li oob’ tuq’ixq li wankeb’ xna’leb’

Chalk re li B’eelomej, xb’aan li xElizabeth Gibbons

15–21 noviembre

Tzol’leb’ ut Sumwank 133–134

“Kawresihomaq eerib’ choq’ re lix k’ulunik li B’eelomej”

Li Awa’b’ej Henry B. Eyring kixye, “Lix k’ojob’ankil wi’chik li evangelio kitikla rik’in jun tuulanil patz’om li kitz’ile’ rix sa’ jun tuulanil ochoch, ut naru na’ux a’an sa’ li junjunq qochoch” (“Jun ochoch b’ar wi’ nawan lix Musiq’ li Qaawa’,” Jolomil ch’utub’aj-ib’ re abril 2019).

Tz’iib’a li nakak’oxla

Naq 19 po chaq xk’ojob’ankil li Iglees, li profeet aj Jose Smith ut xkomoneb’ chik aj jolominel ke’xk’uub’ naq taakawresimanq jun li tasal hu wan wi’ lix k’utb’esinb’il na’leb’ li Dios sa’ roso’jikeb’ li kutan ut naq te’puktesimanq lajeeb’ mil reheb’ li hu a’in—ka’ajwi’ ke’puktesiman oob’ mil lix Hu laj Mormon sa’ li xb’een xpuktesinkil. A’b’anan, terto xtz’aq a’in, ut naq yoo chi kawresiik li hu, ke’chal li ch’uut aj rahob’tesinel re xsachb’al li k’uub’leb’aal hu re li Iglees. Ke’xjek’iheb’ li perel, ut us ta ke’wan laj santil paab’anel li ke’xxok junjunq reheb’, ink’a’ kikana yal ta jun Hu re Taqlahom li tz’aqal xperelil.

Li wan anajwan sa’ li tasal 133 re li Tzol’leb’ ut Sumwank, a’an kiwan raj jo’ lix apendice li Hu re Taqlahom, jun chik li xnimal ru esil sa’ xraqik lix puktesinb’il na’leb’ li Qaawa’. A’an jun tijom chirix lix kutankil li raqb’a-aatin, ut naxka’jultika li b’oqok natawman k’iila sut sa’eb’ li k’utb’esinb’il na’leb’ re roso’jikeb’ li kutan: tz’eqtaanahomaq li k’a’ru re li ruchich’och’, li eetalinb’il xb’aan Babilonia; kab’lahomaq Sion; kawresihomaq eerib’ choq’ re li xkab’ xk’ulunik li Qaawa’; ut jultikahomaq li esil a’in “chiru li junjunq chi tenamit, ut junkab’al, ut aatinob’aal, ut teepal” (raqal 37). Us ta ink’a’ kiru chi puktesimank li Hu re Taqlahom, li k’utb’esinb’il na’leb’ a’in naxjultika qe ut naxch’olob’ xyaalal naq ink’a’ naru taasachmanq lix k’anjel li Qaawa’, “xb’aan naq a’an tixt’usub’ lix santil tel … , ut chixjunileb’ lix maril li ruchich’och’ te’ril li kolb’a-ib’ re lix Dios” (raqal 3).

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzolʼlebʼ ut Sumwank 133

Li yaal li natawman sa’ li Tzol’leb’ ut Sumwank naru tinixkawresi chixb’aanunkil lix k’anjel li Dios.

Wan naq jun li hu naraqe’ rik’in jun aatin li naxka’suti malaj naxk’os ru li rajom li hu. Sa’ xtiklajik, ki’ajman naq li tasal 133 taawanq jo’ xraqik li Hu re Taqlahom, ut maare chaab’il raj rilb’al ru chi wan li na’leb’ a’an sa’ aak’a’uxl. K’a’ru naxjultika li Qaawa’ chirix lix k’anjel? K’a’ru nakatzol sa’eb’ li raqal 57–62 chirix k’a’ru naraj li Qaawa’ naq taab’aanu laa’at sa’ lix k’anjel?

