“Nobyembre 11–17. Mga Hebreohanon 7–13: ‘Ang Labawng Sacerdote sa mga Maayong Butang nga Nanagpangabut’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Nobyembre 11–17. Mga Hebreohanon 7–13,” Dali, Sunod Kanako—Alang sa mga Indibidwal ug mga Pamilya: 2019
Melchizedek Mipanalangin ni Abraham, ni Walter Rane
Nobyembre 11–17
Mga Hebreohanon 7–13
“Ang Labawng Sacerdote sa mga Maayong Butang nga Nanagpangabut”
Samtang magbasa ka sa Mga Hebreohanon 7–13, mahimong makadawat ka og mga impresyon pinaagi sa Espiritu Santo. Ikonsiderar ang mga paagi nga imong marekord kini; pananglitan, mahimo nimong irekord kini niini nga outline, diha sa kilid sa imong mga kasulatan, o sa Gospel Library app.
Irekord ang Imong mga Impresyon
Bisan ang mga Santos usahay mag-antus nga “pagapasipalahan ug pagasakiton” nga makatandog sa ilang pagsalig (tan-awa sa Mga Hebreohanon 10:32–38). Nasayud si Pablo nga ang Judeo nga nakabig ngadto sa Kristiyanismo nakasinati og seryoso nga pagpanggukod tungod sa ilang bag-ong pagtuo. Sa pag-awhag kanila nga magpabilin nga matinud-anon sa ilang mga pagpamatuod, iyang gipahinumduman sila sa taas nga tradisyon sa ilang matinud-anong mga tumutuo gikan sa ilang kaugalingong kasaysayan: Abel, Enoch, Noe, Abraham, Sara, Jose, Moises—“mabagang panganud sa mga saksi” nga ang mga saad sa Dios tinuod ug angayan nga hulaton (Mga Hebreohanon 12:1). Kining kabilin sa pagtuo giambitan sa tanan niadtong kinsa magatutok “kang Jesus [nga] mao ang mag-uugmad ug maghihingpit sa atong pagtuo” (Mga Hebreohanon 12:2). Tungod Kaniya, kon ang kalisdanan maoy makaingon nga kita “mosibug,” kita makahimo hinoon nga “manuol uban ang matinuoron nga kasingkasing nga sa hingpit pinasaligan sa hugot nga pagtuo” (Mga Hebreohanon 10:22, 38). Alang kanato, ingon man alang sa karaang mga Santos, si Jesukristo mao ang atong “labawng sacerdote sa mga maayong butang nga nanagpangabut” (Mga Hebreohanon 9:11).
Mga Ideya alang sa Personal nga Pagtuon sa Kasulatan
Ang Melchizedek Priesthood mao ang labaw nga priesthood.
Sa mga siglo nga milabay, ang mga Judeo migamit sa Levitical Priesthood, nga nailhan usab nga Aaronic Priesthood. Apan sa kahingpitan sa ebanghelyo ni Jesukristo miabut ang mas labaw nga Melchizedek Priesthood, nga nagtanyag og mas daghang panalangin. Unsay imong nakat-unan mahitungod sa Melchizedek Priesthood gikan sa Mga Hebreohanon 7? Ania ang pipila ka mga ehemplo sa kamatuoran nga mahimong imong makit-an:
-
Hubad ni Joseph Smith, Mga Hebreohanon 7:3, 21:Kadtong kinsa gi-orden ngadto sa Melchizedek Priesthood “gihimo sama ngadto sa Anak sa Dios” ug nagpabilin nga “[mga pari] kanunay.”
-
Mga Hebreohanon 7:11:Ang Levitical Priesthood wala magtanyag og “kahingpitan” ug busa gihatag ang labaw nga priesthood nga mao ang Melchizedek (tan-awa sa DP 84:18–22).
-
Mga Hebreohanon 7:20–21:Ang Melchizedek Priesthood madawat pinaagi sa usa ka panumpa (tan-awa sa DP 84:19–44).
Unsa nga mga panalangin ang imong nadawat gikan sa Melchizedek Priesthood ug sa nag-uban niini nga mga ordinansa?
Tan-awa usab sa Alma 13:1–13; Doktrina ug mga Pakigsaad 121:36–46; Gospel Topics, “Melchizedek Priesthood,” topics.lds.org; Giya ngadto sa mga Kasulatan, “Melchizedek,” scriptures.lds.org; Henry B. Eyring, “Hugot nga Pagtuo ug Panumpa ug Pakigsaad sa Priesthood,” Liahona, Mayo 2008, 61–64; Dallin H. Oaks, “Ang mga Yawe ug Awtoridad sa Priesthood,” Liahona, Mayo 2014, 49–52.
Karaan ug moderno nga mga ordinansa nagtudlo ni Jesukristo.
Ang orihinal nga mga magbabasa sa Hebreohanon niini nga sulat tingali pamilyar na kaayo sa karaang tabernakulo ug sa mga ordinansa nga gihulagway ni Pablo. Apan ang uban wala makahibalo sa hingpit nga ang katuyoan niini nga mga ordinansa mao ang pagtudlo ngadto sa maulaong sakripisyo ni Jesukristo.
