

Tz’iib’a li nakak’oxla

Chalen chaq xk’ojob’ankil wi’chik li tijonelil sa’ 1829, eb’ laj Santil Paab’anel sa’ Roso’jikeb’ li Kutan osob’tesinb’ileb’ xb’aan li santil wankilal a’an. Ke’kub’siik xha’, ke’k’ojob’aak, ut ke’b’oqe’ chi k’anjelak xb’aan xwankilal li tijonelil, jo’ chanru ajwi’ naqak’ul anajwan. A’b’an moko juntaq’eet ta roksinkil lix wankilal li tijonelil rik’in xtawb’al ru chi tz’aqal, ut li Dios kiwan xkomon li kiraj naq eb’ lix santil paab’anel te’xtaw ru—jo’ naq ok re chi k’ojob’amank li k’ojob’anb’il k’anjel re li santil ochoch. Li k’utb’esinb’il na’leb’ chirix li tijonelil li kik’eeman sa’ 1832, li wan anajwan sa’ Tzol’leb’ ut Sumwank 84, kixnimob’resi xnawomeb’ laj santil paab’anel chirix k’a’ru tz’aqal li tijonelil. Ut naru tixb’aanu ajwi’ choq’ qe sa’ li kutan a’in. Xb’aan naq toj wan naab’al naru natzolman chirix li santil wankilal wan wi’ “xlaawil li nawom re li Dios,” li naxk’utb’esi “li wankilal re choxahilal,” ut li nokoxkawresi “chirilb’al li rilob’aal li Dios, a’ li Yuwa’b’ej, ut tookanaaq chi yo’yo” (eb’ li raqal 19–22).

Li na’leb’ re xtzolb’aleb’ li loq’laj hu aajunes

Tzolʼlebʼ ut Sumwank 84:1–5, 17–28

Naru tink’ul li wankilal ut li osob’tesink li wan sa’ lix tijonelil li Dios.

Naq nakak’oxla li aatin tijonelil, k’a’ru nachal sa’ aak’a’uxl? Jo’ k’ihal sut nakatk’oxlak chirix li tijonelil ut lix wankil sa’ laa yu’am wulaj wulaj? Chirix xk’oxlankileb’ rix li patz’om a’in, il ru Tzol’leb’ ut Sumwank 84:1–5, 17–28, ut k’oxlan chirix k’a’ru naraj li Qaawa’ naq taanaw chirix lix wankilal lix tijonelil. Chan raj ru taaruuq taawoksiheb’ li raqal a’in re xch’olob’ankil chiru anihaq k’a’ru li tijonelil ut k’a’ru xk’anjel?

Naru ajwi’ tatk’oxlaq chirixeb’ li k’ojob’anb’il k’anjel re li tijonelil xattz’aqon wi’. Chan ru aawilom “li wankilal re choxahilal” (raqal 20) chi k’utb’esinb’il sa’eb’ li k’ojob’anb’il k’anjel a’an? K’oxlan chirix li naraj li Qaawa’ naq taab’aanu laa’at re xk’ulb’al xkomon lix wankilal sa’ laa yu’am.

Chi’ilmanq ajwi’ M. Russell Ballard, “Los hombres y las mujeres, y el poder del sacerdocio,” Liahona, septiembre 2014, 32–27; Temas del Evangelio, “Sacerdocio,” topics.ChurchofJesusChrist.org.

Tzol’leb’ ut Sumwank 84:31–42

Wi tink’ul li Qaawa’ ut eb’ lix moos, tink’ul chixjunil li wan re li Yuwa’b’ej.

Li Elder Paul B. Pieper kixk’ut: “Naqak’e reetal naq sa’ li xaqab’anb’il aatin ut sumwank re li tijonelil [Tzol’leb’ ut Sumwank 84:31–42], li Qaawa’ naroksi li aatin k’uluk. Moko naroksi ta li aatin k’ojob’ank. Sa’ li santil ochoch eb’ li winq ut eb’ li ixq—sa’ komonil—neke’xk’uleb’ li osob’tesink ut li wankilal re li Tijonelil re Aaron ut li Tijonelil re Melkisedek” (“Las realidades reveladas de la vida terrenal,” Liahona, enero 2016, 47).

Naq yooqat chixtzolb’al Tzol’leb’ ut Sumwank 84:31–42, sik’ b’ar natawman li aatin “k’uluk.” K’oxlan chirix k’a’ru naraj naxye sa’ li na’ajej yeeb’il wi’. Chan ru naq laa’at yookat “chixk’ulb’al” li Qaawa’ ut eb’ lix moos?

Taaruuq ajwi’ taak’e reetaleb’ li yeechi’ihom wankeb’ sa’eb’ li raqal a’in li wankeb’ rilom rik’in li xaqab’anb’il aatin ut sumwank re li tijonelil, li “ink’a’ naru chixq’etb’al” li Dios (raqal 40). K’a’ru nakataw li nakatxmusiq’a chi wank xkomon chik laa paab’aal chixk’ulb’al li Yuwa’b’ej, eb’ lix moos, ut lix wankilal lix tijonelil?

Chi’ilmanq ajwi’ K’utul Raqal reheb’ li Loq’laj Hu, “Sumwank,” “Xaqab’anb’il aatin.”

Tzol’leb’ ut Sumwank 84:43–58

Ninchal rik’in li Kristo naq ninpaab’ li raatin ut nin’ab’in chiru lix Musiq’.

