Josef Smit we i stap long Nauvu, 1840, i kam long Theodore Gorka

8–14 Novemba

Doktrin mo Ol Kavenan 129–132

“Taem Yumi Kasem Eni Blesing we I Kam long God, Hem I From Fasin blong Stap Obei”

Ol seksen 129–132 oli tijim plante impoten prinsipol, be sam nomo oli tokbaot bigwan insaed long aotlaen ia. ?Wanem ol nara trutok yu faenem?

Raetemdaon Ol Filing mo Tingting blong Yu

Brigham Yang, wan taem i bin talem abaot Josef Smit, se: “Hem i save eksplenem ol samting we oli blong heven long wan wei we simpol man i andastanem” (insaed long Teachings of Presidents of the Church: Joseph Smith, 499–500). Bae yumi luk se hemia i tru long ol tijing blong Profet long Nauvu, long ol yia 1840, we sam pat oli raetemdaon insaed long Doktrin mo Ol Kavenan 129–32. ?Sevya i olsem wanem? “Hem i wan man olsem yumi nomo.” ?Heven i olsem wanem? “Mo semfala laef wetem ol narafala man we yumi stap gat long wol ia, bae i stap wetem yumi longwe” (Doktrin mo Ol Kavenan 130:1–2), mo ol famli rilesensip we bae yumi holemtaet moa long wol ia, sapos yumi silim tru long stret atoriti, bae “i laef fulwan” long nekis wol (Doktrin mo Ol Kavenan 132:19). Ol trutok olsem, oli mekem heven i nomo stap longwe—i gat glori, be yumi filim se yumi save kasem.

Be afta, samtaem God i save askem yumi blong mekem ol samting we oli had, mekem se yumi luk se bae yumi no save kasem. Long plante fasfala Sent, fasin blong maredem plante woman, i bin wan komanmen ia we i had. Komanmen blong maredem sam moa waef i bin wan strong mo had tes blong fet long Josef Smit, waef blong hem, Ema, mo kolosap evriwan we i kasem komanmen ia. Blong mekem i gotru long tes ia, oli bin nidim moa bitim ol gudfala filing abaot gospel ia we i kambak; oli bin nidim fet long God we i go dip moa bitim eni samting we olgetawan i wantem, o tingting long hem. Komanmen ia, i nomo stap tedei, be fetful eksampol blong olgeta we oli bin laef tru long hemia, i stap yet. Mo eksampol ia, i givim insperesen long yumi taem Lod i askem yumi blong mekem “sakrifaes blong [yumi] blong mekem se bae [yumi] obei” (Doktrin mo Ol Kavenan 132:50).

Sam Aedia blong Skripja Stadi blong Yuwan

Doktrin mo Ol Kavenan 130–31

Josef Smit i bin talemaot ol trutok tru long revelesen, abaot Godhed mo “wol we bae i kam yet.”

Maet bae yu luk se ol seksen 130–31 oli raetem i defren long ol nara seksen insaed long Doktrin mo Ol Kavenan. Hemia i we from ol seksen 130–31 oli stanap long ol not we Wiliam Kleiton, wan long ol sekretari blong Josef Smit i bin raetem abaot ol samting we hem i bin harem Profet i bin tijim. Olsem wan risal, ol seksen ia oli moa olsem wan grup blong ol trutok, be i no ol revelesen olsem we oli talemaot long man. Mo tu, oli ol stamba toktok we plante i tingting long ol, wetem plante nara trutok. Eksampol: yu save ridim ol seksen 130–131 wetem ol kwestin olsem ia long maen blong yu: ?Wanem nao mi lanem abaot God? ?Wanem nao mi lanem abaot laef afta laef long wol ia? ?Olsem wanem nao, save ia, i tajem laef blong mi?

Luk tu long “Our Hearts Rejoiced to Hear Him Speak,” Revelations in Context, 277–80.

Doktrin mo Ol Kavenan 131:1–4; 132:7, 13–25

Papa long Heven i mekem i posibol blong ol famli oli no save finis.

Wan long ol trutok we i givim fulap kamfot, mo i bin kambak tru long Profet Josef Smit, i we mared mo ol famli rilesensip oli save stap blong oltaem. Tru long Josef Smit, Lod i bin putumbak ol odinens mo atoriti we i bin nid blong mekem ol rilesensip ia, oli blong taem we i no save finis (luk long Doktrin mo Ol Kavenan 132:7, 18–19). Tingting long ol famli rilesensip we yu gat, o yu hop blong gat long fiuja taem yu stap ridim Doktrin mo Ol Kavenan 131:1–4; 132:7, 13–15. ?Olsem wanem ol ves ia oli jenisim wei we yu tingting long hem abaot ol rilesensip ia?

