jun isb’ wankeb’ wi’ li uq’ej k’iila paay xb’onoleb’

Re chixjunileb’ li komon winq re li Iglees li k’ulub’ejeb’, xb’aan li xEmma Allebes

6–12 diciembre

Ebʼ lix Raqalil li Paabʼaal ut li Awa’b’ejil Yehom 1 ut 2

“Laa’o naqapaab’”

Naq nakawil Ebʼ lix Raqalil li Paabʼaal ut li Awa’b’ejil Yehom 1ut 2, k’oxla chan ru naq xe’xjal li Iglees. K’a’ru naxtoch’ aach’ool laa’at chirix li yaal neke’xk’ut?

Tz’iib’a li nakak’oxla

Chiruheb’ li 200 chihab’ chalen chaq li xb’een k’utb’esink kiril laj Jose Smith, li Dios yoo chixk’eeb’al “chi tasal tasal li k’utb’esinb’il na’leb’, chi tasal tasal li nawom” reheb’ laj jolominel sa’ lix Iglees (Tzol’leb’ ut Sumwank 42:61). Wan naq li k’utb’esinb’il na’leb’ a’an kixb’eresiheb’ laj jolominel chixjalb’al li b’eresink ut chan ru na’uxman li k’anjel sa’ li Iglees, “jo’ chanru naraj li Qaawa’, re xtuqub’ankileb’ li ruxtaan a’an jo’ chanru li wankeb’ wi’ li ralal xk’ajoleb’ li winq” (Tzol’leb’ ut Sumwank 46:15). Li Awa’b’ejil Yehom 1 ut 2 a’aneb’ k’utb’esinb’il na’leb’ li ke’xb’aanu chi jo’kan—jun kixk’e xraqik xb’aanunkil li sumlaak rik’in numenaq jun li sum aatin, ut li jun chik kixk’e chi uxmank naq chixjunileb’, maak’a’ naxye xb’onol lix tib’eleb’, te’ruuq chixk’ulb’aleb’ li osob’tesink re li tijonelil, jo’ ajwi’ li osob’tesink re li santil ochoch. Li jalok jo’ a’in, a’an xcha’al lix yaalalil naq wan li “yaalil ut yo’yookil iglees” (Tzol’leb’ ut Sumwank 1:30), ut jun li yo’yookil profeet.

A’b’an wan li k’a’aq re ru ink’a’ naru xjalb’al—eb’ li yaalil ut junelikil na’leb’. Ut wan naq li rajom li k’utb’esinb’il na’leb’, a’an xkutanob’resinkileb’ li yaalil na’leb’ a’in, re naq saqen wi’chik ruheb’ chiqu. Eb’ lix Raqalil li Paab’aal—li 13 chi yehom kixye laj Jose Smith chirix k’a’ru neke’xpaab’ laj santil paab’anel—neke’k’anjelak chi jo’ka’in. Li wiib’ paay chi k’utb’esinb’il na’leb’ a’in neke’xb’eresi ut neke’rosob’tesi li Iglees, jun li Iglees li k’ojob’anb’il sa’ xb’eeneb’ li yaalil ut junelikil na’leb’, a’ut li toj naru chi k’iik ut chi jale’k naq li Qaawa’ naxnimob’resi li qanawom re qatenq’ankil chixnumsinkileb’ li ch’a’ajkilal re li kutan a’in. Sa’ jalan chik aatin, “Laaʼo naqapaabʼ chixjunil li ak xkʼutbʼesi li Dios, chixjunil li naxkʼutbʼesi anajwan, ut naqapaabʼ naq toj tixkʼutbʼesi kʼiila naʼlebʼ li xninqalebʼ ru ut ninqebʼ xwankil chirix lix Awaʼbʼejihom li Dios” (Ebʼ lix Raqalil li Paabʼaal 1:9).

reetalil li tzolok aajunes

Li na’leb’ re xtzolb’aleb’ li loq’laj hu aajunes

Eb’ lix Raqalil li Paab’aal

Sa’ Eb’ lix Raqalil li Paab’aal wankeb’ li yaalil ut junelikil na’leb’ re li evangelio li k’ojob’anb’il wi’chik.

