xjalam-uuch li xMaria ut li k’uula’al Jesus

Lix yo’lajik li Jesus, xb’aan laj J. Kirk Richards

20–26 diciembre

Li Ralankil

Li maatan li maak’a’ xjuntaq’eetankil li kixk’e chaq li Dios, a’ lix choxahil Alal

Jun na’leb’ re xjayalinkil aawib’ rik’in li Kolonel sa’ li Ralankil a’in, a’an xtzolb’al “Li Yo’yookil Kristo, Lix Ch’olob’ahomeb’ li Apostol.” Li tusleb’ aatin a’in naxye chan ru naru taatzol li profeetil ch’olob’ahom a’in aajunes ut rik’in laa junkab’al.

Tz’iib’a li nakak’oxla

Sa’ 1838, li profeet aj Jose Smith kixye, “Li xb’eenileb’ na’leb’ re li qapaab’aal a’an lix ch’olob’ahomeb’ li apostol ut eb’ li profeet chirix li Jesukristo, naq kikam, kimuqe’, kiwakli sa’ rox li kutan, ut kitaqe’ sa’ choxa; ut chixjunil chik li k’a’aq re ru li wan sa’ li qapaab’aal yal wan choq’ xcha’al” (Enseñanzas de los Presidentes de la Iglesia: José Smith, 51–52). K’iila chihab’ chirix a’an, li Awa’b’ej Russell M. Nelson kixye naq “a’an tz’aqal li aatin a’in re li Profeet li kixwaklesi xch’ooleb’ o’laju li profeet, aj ilol na’leb’ ut aj k’utb’esinel chixjek’inkil ut chixjuch’b’al xk’ab’a’eb’ chiru lix ch’olob’ahomeb’ re xloq’oninkil ru lix yo’lajik li Qaawa’, 2000 chihab’ chaq. Li ch’olob’ahom a’in, a’an nawb’il ru jo’ “Li yo’yookil Kristo.” Naab’aleb’ li komon ak ke’xchap sa’ xk’a’uxleb’ li yaal li naxk’ut. Wankeb’ chik li ink’a’ neke’xnaw naq wan li ch’olob’ahom a’an. Naq nekesik’ xtzolb’al xkomon chik chirix li Jesukristo, nintz’aama eere naq teetz’il rix “Li yo’yookil Kristo’” (“Roksinkil lix wankil li Jesukristo sa’ li qayu’am,” Jolomil ch’utub’aj-ib’ re abril 2017).

Jo’ aj Santil Paab’anel sa’ Roso’jikeb’ li Kutan, nasaho’ qach’ool naq osob’tesinb’ilo chixk’ulb’al k’utb’esinb’il na’leb’ rik’ineb’ li profeet ut li apostol re li kutan a’in. Naqab’antioxi naq neke’xk’e qana’leb’, nokohe’xtij, ut neke’xwaklesi qach’ool. A’b’an sa’ xb’een chixjunil, osob’tesinb’ilo xb’aan lix ch’olob’ahomeb’ chirix li Jesukristo—sa’ li Ralankil ut chiru chixjunil li chihab’. Maawa’eb’ ajwi’ xchaq’al ru aatin li tz’iib’anb’il xb’aaneb’ li tzolb’ileb’ chi us sa’eb’ li loq’laj hu. A’aneb’ b’an li raatineb’ li sik’b’ileb’ ru, b’oqb’ileb’, ut li k’eeb’ileb’ xwankil xb’aan li Dios jo’ “sik’b’il ru aj yehol nawom chirix lix k’ab’a’ li Kristo sa’ chixjunil li ruchich’och’ ” (Tzol’leb’ ut Sumwank 107:23).

reetalil li tzolok aajunes

Li na’leb’ re xtzolb’aleb’ li loq’laj hu aajunes

“Maajun chik junaq wanjenaq xwankil chixtoch’b’al li qayu’am.”

