Disyembre 31–Enero 6

Responsable Kita alang sa Atong Kaugalingong Pagkat-on

Ang katuyoan sa Dali, Sunod Kanako—Alang sa mga Indibidwal ug mga Pamilya mao ang pagtabang nga ikaw moduol ngadto ni Kristo ug mas makabig pa pag-ayo ngadto sa Iyang ebanghelyo. Kini nga kapanguhaan makatabang ninyo nga makasabut sa mga kasulatan ug makita niini ang espirituhanong kalig-on nga gikinahanglan nimo ug sa imong pamilya. Dayon, sa imong mga klase sa Simbahan, maandam ka sa pagpakigbahin og mga panabut ug makaawhag sa imong isig ka mga Santos sa ilang mga paningkamot sa pagsunod ni Kristo.

Irekord ang Imong mga Impresyon

“Unsay inyong gipangita?” Nangutana si Jesus sa Iyang mga tinun-an (Juan 1:38). Mahimo nimong pangutan-on ang imong kaugalingon sa samang pangutana—kay unsay imong makit-an sa Bag-ong Tugon niining tuiga mag-agad ra gayud unsay imong gipangita. “Pangayo, ug kamo pagahatagan” mao ang saad sa Manluluwas (Mateo 7:7). Mao nga ipangutana kanang moabut sa imong hunahuna samtang magtuon ka, ug dayon paningkamuti pag-ayo ang pagpangita sa mga tubag. Sa Bag-ong Tugon mabasa nimo ang gamhanan nga espirituhanong mga kasinatian sa mga tinun-an ni Jesukristo. Isip usa ka matinud-anon nga tinun-an sa Manluluwas, makabaton ka og imong kaugalingong gamhanan nga espirituhanong mga kasinatian sa imong pagdawat sa pagdapit sa Manluluwas, makita niining tibuok volume, “Dali, sunod kanako” (Lucas 18:22).

Mga Ideya alang sa Personal nga Pagtuon sa Kasulatan

Aron makat-on gayud gikan sa Manluluwas, kinahanglan dawaton nako ang Iyang pagdapit, “Dali, sunod kanako.”

Ang pagdapit sa Manluluwas, “Dali, sunod kanako,” alang sa tanan—bisan og bag-o kita sa dalan sa pagkatinun-an o nakalakaw na niini. Mao kini ang Iyang pagdapit ngadto sa datu nga batan-on nga naningkamot sa pagsunod sa mga sugo (tan-awa sa Mateo 19:16–22). Unsay iyang nakat-unan—ug unsay kinahanglan nga makat-unan natong tanan—mao nga ang pagkatinun-an nagpasabut sa paghatag sa atong tibuok kalag ngadto sa Langitnong Amahan ug ni Jesukristo. Molambo kita sa atong pagkatinun-an samtang mahibaloan nato unsay atong kulang, usbon, ug maningkamot nga mas hingpit nga makasunod Kanila.

Ang pagkat-on gikan sa Manluluwas magsugod kon maningkamot kita sa pagsabut unsay Iyang gitudlo. Pananglitan, sa unsa nga paagi ang imong pagsabut sa pagpasaylo molambo pa samtang imong suhiron ang mosunod?

Ang mga pagtulun-an sa Manluluwas (tan-awa sa Mateo 6:14–15; 18:21–35)

Usa ka ehemplo sa Iyang kinabuhi (tan-awa sa Lucas 23:33–34)

Hinoon, ang pagkat-on dili kompleto hangtud mosunod kita sa Manluluwas pinaagi sa pagsunod unsay Iyang gitudlo. Sa unsa nga paagi nga ikaw mas mapasayloon?

Kon gusto ka pa nga makat-on og dugang, sulayi kini nga kalihokan uban sa laing baruganan sa ebanghelyo, sama sa gugma o pagkamapainubsanon.

Responsable ko sa akong kaugalingong pagkat-on.

Si Elder David A. Bednar mitudlo: “Isip mga tigkat-on, kamo ug ako kinahanglan molihok ug motuman sa pulong ug dili lamang tigpaminaw nga giaaghat lamang. Kamo ba ug ako mga tinugyanan kinsa molihok ug maningkamot sa pagkat-on pinaagi sa hugot nga pagtuo, o kita ba naghulat nga tudloan ug pagaaghaton? … “Ang usa ka nagkat-on nga naggamit sa kabubut-on pinaagi sa paglihok sumala sa sakto nga mga baruganan mibukas sa iyang kasingkasing ngadto sa Espiritu Santo—ug nagdapit sa Iyang pagtudlo, gahum sa pagpamatuod, ug panghimatuod nga saksi. Ang pagkat-on pinaagi sa pagtuo nagkinahanglan sa espirituhanon, mental, ug pisikal nga pagpaningkamot ug dili lamang lumalabay nga pagbati” (“Paningkamot sa Pagkat-on pinaagi sa Hugot nga Pagtuo,” Liahona, Sept. 2007, 19–20).

Unsay buot ipasabut sa pag-angkon og responsibilidad alang sa imong kaugalingong pagkat-on? Pangita sa posible nga mga tubag sa pamahayag ni Elder Bednar ug sa mosunod nga mga kasulatan: Juan 7:17; 1 Mga Taga-Tesalonica 5:21; Santiago 1:5–6, 22; 2:17; 1 Nephi 10:17–19; 2 Nephi 4:15; Alma 32:27; ug Doktrina ug mga Pakigsaad 18:18; 58:26–28; 88:118. Unsay gibati nimo nga nadasig nga buhaton aron mas aktibo nga makat-on sa ebanghelyo?