Sa panahon sa biblia, sa tinuig nga holiday nga gitawag og Adlaw sa Pag-ula, ang usa ka high priest mosulod sa labing balaan nga dapit (o Balaan sa mga Balaan) sa templo sa Jerusalem ug mosakripisyo og usa ka kanding o karnero aron sa pag-ula alang sa mga sala sa Israel. Gipasabut ni Pablo nga si Jesukristo usa ka high priest kinsa mohalad og usa ka sakripisyo—Iyang kaugalingong kinabuhi—aron sa pag-ula alang sa mga sala sa kalibutan (tan-awa sa Mga Hebreohanon 9:24–10:14).
Hunahunaa ang mahitungod sa mga ordinansa nga imong giapilan karon. Sa unsa nga paagi nga kini nga mga ordinansa nagtudlo ngadto ni Jesukristo?
Sa pagkat-on og dugang mahitungod sa mga seremonya sa Judeo ug sa ilang simbolismo, tan-awa ang mga video “The Tabernacle” and “Sacrifice and Sacrament” (LDS.org).
Ang pagtuo nagkinahanglan og pagsalig sa mga saad sa Dios.
Kon adunay tawo nga mohangyo nimo sa pagpasabut sa pagtuo, unsay imong isulti? Si Sister Anne C. Pingree, kanhi sakop sa Kinatibuk-ang Kapangulohan sa Relief Society, migamit sa pinulongan gikan sa Mga Hebreohanon 11 sa paghatag niini nga kahulogan: “Hugot nga pagtuo, ang espirituhanong abilidad nga madani sa mga saad nga makita sa ‘halayo’ nga dili mahimong makab-ot niini nga kinabuhi, mao ang tinuod nga sukdanan sa tinuod nga nagtuo” (“Nanaglantaw sa mga Saad Gikan sa Halayo,” Liahona, Nob. 2003, 14).
Ikonsiderar ang pagpalambo sa imong kaugalingong kahulogan sa pagtuo samtang mamalandong ka sa mga ideya sa Mga Hebreohanon 11. Unsa ang gitudlo sa mga ehemplo sa mga tawo nga gihisgutan niini nga kapitulo kanimo mahitungod sa pagtuo? (Tan-awa usab sa Ether 12:6–22.)
Tan-awa usab sa Alma 32:21, 26–43; Jeffrey R. Holland, “An High Priest of Good Things to Come,” Ensign, Nob. 1999, 36–38; Gospel Topics, “Faith in Jesus Christ,” topics.lds.org.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Mahimo nimong dapiton ang mga sakop sa pamilya sa pagpaambit sa espirituhanong mga kasinatian kon mibati sila nga “nalamdagan” sa kamatuoran. Sa unsa nga paagi nga kini nga mga kasinatian makatabang nato nga “dili wad-on ang [atong] pagsalig” sa mga panahon sa pagsulay o pagduha-duha?
Unsaon nimo pagtabang ang mga sakop sa imong pamilya nga makat-on gikan sa matinud-anong mga ehemplo nga gihisgutan sa Mga Hebreohanon 11? Tingali makalingaw nga himoan og drama ang mga istorya sa pipila niining mga ehemplo. O tingali ang imong pamilya makahisgot sa mga ehemplo sa ubang matinud-anong mga tawo nga imong nailhan—lakip sa mga katigulangan, mga lider sa Simbahan, ug sa mga miyembro sa imong komunidad.
Sumala niini nga bersikulo, ngano nga si Jesus andam nga molahutay sa sakit ug sa pag-antus sa krus? Unsa ang gitudlo niini kanato mahitungod kon unsaon nato sa paglahutay sa atong mga pagsulay? Si Presidente Russell M. Nelson mihatag og pipila ka makatabang nga mga panabut niini nga bersikulo sa iyang mensahe sa “Hingpit nga Kalipay ug Espirituhanon nga Pagsugakod” (Liahona, Nob. 2016, 81–84).
Ngano nga ang Ginoo mopanton ug mokorihir nato? Unsa ang namatikdan sa mga sakop sa pamilya mahitungod sa paagi sa pagtan-aw sa Ginoo sa pagpanton samtang kamo nagtuon niini nga mga bersikulo? Sa unsa nga paagi nga kini nga mga bersikulo makaapekto sa paagi nga ikaw mohatag o modawat og pagpanton?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Paggamit og musika sa pagdapit sa Espiritu ug pagkat-on sa doktrina. Ang Unang Kapangulohan miingon, “Ang musika adunay walay kinutuban nga gahum sa pagdasig [kanato] padulong sa mas malamboon nga pagka-espirituhanon” (“First Presidency Preface,” Hymns, x). Tingali ang usa ka kanta sa pagtuo, makadugang sa panaghisgutan sa pamilya gikan sa “True to the Faith” (Hymns, no. 254), motabang sa panaghisgutanay sa pamilya gikan sa Mga Hebreohanon 11.
Ang mga simbolo sa karaang templo ug sa mga ordinansa niini nagtudlo mahitungod sa tahas ni Jesukristo.