13–19 diciembre

Li Junkab’al: Jun Jek’inb’il Aatin choq’ re li Ruchich’och’

“Li junkab’al q’axal aajel ru sa’ lix k’uub’anb’il na’leb laj Yo’ob’tesinel”

Li Awa’b’ej Dallin H. Oaks kixye, “Laa’in nink’oxla naq chan ru naq naqak’oxla ut naqoksi li jek’inb’il aatin chirix li junkab’al a’an jun yalok-ix choq’ re li tasal tenamit a’in. Nintz’aama sa’ lin tij naq chixjunileb’ laj Santil Paab’anel sa’ Roso’jikeb’ li Kutan te’kanaaq chi xaqxo chiru li yalok-ix a’in” (“Li k’uub’anb’il na’leb’ ut li jek’inb’il aatin,” Jolomil ch’utub’aj-ib’ re octubre 2017). K’oxla li aatin a’in naq nakawil li jekinb’il aatin choq’ re li junkab’al chiru li xamaan a’in.

Tz’iib’a li nakak’oxla

Rub’elaj naq xooyo’la chaq, koowan sa’ junkab’al—lix junkab’al li qachoxahil na’ qayuwa’. Naq kootz’aq chi elk chaq rik’ineb’, maare kik’ojob’aak qach’ool chixnawb’al naq sa’ li ruchich’och’ li junkab’al aajel ru sa’ lix k’uub’anb’il na’leb’ li Dios. Li junkab’al sa’ li ruchich’och’ a’an wan choq’ reetalil li junkab’al sa’ choxa.

Maajun wa kiyeeman naq tz’aqal re ru malaj chaab’il taak’anjelaq li junkab’al sa’ ruchich’och’. A’ut, jo’ kixye li Awa’b’ej Henry B. Eyring, eb’ li junkab’al “neke’xk’e xna’ajeb’ li ralal xk’ajol li Dios b’ar wi’ jwal nim wi’chik li wankilal re te’ruuq raj chireek’ankil li k’a’ru xqeek’a chaq sa’ choxa—a’an xrahom li na’b’ej yuwa’b’ej” (“Xch’utub’ankil lix junkab’al li Dios,” Jolomil ch’utub’aj-ib’ re abril 2017). Li Dios kixnaw naq moko tz’aqalaqeb’ ta re ru li junkab’al ut te’wanq chi pleetinb’il xb’aan laj tza, jo’kan naq kixtaqla li Ralal raaro xb’aan chixtojb’al qix ut chixk’irtesinkil li qajunkab’al. Kixtaqlaheb’ ajwi’ li profeet sa’ roso’jikeb’ li kutan rik’in jun jek’inb’il aatin li tixkol rix ut tixkawob’resi li junkab’al. Wi taqataaqeheb’ li profeet ut taqapaab’ li Kolonel, us ta moko tz’aqaleb’ ta re ru li junkab’al sa’ ruchich’och’, toj taaruuq te’wanq li junkab’al sa’ chaab’ilal—sa’ ruchich’och’ ut sa’ choxa.

Li na’leb’ re xtzolb’aleb’ li loq’laj hu aajunes

“Li junkab’al q’axal aajel ru sa’ lix k’uub’anb’il na’leb laj Yo’ob’tesinel”

“Li Junkab’al: Jun Jek’inb’il Aatin choq’ re li Ruchich’och’ ” na’aatinak chirix li junkab’al. A’b’an na’aatinak ajwi’ chirix lix k’uub’anb’il na’leb’ li Dios re li kolb’a-ib’. Naq nakatzol li jek’inb’il aatin, naru taasik’ k’a’ru li naxk’ut chirix li qayu’am naq maji’ nokoyo’la, sa’ li ruchich’och’, ut chirix naq tookamq. K’a’ru li na’leb’ nakatzol naq nakawil li jek’inb’il aatin chi jo’ka’in? Chan ru nakatxtenq’a chixtawb’al ru k’a’ut naq aajel ru li sumlaak ut li junkab’al sa’ lix k’uub’anb’il na’leb’ li Dios?

