“Agosto 26–Septyembre 1. 1 Mga Taga-Corinto 8–13: ‘Kamo Mao ang Lawas ni Kristo’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Agosto 26–Septyembre 1. 1 Mga Taga-Corinto 8–13,” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019
Agosto 26–Septyembre 1
1 Mga Taga-Corinto 8–13
“Kamo ang Lawas ni Kristo”
Samtang magbasa ka sa mainampoong paagi sa 1 Mga Taga-Corinto 8–13, ang Espiritu Santo mahimong makigsulti kanimo sa dili direkta nga paagi (tan-awa sa 1 Mga Hari 19:11–12). Ang pagrekord niini nga mga impresyon makatabang nimo sa paghinumdom sa mga pagbati ug mga hunahuna nga imong gibati atol sa imong pagtuon.
Irekord ang Imong mga Impresyon
Sa panahon ni Pablo, ang Corinto mao ang dakong sentro sa patigayon uban sa mga residente gikan sa tibuok gingharian sa Roma. Sa daghan kaayong mga kultura ug mga relihiyon diha sa siyudad, ang mga miyembro sa Simbahan sa Corinto naglisud sa pagpadayon sa panaghiusa, mao nga si Pablo nagtinguha sa pagtabang nila nga makakaplag og panaghiusa sa ilang pagtuo ni Kristo. Kini nga panaghiusa mas labaw pa kay sa malinawon lang nga pagpuyo, si Pablo wala lang magsugo nila nga dawaton ang kalainan sa usag usa. Hinoon, mitudlo siya nga kon moapil sa Simbahan ni Jesukristo, kamo “nabunyagan ngadto sa usa ka lawas,” ug ang matag bahin sa lawas gikinahanglan (1 Mga Taga-Corinto 12:13). Kon ang usa ka miyembro mawala, sama kini nga nawad-an og bahin sa lawas, ug ang lawas mas mahuyang isip resulta. Kon ang usa ka miyembro mag-antus, kinahanglan nga kitang tanan mobati ug mobuhat sa atong bahin sa paghupay niini. Niining matanga sa panaghiusa, ang mga kalainan wala lang giila apan gihatagan og bili, tungod kay kon wala ang mga miyembro nga nagkalain-lain og mga gasa ug mga abilidad, ang lawas mahimong limitado. Mao nga kon mobati ka nga ikaw komportable diha sa Simbahan o nakita ang kaugalingon nga naglatagaw kon ikaw apil ba gayud, ang mensahe ni Pablo kanimo nga ang panaghiusa dili magkapareha. Magkinahanglan ka sa imong isig ka Santos, ug ang imong isig ka Santos nagkinahanglan kanimo.
Mga Ideya alang sa Personal nga Pagtuon sa Kasulatan
Ang Dios mohatag og paagi aron pagbuntog sa tintasyon.
Ang espirituhanon nga mga kasinatian, bisan sa mga milagro, dili makapalikay nato gikan sa mga tintasyon nga “maantus sa tawo” (1 Mga Taga-Corinto 10:13). Kana mao ang usa sa rason nga gisulat ni Pablo ang mahitungod sa mga Israelite sa panahon ni Moises nga nakigbisog sa tintasyon, bisan og sila nakasaksi og dagkong mga milagro (tan-awa sa Exodo 13:21; 14:13–31). Samtang magbasa ka sa 1 Mga Taga-Corinto 10:1–13, unsa nga mga pasidaan ang nasinati sa mga Israelite nga ingon og imong magamit? Unsa nga mga matang sa “pagbuntog” sa tintasyon ang gihatag sa Langitnong Amahan kanimo? (tan-awa usab sa Alma 13:27–30; 3 Nephi 18:18–19).
1 Mga Taga-Corinto 10:16–17; 11:16–30
Ang sakrament naghiusa nato isip mga sumusunod ni Kristo.
Bisan og ang ordinansa sa sakrament naglakip og personal nga pasalig tali sa usa ka indibidwal ug sa Ginoo, usa usab kini ka kasinatian nga atong ipaambit sa uban—hapit kanunay kitang tanan nag-ambit sa sakrament isip, usa ka pundok sa mga Santos. Basaha unsa ang gitudlo ni Pablo mahitungod sa sakrament, ug hunahunaa kon sa unsa nga paagi kining sagrado nga ordinansa makatabang og “daghan” nga mahimong “usa” diha ni Kristo (1 Mga Taga-Corinto 10:17). Sa unsa nga paagi nga kamo makakuha og kalig-on gikan sa pag-ambit sa sakrament uban sa laing mga tumutuo? Sa unsa nga paagi nga kini makaimpluwensya sa paagi sa imong pag-andam sa sakrament ug sa imong paningkamot sa pagtuman sa imong mga pakigsaad sa bunyag?
Ngano nga si Pablo nagsulat mahitungod sa pandong sa ulo ug estilo sa buhok?