Jun na’leb’ re xtzolb’al Eb’ lix Raqalil li Paab’aal a’an xtz’iib’ankileb’ li na’leb’ li neke’tawman sa’ li junjunq raqalil, toja’ naq taasik’eb’ raqal sa’eb’ li loq’laj hu chirixeb’ li na’leb’ a’an. Chan ru neke’xnimob’resi aanawom li raqal a’in chirix li na’leb’ natawman sa’ Eb’ lix Raqalil li Paab’aal?

Chi’ilmanq ajwi’ K’utul Raqal reheb’ li Loq’laj Hu, “Eb’ lix Raqalil li Paab’aal”; L. Tom Perry, “Las doctrinas y los principios que se encuentran en los Artículos de Fe,” Liahona, noviembre 2013, 46–48; “Capítulo 38: La Carta a Wentworth,” sa’ Enseñanzas de los Presidentes de la Iglesia: José Smith, 463–476.

Eb’ lix Raqalil li Paab’aal 1:9; Awa’b’ejil Yehom 1 ut 2

B’eresinb’il lix Iglees li Jesukristo xb’aan li k’utb’esinb’il na’leb’.

“Naqapaab’ naq [li Dios] toj tixk’utb’esi k’iila na’leb’ li xninqaleb’ ru ut ninqeb’ xwankil chirix lix Awa’b’ejihom li Dios” (Eb’ lix Raqalil li Paab’aal 1:9), us ta xb’aaneb’ li na’leb’ a’an taajalmanq li k’a’ru na’uxman sa’ li Iglees. Chi wan li na’leb’ a’in sa’ aak’a’uxl, il li Awa’b’ejil Yehom 1 ut 2, ut sik’eb’ li aatin li neke’xkawob’resi laa paab’aal chirix li k’utb’esinb’il na’leb’. K’a’ru’ junjunqeb’ chik li na’leb’ li k’utb’esinb’ileb’ chiru lix profeet li Qaawa’? Chan ru naq li k’utb’esinb’il na’leb’ a’an xe’xjal laa yu’am? Chan ru naq xe’xtiikisi chi uub’ej lix k’anjel li rawa’b’ejihom li qaChoxahil Yuwa’?

Chi’ilmanq ajwi’ Amos 3:7; 2 Nefi 28:30.

Awaʼbʼejil Yehom 1

Lix k’anjel li Dios tento taaxik chi uub’ej.

Sa’ li raqal “Aatin isinb’il chaq sa’ oxib’ lix yehom li Awa’b’ej Wilford Woodruff chirix li Ch’olob’anb’il Aatin” (sa’ xraqik li Awa’b’ejil Yehom 1), k’a’ru kixye li profeet chirix k’a’ut naq li Qaawa’ kixk’e xraqik li sumlaak chi numenaq jun li sum aatin? K’a’ru naxk’ut a’in chawu chirix lix k’anjel li Dios?

Re xtawb’al xkomon chik li na’leb’ chirix li Awa’b’ejil Yehom 1, chi’ilmanq “El mensajero y el Manifiesto” (Revelaciones en Contexto, 346–355) ut “El matrimonio plural en La Iglesia de Jesucristo de los Santos de los Últimos Días” (Temas del Evangelio, topics.ChurchofJesusChrist.org).

xjalam-uuch laj Wilford Woodruff

Wilford Woodruff, xb’aan laj H. E. Peterson

Awaʼbʼejil Yehom 2

Naru taqapaab’ li naxye li Dios, us ta ink’a’ naqataw ru chi tz’aqal.