Chi’ilmanq ajwi’ Dallin H. Oaks, “Li k’uub’anb’il na’leb’ ut li jek’inb’il aatin,” Jolomil ch’utub’aj-ib’ re octubre 2017.

“Li sahil ch’oolejil sa’ li junkab’al, k’a’jo’ wi’chik naq taatawmanq naq k’ojob’anb’il sa’ xb’een li na’leb’ k’utb’il xb’aan li Qaawa’ Jesukristo.”

K’oxla li xwaq ut li xwuq raqal re li jek’inb’il aatin chirix li junkab’al jo’ li na’leb’ re xtawb’al “li sahil ch’oolejil sa’ li junkab’al.” Naq nakawileb’ li raqal a’in, sik’eb’ li na’leb’ chirixeb’ “li sumsu ut li junkab’al li neke’usaak.” Chirix a’an, k’oxla jun komon sa’ laa junkab’al rik’in li taawaj wank wi’ sa’ chaab’ilal. K’a’ru musiq’anb’ilat chixb’aanunkil? Chan ru naq taakanab’ li Kolonel chi tz’aqonk sa’ li taab’aanu?

Chi’ilmanq ajwi’ Richard J. Maynes, “Establecer un hogar centrado en Cristo,” Liahona, mayo 2011, 37–39; “Lo que es más importante,” video, ChurchofJesusChrist.org.

“Teneb’anb’ilaq sa’ inb’een xsumenkil chiru li Dios” chan ru naq kinwan rik’in lin junkab’al.

Sa’ li jek’inb’il aatin chirix li junkab’al wankeb’ li xchaq’al ru osob’tesink yeechi’inb’ileb’ xb’aan li qaChoxahil Yuwa’ reheb’ li neke’b’aanunk re li na’leb’ naxk’e. Wankeb’ ajwi’ li kawil tijom choq’ reheb’ li ink’a’ te’b’aanunq re. Maare taatz’iib’aheb’ li osob’tesink ut li tijom nakataw.

Chan ru yookat chixb’aanunkil li naxye li Dios sa’ li jek’inb’il aatin? Wi ta tatxaqliiq chiru rilob’aal li Dios anajwan, ma kawaq raj aach’ool chi aatinak rik’in a’an chirix chan ru nakatwan rik’in laa junkab’al? K’a raj ru tento tatchaab’ilo’q wi’?

Chi’ilmanq ajwi’ Alma 5:15–22; Tzol’leb’ ut Sumwank 42:22–25; 93:39–44.

Eb’ li na’b’ej yuwa’b’ej tento te’xk’iresiheb’ lix kok’al rik’in rahok ut tiikilal.

Ma naru teb’ink’ul li osob’tesink li yeechi’inb’il wi ch’a’aj wan injunkab’al?

Li Elder D. Todd Christofferson kixye: “Xjultikankil li tz’aqal yaal chirix li sumlaak ut li junkab’al ink’a’ naxkub’si xwankil li mayejak ut li usaak neke’xb’aanu li ani toj maji’ neke’xtaw a’in sa’ xyu’am. … Wan xmaatan li junjunq; chiqajunilo wan li qe; chiqajunilo tooruuq chixtenq’ankil li choxahil na’leb’ sa’ li junq tasal tenamit. Naab’al li k’a’ru chaab’il ut aajel ru—maare yal jo’ k’ihal li na’ajman anajwan—naru taab’anumanq b’ar wi’ moko tz’aqalo ta. … Chi anchal qach’ool naqach’olob’ naq lix Tojb’al rix li Maak xb’aan li Kristo ak naxk’e reetal, ut sa’ xraqik tixk’e reeqaj chixjunil li k’a’ru xsachman chiruheb’ lix tzolom. Maa’ani ak xteneb’aak re naq ink’a’ tixk’ul chixjunil rik’in li Yuwa’b’ej” (“K’a’ru aj-e li sumlaak, k’a’ru aj-e li junkab’al,” Jolomil ch’utub’aj-ib’ re abril 2015).

