Ang Maayong Magbalantay, ni Del Parson

Disyembre 9–15

Pinadayag 1–11

“Himaya, ug Gahum, … sa Kordero Hangtud sa Kahangturan”

Ikonsiderar ang pagsulat sa imong mga pangutana mahitungod sa unsay imong nabasahan sa Pinadayag. Dayon imong mapangita ang mga tubag sa imong mga pangutana o mahisgutan kini sa sakop sa pamilya o sa mga klase sa Simbahan.

Irekord ang Imong mga Impresyon

Nakigbisog ba ikaw sa pagpadayag ngadto sa uban unsay imong gibati atol sa usa ka gamhanan nga espirituhanong kasinatian? Ang kada adlaw nga pinulongan dili paigo sa paghulagway sa espirituhanong mga pagbati ug mga impresyon. Tingali mao kini ngano nga si Juan migamit sa klaro nga simbolismo ug imahe sa paghulagway sa iyang halangdong pagpadayag. Masulti ra man unta niya sa yano nga iyang nakita si Jesukristo, apan aron sa pagtabang kanato nga makasabut sa iyang kasinatian nga iyang gihulagway ang Manluluwas nga naggamit sa mga pulong sama niini: “Ang iyang mga mata sama sa kalayo nga nagasiga,” “gikan sa iyang baba nagagula ang usa ka mahait nga espada,” ug ang “iyang nawong sama sa Adlaw nga magasidlak diha sa labing kakusog” (Pinadayag 1:14–16). Samtang magbasa ka sa basahon sa Pinadayag, paningkamuti ang pagdiskobre sa mga mensahe nga gusto ni Juan nga imong bation ug mabati, bisan kon wala ka makasabut sa kahulugan luyo sa matag simbolo. Ngano kaha nga iyang gitandi ang mga kongregasyon sa Simbahan ngadto sa kandiliro, si Satanas ngadto sa usa ka dragon, ug si Jesukristo ngadto sa usa karnero? Sa katapusan, dili na kinahanglan nga ikaw makasabut sa matag simbolo sa Pinadayag aron makasabut sa importanting mga tema niini, lakip sa labing mahinungdanong tema: si Jesukristo ug ang Iyang mga sumusunod magmadaugon batok sa mga gingharian sa mga tawo ug ni Satanas.

Mga Ideya alang sa Personal nga Pagtuon sa Kasulatan

Pinadayag

Unsaon nako sa pagsabut sa basahon sa Pinadayag?

Ang basahon sa Pinadayag mahimong lisud sabton, apan ayaw pagpakawala sa kadasig. Ang saad ni Juan makadasig nimo sa pagpadayon sa pagpaningkamot: “Bulahan sila kinsa nagbasa, ug sila kinsa naminaw ug nakasabut sa mga pulong niini nga panagna, ug naghupot niadto nga mga butang diin nahisulat dinhi, kay ang panahon sa pag-anhi sa Ginoo nagkaduol na” (Hubad ni Joseph Smith, Pinadayag 1:3 [sa Giya ngadto sa mga Kasulatan]).

Ang mosunod nga mga pangutana ug mga kapanguhaan makahatag og pagsabut samtang ikaw magtuon sa Pinadayag:

• Kinsa si Juan? (Tan-awa sa 1 Nephi 14:18–27; Giya ngadto sa mga Kasulatan, “Juan, Anak ni Zebedeo.”)

• Giunsa pag-organisar sa basahon, ug unsa ang pipila ka tema nga pangitaon? (Tan-awa sa Giya ngadto sa mga Kasulatan, Pinadayag ni Juan.”)

• Unsa ang girepresentaran sa mga simbolo sa Pinadayag? (Tan-awa sa Doktrina ug mga Pakigsaad 77; Manwal sa Estudyante sa Bag-ong Tugon [Church Educational System manual, 2014], 525–68.)

Tingali makatabang usab ang pagpangita og mga panabut diha sa Hubad ni Joseph Smith sa nagkalain-laing mga tudling sa Pinadayag. Tan-awa sa Hubad ni Joseph Smith (diha sa Giya ngadto sa mga Kasulatan.)

Pinadayag

Ang panan-awon ni Juan nagtudlo kon unsaon sa Amahan pagluwas ang Iyang mga anak.

Sa imong pagsugod sa basahon sa Pinadayag, hunahunaa kon sa unsa nga paagi ang mga butang nga imong mabasahan masumpay sa unsay imong nahibaloan mahitungod sa plano sa Langitnong Amahan alang sa katubsanan ug kahimayaan sa Iyang mga anak. Makasugod ka pinaagi sa pagribyu sa kinatibuk-ang pagpasabut sa plano sa kaluwasan sa Isangyaw ang Akong Ebanghelyo (mga pahina 55–69). Dayon, samtang magbasa ka sa istorya ni Juan sa iyang panan-awon, pangutan-a ang imong kaugalingon sa mga pangutana sama niini: Unsa nga mga kamatuoran nga akong makat-unan gikan sa Pinadayag mahitungod sa unsay nahimo sa Langitnong Amahan sa pagtabang kanako nga makabalik ngadto Kaniya? Sa unsa nga paagi kini makatabang kanako nga makasabut sa plano sa Dios alang kanako?

