Li jalok ch’oolej, a’an li qajayalihom

Li na’ajman ru sa’ chixjunil li tzolok ut li k’utuk li na’uxman sa’ li evangelio, a’an xnimob’resinkil lix jalajik qach’ool chirix li Jesukristo, ut qatenq’ankil chi wank chi mas wi’chik jo’ a’an. Xb’aan a’in, naq naqatzol li evangelio, ink’a’ yal yooko chixsik’b’al li ak’ na’leb’, naqaj wank choq’ “ak’ yo’ob’tesihom” (chi’ilmanq 2 Korintios 5:17). A’in naraj naxye xkanab’ankil qib’ chiru li qaChoxahil Yuwa’ ut li Jesukristo re toohe’xtenq’a chixjalb’al li qach’ool, li qak’oxlahom, li qab’aanuhom, ut tz’aqal li qawanjik.

A’b’anan, li tzolok chirix li evangelio li naxkawob’resi li qapaab’aal ut naxk’e chi uxmank li sachb’a-ch’oolejil jalaak sa’ qach’ool, ink’a’ sa’ junpaat na’uxman. Ink’a’ ka’ajwi’ na’uxman sa’ li tzoleb’aal, a’b’an sa’ rochoch ut sa’ xch’ool junaq. Na’ajman ru naq taqayal qaq’e rajlal ut wulaj wulaj re xtawb’al ru ut xyu’aminkil li evangelio. A’ut li qaChoxahil Yuwa’ ink’a’ naraj naq qajunes qib’ taqab’aanu—a’an tixtaqla li Santil Musiq’ej re xjalb’al qach’ool.

Li Santil Musiq’ej naxk’am qab’e rik’in li yaal, ut naxk’ut xyaalal li yaal a’an (chi’ilmanq Jwan 16:13). A’an naxkutanob’resi li qak’a’uxl, naxseeb’ob’resi li qana’leb’, ut naxtoch’ li qach’ool rik’in lix k’utb’esihom li Dios, a’an laj k’ehol re chixjunil li yaal. Li Santil Musiq’ej naxsaqob’resi ru li qach’ool. A’an nokoxmusiq’a re naq taqaj xyu’aminkil li yaal, ut naxhasb’a qe chan ru naq naru taqab’aanu a’in. Relik chi yaal naq “li Santil Musiq’ej … tooxtzol chirix chixjunil” (Jwan 14:26).

Xb’aan a’in, naq naqayal qaq’e chixyu’aminkil, chixtzolb’al, ut chixk’utb’al li evangelio, tento xb’een wa naq taqasik’ ochb’eeniik xb’aan li Musiq’ej. Li ajom a’in tento naq tixb’eresi li k’a’ru naqasik’ ru, ut tixb’eresi li k’a’ru naqak’oxla ut naqab’aanu. Tento taqasik’ chixjunil li naxk’e xb’oqb’al lix wankil li Musiq’ej, ut taqatz’eqtaana chixjunil li nanajtob’resink re li wankilal a’an—xb’aan naq naqanaw naq wi naru nokowan chi k’ulub’ej re taawanq qik’in li Santil Musiq’ej, naru ajwi’ naq k’ulub’ejaqo re wank chiru li qaChoxahil Yuwa’ ut li Jesukristo, li Ralal.