laj Jose Smith najultikan aatin

4–10 octubre

Tzolʼlebʼ ut Sumwank 111–114

“Laa’in tintuqub’ chixjunil li k’a’aq re ru choq’ re lee chaab’ilal”

Patz’ rik’in tijok naq li Musiq’ej tatxb’eresi naq taawil ru Tzol’leb’ ut Sumwank 111–114, ut tz’iib’a li nakak’oxla. Chirix a’an, k’oxla k’a’ru naru taab’aanu re xk’anjelankil li na’leb’ nakak’ul.

Tz’iib’a li nakak’oxla

Ma ak xak’ul jun sutaq k’a’ruhaq re musiq’ej li xkawob’resi aach’ool ut laa paab’aal—ut chirix a’an xyale’ rix laa paab’aal xb’aan li ch’a’ajkilal, ut xak’e reetal naq ch’a’aj xk’ulb’al wi’chik li tuqtuukilal xaweek’a junxil? A’in li kik’ulman rik’ineb’ laj santil paab’anel sa’ Kirtland. Naq maji’ numenaq jun chihab’ chaq chirix li musiq’ejil hoyonik li kiwan sa’ rosob’tesinkil li santil ochoch re Kirtland, ki’ok li ch’a’ajkilal. Xb’aan li ch’a’ajkilal rik’in li tumin, li wech’ok-ib’ sa’ lix Molameb’ li Kab’laju, ut xkomoneb’ chik li ch’a’ajkilal, ke’wan li ke’laj xpaab’aal.

Ink’a’ nokoru chi elk chiru li ch’a’ajkilal. Jo’kan ut, k’a’ru naru taqab’aanu re naq ink’a’ taalajq li qapaab’aal ut lix nawom qach’ool xb’aan? Naru xtawb’al xsumenkil a’an sa’ lix na’leb’ li Qaawa’ sa’ Tzol’leb’ ut Sumwank 112, li kik’ehe’ sa’ xq’ehil li ch’a’ajkilal sa’ Kirtland. Li Qaawa’ kixye, “Chesaqob’resi ru lee ch’ool chiwu” (raqal 28), “Meepo’resi eech’ool” (raqal 15), “B’ak’ laa yiitoq choq’ re li k’anjel” (raqal 7), ut “Tuulanaq aach’ool” (raqal 10). Naq naqataaqe li na’leb’ kixk’e li Qaawa’, a’an “tooxb’eresi chi quq’ ” sa’ li ch’a’ajkilal toj sa’ li k’iraak ut li tuqtuukilal (che’ilmanq li raqal 10, 13).

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzolʼlebʼ ut Sumwank 111

Li Qaawa’ naru “tixtuqub’ chixjunil li k’a’aq re ru choq’ re lin chaab’ilal.”

Sa’ 1836, q’axal nim lix k’as li Iglees xb’aan xb’aanunkil lix k’anjel li Qaawa’. Naq yoo chaq xk’a’uxl laj Jose Smith ut xkomoneb’ chik chirix li k’as a’in ut yookeb’ chixk’oxlankil chan ru te’xtoj, xkoheb’ sa’ Salem, Massachusetts, maare xb’aan naq yeeb’il resil naq wan tumin li kanab’anb’il sa’ jun li kab’l aran (chi’ilmanq xtiklajik li tasal Tzol’leb’ ut Sumwank 111). Chirix naq ke’wulak aran Salem, li Qaawa’ kixye, “Moko jun ajwi’ ta li b’ihomal wan choq’ eere sa’ li tenamit a’in” (raqal 10)—ut li b’ihomal a’an, a’aneb’ li kristiaan li “tixch’utub’eb’ chaq sa’ tz’aqal xq’ehil choq’ re lix chaab’ilal Sion” (raqal 2; chi’ilmanq ajwi’ Exodo 19:5). Us ta moko ke’xtaw ta tumin aran Salem, eb’ li komon li moqon te’rab’iheb’ li misioneer aran, a’aneb’ xcha’al lix tz’aqob’resinkil ru lix yeechi’ihom li Qaawa’.