Rilb’aleb’ ru chi kok’ aj xsa’ li loq’laj hu ut li raatineb’ li profeet maawa’ ka’ajwi’ jun ch’ina k’anjel tento xtz’aqob’resinkil ru sa’ jun li musiq’ejil tusulal. K’a’ruheb’ li yaalil na’leb’ nakataw sa’ Tzol’leb’ ut Sumwank 84:43–58 li nakate’xtenq’a chixtawb’al ru k’a’ut naq tento taatzol rajlal li raatin li Dios? K’e reetal chan ru naq jalan li saqen rik’in li q’ojyin sa’eb’ li raqal a’in; chan ru naq “lix yalb’al aaq’e chiru li aatin re li junelik yu’am” naxk’am chaq li saqen, li yaal, ut “lix Musiq’ li Jesukristo” sa’ laa yu’am? (eb’ li raqal 43, 45).

Chi’ilmanq ajwi’ 2 Nefi 32:3; “El Libro de Mormón: La clave de nuestra religión,” Enseñanzas de los Presidentes de la Iglesia: Ezra Taft Benson (2014), 137–147.

Xtzolb’aleb’ li loq’laj hu nikinixtenq’a chireek’ankil lix wankil li Musiq’ej.

Tzol’leb’ ut Sumwank 84:62–91

Li Qaawa’ taawanq wik’in naq yookin chi k’anjelak chiru.

Naq yooqat chirilb’aleb’ ru li raqal a’in, taaruuq taak’e reetal k’a’ru kixye li Qaawa’ naq tixb’aanu re xtenq’ankileb’ lix apostol ut lix misioneer. Chan raj ru te’kanjelaq li yeechi’ihom a’in sa’ li k’anjel naxpatz’ aawe naq taab’aanu? Qayehaq, chan ru naq tz’aqob’resinb’ileb’ ru sa’ laa yu’am li yeechi’ihom wankeb’ sa’ li raqal 88?

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 84:6–18.Chirix rilb’al ru li esil chirix chan ru naq laj Moises kixk’ul lix wankilal sa’ li tijonelil, jun li xk’uluk re li tijonelil sa’ laa junkab’al malaj jun winq aj ilol komon taaruuq tixwotz li kixnumsi naq kik’ojob’aak sa’ jun opiis re li tijonelil. Wi naru, taaruuq tixwotz ut taa’aatinaq chirixeb’ li ke’wan choq’ xxe’ xtoonal lix wankilal sa’ li tijonelil. K’a’ut naq aajel ru naq naru naqak’e reetal naq li wankilal re li tijonelil sa’ li Iglees anajwan nachal chaq rik’in lix wankilal li Jesukristo? Re xpatz’b’al resil lix xe’toonil aawankilal sa’ li tijonelil, naru xtaqlankil jun correo electrónico re [e-mail].

Tzol’leb’ ut Sumwank 84:20–21.Jo’q’e xeril jo’ junkab’al “li wankilal re choxahilal” chi k’utb’esimank sa’ jun k’ojob’anb’il k’anjel jo’ li kub’iha’ malaj li loq’laj wa’ak? Maare naru tex’aatinaq chirix chan ru naq eb’ li k’ojob’anb’il k’anjel a’in neke’xk’am chaq lix wankil li Dios sa’ li qayu’am. Taaruuq ajwi’ taak’ut jun xjalam-uuch li santil ochoch ut tat-aatinaq chirix chan ru naq eb’ li k’ojob’anb’il k’anjel re li santil ochoch neke’xk’e xkomon li qawankil chi wank jo’ li Kolonel. Naru teeb’icha jun li b’ich chirix li tijonelil, jo’ “Tz’aqal tijonelil xk’ojob’aman chi ak’il” (B’ichleb’aal choq’ reheb’ li Kok’al, 60–61), ut tex’aatinaq chirix k’a’ru naxk’ut li b’ich a’in chirix li tijonelil.

Tzol’leb’ ut Sumwank 84:43–44.Taaruuq teek’uub’ jun tzakemq malaj kok’ kab’ sa’ komonil ut teetz’iib’a li aatin malaj ch’ol aatin sa’ li raqal 44 choq’ xk’ab’a’ li junjunq k’a’aq re ru na’oksiman re xk’uub’ankil. K’a’ut naq aajel ru naq taa’oksimanq li junjunq k’a’aq re ru? K’a’ut naq aajel ru naq taqayu’ami li junjunq chi aatin re li Dios?

Tzol’leb’ ut Sumwank 84:98–102.K’a’ru naqatzol chirix li Jesukristo sa’ li “ak’ b’ich” (raqal 98) sa’eb’ li raqal a’in? K’a’ru naru taqab’aanu sa’ li qakutankil re xtenq’ankil chixk’eeb’al chi uxmank li k’a’ru k’utb’il sa’ li b’ich a’in?

Tzol’leb’ ut Sumwank 84:106–10.Chan ru naq jo’ junkab’al “nawaklesiiq li qaam sa’ komonil” xb’aaneb’ lix maatan ut lix k’anjel li “junjunq cha’alej”? (raqal 110).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Tz’aqal tijonelil xk’ojob’aman chi ak’il,” B’ichleb’aal choq’ reheb’ li Kok’al, 60–61; chi’ilmanq ajwi’ “Li na’leb’ re xchaab’ilob’resinkil li tzolok sa’ junkab’al.”

Xchaab’ilob’resinkil li qak’utum

K’eheb’ li b’oqb’al chi k’anjelak ut patz’on chirixeb’. Naq taak’e xb’oqb’al laa junkab’al chixb’aanunkil li k’a’ru yookeb’ chixtzolb’al, k’ut chiruheb’ naq li evangelio tento xyu’aminkil, ink’a’ yal aatinak chirix. K’a’ru naru taak’e xb’oqb’aleb’ chixyu’aminkil sa’ li k’a’ru xetzol sa’ Tzol’leb’ ut Sumwank 84?

Santil Ochoch re Roma, Italia