“2–8 agosto. Tzolʼlebʼ ut Sumwank 85–87: “Xaqlinqex sa’eb’ li na’ajej sant,” ” Kim, Taaqehin—Choq’ reheb’ li komon ut li junkab’al: Li Tzol’leb’ ut Sumwank 2021 (2020)
“2–8 agosto. Tzolʼlebʼ ut Sumwank 85–87,” Kim, Taaqehin—Choq’ reheb’ li komon ut li junkab’al: 2021
2–8 agosto
Tzolʼlebʼ ut Sumwank 85–87
“Xaqlinqex sa’eb’ li na’ajej sant”
Li Musiq’ej naru tatxb’eresi chixtzolb’aleb’ na’leb’ sa’eb’ li tasal 85–87 li moko wankeb’ ta sa’ li tusleb’ aatin a’in. Taaqe lix b’eresihom.
Tz’iib’a li nakak’oxla
Sa’ li Ralankil k’aynaqo chixk’oxlankileb’ li esil jo’ “tuqtuukilal usilal sa’ ruchich’och’ ” (chi’ilmanq Lukas 2:14). A’b’an sa’ li 25 re diciembre, 1832, yoo chaq xk’a’uxl laj Jose Smith chirix xchalik li pleetik. Li estado South Carolina toje’ kixjach rib’ rik’in xjolomil li tenamit aran Estados Unidos ut yoo chaq chixkawresinkil rib’ choq’ re pleetik. Ut li Qaawa’ kixk’utb’esi chiru laj Jose naq a’in ka’ajwi’ lix tiklajik: “Taahoymanq li pleet sa’ xb’eeneb’ chixjunil li tenamit,” chan (Tzol’leb’ ut Sumwank 87:2). Chanchan naq sa’ junpaat taatz’aqob’resimanq ru li profeetil aatin a’in.
A’b’an ink’a’ kik’ulman a’in. Chirix xnumik junjunq xamaan, South Carolina ut li Estados Unidos ke’xk’am wi’chik rib’ chirib’ileb’ rib’ sa’ usilal, ut ink’a’ ki’ux li pleetink-ib’. A’ut li k’utb’esinb’il na’leb’ ink’a’ junelik natz’aqob’resiman ru jo’q’e malaj chan ru naqak’oxla laa’o. 30 chihab’ chirix a’an, k’iila chihab’ chirix xkamik laj Jose Smith ut xxikikeb’ laj santil paab’anel sa’ rokeb’aal saq’e, South Carolina kirisi wi’chik rib’ ut ki’ux li nimla pleetink-ib’. Chalen chaq a’an, xb’aan li pleetik chiru chixjunil li ruchich’och’ “xe’yaab’ak li wankeb’ chi sa’ ” (Tzol’leb’ ut Sumwank 87:6). Us ta sa’ roso’jik kitz’aqob’resiman ru li profeetil aatin, lix loq’al li k’utb’esinb’il na’leb’ a’in maawa’ xq’ehinkil jo’q’e taak’ulmanq li rahilal, a’an b’an xk’utb’al k’a’ru tento taab’aanumanq naq taak’ulmanq. Juntaq’eet li na’leb’ k’eeb’il sa’ 1831, sa’ 1861, ut sa’ 2021: “Xaqlinqex sa’eb’ li na’ajej sant, ut mex’eek’asiik” (raqal 8).
Li na’leb’ re xtzolb’aleb’ li loq’laj hu aajunes
Tz’aqal us “xtz’iib’ankil jun esilal.”
Sa’ li “esilal” li yeeb’il resil sa’ li raqal 1 ke’tz’iib’aman xk’ab’a’eb’ li ani “ke’k’uluk re li reechanihomeb’ jo’ chanru li chaq’rab’ ” sa’ Sion (chi’ilmanq ajwi’ Tzol’leb’ ut Sumwank 72:24–26). A’b’anan, li esilal a’in maawa’ ka’ajwi’ re xb’aanunkil xk’anjel li Iglees—a’an ajwi’ jun xnimal ru esilal chirix “chanru lix yu’ameb’, ut lix paab’aaleb’, ut lix k’anjeleb’ ” laj santil paab’anel (raqal 2).