Naq nakawil ru li tasal 111, k’oxla k’a’ru li na’leb’ yoo wi’ laa k’a’uxl. K’oxla chan ru naq li aatin kixye li Qaawa’ re laj Jose naru nak’anjelak choq’ aawe. Chan ru naq li Qaawa’ ak xatxtenq’a chixtawb’al li “b’ihomal”? (raqal 10). K’oxla k’a’ru li ak xb’aanu re “xtuqub’ankil chixjunil li k’a’aq re ru choq’ re lee chaab’ilal” (raqal 11). Naq nakawil li aatin “a’ yaal sa’ junpaat jo’ nekexru chixk’ulb’al,” k’a’ru nakatzol chirix li qaChoxahil Yuwa’?

Chi’ilmanq ajwi’ Mateo 6:19–21, 33; “Más de un tesoro,” Revelaciones en Contexto, 245–250.

Tzolʼlebʼ ut Sumwank 112:3–15

Li Qaawa’ tixb’eresi li ani naxsik’ li rajom chi tuulan xch’ool.

Yoo chaq chi lajk li junajil sa’ lix Molameb’ li Kab’laju sa’ li saq’ehil re 1837. Ke’wan wech’ok-ib’ chirix lix k’anjeleb’, ut wankeb’ li komon li ke’xmaa’usaatina li Profeet aj Jose Smith. Yoo chaq xk’a’uxl laj Thomas B. Marsh, li Awa’b’ej re lix Molameb’ li Kab’laju, ut ki’el chaq Missouri toj sa’ Ohio re xsik’b’al xna’leb’ li Profeet. Li Hermano Marsh kixk’ul xna’leb’ sa’ li k’utb’esinb’il na’leb’ li wan sa’ li tasal 112. Chan ru naq lix na’leb’ li Qaawa’ kixtenq’a raj a’an ut lix molam? K’a’ru nakatzol laa’at sa’ li na’leb’ a’an re aatenq’ankil chixq’axb’al ru li wech’ok-ib’?

Maare taak’oxla li naxye li raqal 10. K’a’ru naraj naxye naq li Qaawa’ “tatxb’eresi chawuq’ ”? K’a’ut naq aajel ru li tuulanil re tatb’eresiiq chi jo’kan?

Chi’ilmanq ajwi’ Ulisses Soares, “Sean mansos y humildes de corazón,” Liahona, noviembre 2013, 9–11; “La fe y la caída de Thomas Marsh,” Revelaciones en Contexto, 58–65.

wiib’ li yookeb’ chi tijok

Wi tuulan qach’ool, li Qaawa’ tooxb’eresi ut tixsume li qatij.

Tzolʼlebʼ ut Sumwank 113

Laj Jose Smith a’an “jun moos sa’ ruq’ li Kristo.”

Laj Isaias kixye naq jun reheb’ li ralal xk’ajol laj Isai taawanq jo’ “ru’uj” ut “xxe’ ” a’an (Isaias 11:1, 10). Sa’ li tasal 113, li Qaawa’ kixch’olob’ naq li alal k’ajolb’ej a’an, jun xmoos li Kristo, k’a’jo’ naq taak’anjelaq sa’ xch’utub’ankil lix tenamit li Qaawa’ sa’ roso’jikeb’ li kutan (chi’ilmanq Tzol’leb’ ut Sumwank 113:4, 6)—a’an jun k’utb’esinb’il na’leb’ li naxye chi us resil li profeet aj Jose Smith. Chan ru naq li aatin a’in ut xkomoneb’ chik li na’leb’ sa’ li tasal 113 kixtenq’aheb’ raj laj santil paab’anel sa’ xq’ehil li ch’a’ajkilal sa’ Kirtland? K’a’ru nakataw sa’ li k’utb’esinb’il na’leb’ a’in li nakatreek’asi chi tenq’ank sa’ xk’anjel li Qaawa’ sa’ li kutan a’in?

