“27 Setema–3 Oketopa. Mataupu Faavae ma Feagaiga 109-110: ‘O Lou Maota Lava, o se Afioaga mo Lou Paia,’” Sau, Mulimuli Mai ia te A’u—Mo Tagata Taitoatasi ma Aiga: Mataupu Faavae ma Feagaiga 2021 (2020)
“27 Setema–3 Oketopa. Mataupu Faavae ma Feagaiga 109-110,” Sau, Mulimuli Mai ia te A’u—Mo Tagata Taitoatasi ma Aiga: 2021
Malumalu o Katelani, saunia e Jon McNaughton
27 Setema–3 Oketopa
Mataupu Faavae ma Feagaiga 109–110
“O Lou Maota Lava, o se Afioaga mo Lou Paia”
Na saunoa Elder David A. Bednar, e faatatau i le Mataupu Faavae ma Feagaiga 109:24–28, “Ou te valaaulia outou e suesue pea lava pea ma mafaufau ma le agaga tatalo i aafiaga o nei mau i lou olaga ma mo lou aiga” (“Taofia ma le Mamalu se Igoa ma Tulaga,” Ensign po o le Liahona, Me 2009, 99). Mafaufau i le valaaulia lenei a o e suesue.
Tusifaamaumau Ou Lagona Uunai
Sa le’i tatau ona tatalaina faitotoa o le Malumalu o Katelani sei ta le 8:00 i le taeao o le aso 27 o Mati, 1836. Ae na amata laina le Au Paia o e sa faamoemoe e auai i sauniga o le faapaiaga i le ta o le 7:00. Ina ua vave faatumulia nofoa uumi ma vainofoa i tagata tapuai naunautai, sa fautuaina atu e Iosefa Samita se isi nofoaga faaopoopo e nonofo ai. Ina ua tumu lena nofoaga, sa fuafuaina loa se sauniga lona lua. Ma sa le na’o tagata ola sa naunau e auai ai. E toatele molimau sa molimauina lo latou vaaia o agelu, i totonu o le malumalu ma e faapena foi luga o le taualuga, i le aluga ma le mae’a ai o le faapaiaga. Sa foliga moni lava na o mai “autau a le lagi, e pepese [ma] alalaga” faatasi ma le Au Paia o Aso e Gata Ai (“O Le Agaga o le Atua,” Viiga, nu. 2).
Aisea lea sagisagi fiafia tele—i itu uma e lua o le veli? O le folafolaga e faapea o le Au Paia o le a “faaeeina ai [outou] i le mana mai luga” o le mafuaaga lena e tasi na latou faapotopoto ai i Ohaio i le taimi muamua (Mataupu Faavae ma Feagaiga 38:32). Ma sa folafola mai ai mea maoae mo le lumanai. “O le amataga lenei,” na tautino mai ai le Alii. “o le faamanuiaga o le a sasaa mai i luga o ulu o loʼu nuu” (Mataupu Faavae ma Feagaiga 110:10). O le vaitaimi ua tatou ola ai nei—ma le faatelevaveina o galuega o malumalu ma sauniga ua avanoa i le faitau miliona o tagata soifua ma e ua maliliu—na i ai lona amataga i Katelani, i le taimi “le lagi ua amata ona le toe punia” (“O Le Agaga o le Atua”).
Tagai foi Au Paia, 1:232–41; “A House for Our God,” Revelations in Context, 169–72.
Manatu mo Suesuega Faaletagata Lava Ia o Tusitusiga Paia
Mataupu Faavae ma Feagaiga 109
E finagalo le Atua e faamanuia a’u i totonu o Lona maota paia.