Be, samtaem, prinsipol blong ol famli we oli no save finis, i no givim kamfot—i save tekem tingting i fasfas, mo man i save harem se hem i no hapi; hemia taem famli situesen blong yumi i no stret wetem selestial tingting. Taem we Presiden Henri B. Eyring i bin wari long kaen situesen olsem insaed long stret famli blong hem, hem i bin kasem waes kaonsel ia long wan memba blong Kworom blong Olgeta Twelef Aposol: “Yu jes laef klin inaf nomo blong stap long selestial kingdom, mo ol famli bae oli kam moa gud bitim we yu save tingbaot” (insaed long “Wan Hom we Spirit I Stastap long Hem,”   Liahona, Mei 2019, 22). ?Olsem wanem taem yu stap folem kaonsel ia, i stap blesem yu long famli situesen we yu stap long hem?

Luk tu long Kristen M. Oaks, “To the Singles of the Church” (Jos Edukesen Sistem divosen blong ol yang adalt, 11 Septemba 2011), broadcasts.ChurchofJesusChrist.org.

Ol famli rilesensip oli save kam blong oli no save finis, tru long ol odinens blong tempol.

Doktrin mo Ol Kavenan 132:1–2, 29–40

Fasin blong maredem fulap woman, God i save akseptem nomo taem Hem nao i givim oda from.

Eniwan i bin ridim OlTesteman finis i bin askem hemwan finis abaot Ebraham, Aesak, Jekob, Moses mo ol narawan we oli bin stap maredem fulap waef. ?Weswe? ?Ol gudfala man ia oli mekem adaltri? ?O God i bin apruvum ol aksen blong olgeta? Lukaotem ol ansa insaed long Doktrin mo Ol Kavenan 132:1–2, 29–40.

Mared bitwin wan man mo wan woman, hem i standet blong God long saed blong mared (luk long seksen heding blong Ofisol Toktok 1; luk tu long Jekob 2:27, 30). Be, i bin gat ol taem long histri taem we God i bin givim komanmen long ol pikinini blong Hem blong praktisim fasin blong maredem fulap woman.

Ol fasfala yia blong Jos ia we i kambak, oli bin wan taem we i no semmak long ol nara taem. Afta we hem i bin kasem komanmen ia, Josef Smit mo ol nara Lata-dei Sent oli bin praktisim fasin blong maredem fulap woman. Sapos yu wantem lanem moa abaot fasin blong maredem fulap woman long medel blong ol fasfala Lata-dei Sent, luk long “Mercy Thompson and the Revelation on Marriage” (Revelations in Context, 281–93); Saints, 1:290–92, 432–35, 482–92, 502–4; “Plural Marriage in The Church of Jesus Christ of Latter-day Saints” (Gospel Topics, topics.ChurchofJesusChrist.org); “Why Was It Necessary for Joseph Smith and Others to Practice Polygamy?” (vidio, ChurchofJesusChrist.org).

Sam Aedia blong Famli Skripja Stadi mo Famli Haos Naet

Doktrin mo Ol Kavenan 130:2, 18–19; 132:13, 19.?Olsem wanem nao yu save yusum ol ves ia blong helpem famli blong yu blong putum ol fas samting we oli blong taem we i no save finis oli kam faswan? Mebi yu save fulumap wan sutkes, o wan hanbag wetem ol samting we oli ripresentem ol samting we, folem wanem i stap long Doktrin mo Ol Kavenan 130:2, 18–19; 132:19, bae yumi save tekem olgeta wetem yumi i go long nekis laef, olsem ol pikja blong famli o skripja. ?Wanem nao Doktrin mo Ol Kavenan 132:13 i stap tijim yumi abaot ol samting blong wol ia? Hemia i save lidim yufala blong toktok raon long fasin blong lukluk nomo long ol samting we oli gat mining long taem we i no save finis.

Doktrin mo Ol Kavenan 130:20–21.Yu save singsing wan singsing abaot fasin blong talem tangkyu, olsem “Yu Gat Blesing, Kaontem Evriwan” (STSP, pej 8), mo mekem wan lis blong ol blesing we famli blong yu i bin kasem from yufala i bin obei long ol loa ia blong God. ?Wanem blesing nao yumi hop blong kasem? ?Olsem wanem yumi save kasem olgeta blesing ia?

Doktrin mo Ol Kavenan 131:1–4; 132:15–19.Vidio ia, “Marriage Is Sacred” (ChurchofJesusChrist.org) i save helpem famli blong yu blong toktok raon long ol trutok ia insaed long ol ves ia. ?Olsem wanem Lod i filim abaot mared? ?Olsem wanem nao, yumi, i nomata se yumi mared o singgel, yumi stap mekem yumi rere blong gat wan mared we i no save finis?

Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Tugeta, singsing long “Famli I Stap Tugeta Foreva,” Liahona, Epril 2013, 65).

Stap Kam Antap long Stadi blong Yuwan

Lukaotem ol trutok blong gospel. Samtaem ol trutok blong gospel, oli talemaot klia; long sam nara taem, oli kamkamaot tru long wan eksampol o wan stori. Taem yufala i stap rid, askem yuwan: “?Wanem trutok we i no save finis nao oli stap tijim insaed long ol ves ia?”

Wan siling rum insaed long Paris Franis Tempol.