Yookin chirilb’al li K’ajolb’ej xaqxo sa’ xnim uq’ li Dios, xb’aan laj Walter Rane

23–29 agosto

Tzol’leb’ ut Sumwank 93

“Teek’ul xkomon lix tz’aqalil ru”

Sa’ Tzol’leb’ ut Sumwank 93 naxk’ut naq “li yaal aʼan xnawbʼal li kʼaʼaq re ru joʼ chanru wan, joʼ kiwan, ut joʼ toj taawanq” (raqal 24). Naq nakawil li raqal a’in, sik’ li k’a’ru yaal ut tz’iib’a li nakatzol. K’a’ru taab’aanu re xk’ulb’al li yaal? (che’ilmanq li raqal 27–28).

Tz’iib’a li nakak’oxla

“Naq nakattaqe’ sa’ jun li eeb’,” chan laj Jose Smith, “taq’a taatikib’, ut timil timil tatwulaq taqe’q; jo’kan ajwi’ li na’leb’ re li evangelio—tento taatikib’ rik’in li xb’een, toj reetal taatzol chixjunileb’ li na’leb’ re li taqenaqil loq’al” (Enseñanzas de los Presidentes de la Iglesia: José Smith [2007], 282).

Wanq naq li eeb’ re li taqenaqil loq’al jwal nim xteram, a’b’an xooyo’la re taqe’k sa’ xb’een. Us ta naqil lix q’unal qametz’ew, li qaChoxahil Yuwa’ ut li Ralal neke’ril li qaloq’al, chanchan xloq’al li Dios. Jo’ chanru naq li Jesukristo “kiwan sa’ xtiklajik rik’in li Yuwa’b’ej,” “laa’ex ajwi’ kexwan” (Tzol’leb’ ut Sumwank 93:21, 23). Jo’ chanru naq “kinume’ chalen chaq sa’ li jun usilal toj sa’ li jun chik,” laa’ex ajwi’ “teek’ul li usilal jo’ reeqaj li usilal” (eb’ li raqal 13, 20). Li evangelio li k’ojob’anb’il wi’chik naxk’ut ani ut chan ru li Dios, ut naxk’ut ajwi’ aniho laa’o ut chan ru naru toowulaq. Us ta yoo chi k’anjelak “li maa’us a’an” (raqal 39)—ut us ta nakaweek’a xq’unal aametz’ew—laa’at jun ralal li Dios ut naru naq “sa’ tz’aqal xq’ehil, taak’ul xkomon lix tz’aqalil ru” (raqal 19).

Li na’leb’ re xtzolb’aleb’ li loq’laj hu aajunes

Tzolʼlebʼ ut Sumwank 93

Naqaloq’oni li Dios Yuwa’b’ej ut li Jesukristo, li Ralal.

Naq yoo chi aatinak chirix li k’utb’esinb’il na’leb’ sa’ Tzol’leb’ ut Sumwank 93, li Qaawa’ kixye, “Ninkʼe eere li yehom aʼin re teetaw ru ut teenaw chan ru loqʼonink, ut teenaw kʼaʼru nekeloqʼoni, re texruuq chi chalk rikʼin li Yuwaʼbʼej saʼ lin kʼabʼaʼ, ut saʼ tzʼaqal xqʼehil, teekʼul xkomon lix tzʼaqalil ru” (raqal 19). Naq nakawil li k’utb’esinb’il na’leb’ a’in, k’e reetal li na’leb’ nakataw chirix ani naqaloq’oni: li Dios Yuwa’b’ej ut li Jesukristo, li Ralal. K’a’ru nakatzol chirix “chan ru loq’onink”? chirix chan ru “chalk rik’in li Yuwa’b’ej”?

Li profeet aj Jose Smith kixye, “Wi li winq ink’a’ naxtaw ru ani li Dios, ink’a’ naxtaw ru ani a’an xjunes rib’ ” (Enseñanzas: José Smith, 42). Naq nakattzolok chirix li Kolonel sa’ Tzol’leb’ ut Sumwank 93, sik’ k’a’ru naru taatzol chawix laa’at. Qayehaq, k’a’ru nakatzol chirix a’an sa’eb’ li raqal 3, 12, 21, ut 26? K’a’ru li na’leb’ chanchan a’an nakataw chawix laa’at sa’ eb’ li raqal 20, 23, ut 28–29? (Chi’ilmanq ajwi’ 1 Jwan 3:2; 3 Nefi 27:27; Dean M. Davies, “Eb’ li osob’tesink re li loq’onink,” Jolomil ch’utub’aj-ib’ re 2016)

Tzol’leb’ ut Sumwank 93:1–39

Lix loq’al li Dios a’an li saqen ut li yaal.

Maare taak’e reetal naq naab’al sut neke’qil li aatin loq’al, saqen, ut yaal sa’ li k’utb’esinb’il na’leb’ a’in. Nak nakawileb’ li raqal 21–39, tz’iib’a li na’leb’ nakatzol chirix li loq’al, li saqen, ut li yaal. Chan ru nakate’xmusiq’a li na’leb’ a’in chixsik’b’al xkomon chik li saqen ut li yaal? Chan ru naru najalman aayu’am rik’ineb’ li yaalil na’leb’ a’in?