Sa ese le Malumalu o Katelani, i nisi o itu mai malumalu ua tatou iloa i aso nei. Sa leai ni fata faitaulaga ma ni faatanoa mo papatisoga, ma o sauniga e pei o le papatisoga mo e ua maliliu ma faamauga e le’i toefuataiina mai i lena taimi. Ae o faamanuiaga o loo faamatalaina i le vaega 109, o le tatalo o le faapaiaga o le Malumalu o Katelani, o faamanuiaga ia ua tatou maua i totonu o maota o le Alii i aso nei. Toe iloilo fuaiupu nei ia maua ai nisi o nei faamanuiaga. A o faitau e uiga i ai, mafaufau loloto pe aisea ua taua ai ia te oe ma lou aiga.
O fuaiupu 5, 12–13 (tagai foi Mataupu Faavae ma Feagaiga 110:6–8): I totonu o le malumalu, e mafai e le Alii ona faaali mai o Ia lava ia i tatou ma e mafai ona tatou lagonaina Lona mana.
O fuaiupu 9, 17–19, 26, 78–79: I totonu o le malumalu tatou te tauave ai i o tatou luga le suafa o le Alii.
O fuaiupu 22–23: Pe a tatou osia ma faamamalu i feagaiga o le malumalu, e tuuina mai e le Alii ia i tatou le mana e fai ai Lana galuega.
O fuaiupu 24–33: Pe a tatou auai atu ma le agavaa i le malumalu, e mafai ona tatou maua le puipuiga a le Alii.
Isi faamanuiaga:
O le a se mea ua musuia oe e le Agaga e fai ia maua ai nei faamanuiaga?
Mataupu Faavae ma Feagaiga 109
O le tatalo o le faapaiaga o le Malumalu o Katelani, e mafai ona aoao ai a’u e uiga i le tatalo.
O le vaega 109 o se tatalo o le faapaiaga sa tuuina atu ia Iosefa Samita e ala i faaaliga (tagai faaulutala o le vaega). O le a se mea ua e aoaoina e uiga i le tatalo mai i le vaega lenei? A o e faitau i ai, atonu e te mafaufau e uiga i a oe lava tatalo. O a ni uunaiga e te maua e mafai ona fesoasoani e faaleleia ai au fesootaiga ma le Tama Faalelagi? Mo se faataitaiga, o le a se mea na tatalo ai le Perofeta i lenei tatalo?
Mataupu Faavae ma Feagaiga 110:1–10
E mafai e le Alii ona faaali mai o Ia lava ia te a’u i totonu o le malumalu.
O a ni ou lagona e uiga i le Faaola i le mae’a ai o le faitauina o le Mataupu Faavae ma Feagaiga 110:1–10? E faapefea ona Ia faaali mai o Ia Lava ia te oe i le malumalu? O a ni auala e fesoasoani mai ai o Ia ia e iloa ua Ia taliaina au taumafaiga ma osigataulaga?
E tofu itu taitasi o le Malumalu o Katelani ma pulelaa mo taitai perisitua.
Mataupu Faavae ma Feagaiga 110:11-16
O ki o le perisitua e manaomia e ausia ai le galuega a le Atua ua i ai i le Ekalesia i aso nei.
Ina ia malamalama i ki o le perisitua na tuuina mai e Mose, Elaia ma Elia ia Iosefa Samita ma Oliva Kaotui i le Malumalu o Katelani, atonu e te faitau i le savali a Elder Quentin L. Cook “Saunia e Feiloai ma le Atua” (Ensign po o le Liahona, Me 2018, 114–17). Sa faamatalaina e Elder Cook le ala e tutusa ai nei ki ma le galuega a le Ekalesia i aso nei. Atonu e te mafaufau foi e aoao e uiga i nei perofeta anamua e ala i le suesue ia “Mose,” “Elaia,” ma “Elia” i le Taiala i Tusitusiga Paia (scriptures.ChurchofJesusChrist.org). Mafaufau loloto i mea e mafai ona e faia e fesoasoani ai i le galuega ua faatatau i ai nei ki.