Eb’ li loq’laj hu neke’xk’ut naq k’ojk’ooq raj qach’ool rik’in li Qaawa’ (chi’ilmanq Proverbios 3:5), ut a’an li ke’xb’aanu laj santil paab’anel aj Africano naq li Iglees ink’a’ kixkanab’eb’ chi k’ojob’aak sa’ li tijonelil chi moko chixk’ulb’aleb’ li k’ojob’anb’il k’anjel re li santil ochoch. Us ta ink’a’ ke’xtaw ru k’a’ut naq kib’aanuman a’an—ut chi kok’ aj xsa’ ke’raho’ xch’ool xb’aan li na’leb’ li k’utb’il chaq chirix a’an, li moko paab’anb’il ta chik xb’aan li Iglees anajwan—toj ke’wan naab’aleb’ li komon aj Africano li ke’xpaab’ li Qaawa’ ut ke’kana chi tiik xpaab’aaleb’ chiru lix yu’ameb’. Naq nakawil li Awa’b’ejil Yehom 2, k’oxla chan ru naq xatzol xpaab’ankil li naxye Qaawa’ us ta naq ink’a’ nakataw ru chi tz’aqal.

Li tzolok chirix lix paab’aaleb’ li komon aj Africano sa’ li Iglees naru tixwaklesi aach’ool. A’in junjunqeb’ lix seraq’, li neke’tawman sa’ history.ChurchofJesusChrist.org:

• “Jane Elizabeth Manning James” (Temas de la historia de la Iglesia)

• “En la casa de mi Padre muchas moradas hay” (seraq’ chirix laj Green Flake)

• “Lo aceptaré con fe” (seraq’ chirix laj George Rickford)

Chi’ilmanq ajwi’ “Al ver la fidelidad,” Revelaciones en Contexto, 356–366.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Eb’ lix Raqalil li Paab’aal.K’oxla chan ru naq teek’uub’ li kok’ tzolok chirix Eb’ lix Raqalil li Paab’aal jo’ junkab’al. Qayehaq, chiru li xamaan, li junjunq komon naru tixsik’ ru jun reheb’ li raqal ut tixtaw jun raqal sa’eb’ li loq’laj hu, jun li jalam-uuch, malaj jun li b’ich li naxk’am rib’ rik’in, malaj naru tixwotz k’a’ruhaq xk’ul sa’ xyu’am.

Malaj naru texpatz’oq cherib’il eerib’ chirix li Iglees ut li qapaab’ahom, toja’ naq teesumeheb’ li patz’om a’an rik’in jun reheb’ lix raqalil li paab’aal.

Awa’b’ejil Yehom 1 ut 2.Li Awa’b’ejil Yehom 1 ut 2 nokohe’xtenq’a chixtawb’al ru li k’utb’esinb’il na’leb’ sa’ li Iglees. Naq teerileb’ sa’ komonil, naru tex’aatinaq chirix li profeet ut chan ru naq nokoxb’eresi “chi musiq’anb’il xb’aan li Nimajwal Dios” (Awa’b’ejil Yehom 1). Chan ru naq li wiib’ chi yehom a’in neke’xkawob’resi li qapaab’aal chirix jun li yo’yookil Dios li naxb’eresi lix Iglees? Chan ru naq naqak’e reetal li ruq’ a’an sa’ xk’anjel li Iglees sa’ li kutan a’in? Maare sa’ komonil teerileb’ li na’leb’ li wankeb’ sa’ “Li na’leb’ re xtzolb’aleb’ li loq’laj hu aajunes” sa’ li tusleb’ aatin a’in.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Paab’eb’ li taqlahom,” B’ichleb’aal choq’ reheb’ li Kok’al, 68–69.

Xchaab’ilob’resinkil li qak’utum

Patz’on chirixeb’ li b’oqb’al chi k’anjelak. “Naq nakatpatz’ok chirix jun b’oqb’al chi k’anjelak, nakak’ut chiruheb’ li komon [sa’ laa junkab’al] naq yookat chixk’oxlankileb’, ut chixk’oxlankil chan ru neke’osob’tesiik xyu’ameb’ xb’aan li evangelio. Jo’kan ajwi’ nakakanab’eb’ chixwotzb’al li k’a’ru xe’xk’ul sa’ xyu’am” (Li k’utuk jo’ li Kolonel, 35).

Eb’ lix Raqalil li Paab’aal