“Marso 11–17. Mateo 10–12; Marcos 2; Lucas 7; 11: ‘Kining Napulog Duha Gipadala ni Jesus’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Marso 11–17. Mateo 10–12; Marcos 2; Lucas 7; 11,” Dali, Sunod Kanako—Alang sa mga Indibidwal ug mga Pamilya: 2019
Marso 11–17
Mateo 10–12; Marcos 2; Lucas 7; 11
“Kining Napulog Duha Gipadala ni Jesus”
Samtang magbasa ka sa Mateo 10–12; Marcos 2; ug Lucas 7; 11, isulat ang mga impresyon nga imong nadawat gikan sa Espiritu Santo. Ikonsiderar ang pagpamalandong ug pagrekord niini.
Irekord ang Imong mga Impresyon
Ang balita sa mga milagro sa pagpang-ayo ni Jesus daling mikatap. Ang panon sa katawhan misunod Kaniya, naglaum nga mamaayo sa ilang mga sakit. Apan sa dihang ang Manluluwas nagtan-aw sa panon sa katawhan, nakita Niya ang labaw pa kay sa ilang pisikal nga mga sakit. Napuno sa kapuangod, nakita Niya ang “karnero nga walay magbalantay” (Mateo 9:36). “Daghan unta ang anihon,” obserbar Niya, “apan dyutay ra ang mga mamumuo” (Mateo 9:37). Mao nga gitawag Niya ang napulog duha ka mga Apostoles, “gihatagan silag gahum,” ug mipadala kanila sa pagtudlo ug pagpangalagad “sa nangawalang karnero sa banay ni Israel” (Mateo 10:1, 6). Karon ang panginahanglan alang sa dugang nga mga mamumuo sa pagserbisyo sa mga anak sa Langitnong Amahan sama ka importante. Aduna gihapoy napulog duha ka mga Apostoles, apan adunay mas daghang mga tinun-an ni Jesukristo kay sa kaniadto—mga tawo nga makadeklarar ngadto sa tibuok kalibutan, “Ang gingharian sa langit haduol na” (Mateo 10:7).
Mga Ideya alang sa Personal nga Pagtuon sa Kasulatan
Ang Ginoo mihatag sa Iyang mga sulugoon og gahum sa paghimo sa Iyang buhat.
Ang instruksyon nga gihatag ni Jesus sa Mateo 10 alang sa Iyang mga Apostoles, apan kitang tanan kabahin sa buhat sa Ginoo. Unsa nga gahum ang gihatag ni Kristo sa Iyang mga Apostoles aron sa pagtabang kanila sa pagtuman sa ilang misyon? Unsaon nimo sa paggamit sa Iyang gahum sa buhat nga imong pagabuhaton? (tan-awa sa 2 Mga Taga-Corinto 6:1–10; DP 121:34–46).
Ang Napulog Duha ka mga Apostoles nagpahigayon sa buhat sa Ginoo karon.
Samtang basahon nimo ang sugo nga gihatag ni Kristo sa Iyang mga Apostoles, tingali makadawat ka og impresyon bahin sa buhat nga gusto sa Ginoo nga imong buhaton. Usa ka tsart sama sa mosunod makatabang nimo pag-organisar sa imong mga hunahuna:
|
Mga impresyon nga akong nadawat | |
|---|---|
|
Ang Manluluwas mihatag sa Iyang mga tinun-an og gahum. | Mga impresyon nga akong nadawat Ang Dios mohatag nako og gahum nga akong gikinahanglan sa akong trabaho. |
Mga impresyon nga akong nadawat |
Tan-awa usab sa Mga Artikulo sa Hugot nga Pagtuo 1:6; Giya ngadto sa mga Kasulatan, “Apostoles”
Kon ako anaa sa pag-alagad sa Ginoo, dasigon ako Niya unsay isulti.
Nakita nang daan sa Ginoo nga ang Iyang mga Apostoles lutuson ug pangutan-on bahin sa ilang pagtuo—susama sa unsay nasinati sa mga tinun-an karon. Apan misaad Siya sa mga tinun-an nga sila makahibalo pinaagi sa Espiritu unsay isulti. Nakasinati na ba ka sa dihang natuman kining balaan nga saad sa imong kinabuhi, tingali sa dihang ikaw nagpamatuod, mihatag og panalangin, o nakig-istorya sa usa ka tawo? Ikonsiderar ang pagpakigbahin sa imong mga kasinatian uban sa usa ka minahal o sa pagsulat niini sa journal.
Tan-awa sa Lucas 12:11–12; Doktrina ug mga Pakigsaad 84:85.
Unsay gipasabut ni Jesus sa “wala pa ako moanhi sa pagdalag pagdinaitay kondili espada hinoon”?
