Kristo Nagsangyaw didto sa Kalibutan sa Espiritu, ni Robert T. Barrett

Nobyembre 25–Disyembre 1

1 ug 2 Pedro

“Nagakalipay sa Labihan Gayud nianang Dili Ikaasoyng Kalipay ug Puno sa Himaya”

Samtang magbasa ka sa mga Sulat [Epistola] ni Pedro, mahimong makadawat ka og mga pag-aghat sa paglihok. Irekord kini nga mga pag-aghat samtang ikaw “diha pa ubos sa gahum sa Espiritu” (DP 76:80) aron makuha gayud nimo unsay gitudlo.

Irekord ang Imong mga Impresyon

Human dayon sa Iyang Pagkabanhaw, ang Manluluwas nanagna nga tingali nakapahasol ni Pedro. Miingon Siya nga si Pedro tigulang na, siya pagadad-on “sa dapit nga dili [mo] gustong adtoan … , giingon niya kini aron sa pagpaila sa kamatayon nga pinaagi niini pagapasidunggan ni Pedro ang Dios” (Juan 21:18–19). Sa dihang gisulat ni Pedro ang iyang mga sulat [epistola], nasayud siya nga kini nga panagna nga pagkamartir duol na: “Kining akong lawas dili na madugayng pagabiyaan, sumala sa gipadayag kanako sa atong Ginoong Jesukristo” (2 Pedro 1:14). Subo lang, ang grabing pagpanggukod komon ra sa mga Santos sa mga probinsya sa Roma, nga maoy tumong sa sulat ni Pedro (tan-awa sa 1 Pedro 1:1). Apan ang iyang mga pulong wala mapuno sa kahadlok o pagduha-duha. Hinoon, iyang gitudloan ang mga Santos nga “igakalipay og dako,” bisan tuod nga karon “inyong pagaantuson sa makadiyot ang nagkalainlaing mga pagsulay.” Gitambagan niya sila sa paghinumdom nga “ang pagkatinuod sa [ilang] pagtuo” mosangpot ngadto sa “pagdalayeg ug paghimaya ug pasidungog kaninyo inig padayag na unya kang Jesukristo” ug “sa kaluwasan sa [ilang] mga kalag (1 Pedro 1:6–7, 9). Ang pagtuo ni Pedro nakapahupay tingali niadtong unang mga Santos, sama nga kini makaawhag sa mga Santos karon, kinsa “pagpakaambit sa mga kasakit ni Kristo, aron [kita] magakalipay usab ug magasadyaon inigpadayag na unya sa iyang himaya” (1 Pedro 4:13).

Mga Ideya alang sa Personal nga Pagtuon sa Kasulatan

1 Pedro 1:3–9; 2:19–24; 3:14–17; 4:12–19

Makakita ako og kalipay panahon sa pagsulay ug pag-antus.

Sa sinugdanan, makapatingala tingali nga si Pedro migamit sa mga pulong sama sa igakalipay, magakalipay, himaya, ug magmasadyaon sa pakiglambigit sa mga pulong nga may kalabut sa kalisud: kabug-at, mga tintasyon, kasubo, pagsulay, ug kasakit (tan-awa sa 1 Pedro 1:6; 2:19; 4:12–13). Ang mensahe ni Pedro ngadto sa unang mga Santos mao ang sama nga mensahe nga gitudlo ni Presidente Russell M. Nelson: “Ang mga santos mahimong magmalipayon sa bisan unsang kahimtang. … “Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo. Ang kalipay moabut gikan ug tungod Kaniya. Siya ang tinubdan sa tanang kalipay” (“Hingpit nga Kalipay ug Espirituhanon nga Pagsugakod,” Liahona, Nob. 2016, 82).

Samtang magbasa ka sa 1 Pedro 1:3–9; 2:19–24; 3:14–17; 4:12–19, unsay makahatag nimo og paglaum nga ikaw makakita og kalipay sa tunga-tunga sa malisud nga mga sirkumstansya?

1 Pedro 3:18–20; 4:1–6

Ang ebanghelyo gisangyaw ngadto sa mga patay aron sila mahukman sa makatarunganong paagi.

Moabut ang adlaw, ang matag tawo mobarug sa hukmanan ug “magahatag ra unyag husay ngadto kaniya nga andam sa paghukom sa buhi ug sa mga patay” (1 Pedro 4:5). Ang uban naghunahuna kon unsaon sa Dios sa paghukom sa tanang katawhan sa makiangayong paagi kay ang ilang mga oportunidad sa pagsabut ug pagsunod sa ebanghelyo lahi kaayo. Matnguni ang doktrina nga gitudlo ni Pedro sa 1 Pedro 3:18–20; 4:6 aron matabangan ang mga Santos sa iyang panahon nga makasabut nga ang mga paghukom sa Dios makiangayon. Sa unsa nga paagi nga kini nga mga bersikulo nakapalig-on sa imong pagtuo sa pagkamakiangayon ug hustisya sa Dios?