Chi’ilmanq ajwi’ li K’utul Raqal reheb’ li Loq’laj Hu, “Isai (Jese),”; 2 Nefi 21:10–12; Jose Smith—Resilal 1:40.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzolʼlebʼ ut Sumwank 111:2, 9–11.Eb’ li raqal a’in naru texxtenq’a chi aatinak chirix k’a’ruheb’ li junelikil “b’ihomal” choq’ re lee junkab’al. Naru teeb’aanu jun li b’atz’unk re xsik’b’al b’ihomal; taamuq junjunq li k’a’aq re ru sa’ li ochoch li nareetali lix b’ihomal li Qaawa’. Naq laa junkab’al tixtaw li k’a’aq re ru, aatinanqex chirix k’a’ru li naru teeb’aanu re xk’utb’al naq nim xloq’al choq’ eere.

Tzol’leb’ ut Sumwank 112:10.Li Elder Ulisses Soares kixye a’in chirix li ani tuulan xch’ool: “Li ani tulan xch’ool naxk’ul xtzolb’al; naxk’e reetal naq naxkanab’ rib’ chiru li Dios, ut naraj xb’aanunkil li rajom xch’ool a’an. Li ani tuulan xch’ool wan chi kub’enaq xch’ool, ut naru naxtenq’aheb’ li ras riitz’in chi wank ajwi’ chi jo’kan” (“Sean mansos y humildes de corazón,” Liahona, noviembre 2013, 10). K’oxla chan ru taatenq’a laa junkab’al chixtawb’al ru li tuulanil ch’oolej. Naru teeb’icha jun li b’ich chirix li tuulanil, jo’ “Saʼ laa chʼool tuulan chatwanq” (Eb’ li B’ich, 73), ut jun komon tixchap jun chik “chiruq’ ” ut tixb’eresi chi sa’ lee rochoch. Malaj naru teeye resil hoonal naq li Qaawa’ xb’eresi lee junkab’al “chi uq’ej” ut “xk’e xsumenkileb’ ru lix tij.”

Tzolʼlebʼ ut Sumwank 112:11–14, 26.Chan ru naq jalan yal xnawb’al xk’ab’a’ anihaq rik’in xnawb’al ru li kristiaan a’an? K’a’ru naqatzol sa’eb’ li raqal 11–14 chirix lix yaalalil xnawb’al ru li Qaawa’?

Tzol’leb’ ut Sumwank 112:15.K’a’ru naraj naxye “xpo’resinkil qach’ool” chirix li profeet? K’a’ru naqataw sa’ li raqal a’in li nokoxtenq’a chixxaqab’ankil xwankil li profeet?

Tzol’leb’ ut Sumwank 113:7–8.K’a’ru naqatzol sa’ li raqal 8 li tooxtenq’a “chixk’amb’al chaq wi’chik Sion” ut chixtojb’al rix Israel?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Sa’ laa ch’ool tuulan chatwanq,” Eb’ li B’ich, 73.

Xchaab’ilob’resinkil li qak’utum

Yu’ami lix nawom aach’ool. “Chan ru nakatwan a’an li nakak’ut,” kixye li Elder Neal A. Maxwell. “Chan ru wankat mas wi’chik taajultikamanq … chiru jun yaalil na’leb’ xak’ut sa’ jun li tzolok” ” (Li k’utuk jo’ li Kolonel, 13).

aj Thomas B. Marsh ut aj Jose Smith

Laj Thomas B. Marsh naxtz’iib’a li k’utb’esinb’il na’leb’ kik’eeman re rik’in laj Jose Smith. Tuulanaq aach’ool, xb’aan li xJulie Rogers.