“Hulyo 8–14. Mga Buhat 6–9: ‘Unsa ang Buot Mo nga Pagabuhaton Ko?’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Hulyo 8–14. Mga Buhat 6–9,” Dali, Sunod Kanako—Alang sa mga Indibidwal ug sa mga Pamilya: 2019
Hinaut nga Kita Mabuhi, ni Sam Lawlor
Hulyo 8–14
Mga Buhat 6–9
“Unsa ang Buot Mo nga Pagabuhaton Ko?”
Sugdi pinaagi sa pagbasa sa Mga Buhat 6–9. Ang mga sugyot niini nga outline makatabang nimo sa pag-ila sa pipila sa importante nga mga baruganan niini nga mga kapitulo, bisan og ikaw makakita sa uban sa imong kaugalingong pagtuon.
Irekord ang Imong mga Impresyon
Kon adunay ingon og dili kandidato sa pagkakabig, tingali si Saulo—usa ka Pariseo nga dunay reputasyon sa paggukod sa mga Kristiyano. Mao nga sa dihang ang Ginoo misugo sa usa ka disipulo nga ginganlan og Ananias sa pagpangita ni Saulo ug motanyag kaniya og panalangin, masabtan nga si Ananias nagduha-duha. “Ginoo,” miingon siya, “Nakadungog ako gikan sa daghan mahitungod niining tawhana, unsa kadaku sa kadaut nga iyang nahimo sa imong mga balaan” (Mga Buhat 9:13). Apan ang Ginoo nakahibalo sa kasingkasing ni Saulo ug sa iyang potensyal, ug Siya naghunahuna og misyon alang ni Saulo: “Siya pinili nga galamiton ko sa pagdala sa akong ngalan sa atubangan sa mga Hentil ug sa mga hari ug sa mga anak ni Israel” (Mga Buhat 9:15). Mao nga misunod si Ananias, ug sa dihang iyang nakit-an kining kanhi tigpanggukod, gitawag niya kini nga “Igsoon Saulo” (Mga Buhat 9:17). Kon si Saulo hingpit nga makausab ug si Ananias midawat kaniya, nan moisip ba kita ni bisan kinsa nga dili kandidato alang sa kausaban—lakip sa atong kaugalingon?
Mga Ideya alang sa Personal nga Pagtuon sa Kasulatan
Ang akong kasingkasing kinahanglan nga “matarung sa atubangan sa Dios.”
Ang nagtubo nga simbahan nagpasabut sa nagtubo nga panginahanglan alang sa mga tinun-an sa pagserbisyo diha sa gingharian. Sumala sa Mga Buhat 6:1–15, unsa nga mga hiyas ang gipangita sa Napulog Duha ka mga Apostoles niadtong kinsa moserbisyo uban kanila? Samtang magbasa ka sa Mga Buhat 6–8, hinumdumi sa unsa nga paagi kini nga mga hiyas, ug ang uban, nakita diha sa mga tawo sama nila ni Esteban ug Felipe. Unsa ang kulang si Simon, ug unsay atong makat-unan gikan kaniya mahitungod sa pagkaandam sa pag-usab?
Aduna bay bisan unsa nga imong gibati nga nadasig nga usbon aron sa pagsiguro nga ang imong kasingkasing “matarung sa atubangan sa Dios”? (Mga Buhat 8:21–22). Sa unsa nga paagi nga ang paghimo niini nga kausaban makapanalangin kanimo samtang magserbisyo ka sa Dios?
Ang pagbatok sa Espiritu Santo makagiya ngadto sa pagsalikway sa Manluluwas ug sa Iyang mga propeta.
Ang mga lider sa Judeo, bisan og gisugo sa pag-andam sa mga tawo alang sa pag-anhi sa Mesiyas, misalikway ni Jesukristo ug gusto sa Iyang Pagkalansang tungod sa iyang garbo ug tinguha alang sa gahum. Sa unsa nga paagi kini nahitabo? Si Esteban mipahayag ngadto kanila, “Kanunay gayud kamong nagapakigbatok sa Espiritu Santo” (Mga Buhat 7:51). Unsa kaha ang gipasabut sa pagpakigbatok sa Espiritu Santo? Ngano nga ang pagpakigbatok sa Espiritu Santo mosangpot ngadto sa pagsalikway sa Manluluwas ug sa Iyang mga propeta?
Samtang magbasa ka sa Mga Buhat 6–7, pangitaa ang ubang mga mensahe nga gitudlo ni Esteban sa mga Judeo. Unsa nga mga kinaiya ang iyang gipasidaan nga dili maayo? Nakamatikod ba ikaw og bisan unsang susama nga mga kinaiya sa imong kaugalingon? Unsa ang gitudlo sa mga pulong si Esteban kanimo mahitungod sa mga sangputanan sa pagpakigbatok sa Espiritu Santo? Unsaon nimo nga mas masensitibo ug masulundon sa mga pag-ghat sa Espiritu Santo sa imong kinabuhi?
Gawas ni Esteban, kinsa pa ang gimartir tungod sa ilang pagpamatuod ni Jesukristo?