Sa pagtuon og dugang niini nga doktrina, suhira ang Doktrina ug mga Pakigsaad 138, usa ka pagpadayag nga nadawat ni Presidente Joseph F. Smith samtang namalandong siya niining mga sinulat ni Pedro. Unsa nga mga panalangin ang moabut niadtong kinsa mohimo sa mga ordinansa sa ebanghelyo ngadto sa mga sakop sa ilang pamilya nga namatay ug naghulat pa niini nga mga ordinansa?

2 Pedro 1:1–11

Pinaagi sa gahum ni Jesukristo, mapalambo nako ang akong balaang pagkatawo.

Gibati ba nimo nga ang pagkahimong sama ni Jesukristo ug pagpalambo sa Iyang mga hiyas dili posible? Si Elder Robert D. Hales mitanyag niining makaawhag nga hunahuna mahitungod kon unsaon nato nga makapalambo og Kristohanong mga hiyas: “Ang mga hiyas sa Manluluwas … nahiusa kini nga mga kinaiya, nadugang ngadto sa usag usa, nga milambo diha kanato sa makaimpluwensya nga pamaagi. Sa laing pagkasulti, dili kita makabaton og usa ka Kristohanong kinaiya nga dili usab maimpluwensyahan ang uban. Samtang ang usa ka kinaiya mahimong lig-on, mao usab ang daghan pa.” (“Pagkahimong usa ka Disipulo sa Atong Ginoong Jesukristo ,” Liahona, Mayo 2017, 47).

Ang matag Kristohanong hiyas nga atong mapalambo makatabang nato sa pag-la og espirituhanong kurtina sa pagkadisipulo.

Ikonsiderar ang pagbasa sa 2 Pedro 1:1–11 agig sumpay sa mensahe ni Elder Hales. Unsay imong nakat-unan gikan niining duha ka Apostoles nga makatabang nimo sa imong mga paningkamot nga mahimong mas Kristohanon?

Tan-awa usab sa 1 Pedro 4:8; David A. Bednar, “Bililhon ug Dagko Uyamot nga mga Saad,” Liahona, Nob. 2017, 90–93.

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:

1 Pedro 2:5–10

Samtang magbasa ka niini nga mga bersikulo uban sa imong pamilya, ikonsiderar ang paggamit og mga bato aron matabangan ang mga sakop sa pamilya nga mahanduraw ang mga pagtulun-an ni Pedro nga ang atong Manluluwas mao ang atong “bato nga pinili.” Sa unsang paagi kita sama sa “madasigon [buhi] nga mga bato” nga gigamit sa Dios sa Iyang gingharian? Unsay atong nakat-unan gikan ni Pedro mahitungod sa Manluluwas ug sa atong tahas sa Iyang gingharian? Unsa ang mensahe ni Pedro sa imong pamilya?

1 Pedro 3:8–17

Sa unsa nga paagi nga kita “kinahanglan nga andam kanunay sa pagtubag” niadtong mangutana kanato mahitungod sa atong pagtuo? Tingali ang imong pamilya malingaw sa mga sitwasyon nga i-role play diin dunay tawo nga mangutana kanila og pangutana mahitungod sa ebanghelyo.

1 Pedro 3:18–20; 4:6

Unsay inyong mahimo isip pamilya sa pagkat-on mahitungod sa inyong mga katigulangan nga nangamatay? Tingali sa adlawng natawhan sa katigulangan nga nangamatay mahimo kang magluto sa paboritong pagkaon sa imong katigulangan, magbutang og mga litrato, o mosaysay og mga istorya gikan sa kinabuhi sa imong katigulangan. Kon posible mahimo usab nga magplano ka nga modawat og mga ordinansa alang niini nga katigulangan diha sa templo.

2 Pedro 1:16–21

Niini nga mga bersikulo, gipahinumduman ni Pedro ang mga Santos sa iyang kasinatian diha sa Bukid sa Transpigurasyon (tan-awa usab sa Mateo 17:1–9). Unsa ang atong makat-unan gikan niini nga mga bersikulo mahitungod sa mga responsibilidad sa mga propeta? (tan-awa usab sa DP 1:38). Unsa ang nakahatag nato og pagsalig sa pagsunod sa atong buhi nga propeta karon?

Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.

Pagpalambo sa Atong Pagtudlo

“Andam Kanunay.” Impormal nga mga higayon sa pagtudlo diha sa panimalay moabut ug molabay dayon, mao nga importante ang pagpahimulos niini kon moabut na. Sa unsa nga paagi kamo maningkamot nga “andam kanunay” sa pagtudlo sa imong mga sakop sa pamilya sa mga kamatuoran sa ebanghelyo ug mopaambit “sa paglaum nga anaa kaninyo” (1 Pedro 3:15) kon moabut ang mga higayon sa pagtudlo? (Tan-awa sa Pagtudlo sumala sa Pamaagi sa Manluluwas, 16.)

Bisan si Pedro nag-atubang og daghang pagpanggukod ug oposisyon, nagpabilin siya nga makanunayon sa iyang pagpamatuod ni Kristo.