“Pebrero 4–10. Mateo 4; Lucas 4–5: ‘Ang Espiritu sa Ginoo ania Kanako’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Pebrero 4–10. Mateo 4; Lucas 4–5,” Dali, Sunod Kanako—Alang sa mga Indibidwal ug mga Pamilya 2019
Nagmadaugon si Kristo batok ni Satanas, ni Robert T. Barrett
Pebrero 4–10
Mateo 4; Lucas 4–5
“Ang Espiritu sa Ginoo ania Kanako”
Sugdi pinaagi sa pagbasa sa Mateo 4 ug Lucas 4–5, ug bantayi ang bisan unsa nga mga pagpasabut nga imong madawat. Ang mga ideya sa pagtuon niini nga outline makatabang nimo sa pag-ila sa importante nga mga baruganan niini nga kapitulo.
Irekord ang Imong mga Impresyon
Gikan sa Iyang pagkabatan-on, ingon og nakahibalo na si Jesus sa Iyang talagsaon, sagrado nga misyon. Apan samtang si Jesus nangandam sa pagsugod sa Iyang yutan-ong pangalagad, ang kaaway nagtinguha sa pagtanom og pagduha-duha sa hunahuna sa Manluluwas. “Kay ikaw Anak man sa Dios,” miingon si Satanas (Lucas 4:3, italics gidugang). Apan ang Manluluwas nakigsulti sa Iyang Amahan sa Langit. Nakahibalo Siya sa mga kasulatan, ug nasayud Siya kinsa Siya. Alang Kaniya, ang tanyag ni Satanas—“Kanimo ihatag ko kining tanang kagamhanan” (Lucas 4:6)—usa ka mabaw nga tanyag, kay ang tibuok kinabuhi nga pagpangandam sa Manluluwas nakapahimo Niya sa pagdawat “sa gahum sa Espiritu” (Lucas 4:14). Mao nga bisan pa sa tintasyon, mga pagsulay, ug pagsalikway, wala gayud magduha-duha si Jesukristo sa gitudlo Niyang trabaho: “Kinahanglan iwali ko ang maayong balita mahitungod sa gingharian sa Dios … kay alang sa maong katuyoan gipadala ako” (Lucas 4:43).
Mga Ideya alang sa Personal nga Pagtuon sa Kasulatan
Ang pagpakigsulti sa Dios nag-andam nako sa pag-alagad Kaniya.
Aron makapangandam sa Iyang misyon, miadto si Jesus sa kamingawan “aron makig-uban sa Dios” (Hubad ni Joseph Smith, Mateo 4:1. ). Hunahunaa unsay imong mabuhat aron mobati nga suod ngadto sa Dios. Sa unsa nga paagi kini makaandam kanimo alang sa buhat nga gusto Niyang imong buhaton?
Si Jesukristo nagpakita og ehemplo alang nako pinaagi sa pagbatok sa tintasyon.
Usahay ang mga tawo mobati nga sad-an kon sila tintalon sa pagpakasala. Apan bisan ang Manluluwas, kinsa nagpakabuhi nga “walay sala” (Mga Hebreohanon 4:15), gitintal. Makahupay nga makahibalo nga tungod kay si Kristo miatubang usab ug mibuntog sa mga tintasyon, nasayud Siya sa mga tintasyon nga atong giatubang ug makatabang nato sa pagbuntog niini (tan-awa sa Mga Hebreohanon 2:18; Alma 7:11–12).
Samtang magbasa ka sa Mateo 4:1–11 ug Lucas 4:1–13, unsay imong nakat-unan nga makatabang nimo kon ikaw mag-atubang og mga tintasyon? Mahimo nimong i-organisar ang imong mga hunahuna sa usa ka tsart sama niini:
|
Jesukristo |
Ako |
|---|---|
Jesukristo Unsay gitintal ni Satanas nga buhaton ni Kristo? Sa paggamit sa Iyang gahum sa pagtagbaw sa Iyang kagutom. | Ako Unsay gitintal ni Satanas nga akong buhaton? |
Jesukristo Ngano nga si Kristo andam sa pagbatok sa tintasyon? Nagpuasa Siya; Nakig-uban Siya sa Dios; Nakahibalo Siya sa mga kasulatan. | Ako Unsaon nako sa pagpangandam sa pagbatok sa tintasyon? |
Jesukristo | Ako |
Unsa ang dugang nga mga panabut ang imong nakuha gikan sa Hubad ni Joseph Smith sa Mateo 4?
Tan-awa usab sa 1 Mga Taga-Corinto 10:13; Alma 13:28; Moises 1:10–22.
Si Jesukristo mao ang gipanagna nga Mesiyas.
Kon hangyoon ka sa paghulagway unsay buhaton ni Jesukristo nga gipadala Siya sa yuta, unsay imong ikasulti? Sa Lucas 4:18–19, ang Manluluwas mihulagway sa mga aspeto sa Iyang kaugalingong misyon pinaagi sa pagkutlo sa usa sa mga panagna ni Isaias bahin sa Mesiyas (tan-awa sa Isaias 61:1–2). Unsay imong nakat-unan bahin sa Iyang misyon samtang nagbasa ka niini nga mga bersikulo?