K’a’ru nakak’oxla naq nakawil Lukas 2:10–11 ut li xb’een raqal re “Li Yo’yookil Kristo”? K’a’ raj ru taaye re xch’olob’ankil xyaalal li esil naq “maajun chik junaq wanjenaq xwankil chixtoch’b’al xch’ooleb’ chixjunil li ani xe’wan ut li toj te’wanq sa’ li ruchich’och’ ”? Sik’eb’ li na’leb’ sa’ “Li Yo’yookil Kristo” li neke’xye resil chan ru naq li Kolonel naxtoch’ ch’oolej. Chan ru naq xtoch’ aach’ool laa’at ut xk’am “xnimal sahil ch’oolej” aawe? (Lukas 2:10).

“Kiwakli chaq sa’ li muqleb’aal.”

Sa’ “Li Yo’yookil Kristo,” eb’ li apostol neke’xch’olob’ xyaalal lix waklijik li Kolonel chi yo’yo, ut neke’xye resil oxib’ sut naq kixk’ut rib’ li Kolonel chirix naq kiwakli wi’chik (chi’ilmanq li raqal 5). Naru taawil resileb’ lix k’utunik a’an sa’ Jwan 20–21; 3 Nefi 11–26; ut Jose Smith—Resilal 1:14–20. K’a’ru nakatzol chirix li Kolonel rik’in li raatin ut lix b’aanuhom naq kixk’ut rib’?

“Lix tijonelil a’an ut lix Iglees a’an, ak xe’k’ojob’aak wi’chik.”

Sa’ xtzolb’al li Tzol’leb’ ut Sumwank chiru li chihab’ a’in, xatru chixtzolb’al xkomon chik chirix li Kolonel ut chan ru naq “lix tijonelil a’an ut lix Iglees a’an, ak xe’k’ojob’aak wi’chik.” K’a’ruheb’ li na’leb’ malaj tzol’leb’ li k’ojob’anb’ileb’ wi’chik li jwal neke’xtoch’ aach’ool? Naru taawil junjunq reheb’ li raqal a’in li neke’aatinak chirix lix k’ojob’ankil wi’chik li evangelio: Tzol’leb’ ut Sumwank 1:17–23; 13; 20:1–12; 65; 110; 112:30–32; 124:39–42; 128:19–21. K’oxla chan ru naq li yaal li natawman sa’ li evangelio k’ojob’anb’il wi’chik nakatxtenq’a chixnawb’al ru ut chixloq’oninkil li Jesukristo (chi’ilmanq Tzol’leb’ ut Sumwank 93:19).

“Sa’ junaq kutan a’an taasutq’iiq sa’ li ruchich’och’.”

Li Ralankil a’an xq’ehil xk’oxlankil li kutan kiyo’la wi’ li Jesukristo, jo’ ajwi’ li kutan naq taasutq’iiq wi’chik. K’a’ru nakatzol chirix lix sutq’ijik sa’ xraqik “Li Yo’yookil Kristo”? Maare chaab’ilaq raj ajwi’ rilb’al ru, xb’ichankil, malaj rab’inkil junjunq li b’ich re li Ralankil li neke’xye resil li xkab’ xk’ulunik li Qaawa’, jo’ “Sahaq eechʼool, li Qaawaʼ xchal” malaj “Chiru qʼojyin kiʼabʼiman” (Eb’ li B’ich, 123, 129).

“A’an lix saqen, lix yu’am, ut lix yo’onihom li ruchich’och’.”

Sa’ li roso’jik raqal re “Li Yo’yookil Kristo,” k’e reetaleb’ li na’leb’ chirix ut eb’ li k’ab’a’ej k’eeb’il re li Kolonel. Eb’ li raqal a’in naru tate’xtenq’a chixk’oxlankil chan ru naq li Jesukristo a’an “lix saqen, lix yu’am, ut lix yo’onihom li ruchich’och’ ”: Lukas 2:25–32; 1 Korintios 15:19–23; Moroni 7:41; Tzol’leb’ ut Sumwank 50:24; 84:44–46; 93:7–10. Chan ru naq a’an laa saqen, laa yu’am, ut laa yo’onihom? K’a’ruheb’ chik li na’leb’ chirix malaj k’ab’a’ej k’eeb’il re li Kristo li neke’xtoch’ aach’ool?