Ma yookat chixtz’iib’ankil resil laa yu’am laa’at? K’a’ raj ru taaruuq taatz’iib’a chirix chan ru laa yu’am, laa paab’aal, ut laa k’anjel li taaruuq taarosob’tesiheb’ li tasal tenamit toj te’chalq? Chan raj ru taaruuq tat-osob’tesiiq laa’at xb’aan li esilal a’in?
Chi’ilmanq ajwi’ “El diario: “De mucho más valor que el oro,” ” Enseñanzas de los Presidentes de la Iglesia: Wilford Woodruff (2011), 131–138.
Li Musiq’ej na’aatinak rik’in jun “ch’ina xyaab’ kuxej li q’un na’aatinak.”
K’oxlan chirix li aatin kiroksi laj Jose Smith re xch’olob’ankil xyaalal li Musiq’ej sa’ Tzol’leb’ ut Sumwank 85:6. Chan ru naq lix yaab’ xkux li Musiq’ej a’an jun “ch’ina xyaab’ kuxej li q’un na’aatinak”? K’a’ru junjunq li k’a’aq re ru li “naxq’ax ru” sa’ laa yu’am?
Naq yooqat chi k’oxlak chirix chan ru na’aatinak li Musiq’ej aawik’in, k’oxlaheb’ li na’leb’ a’in k’eeb’ileb’ rik’in xtz’uumal re laj Jose Smith: Tzol’leb’ ut Sumwank 6:22–24; 8:2–3; 9:7–9; 11:12–13; 128:1. A’ yaal li xawil ru, k’a’ru nakaweek’a naq tento taab’aanu re reek’ankil chi us wi’chik lix yaab’ xkux li Musiq’ej?
Chi’ilmanq ajwi’ 1 Reyes 19:11–12; Helaman 5:30.
Xtzolb’aleb’ li loq’laj hu nokoxtenq’a chirab’inkil li Santil Musiq’ej.
Eb’ li tiikeb’ xch’ool te’ch’utub’aaq sa’ roso’jikeb’ li kutan.
Sa’ Tzol’leb’ ut Sumwank 86:1–7 li Qaawa’ naxch’olob’ k’a’ru xyaalalil li jajlookil ru aatin chirix li trigo ut li yib’ aj pim, ut jalan b’ayaq li raatin arin rik’in li raatin sa’ Mateo 13:24–30, 37–43. Naq yooqat chixjuntaq’eetankileb’ li wiib’ chi esil, k’a’ru xjalanileb’ nakawil? K’oxla k’a’ut naq li jaljookil ru aatin—rik’ineb’ li jalanil a’in—aajel ru xka’sutinkil “sa’ roso’jik li kutan, anajwan ajwi’ ” (Tzol’leb’ ut Sumwank 86:4). K’a’ru naru taatzol rik’in li jaljookil ru aatin a’in, ut rik’in li ch’olob’anb’il chirix sa’ roso’jikeb’ li kutan?
Jo’ tz’iib’anb’il sa’eb’ li raqal 8–11, li Qaawa’ ki’aatinak ajwi’ chirix li tijonelil, lix k’ojob’ankil wi’chik li evangelio, ut lix kolb’aleb’ lix tenamit. K’a’ru nakawil chirix chan ru neke’xk’am rib’ li raqal a’in ut li jaljookil ru aatin chirix li trigo ut li yib’ aj pim? Chan ru naru tatwanq jo’ “jun aj kolonel choq’ re lix tenamit li Qaawa’ ”? (raqal 11).
Chi’ilmanq ajwi’ Temas del Evangelio, “Apostasía,” “Jesucristo restauró el sacerdocio,” topics.ChurchofJesusChrist.org.
Natawman li tuqtuukilal sa’eb’ “li na’ajej sant.”