Naqak’ul li saqen ut li yaal naq naqapaab’eb’ lix taqlahom li Dios.

Tzol’leb’ ut Sumwank 93:40–50

“Taak’e xtuqub’ankil ru laa wochoch laa’at.”

Sa’ li raqal 40, Tzol’leb’ ut Sumwank 93 naraqe’ chi aatinak chirix lix loq’al li Dios ut li choxahilal naru naqak’ul, ut na’ok chi aatinak chirix xk’iresinkileb’ li kok’al ut xtuqub’ankil ru li qochoch. Chan ru naq lix k’utum li Qaawa’ chirix li saqen, li yaal, ut li loq’al sa’eb’ li raqal 1–39 nakatxtenq’a chixtawb’al ru ut chixtaaqenkil li na’leb’ li wan sa’eb’ li raqal 40–50?

Chi’ilmanq ajwi’ David A. Bednar, “Más diligentes y atentos en el hogar,” Liahona, noviembre 2009, 17–20.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 93:2.Chan ru naq li Jesukristo nawan jo’ jun li “tz’aqal saqen” sa’ li qayu’am? Chan ru naq naqil lix saqen a’an sa’eb’ li ani wankeb’ chiqasutam?

Tzol’leb’ ut Sumwank 93:3–29.Re xtenq’ankil laa junkab’al chi aatinak chirix li te’xtzol sa’ li tasal 93 chirix li Kolonel ut chirixeb’ ajwi’ a’an, naru teeb’anu jun ch’ina b’atz’unk. Qayehaq, naru taatz’iib’a junjunq li raqal re li tasal 93 chiru kok’ setb’il hu, li neke’aatinak chirix li Kolonel (che’ilmanq li raqal 3, 12, 21, 26), ut junjunqeb’ chik li neke’aatinak chiqix laa’o (che’ilmanq li raqal 20, 23, 28–29). Eb’ laa komon naru te’xxok jun hu sa’ li jun siir, te’ril ru li raqal, ut te’xsik’ sa’ li jun siir chik b’ar wan li na’leb’ li naxk’ul rib’ rik’in. Chan ru naq eb’ li na’leb’ a’in neke’xjal li naqeek’a chirix li Kolonel ut chiqix ajwi’ laa’o?

Tzolʼlebʼ ut Sumwank 93:12–13, 20.K’a’ru naraj naxye xk’ulb’al “li usilal jo’ reeqaj li usilal” ut nume’k “chalen chaq sa’ li jun usilal toj sa’ li jun chik”? (eb’ li raqal 12–13). K’a’ru neke’xye li raqal a’in chirix chan ru naq nokok’iik ut nokotzolok? Chan ru naq xnawb’al a’in naxjal chan ru naq naqil qib’ chiqib’ qib’—ut qajunes qib’ ajwi’?

Tzol’leb’ ut Sumwank 93:24.Il ru k’a’ru naraj naxye li aatin “yaal” sa’ li raqal a’in, ut b’oq laa junkab’al chixwotzb’al li na’leb’ sa’ li tasal 93 li nim xloq’al choq’ reheb’. K’a’ chik ru naraj naxye li aatin yaal, jo’ k’utb’il sa’ Jwan 14:6; Jakob 4:13; malaj jun li b’ich chirix li yaal, jo’ “K’a’ru pe’ li yaal?” (Eb’ li B’ich, 175).

Tzol’leb’ ut Sumwank 93:40.Maare naq teeril li raqal a’an, teeb’icha jo’ junkab’al jun li b’ich chirix li tzolok sa’ ochoch, jo’ “Tzolin chi b’eek sa’ saqen” (B’ichleb’aal choq’ reheb’ li Kok’al, 70). Eb’ li kok’al maare taawulaq chiruheb’ xk’utb’esinkil chi uq’ej li naxye li raatinul li b’ich. K’a’ru musiq’anb’ilat chixb’aanunkil re taa’ok xkomon chik li “saqen ut li yaal” sa’ laa wochoch?

Tzol’leb’ ut Sumwank 93:41–50.Aatinanqex jo’ junkab’al chirix k’a’ru maare “moko tiik ta sa’ lee rochoch.” K’a’ru naru taqab’aanu re “xtuqub’ankil ru li qochoch”? (eb’ li raqal 43–44).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Laa’in jun ralal li Dios,” B’ichleb’aal choq’ reheb’ li Kok’al, 2–3.

Xchaab’ilob’resinkil li naqatzol

Il ru junjunq sut. Maare taasik’ ru rilb’al ru Tzol’leb’ ut Sumwank 93 k’iila sut chiru li xamaan. Rajlal sut naq taawil, maare taak’e reetaleb’ li ak’ na’leb’ li te’xtoch’ aach’ool. Rilb’al ru k’iila sut tixk’e ajwi’ laa hoonal chixtz’ilb’al rix chi us.

Li saqen ut li yaal, xb’aan laj Simon Dewey