Chan ru naq xtzolb’al “Li Yo’yookil Kristo” xnimob’resi laa paab’aal chirix li Kolonel ut laa rahom choq’ re?

Jesukristo

Xsaqenkil li ruchich’och’, xb’aan laj Howard Lyon

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

“Li Yo’yookil Kristo.”Re xtenq’ankil laa junkab’al chixtawb’aleb’ ru li na’leb’ li k’utb’ileb’ sa’ “Li Yo’yookil Kristo,” naru taasik’ ru junjunq li aatin aajeleb’ ru ut jo’ junkab’al teesik’ malaj teeyiib’ xjalam-uucheb’ li aatin a’an. Toja’ naq teech’utub’eb’ li jalam-uuch a’an sa’ jun li tasal hu.

“Naqak’e li qach’olob’ahom.”K’a’ru naqatzol sa’ “Li Yo’yookil Kristo” chirix k’a’ru xk’eeb’al jun ch’olob’ahom? Maare teeraj xtz’iib’ankil lee ch’olob’ahom laa’ex chirix li Kristo re xnimankil lix yo’lajik li Kolonel.

“A’an kinume’k yalaq b’ar chixb’aanunkil li chaab’ilal.”Jo’ junkab’al, chan ru teeb’aanu li kixb’aanu li Kolonel sa’ k’anjelak chiru lee ras eeriitz’in chiru li Ralankil a’in? Chan ru teewotz “tuqtuukilal ut chaab’il ajom” sa’ lee junkab’al ut sa’ lee tenamit? Chan ru textenq’anq chixk’amb’al “xk’irtesinkileb’ li yaj”? Maare naru teetaw eena’leb’ sa’ eb’ li video chirix li Ralankil sa’ li aplicación malaj perel web re Recursos del Evangelio (medialibrary.ChurchofJesusChrist.org).

“B’antioxinb’ilaq taxaq re li Dios li maatan li maak’a’ xjuntaq’eetankil li kixk’e chaq; a’ lix choxahil Alal.”K’a’ruheb’ li maatan ak xqak’ul xb’aan li Jesukristo? Maare laa junkab’al naru te’xtaw xsumenkil a’an sa’ “Li Yo’yookil Kristo,” toja’ naq te’xlaneb’ jo’ maatan li k’a’aq re ru li neke’reetaliheb’ li maatan neke’qak’ul rik’in li Kolonel. Naru teeteheb’ li maatan sa’ li kutan re Ralankil malaj chiru li xamaan ut teerileb’ li raqal sa’eb’ li loq’laj hu neke’aatinak chirix li junjunq. Wahe’ junjunqeb’ li raqal, us ta naru teetaw jalaneb’ chik: Lukas 2:10–14; 1 Pedro 2:21; Mosiah 3:8; Alma 11:42–43; Tzol’leb’ ut Sumwank 18:10–12. Naru ajwi’ teeb’icha jun li b’ich chirix li Kolonel, jo’ Kixtaqla li Ralal” (B’ichleb’aal choq’ reheb’ li Kok’al, 20–21),

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Abʼihomaq xbʼichebʼ li anjel,” Eb’ li B’ich, 132.

Xchaab’ilob’resinkil li tzolok aajunes

Jayali aawib’ rik’in li Kolonel. “Rilb’al ru “ Li yo’yookil Kristo” rik’in tijok, a’an chanchan rilb’al ru lix ch’olob’ahomeb’ laj Mateo, laj Markos, laj Lukas, laj Jwan, ut eb’ li profeet sa’ lix Hu laj Mormon . Tixnimob’resi laa paab’aal chirix li Kolonel ut tatxtenq’a chixjayalinkil aawib’ rik’in a’an” (M. Russell Ballard, “Li sutq’iik ut li k’uluk,” Jolomil ch’utub’aj-ib’ re abril 2017).

Li Yo’yookil Kristo