“Hulyo 15–21. Mga Buhat 10–15: ‘Ang Pulong Sa Dios Mitubo ug Misanay’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Hulyo 15–21. Buhat 10–15,” Dali, Sunod Kanako—Alang sa mga Indibidwal ug mga Pamilya: 2019
Hulyo 15–21
Mga Buhat 10–15
“Ang Pulong sa Dios Mitubo ug Misanay”
Basaha ang Mga Buhat 10–15 pag-ayo, maghatag og panahon alang sa Espiritu sa pag-aghat nimo sa mga hunahuna ug mga pagbati. Unsay anaa niini nga mga kapitulo nga imong makat-unan?
Irekord ang Imong mga Impresyon
Panahon sa Iyang mortal nga pangalagad, ang mga pagtulun-an ni Jesukristo kanunay mihagit sa dugay nang gisunod nga mga tradisyon ug mga pagtuo sa mga tawo; wala kini mahunong human Siya mikayab ngadto sa langit—human sa tanan, Siya nagpadayon sa paggiya sa Iyang Simbahan pinaagi sa pagpadayag. Sama pananglit, panahon sa kinabuhi ni Jesus ang Iyang mga disipulo misangyaw sa ebanghellyo ngadto lamang sa isig ka Judeo. Apan human dayon sa pagkamatay sa Manluluwas ug si Pedro nahimong propeta sa Simbahan, si Jesukristo mipadayag ngadto ni Pedro nga ang panahon miabut na nga isangyaw ang ebanghelyo ngadto sa dili mga Judeo. Ang ideya sa pagpakigbahin sa ebanghelyo ngadto sa mga Hentil dili ikatingala karon, mao nga unsa ang leksyon niini nga istorya alang kanato karon? Tingali ang usa ka leksyon mao nga ang polisiya ug praktis—sa karaan ug moderno nga Simbahan—moabut pinaagi sa pagpadayag gikan sa Ginoo ngadto sa Iyang pinili nga mga lider (Amos 3:7; DP 1:38). Ang nagpadayon nga pagpadayag usa ka importante nga bahin sa tinuod ug buhi nga Simbahan ni Jesukristo. Sama ni Pedro, kinahanglan nga andam kita nga modawat sa nagpadayon nga pagpadayag ug mabuhi “dili sa tinapay lamang” (Lucas 4:4), lakip sa “tanan nga [Iyang] gipadayag, sa tanan nga gipadayag Niya karon” ug sa “daghan nga dagko ug mahinungdanon nga mga butang” nga ipadayag pa Niya “kalabut sa Gingharian sa Dios” (Mga Artikulo sa Hugot nga Pagtuo 1:9).
Mga Ideya alang sa Personal nga Pagtuon sa Kasulatan
“Ang Dios wala diay pinalabi sa mga tawo.”
Sa mga henerasyon, ang mga Judeo nagtuo nga “ang kaliwat ni Abraham,” o usa ka literal nga kaliwat ni Abraham, nagpasabut nga kanang tawhana gidawat (gipili) sa Dios (tan-awa sa Lucas 3:8). Si bisan kinsa gikonsiderar nga “dili limpyo” nga Hentil kinsa wala dawata sa Dios. Sa Mga Buhat 10, unsa ang gitudlo sa Ginoo ni Pedro mahitungod kinsa “ang pagahimut-an”? (Mga Buhat 10:35). Unsa nga ebidensya ang imong nakita niini nga kapitulo nga si Cornelio nagpuyo og matarung nga kinabuhi nga gidawat sa Ginoo? Ngano nga importante nga makahibalo nga ang “Dios wala diay pinalabi sa mga tawo” (bersikulo 34), nagpasabut nga ang tanang tawo makadawat sa mga panalangin sa ebanghelyo kon sila magsunod sa ebanghelyo? (tan-awa sa 1 Nephi 17:35).
Sama sa mga Judeo nga mibati nga labaw niadtong kinsa dili kaliwat ni Abraham, nakabantay ba ikaw sa imong kaugalingon nga naghimo og dili mabination o dili mao nga panghunahuna mahitungod sa tawo kinsa lahi kay kanimo? Unsaon man nimo sa pagbuntog niini nga kalagmitan? Makapaikag tingali ang pagsulay og yanong kalihokan sa mosunod nga pipila ka adlaw: Kon ikaw dunay inter-aksyon sa usa ka tawo, sulayi ang paghunahuna sa imong kaugalingon, “Kining tawhana usa ka anak sa Dios.” Samtang buhaton nimo kini, unsa nga kausaban ang imong mamatikdan sa paagi sa imong paghunahuna ug inter-aksyon sa uban?
Tan-awa usab sa D. Todd Christofferson, “Magpabilin Kamo sa Akong Gugma,” Liahona, Nob. 2016, 48–51; 1 Samuel 16:7; “Peter’s Revelation to Take the Gospel to the Gentiles” (video, LDS.org).
Ang Langitnong Amahan nagtudlo kanako pagtulun-an human sa laing pagtulun-an pinaagi sa pagpadayag.