Tagai foi “Ki o le Perisitua,” Faamaoni i le Faatuatua, 126-27; Henry B. Eyring, “E Alu Atu o Ia i o Tatou luma,” Ensign po o le Liahona, Me 2020, 66-69.
Manatu mo Suesuega Faaleaiga o Tusitusiga Paia ma Afiafi Faaleaiga
-
Mataupu Faavae ma Feagaiga 109.O se aiga, sue ni fuaiupu i le vaega 109 e musuia ai oe e faaalu se taimi tele i le malumalu (mo se faataitaiga, tagai i fuaiupu o loo lisiina i lalo o “Manatu mo Suesuega Faaletagata Lava Ia o Tusitusiga Paia”). Talanoa i auala e mafai ai ona e faia le mea ua fautuaina mai e Peresitene Russell M. Nelson: “Saili se auala e fai ai sou taimi faatulagaina ma le Alii—ia i ai i totonu o Lona maota paia—ona tausia lea o lena taimi faatulagaina ma le sa’olele atoatoa ma le olioli” (“Avea ma Faataitaiga Lelei o le Au Paia o Aso e Gata Ai,” Ensign po o le Liahona, Nov. 2018, 114). Afai e te le’i alu pe le’i o lou aiga i le malumalu, e mafai ona e asiasi i le temples.ChurchofJesusChrist.org e fesoasoani e saunia ai outou lava e o [i le malumalu].
-
Mataupu Faavae ma Feagaiga 109:78–80.O le viiga “O Le Agaga o le Atua” (Viiga, nu. 2) sa tusia mo le faapaiaga o le Malumalu o Katelani—ma talu mai lena aso ua lagiina ai i faapaiaga uma o malumalu. Atonu tou te usuina faatasi lenei viiga ma su’e fuaitau e faateleina ai lou agaga faafetai mo malumalu o aso e gata ai. E faapefea ona faatatau lenei viiga i le savali o le Mataupu Faavae ma Feagaiga 109:78–80?
E mafai ona e maua le tatalo o le faapaiaga mo le malumalu aupito lata atu ia te oe i le temples.ChurchofJesusChrist.org.
-
Mataupu Faavae ma Feagaiga 110.A o faitau e tagata o lou aiga le vaega 110 ma vaavaai i le ata o loo i le faaiuga o le otootoga lenei, valaaulia i latou e vaai faalemafaufau pe mata e faapeī o latou lagona pe ana faapea sa latou i ai faatasi ma Iosefa Samita ma Oliva Kaotui i le Malumalu o Katelani. Tuu atu i lou aiga se avanoa e faasoa mai ai o latou lagona e uiga i le Faaola.
-
Mataupu Faavae ma Feagaiga 110:15.Mata o le a se mea e fesoasoani e “liliu ai loto” o lau fanau i o latou tuaa? E mafai ona e maua ni manatu malie i le FamilySearch.org/discovery. E mafai ona outou galulue faatasi e faailoa tuaa o e manaomia sauniga o le malumalu ma fuafua e faatino na sauniga i le malumalu. E mafai foi ona e talanoa i le ala ua faateleina ai e le galuega na toefuatai mai e Elia i le Malumalu o Katelani ia faateleina ai lou alofa i ou tuaa.
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Pese fautuaina: “O Le Agaga o le Atua,” Viiga, nu. 2.
O Leo o le Toefuataiga
O Faaaliga Faaleagaga ma le Malumalu o Katelani
Pei o le Mumu o se Afi, saunia e Glen S. Hopkinson
O lalo ifo o loo i ai upu a le Au Paia o Aso e Gata Ai o e sa i ai i le Malumalu o Katelani i le taimi o lona faapaiaga ma i isi fonotaga na sosoo ai. O le toatele na faatusaina o latou aafiaga i le mea na oo i le Au Paia anamua ina ua latou “maua le mana mai luga” i le aso Penetekoso (Luka 24:49; tagai foi Galuega 2:1–4; Mataupu Faavae ma Feagaiga 109:36–37).