Tzol’leb’ ut Sumwank 133:1–19

Li Qaawa’ naraj naq tinkawresi wib’ choq’ re li xkab’ xk’ulunik.

Li tasal 1, lix yehom li Qaawa’ re xtikib’ankil li Tzol’leb’ ut Sumwank, ut li tasal 133, li kiwan jo’ xraqik li hu junxil, neke’tikla rik’in li aatin a’in kixye li Qaawa’: “Chex’ab’inq, ex tenamit re lin iglees” (Tzol’leb’ ut Sumwank 1:1; 133:1). K’a’ru xyaalalil li ab’ink? (chi’ilmanq li K’utul Raqal reheb’ li Loq’laj Hu, “Ab’ink”). K’a’ru li b’oqom malaj li taqlahom naraj li Qaawa’ naq taawab’i sa’ Tzol’leb’ ut Sumwank 133:1–19? K’a’ru eek’asinb’ilat chixb’aanunkil re xkawresinkil aawib’ choq’ re li xkab’ xk’ulunik li Qaawa’? Chan ru taatenq’aheb’ laa was aawiitz’in chixkawresinkileb’ rib’?

Chi’ilmanq ajwi’ Mateo 25:1–13; D. Todd Christofferson, “Xkawresinkil qib’ choq’ re lix sutq’ijik li Qaawa’,” Jolomil ch’utub’aj-ib’ re abril 2019.

Tzol’leb’ ut Sumwank 133:19–56

Eb’ li tiikeb’ chi paab’ank te’saho’q xch’ool sa’ xkab’ xk’ulunik li Qaawa’.

Naq nakawil ru Tzol’leb’ ut Sumwank 133:19–32 li na’aatinak chirix li taak’ulmanq sa’ xkab’ xk’ulunik li Kolonel, maare us wi taak’oxla k’a’ru naxk’ut li na’leb’ a’an chawu chirix li Kolonel ut lix k’anjel. K’a’ruheb’ li musiq’ejil na’leb’ naru taawoksi?

Naq nakawil ru resil lix k’ulunik li Kolonel sa’eb’ li raqal 32–56, k’a’ru naxk’e chak’oxla li xnimal ru kutan a’an? K’a’ru li aatin li naxch’olob’ lix rahom li Qaawa’ choq’ re lix tenamit? Naru taatz’iib’a resil li ak xak’ul laa’at rik’in “li chaab’ilal ch’oolej aj rahonel re laa Qaawa’, ut chixjunil li kixq’axtesi a’an sa’ aab’een jo’ chanru lix chaab’ilal” (raqal 52).

Tzolʼlebʼ ut Sumwank 134

“Ebʼ li jolomil tenamit kʼojobʼanbʼilebʼ xbʼaan li Dios choqʼ re lix chaabʼilalebʼ li winq.”

Ch’a’aj b’ayaq li komonil ke’wan wi’ laj santil paab’anel rik’in lix jolomil li tenamit. Naq ke’mine’ ru laj santil paab’anel chi elk chaq sa’ li Condado Jackson, Missouri sa’ 1833, maak’a’ ke’xk’ul rik’in lix jolomil li tenamit us ta ke’xpatz’ lix tenq’. Jo’kan ajwi’, ke’wan li moko komoneb’ ta sa’ li Iglees li ke’xk’oxla naq lix k’utumeb’ chirix Sion, a’an reetalil naq eb’ laj santil paab’anel neke’xtz’eqtaana lix wankileb’ li jolomil tenamit re li ruchich’och’. Tzol’leb’ ut Sumwank 134 kitz’iib’aman re xch’olob’ankil k’a’ru lix na’leb’ li Iglees chirixeb’ li jolomil tenamit.