Si Elder D. Todd Christofferson mitudlo: “Masaligon ako nga pipila kaninyo gisalikway ug gihinginlan sa amahan ug inahan, mga kaigsoonan samtang inyong gidawat ang ebanghelyo ni Jesukristo ug misulod ngadto sa Iyang pakigsaad. Sa usa o laing paagi, ang inyong dakong gugma ni Kristo nagkinahanglan nga isakripisyo ang mga relasyon nga bililhon kaninyo, ug kamo nagpaagas og daghang mga luha. Apan uban sa inyong kaugalingong gugma nga wala mokunhod, kamo nagmakanunayon ubos niini nga krus, nagpakita nga wala ninyo gikaulaw ang Anak sa Dios” (“Pagpangita sa Inyong Kinabuhi,” Ensign, Mar. 2016, 28).
Kini nga pagkaandam nga mawala ang bililhon nga mga relasyon aron makasunod sa Manluluwas moabut ang saad nga “ang mawagtangan sa iyang kinabuhi tungod kanako, makakaplag ra niini” (Mateo 10:39).
Papahulayon ako ni Jesukristo kon ako mosalig Kaniya ug sa Iyang Pag-ula.
Kitang tanan nagdala og alantuson—ang uban resulta sa atong kaugalingong mga sala ug mga sayop, ang uban tungod sa mga pagpili sa uban, ug ang uban dili sayop ni bisan kinsa apan kabahin lang sa kinabuhi sa yuta. Bisan unsa pa ang rason sa atong mga pakigbisog, nangamuyo si Jesus kanato sa pagduol ngadto Kaniya aron Siya makatabang nato pagpas-an sa atong mga alantuson ug makakita og kahupayan (tan-awa usab sa Mosiah 24). Si Elder David A. Bednar mitudlo, “Ang paghimo ug paghupot og sagradong mga pakigsaad nagyugo kanato ngadto ug uban ni Ginoong Jesukristo” (“Makadaug sa Ilang mga Alantuson uban sa Kasayon,” Liahona, Mayo 2014, 88). Uban niini sa hunahuna, palandunga ang mga pangutana sama sa mosunod aron mas masabtan ang mga pulong sa Manluluwas niini nga mga bersikulo: “Sa unsa nga paagi nga ang akong mga pakigsaad nagyugo kanako ngadto ug uban sa Manluluwas?” “Unsay angay nakong buhaton aron makaduol ngadto ni Kristo?” o “Sa unsang paagi nga ang yugo sa Manluluwas masayon ug ang Iyang alantuson magaan?”
Unsa ang ubang mga pangutana ang moabut sa imong hunahuna samtang ikaw nagbasa? I-rekord kini ug pangita sa mga tubag niining semanaha diha sa mga kasulatan ug sa mga pulong sa mga propeta. Mahimong makita nimo ang mga tubag sa pipila sa imong mga pangutana sa mensahe ni Elder David A. Bednar nga gihisgutan sa ibabaw.
Samtang napasaylo ko sa akong mga sala, ang akong gugma alang sa Manluluwas midako.
Nakita ba nimo ang imong kaugalingon sa istorya niini nga mga bersikulo sa pagbisita sa Manluluwas ngadto ni Simon ang Pariseo? Pareho ba ikaw ni Simon? Unsay imong mahimo sa pagsunod sa ehemplo sa babaye sa pagpakita og pagpaubos ug gugma alang ni Jesukristo? Kanus-a ikaw makasinati sa kalumo ug kalooy nga gipakita sa Manluluwas sa babaye? Unsay imong nakat-unan niini nga mga bersikulo kon sa unsa nga paagi nga ang pagpasaylo nakapalig-on sa atong gugma alang sa Manluluwas?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Sa atong pagkonsiderar sa mga mensahe sa labing bag-ong kinatibuk-ang komperensya, unsay atong gibuhat isip pamilya sa pagdawat ug pagsunod sa tambag sa modernong mga Apostoles? Sa unsa nga paagi nga atong pagkamasulundon sa ilang tambag makapasuod nato ngadto ni Jesukristo?
Makatabang ka sa imong pamilya sa paghanduraw sa mga pagtulun-an sa Manluluwas niini nga mga bersikulo pinaagi sa pagpuli-puli sa pagbitad og butang nga bug-at, una sa ilang kaugalingon ug dayon dunay tabang. Unsa ang bug-at nga mga alantuson nga atong gipas-an? Unsay buot ipasabut sa pagpas-an sa yugo ni Kristo sa atong kaugalingon? Ang litrato nga kauban niini nga outline makatabang nimo sa pagpasabut unsa ang yugo.
Sa unsa nga paagi kita “makahimo og maayo” sa adlaw nga Igpapahulay? (Mateo 12:12). Sa unsa nga mga paagi nga ang Manluluwas makaayo kanato sa Igpapahulay?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Paminaw sa Espiritu. Samtang ikaw magtuon, bantayi ang imong mga hunahuna ug mga pagbati (tan-awa sa DP 8:2–3), bisan og kini walay kalabutan sa imong gibasa. Kadto nga mga impresyon tingali mao ang butang nga gusto sa Dios nga imong mahibaloan ug buhaton.
Miingon ang Manluluwas, “Isangon ninyo ang akong yugo diha kaninyo” (Matthew 11:29).
Kirtland ug ang Unang Templo, ni Dan Burr