Rochb’een li ruchich’och’il rahilal, jo’ li “hoyok kik’ … ut we’ej, ut yajel, ut hiik” (Tzol’leb’ ut Sumwank 87:6), li na’leb’ sa’ li k’utb’esinb’il na’leb’ a’in naru taawanq ajwi’ xwankil rik’in li rahilal sa’ musiq’ej naqak’ul chiqajunilo sa’ roso’jikeb’ li kutan. K’a’ruheb’ li “na’ajej sant” (raqal 8) nakataw wi’ li tuqtuukilal ut xkolb’al aawix laa’at? K’a’ru naxk’e xsantilal junaq na’ajej? Rochb’eeneb’ ruchich’och’il na’ajej, maare wankeb’ santil hoonal, santil b’aanuhom, malaj santil k’oxlahom li naru te’xk’e li tuqtuukilal. K’a’ru naraj naxye “mex’eek’asiik” sa’eb’ li na’ajej a’in?
Chi’ilmanq ajwi’ Henry B. Eyring, “Jun ochoch b’ar wi’ nawan lix Musiq’ li Qaawa’,” Jolomil ch’utub’aj-ib’ re 2019, 22–25; Santos, 1:166–167; “Paz y guerra,” Revelaciones en contexto,, 169–175.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Tzol’leb’ ut Sumwank 85:6.Chan ru naru taak’ut chiru laa junkab’al chan ru xk’eeb’al reetal li ch’ina xyaab’ xkux li Musiq’ej li q’un na’aatinak? Maare taaruuq teeb’aanu jun li b’atz’unk b’ar wi’ anihaq naxhasb’a k’a’ruhaq naq wan choqink. K’a’ raj ru naru tooxjalb’ehi rik’in rab’inkil li Santil Musiq’ej? Maare eb’ li komon sa’ li junkab’al taaruuq te’xwotz k’a’ru neke’xb’aanu re rab’inkil xyaab’ xkux li Musiq’ej.
-
Tzolʼlebʼ ut Sumwank 86.Xyiib’ankileb’ malaj rilb’aleb’ jalam-uuch taaruuq tixtenq’a laa junkab’al chixtawb’al ru li jaljookil ru aatin chirix li trigo ut li yib’ aj pim. Naru teetikib’ rik’in xjalam-uuch li k’a’ru yeeb’il resil sa’ Mateo 13:24–30. Chirix a’an texruuq chixtz’iib’ankil k’a’ru xyaalalil li junjunq jalam-uuch a’ yaal li naxye sa’ Tzol’leb’ ut Sumwank 86:1–7. Chan ru naq chanchano li trigo? Chan ru naru toowanq chanchaneb’ li anjel li neke’xch’utub’ li trigo?
-
Tzol’leb’ ut Sumwank 87:8.Re xtikib’ankil li aatinak chirix chan ru xnimob’resinkil xsantilal lee rochoch, taaruuq taakanab’eb’ li komon sa’ laa junkab’al chixk’uub’ankil reetalil jun ochoch choq’ li ani narahok re li Kolonel. A’in taaruuq taak’anjelaq re eetenq’ankil chixk’eeb’al reetal chan raj ru teejal lee rochoch re taawanq jo’ jun na’ajej re tuqtuukilal sa’ xyiheb’ li musiq’ejil rahilal sa’ ruchich’och’. Eb’ li b’ich jo’ “Naq nawan rahok,” “Li ochoch chanchan choxa” (Eb’ li B’ich, 190, 191), malaj “B’ar wi’ rahok nawan” (B’ichleb’aal choq’ reheb’ li Kok’al, 76) taaruuq te’xk’e eena’leb’.
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “B’ar wi’ rahok nawan,” B’ichleb’aal choq’ reheb’ li Kok’al, 76.
Xchaab’ilob’resinkil li qak’utum
Oksi xchaab’ilal laa na’leb’. Naq nakak’uteb’ li loq’laj hu chiru laa junkab’al, maawoksi ka’ajwi’ eb’ li patz’om ut kok’ k’anjel wankeb’ sa’ li tusleb’ aatin a’in. Kanab’eb’ li na’leb’ a’in chirajsinkil aawu re taataweb’ tz’aqal aana’leb’. K’oxlan chirix k’a’ru taawulaq chiru laa junkab’al ut k’a’ru tixtenq’aheb’ chixjuntaq’eetankileb’ li loq’laj hu rik’in lix yu’ameb’.
Li Qaawa’ kiroksi li jaljookil ru aatin chirix li trigo ut li yib’ aj pim re xk’utb’al chan ru naq te’ch’utub’aaq lix tenamit sa’ roso’jikeb’ li kutan.