Sa dihang si Pedro nakakita sa panan-awon nga gihulagway sa Mga Buhat 10, naglisud siya sa sinugdanan sa pagsabut niini ug “nalibog pa sa iyang hunahuna kon unsa kaha ang kahulugan niadtong [panan-awon]” (bersikulo 17). Apan ang Ginoo mihatag ni Pedro og mas dakong pagsabut samtang si Pedro nagtinguha niini. Samtang magbasa ka sa Mga Buhat 10, 11, ug 15, panid-i kon sa unsa nga paagi ang pagsabut ni Pedro sa iyang panan-awon napalawman paglabay sa panahon. Sa unsa nga paagi ikaw nagtinguha ug nakadawat og mas dako nga pagsabut gikan sa Dios sa dihang ikaw adunay mga pangutana?
Mga Buhat 10, 11, ug 15 nag-istorya sa mga higayon diin ang Ginoo migiya sa Iyang mga sulugoon pinaagi sa pagpadayag. Tingali makatabang ang pagrekord unsay imong makit-an kabahin sa pagpadayag samtang magbasa ka niini nga mga kapitulo. Sa unsa nga paagi ang Espiritu makigsulti kanimo?
Tan-awa usab sa “Revelation,” Gospel Topics, topics.lds.org; Ronald A. Rasband, “Tuguti ang Balaang Espiritu nga mao ang Mogiya ,” Liahona, Mayo 2017, 93–96; “The Jerusalem Conference” (video, LDS.org).
Ako usa ka Kristiyano tungod kay ako motuo ug mosunod kang Jesukristo.
Unsa ang nakaimportante mahitungod sa usa ka tawo nga gitawag og Kristiyano? (tan-awa sa Mga Buhat 11:26). Unsay kahulugan niini kanimo nga mahibaloan nga usa ka Kristiyano o modala sa imong kaugalingon sa ngalan ni Jesukristo? (tan-awa sa DP 20:77). Ikonsiderar ang kaimportante sa mga ngalan. Pananglitan, unsay kahulugan sa imong apelyido nganha nimo? Ngano nga ang ngalan sa Simbahan karon importante? (tan-awa sa DP 115:4).
Tan-awa usab sa Mosiah 5:7–15; Alma 46:13–15; 3 Nephi 27:3–8; M. Russell Ballard, “Ang Importansya sa Pangalan,” Liahona, Nob. 2011, 79–82.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Aduna ba kitay espirituhanong mga kasinatian ug dayon nagduha-duha unsay atong gibati o nakat-unan? Unsa nga tambag ang atong mahatag sa usag usa nga makatabang nato nga makabuntog sa atong mga pagduha-duha? (Tan-awa sa Ronald A. Rasband, “Kay Tingali Lamang Unya Mahakalimot Ka,” Liahona, Nob. 2016, 113–15.)
Sa dihang si Pedro gibalhug sa bilanggoan, ang mga miyembro sa Simbahan nagpundok ug nag-ampo alang kaniya. Aduna bay gibati nga nadasig ang imong pamilya nga mag-ampo alang sa usa ka tawo, sama sa usa ka lider sa Simbahan o minahal? Unsay gipasabut nga mag-ampo “nga mainit”? (Mga Buhat 12:5).
Naluwas si Pedro gikan sa Bilanggoan, ni A. L. Noakes
Samtang magbasa kamo niini nga kapitulo, ang pipila ka mga sakop sa pamilya mahimong magtimaan sa mga panalangin nga miabut ngadto sa mga disipulo ug sa Simbahan, samtang ang ubang mga sakop sa pamilya magtimaan sa oposisyon o mga pagsulay nga nasinati sa mga disipulo. Ngano nga ang Dios nagtugot sa malisud nga mga butang nga mahitabo ngadto sa matarung nga mga tawo?
Kini nga mga bersikulo naghulagway sa panagsumpaki diha sa Simbahan kabahin kon ang hentil ba (dili Judeo) nga mga kinabig kinahanglan ba og sirkunsisyon isip usa ka timailhan sa ilang pakigsaad. Ang panagsumpaki nasulbad human nagmiting ang mga Apostoles sa pagkonsiderar sa hilisgutan ug dayon nakadawat og dinasig nga tubag. Maayo tingali kini nga panahon sa pagtudlo sa imong pamilya nga ang sama nga sumbanan magamit karon. Isip usa ka pamilya, pagpili og pangutana mahitungod sa ebanghelyo nga gusto ninyong pangitaan og tubag. Pangitai ninyo og mga pagpasabut diha sa mga kasulatan ug sa mga pagtulun-an sa moderno nga mga propeta ug mga apostoles. (Ang indeks sa mga hilisgutan sa isyu sa komperensya sa Simbahan mahimong makatabang.)
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Pagdrowing og litrato. Ang mga litrato makatabang sa mga sakop sa pamilya nga makahanduraw sa mga pagtulun-an ug mga istorya sa kasulatan. Mahimo kamong mobasa og pipila ka bersikulo ug dayon hatagi og panahon ang mga sakop sa pamilya sa pagdrowing og butang nga may kalabutan sa unsay inyong gibasa. Pananglitan, ang mga sakop sa pamilya malingaw sa pagdrowing og mga litrato sa panan-awon ni Pedro sa Mga Buhat 10.
Ang mga kasinatian ni Pedro ug Cornelio nagpakita nga ang “Dios wala diay pinalabi sa mga tawo” (Mga Buhat 10:34).