Gipasabut ni Pablo ang naandan sa kultura sa sininaan ug pamustura aron sa pagtudlo mahitungod sa relasyon tali sa mga lalaki, mga babaye, ug sa Ginoo. Samtang dili kita mosunod niining maong naandan karon, makakat-on gihapon kita gikan sa pamahayag ni Pablo sa 1 Mga Taga-Corinto 11:11 nga ang mga lalaki ug mga babaye gikinahanglan sa plano sa Ginoo, sa kaminyoon ug sa Simbahan. Sama sa gitudlo ni Elder David A. Bednar, “Ang lalaki ug babaye gituyo aron magkat-on, maglig-on, mopanalangin, ug maghingpit sa usag usa” samtang maglambo sila padulong sa kahimayaan (“Kita Nagtuo sa Pagkaputli,” Liahona, Mayo, 2013, 42; tan-awa usab sa Marcos 10:6–9).
Ang espirituhanong mga gasa gihatag aron makabenepisyo ang tanang anak sa Langitnong Amahan.
Ang lista sa espirituhanong mga gasa sa 1 Mga Taga-Corinto 12–13 dili kompleto. Apan maayo kini nga dapit sa pagsugod samtang imong ilhon ug palandungon ang espirituhanong mga gasa nga gihatag sa Langitnong Amahan kanimo. Mahimo nimong idugang ang lista sa mga gasa ni Pablo nga imong nakit-an sa uban, sa imong kaugalingon, o sa mga tawo sa kasulatan. Kon ikaw adunay patriyarkal nga panalangin, basin naghisgot kini sa imong pipila ka espirituhanong mga gasa. Sa unsa nga paagi nga kini nga mga gasa makatabang nato sa pagtukod sa gingharian sa Dios? Ikonsiderar unsay imong buhaton aron “magtinguha pag-ayo sa labi pang dagkong mga hiyas” (1 Mga Taga-Corinto 12:31).
Tan-awa usab sa Moroni 10:8–21, 30; Doktrina ug mga Pakigsaad 46:8–26; Mga Artikulo sa Hugot nga Pagtuo 1:7.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, tinguhaa ang inspirasyon aron sa pagtubag sa mga panginahanglan sa imong pamilya. Ang mosunod nga mga sugyot makatabang:
Tungod kay gitandi ni Pablo ang pagsunod sa ebanghelyo ngadto sa lumba sa dagan, mahimo tingali maglumba ang imong pamilya aron sa paghulagway sa iyang punto. Gantihi og korona ang tanan nga makahuman sa lumba, ug hisguti sa unsa nga paagi nga ang tanang magmakugihon sa pagsunod ni Jesukristo niini nga kinabuhi makadaog sa “dili madunot” nga premyo (1 Mga Taga-Corinto 9:25; tan-awa usab sa 2 Timoteo 4:7–8). Unsa kaha ang buhaton sa tsampyon nga runner aron makaandam sa usa ka lumba? Sa maong paagi, unsay atong mahimo sa pag-andam sa pagbalik ngadto sa Langitnong Amahan?
Gitandi ni Pablo ang pagsunod sa ebanghelyo ngadto sa lumba sa pagdagan.
Ikonsiderar ang paghatag sa tanan og piraso sa papel nga dunay pangalan sa laing sakop sa pamilya sa ibabaw. Hangyoa ang tanan sa paglista sa espirituhanong mga gasa nga ilang namatikdan nga anaa niana nga tawo. Dayon imong mapasa ang mga papel sa sirkulo hangtud ang tanan adunay kahigayunan sa pagsulat mahitungod sa mga gasa sa mga sakop sa pamilya.
Ngano nga ang Espiritu Santo gikinahanglan sa pag-angkon og pagpamatuod ni Jesukristo? Unsay atong mahimo sa pagdapit sa Espiritu Santo sa paglig-on sa atong mga pagpamatuod Kaniya?
Ang analohiya ni Pablo sa usa ka lawas mahimong halandumon nga paagi sa paghisgot sa panaghiusa sa pamilya. Pananglitan, ang mga sakop sa pamilya makasulay sa pagdrowing og lawas nga duna lay mga mata o mga dunggan (tan-awa sa bersikulo 17). Unsa ang gisugyot niini nga mga bersikulo mahitungod kon unsaon nato pagtagad ang usag usa isip mga sakop sa pamilya?
Ang kahulogan ni Pablo sa gugma tingali makapahimo og dinasig nga motto alang sa imong pamilya. Makatudlo ka sa matag sakop sa pamilya sa pagtuon sa mga pulong sa mga bersikulo 4–8 ug tudloan ang uban sa pamilya unsay gipasabut gamit ang mga kahulogan, mga ehemplo, ug personal nga mga kasinatian. Sa unsa nga paagi nga ang Manluluwas usa ka ehemplo niini nga mga hiyas? Makahimo usab ikaw og mga poster alang sa matag usa niini nga mga pulong ug ibutang kini sa imong tibuok balay. Pagmamugnaon!
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
I-display ang usa ka Kasulatan. I-display ang usa ka bersikulo nga makahuluganon nimo, ug ibutang kini diin makita kanunay sa mga sakop sa pamilya. Dapita ang ubang mga sakop sa pamilya sa pagpuli-puli sa pagpili og kasulatan nga i-display.
“Ang pan nga atong ginatipiktipik, dili ba kini ang pagpakig-ambit man sa lawas ni Kristo? Sanglit usa man lamang ka buok ang tinapay, kita usab usa lamang ka lawas” (1 Mga Taga-Corinto 10:16–17).