K’a’ru tento te’reek’a li komon sa’ li Iglees chirixeb’ li jolomil tenamit? Naq nakawil ru li tasal 134, k’oxla xtz’iib’ankil wiib’ xtusulal li na’leb’: sa’ li jun, li k’a’ru xatzol chirixeb’ li jolomil tenamit, ut sa’ li xkab’, li k’a’ru tento sa’ xb’eeneb’ li wankeb’ sa’ li tenamit. Chan ru naq eb’ li na’leb’ a’in ke’xtenq’aheb’ raj laj santil paab’anel sa’ xtiklajik li Iglees? Chan ru naru roksinkil li na’leb’ a’an sa’ li tenamit wankat wi’ laa’at?

Chi’ilmanq ajwi’ Eb’ lix Raqalil li Paab’aal 1:11–12; Temas del Evangelio, “Libertad religiosa,” topics.ChurchofJesusChrist.org.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzolʼlebʼ ut Sumwank 133:4–14.Lix junpak’alil li Sion sa’ musiq’ej, a’an Babilonia—jun najteril tenamit li nareetali li maa’usilal ut li musiq’ejil moosil sa’eb’ li loq’laj hu (chi’ilmanq D. Todd Christofferson, “A Sión venid,” Liahona, noviembre 2008, 37; K’utul Raqal reheb’ li Loq’laj Hu, “Babel, Babilonia”). Ma wan k’a’ruhaq tento teeb’aanu jo’ junkab’al, re naq sa’ musiq’ej “tex’elq chaq Babilonia” (raqal 5) ut “texxik … toj sa’ … Sion”? (raqal 9).

Tzol’leb’ ut Sumwank 133:20–33.Naq teerileb’ ru li raqal a’in jo’ junkab’al, naru teeyiib’ xjalam-uuch chan ru neke’xk’oxla naq taawanq li xkab’ xk’ulunik li Kolonel. Naru ajwi’ teeb’icha jun li b’ich chirix li xkab’ xk’ulunik li Qaawa’, jo’ “Naq taak’ulunq li Kolonel” (B’ichleb’aal choq’ reheb’ li Kok’al, 46–47), ut tex’aatinaq chirix k’a’ru naru teeb’aanu re xkawresinkil eerib’ choq’ re lix k’ulunik.

Tzol’leb’ ut Sumwank 133:37–39.Ma taawulaq cheru xyaab’asinkileb’ li raqal a’in “chi kaw xyaab’ eexkux”? (raqal 38). K’a’ru naraj naxye xwotzb’al li evangelio chi kaw xyaab’ qakux? K’a’ru li yaal naru taqawotz?

Tzol’leb’ ut Sumwank 134:1–2.Re xtenq’ankil laa junkab’al chixtawb’al ru lix aajelil ru li jolomil tenamit, naru tex’aatinaq chirixeb’ li patz’om a’in: Chan ru naq osob’tesinb’il li qajunkab’al xb’aaneb’ li chaq’rab’? Chan ru naq li qatenamit osob’tesinb’il xb’aaneb’ li chaq’rab’? Naru ajwi’ teeb’on jun xjalam-uuch lix bandera lee tenamit malaj teekanab’ sa’ eek’a’uxl li raatinul li xjunlaju ut xkab’laju raqalil li paab’aal.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Ralal xk’ajol li Qaawa’,” Eb’ li B’ich, 28.

Xchaab’ilob’resinkil li tzolok aajunes

K’ut li tzol’leb’ chi ch’olch’o ru ut chi saqen ru. Li Qaawa’ naroksiheb’ li aatin jo’ “saqen ru” ut “ch’olch’o” re xch’olob’ankil lix evangelio (Tzol’leb’ ut Sumwank 133:57). K’a’ru nakatzol rik’ineb’ li aatin a’in chirix xk’utb’al li evangelio chiru laa junkab’al?

li Kristo tiqto chi kaq

Li Kristo tiqto chi kaq, xb’aan li xMinerva Teichert