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

“Li winqilal ut ixqilal a’an aajel ruhil eetalil chirix aniho ut k’a’ut naq wan li junjunq, naq maji’ nayo’la, sa’ li yu’am a’in, ut sa’ li junelik q’e kutan.”Wi chaab’il choq’ re laa junkab’al aatinak chirix li tzol’leb’ chirixeb’ li neke’rahok re rech winqilal malaj rech ixqilal, naru teeroksi li na’leb’ a’in: Dallin H. Oaks, “Li yaal ut li k’uub’anb’il na’leb’,” Jolomil ch’utb’aj-ib’ re octubre 2018; Temas del Evangelio, “La atracción hacia personas del mismo sexo,” topics.ChurchofJesusChrist.org.

“Li choxahil k’uub’anb’il na’leb’ re sahil ch’oolejil.”Re xtenq’ankil laa junkab’al chixk’eeb’al reetal lix aajelil ru li junkab’al sa’ lix k’uub’anb’il na’leb’ li Dios, naru taatz’iib’a li yu’am naq maji’ nokoyo’la, li yu’am a’in, ut li yu’am chirix li kamk chiru jun li perel. Sa’ komonil teeril li jek’inb’il aatin, ut teetz’iib’a k’a’ru li neketzol chirix li junjunq cha’alej a’in re lix k’uub’anb’il na’leb’ li Dios. K’a’ut naq aajel ru li junkab’al choq’ re li Dios?

“Eb’ li junkab’al [naru] te’junajimanq chi junelik.”Naru teeril li video “El plan de salvación - Aún somos una familia” (ChurchofJesusChrist.org). Sik’eb’ li na’leb’ sa’ li jek’inb’il aatin chirix li junkab’al li ke’xtenq’a li saaj winq sa’ li video rik’in lix paab’aal.

“Li sahil ch’oolejil sa’ li junkab’al.”Re aatinak chirix chan ru xk’ulb’al xkomon chik “li sahil ch’oolejil sa’ lee junkab’al,” naru teeb’icha jun li b’ich chirix li junkab’al, jo’ “Li ochoch chanchan choxa” (Eb’ li B’ich, 191). K’a’ru naqatzol sa’ li b’ich ut sa’ li jek’inb’il aatin chirix li junkab’al li naru tixk’am xkomon chik li sahil ch’oolejil sa’ li qajunkab’al? K’a’ru naru taqab’aanu re naq li qajunkab’al taawanq chi “k’ojob’anb’il sa’ xb’een li na’leb’ k’utb’il xb’aan li Qaawa’ Jesukristo”? Maare taasik’ jun li na’leb’ taawaj xk’anjelankil chiru li xamaan a’in.

“Xkawresinkil li junkab’al jo’ li ch’utam li wan choq’ roqechal li tenamit.”Chan ru naq laj Satanas naxyal xq’e chixsachb’al xkawilaleb’ li junkab’al sa’ li ruchich’och’? Chan ru naru taqakawob’resiheb’ li junkab’al? Re xtawb’al eena’leb’, chi’ilmanq li raatin li Hermana Bonnie L. Oscarson “Eb’ aj kolol re li Jek’inb’il Aatin chirix li Junk’ab’al” (Jolomil ch’utub’aj-ib’ re abril 2015).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Li ochoch chanchan choxa,” Eb’ li B’ich, 191.

Xchaab’ilob’resinkil li tzolok aajunes

Xtawb’al lix rahom li Dios. Li Elder M. Russell Ballard kixye, “Li evangelio a’an jun evangelio re rahok—rahok choq’ re li Dios ut choq’ re li qas qiitz’in” (“El amor de Dios y sus creaciones,” Liahona, julio 1988, 58). Naq nakawil li jek’inb’il aatin chirix li junkab’al, maare taajuch’eb’ li reetalil lix rahom li Dios li neke’wulak chawu.