Eliza R. Snow
“O sauniga o lena faapaiaga e mafai ona toe faatinoina, ae e leai se gagana faaletino e mafai ona faamatalaina faaaliga faalelagi o lena aso e le mafaagaloina. Na faaali mai agelu i nisi, a o le lagona o le faatasi mai o au o le lagi na lagonaina e tagata uma na auai, ma na faatumuina loto taitasi uma i le ‘olioli ai ma fiafia e le matalatalaina, e silisili ese lava.’”1
Sylvia Cutler Webb
“O se tasi o mea ou te manatua mai lo’u laitiiti o le faapaiaga o le Malumalu. Na sii i ma’ua e lo’u tama i ona vae ma faamatala mai le mafuaaga na matou o ai ma le uiga o le faapaiaina o se maota i le Atua. Ma e ui lava i le laitiiti tele i lena taimi, ou te manatua lelei lava le mea na tupu. E mafai ona ou toe tepa i tua i mea na tutupu ma vaai ai e pei ona sa ou vaai ai i lena aso ia Iosefa le Perofeta, na tu ma ona lima sa sisii ae i le lagi, o ona foliga sa sesega lava, sa tafe ifo loimata i ona alafau a’o saunoa o ia i lena aso lemafaagaloina. Sa foliga mai na toetoe o tagata uma na maligi loimata. Sa matuai tumu lava le fale, o tamaiti sa tele lava ina saofafai i luga o vae o tagata matutua; na nofo lo’u uso i luga o vae o tamā, ae o a’u i luga o vae o tina. Ou te manatua foi o ma ofu na ofu. Sa laitiiti tele lo’u mafaufau i lena taimi e malamalama ai i le taua atoa o lea mea, ae a o mavae atu aso, sa faapea ona ou malamalama atili ai, ma ou te faafetai tele ona sa faamanuiaina a’u e i ai iina.”2
Oliva Kaotui
“O le afiafi na matou feiloai ai ma taitai o le ekalesia i totonu o le maota o le Alii. Sa sasaa ifo le Agaga---sa ou vaai i le mamalu o le Atua, e pei o se ao tele, o alu ifo i lalo ma faamalumalu i luga o le fale, ma faatumulia lea lava fale e pei o se agi tele mai o le matagi. Sa ou vaaia foi laulaufaiva mavaevae, e pei o le afi i luga o le toatele, … a o latou tautatala i isi gagana ma vavalo.”3
Peniamina Brown
“E tele faaaliga [sa] vaaia. Sa vaai se tasi tagata i se aluga po o ao o faamalumalu ifo i luga ae o le malumalu, sa susulu e pei o le susulu o le la i luga o se ao e pei o se auro. Sa vaai isi tagata e toalua i ni peresona se toatolu o faamalumalu i totonu o le potu ma ni ki iila i o latou lima, ma se filifili iila foi i o latou lima.”4
Orson Pratt
“Sa i ai iina le Atua, sa i ai iina ana agelu, sa i ai le Agaga Paia i le totonugalemu o tagata … ma faatumulia i latou mai le tumuai o o latou ulu e oo i matiutiuvae o o latou tamaivae i le mana ma musumusuga a le Agaga Paia.”5
Nancy Naomi Alexander Tracy
“[Ina] ua mae’a ma faapaiaina le Malumalu … o aso e lua na sa sili ona fiafia o lo’u olaga. O le viiga fetaui lelei lea sa fatuina mo le faamoemoe o le, ‘O Le Agaga o le Atua Ua Pei o se Afi ua [Mumu].’ Sa matuai moni lava sa oo ifo le Mana Faalelagi i luga o lena maota. … Na ou lagonaina o le lagi i le fogaeleele.”6
Ua Faaali Mai Mose, Elaia, ma Elia i totonu o le Malumalu o Katelani, saunia e Gary E. Smith