Kinahanglan nakong mahibaloan ang kamatuoran sa akong kaugalingon.

Tingali nakaila ka og mga tawo nga wala gayud mawagtangi og pagtuo, bisan unsa pay mahitabo sa ilang mga kinabuhi. Makapahinumdom sila nimo sa lima ka buotan nga mga birhen sa sambingay sa Manluluwas (tan-awa sa Mateo 25:1–13). Unsay dili tingali nimo makita mao ang ilang makugihong paningkamot sa paglig-on sa ilang mga pagpamatuod sa kamatuoran. Kinahanglan nga maningkamot kitang tanan sa pagpalig-on sa atong mga pagpamatuod tungod kay, sama sa nakat-unan sa boangboang nga mga birhen, dili kita makahulam sa pagkakabig gikan ni bisan kinsa.

Unsaon nato sa pag-angkon ug pag-amuma sa atong kaugalingong mga pagpamatuod? Isulat ang imong mga hunahuna samtang ikaw mamalandong sa mosunod nga mga kasulatan: Lucas 11:9–13; Juan 5:39; Juan 7:14–17; Mga Buhat 17:10–12; 1 Mga Taga-Corinto 2:9–11; ug Alma 5:45–46.

Kinahanglan nga ang matag usa kanato makaangkon og pagpamatuod alang sa atong kaugalingon.

Unsay akong buhaton kon ako adunay mga pangutana?

Samtang magtinguha ka og espirituhanong kahibalo, mga pangutana moabut sa imong hunahuna. Ang mosunod nga mga baruganan makatabang kanimo pagtubag sa mga pangutana sa paagi nga makalig-on sa pagtuon ug pagpamatuod:

1. Tinguhaa ang dugang nga panabut pinaagi sa balaanong gipili nga mga tinubdan. Ang Dios mao ang tinubdan sa tanang kamatuoran, ug gipadayag Niya ang kamatuoran pinaagi sa Espiritu Santo, sa mga kasulatan, ug sa Iyang mga propeta ug mga apostoles.

2. Lihok inubanan sa hugot nga pagtuo. Kon ang mga tubag dili moabut dayon, salig nga ang Ginoo mopadayag sa mga tubag inig abut sa eksaktong panahon. Sa pagkakaron, padayon sa pagsunod sa kamatuoran nga nahibaloan na nimo.

3. Pagbaton og mahangturon nga panglantaw. Paningkamot nga makakita sa mga butang sama sa nakita sa Ginoo niini, dili sama sa pagkakita sa kalibutan. Tan-awa ang imong mga pangutana sa konteksto sa plano sa Langitnong Amahan sa kaluwasan.

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:

Mateo 13:1–23

Usa ka labing maayong paagi sa pagtabang sa imong pamilya nga maandam sa pagkat-on gikan sa Bag-ong Tugon niining tuiga mao ang pagribyu sa sambingay sa magpupugas. Tingali malingaw ang imong pamilya nga motan-aw sa lain-laing matang sa yuta duol sa inyong balay aron mahanduraw ang mga matang sa yuta nga gihulagway sa sambingay. Unsay atong mahimo sa pag-ugmad og “maayong yuta” diha sa atong panimalay? (Mateo 13:8).

Mga Taga-Galatia 5:22–23; Mga Taga-Filipos 4:8

“Motambag kami sa mga ginikanan ug mga anak sa paghatag og pinakataas nga prayoridad sa pag-ampo sa pamilya, family home evening, pagtuon ug panudlo sa ebanghelyo, ug maayo nga mga kalingawan sa pamilya. Bisan unsa pa kanindot ug kaangayan ang ubang mga panginahanglan o mga kalihokan, kinahanglang dili kini tugutan nga mosakmit sa mga responsibilidad nga balaanong gihatag nga mahimo lamang buhaton sa mga ginikanan ug mga pamilya” (“Letter from the First Presidency,” Liahona, Dis. 1999, 1).

Ang sinugdanan sa bag-ong tuig mao ang maayong panahon sa paghimo og family council bahin sa paghimo sa imong panimalay nga mas makasentro sa ebanghelyo. Unsa nga mga ideya ang moabut sa hunahuna samtang magbasa kamo sa mga panalangin ug tambag sa Mga Taga-Galatia 5:22–23 ug Mga Taga-Filipos 4:8? Tingali mahimo kang magbuhat og mga poster nga ibutang libut sa balay aron pagpahinumdom sa imong kaugalingon sa imong mga tumong.

Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.

Pagpalambo sa Personal nga Pagtuon

Pangitaa ang doktrina. Ang doktrina usa ka mahangturon, dili mausab nga kamatuoran. Si Presidente Boyd K. Packer mideklarar nga ang “tinuod nga doktrina, nga nasabtan, makapausab sa mga kinaiya ug batasan” (“Little Children,” Ensign, Nob. 1986, 17). Samtang ikaw ug ang imong pamilya magtuon sa mga kasulatan, pangitaa ang mga kamatuoran nga makatabang kanimo sa pagpakabuhi sama sa Manluluwas.

Kahayag sa Kalibutan, ni Brent Borup

Siya Nabanhaw, ni Del Parson