Si Esteban mao ang unang nailhan nga Kristiyano nga martir (usa ka tawo nga gipatay tungod sa ilang pagtuo) human sa Pagkabanhaw ni Jesus. Daghang ubang mga Santos sa tibuok kasaysayan gipatay usab tungod kay sila dili molimud sa ilang pagtuo kang Jesukristo. Ang pipila niini gihisgutan sa 2 Mga Cronicas 24:20–21; Marcos 6:17–29; Mga Buhat 12:1–2; Pinadayag 6:9–11; Mosiah 17:20; Alma 14:8–11; Helaman 13:24–26; Doktrina ug mga Pakigsaad 109:47–49; 135:1–7; ug Abraham 1:11. Hayan nga human sa Pagkabanhaw sa Manluluwas, ang tanang mga Apostoles gawas ni Juan namatay isip mga martir.
Ang Espiritu Santo motabang nako nga mogiya sa uban ngadto ni Jesukristo.
Unsay imong makat-unan mahitungod sa pagpakigbahin sa ebanghelyo gikan sa istorya sa Mga Buhat 8:26–39? Giunsa pagtabang sa Espiritu Santo si Felipe? Sa unsa nga paagi nga ang pagpakigbahin sa ebanghelyo ngadto sa uban sama sa usa ka giya? (tan-awa sa Mga Buhat 8:31).
Kon ako motugyan ngadto sa kabubut-on sa Ginoo, mahimo akong usa ka instrumento sa Iyang mga kamot.
Ang pagkakabig ni Saulo ingon og kalit kaayo; siya miadto “dihadiha” gikan sa pagpabilanggo sa mga Kristiyano ngadto sa pagsangyaw ni Kristo diha sa mga sinagoga (Mga Buhat 9:20). Samtang magbasa ka sa iyang istorya, palandunga ngano nga siya andam nga mousab. (Aron makabasa sa kaugalingong deskripsyon ni Saulo sa iyang pagkakabig, tan-awa sa Mga Buhat 22:1–16 ug 26:9–18. Hinumdumi nga sa panahon niini nga mga istorya, ang ngalan ni Saulo giusab ngadto sa Pablo.)
Samtang tinuod nga ang kasinatian ni Saulo dili kasagaran—kay kasagaran sa mga tawo, ang pagkakabig usa ka taas kaayo nga proseso—ikaw aduna bay makat-unan gikan ni Saulo mahitungod sa pagkakabig? Unsay imong makat-unan sa reaksyon ni Ananias ug sa ubang mga disipulo sa pagkakabig ni Saulo? Unsay imong buhaton sa paggamit niini nga mga leksyon sa imong kinabuhi? Mahimong sugdan nimo pinaagi sa pag-ampo, sama sa gibuhat ni Saulo, “Unsa ang Buot Mo nga Pagabuhaton Ko?” O mahimo nimong isulat kini nga pangutana isip ulohan sa imong journal ug irekord ang mga impresyon nga moabut nimo.
Tan-awa usab sa Dieter F. Uchtdorf, “Naghulat diha sa Dalan sa Damasco,” Liahona, Mayo 2011, 70–77; “The Road to Damascus” (video, LDS.org).
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Itandi ang mga istorya ni Esteban diha sa Mga Buhat 6:8 ug Mga Buhat 7:51–60 ngadto sa mga istorya sa Manluluwas sa Lucas 23:1–46. Giunsa ni Esteban pagsunod ang ehemplo sa Manluluwas?
Sa unsa nga paagi ang Espiritu Santo mipanalangin ni Esteban sa dihang siya gigukod? Kanus-a kita nakadawat og kalig-on gikan sa Espiritu Santo atol sa malisud nga mga panahon?
Tabita Bumangon Ka, ni Sandy Freckleton Gagon
Ikonsiderar ang pagdapit sa mga sakop sa imong pamilya sa pagdrowing og mga litrato sa mga istorya sa Mga Buhat 9:32–43. Unsa ang ilang nakat-unan mahitungod sa tinuod nga pagkadisipulo gikan kang Aeneas, Tabita, ug sa mga biyuda sa Jope? Sa unsa nga paagi nga ang usa ka tawo nga “daghag maayong mga binuhatan” makatabang sa uban nga motuo sa Ginoo? (tan-awa sa Mga Buhat 9:36, 42; “Kapitulo 60: Gibuhi og Balik ni Pedro si Tabita,” Mga Istorya sa Bag-ong Tugon, 156–57, o sa corresponding video sa LDS.org).
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Ipahisama ang mga kasulatan sa imong kinabuhi. Samtang magbasa ka, ikonsiderar sa unsa nga paagi nga ang mga istorya ug mga pagtulun-an sa mga kasulatan magamit sa imong kinabuhi. Pananglitan, kanus-a nimo gibati nga “puno sa Espiritu Santo” sa mga panahon sa pagsulay o pagpanggukod? (Mga Buhat 7:55).
Nakita Ko ang Anak sa Tawo Nagatindog sa Tuo sa Dios, ni Walter Rane