Si Jesus nagpamatuod nga Siya mao ang Mesiyas.
Bisan og ang mga Judeo naghulat sulod sa mga katuigan sa panagna ni Isaias nga matuman, daghan ang dili modawat nga si Jesus mao ang Mesiyas sa dihang mideklarar Siya, “Niining adlawa karon, kining bahin sa kasulatan matuman diha sa inyong pagpatalinghug niini” (Lucas 4:21). Samtang basahon nimo ang Lucas 4:20–30 (tan-awa usab sa Marcos 6:1–6), sulayi ang pagbutang sa imong kaugalingon sa lugar sa mga tawo sa Nazaret. Aduna bay bisan unsa nga butang nga mahimong makapugong nimo sa pagdawat sa hingpit ni Kristo isip imong personal nga Manluluwas?
Tan-awa usab sa Mosiah 3:5–12.
Kon mosalig ako sa Ginoo, makatabang Siya nako sa pagkab-ot sa akong balaang potensyal.
Si Presidente Ezra Taft Benson mitudlo: “Ang mga kalalakin-an ug mga kababayen-an kinsa mosalig sa ilang mga kinabuhi ngadto sa Dios makadiskobre nga Siya makahimo og daghan pa sa ilang mga kinabuhi kay sa ilang mahimo” (Mga Pagtulun-an sa mga Presidente sa Simbahan: Ezra Taft Benson [2014], 50). Mao kini ang nahitabo ngadto ni Pedro ug sa iyang isig ka mangingisda. Mitabang si Jesus kanila nga mas daghan pa ang ilang mahimo kay sa pagpangisda—mahimo silang “mangingisdag tawo” (Mateo 4:19; tan-awa usab sa Lucas 5:10). Aron matabangan sila nga makakita niini, migamit si Jesus og mga kasinatian nga pamilyar nila.
Kanus-a nimo nabati nga ang Manluluwas nagtawag nimo sa pagsunod Kaniya? Unsaon nimo sa pagpakita sa Ginoo nga ikaw andam sa “[pagbiya] sa tanan” (Lucas 5:11) sa pagsunod Kaniya? Palandunga kini nga mga pangutana samtang basahon nimo ang Mateo 4:18–22 ug Lucas 5:1–11.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Nagpuasa si Jesus sa wala pa Siya tintala sa kaaway. Unsa nga mga panabut ang atong maangkon gikan niini nga istorya bahin sa gahum sa pagpuasa? Mahimo nimong dapiton ang mga sakop sa pamilya sa pagpakigbahin og mga kasinatian nga ilang nasinati sa pagpuasa. Tingali ang imong pamilya sa mainampoong paagi makahimo og mga plano sa pagpuasa og dungan alang sa piho nga katuyoan.
Sa dihang si Satanas mitintal ni Kristo sa paghimo sa bato ngadto sa pan, iyang gihagit ang balaan nga pagkatawo ni Kristo pinaagi sa pag-ingon, “Kay ikaw anak man sa Dios” (Mateo 4:3, italics gidugang). Ngano nga si Satanas maningkamot nga kita magduha-duha sa atong balaang pagkatawo? Giunsa niya sa paghimo niini? (Tan-awa usab sa Moises 1:10–23.)
Human masulayi si Jesus sa pisikal ug espirituhanong paagi, ang Iyang mga hunahuna mibalhin ngadto sa mga panginahanglan ni Juan nga Bautista, nga atua sa bilanggoan: “Ug karon si Jesus nasayud nga si Juan gibalhug ngadto sa bilanggoan, ug siya mipadala og mga anghel, ug tan-awa,sila miabut ug nangalagad ngadto kaniya [Juan]” (Hubad ni Joseph Smith, Mateo 4:11). Sa unsa nga paagi kita mapanalanginan kon kita mosunod sa ehemplo ni Kristo nga hunahunaon ang uban sa dili pa ang atong kaugalingon? Unsaon nato sa pagsunod ang Iyang ehemplo?
Aduna ba kitay nailhan nga nagmasulub-on o gikinahanglan ang “paghatag og kagawasan”? (Lucas 4:18). Unsaon nato sa pagtabang ang uban nga makadawat sa pagkaayo ug kaluwasan? Mahimo usab nga imong hisgutan ang pagpahigayon og mga ordinansa sa templo nga makatabang sa “kagawasan sa binilanggo” (Lucas 4:18).
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Sunda ang ebanghelyo ni Jesukristo. “Tingali ang labing importanting butang nga imong mabuhat mao ang pagsunod sa ehemplo sa Manluluwas sa pagkamasulundon ug pagsunod sa ebanghelyo sa tibuok nimong kasingkasing. … Kini ang labing mahinungdanong paagi aron mahimong takus sa pagpakig-uban sa Espiritu Santo. Dili kinahanglan nga mahingpit ka, makugihon lang nga naningkamot—ug magtinguha og kapasayloan pinaagi sa Pag-ula sa Manluluwas matag higayon nga ikaw nasayop” (Pagtudlo sumala sa Pamaagi sa Manluluwas, 13).
Ang Tawag, ni Jorge Cocco