Makatabang kini kanimo nga makahibalo niana sa kinatibuk-an:

• Kasagaran sa kapitulo 12 naghisgot sa mga panghitabo didto sa premortal nga kinabuhi (tan-awa usab sa “Premortality,” Gospel Topics, topics.lds.org).

• Mga Kapitulo 6–11, 13–14, 16–19 naghulagway sa mortal nga kinabuhi ug sa mga panghitabo sa kasaysayan sa yuta (tan-awa usab sa “Mortality,” Gospel Topics, topics.lds.org).

• Mga Kapitulo 2–3, 15, 20–22 naghulagway sa Katapusang Paghukom ug sa himaya nga naghulat sa matinud-anon sa mahangturong mga gingharian (tan-awa usab sa “Postmortality,” Gospel Topics, topics.lds.org).

Pinadayag 2–3

Si Jesukristo personal nga nakaila kanako ug motabang nako sa pagbuntog sa akong mga hagit.

Ang mga pulong sa Manluluwas sa Pinadayag 2–3 nagpadayag nga Siya nakasabut sa mga kalampusan ug mga pakigbisog nga talagsaon sa matag branch sa Simbahan sa panahon ni Juan. Iyang gihatagan og kasiguroan ang mga Santos sa daghang kongregasyon nga Siya nakahibalo, sa ubang mga butang, sa ilang “mga nabuhat,” “kasakit,” “kakabus,” ug “gugma” (Pinadayag 2:2, 9, 19)—uban sa pipla ka paagi nga ilang mapalambo.

Kini nga mga kapitulo makapahinumdom nimo nga ang Manluluwas nakasabut sa imong mga kalig-on ug mga kahuyang ug gusto nga motabang kanimo sa pagbuntog sa imong yutan-ong mga hagit. Unsa ang gisaad ni Jesukristo niadtong makabuntog? Unsa nga mga kausaban ang imong gibati nga naaghat nga himoon sa pagbuntog sa imong mga hagit?

Pinadayag 5

Si Jesukristo lamang ang makahimo nga ang plano sa Langitnong Amahan mahimong posible.

Bisan og ikaw wala mahinumdom niini, hayan ikaw didto sa mga panghitabo nga gihulagway ni Juan sa Pinadayag 5. Samtang ikaw magbasa niini nga mga panghitabo, ikonsiderar kon unsa kaha ang mahitabo kon kitang tanan makahibalo nga si Jesukristo (ang “Kordero”) mohimo nga posible sa plano sa Langitnong Amahan (ablihi ang basahon ug tang-tanga ang pito ka mga silyo). Ngano nga si Jesukristo lang ang makahimo niini? Unsaon nimo sa pagpakita sa imong pagtuo diha Kaniya isip imong Manluluwas?

Tan-awa usab sa Job 38:4–7; “Atonement of Jesus Christ,” Gospel Topics, topics.lds.org.

Pinadayag 6–11

Ang Pagpahiuli mag-una sa kalaglagan nga mahitabo sa dili pa ang Ikaduhang Pag-anhi ni Jesukristo.

Pinadayag 6–11 naghulagway sa mga panghitabo nga mahitabo panahon sa temporal nga kahimtang sa yuta (tan-awa sa DP 77:6), lakip sa Pagpahiuli sa ebanghelyo sa ulahing mga adlaw (tan-awa sa Pinadayag 7). Samtang magbasa ka sa mga panghitabo nga gipanagna ni Juan ug magtan-aw niini nga matuman, unsay nadasig nimo nga buhaton aron mas makaandam sa imong kaugalingon ug sa imong pamilya alang sa Ikaduhang Pag-anhi?

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:

Pinadayag 2–3

Pagpakaaron-ingnon nga si Juan gihangyo sa paghatag sa mensahe sa imong pamilya sama sa mensahe nga iyang gihatag ngadto sa mga simbahan sa iyang panahon. Unsa kahay iyang isulti nga maayo? Sa unsang paagi ka molambo?

Pinadayag 3:20

Ipakita ang litrato sa Manluluwas nga nagtuktok sa pultahan (tan-awa ang litrato nga anaa niini nga outline). Dapita ang imong pamilya sa pagbasa sa Pinadayag 3:20 ug hisguti ang mga pangutana sama sa mosunod: Nganong si Jesus nanuktok imbis nga mosulod lang? Unsaon nato sa pagdapit sa Iyang impluwensya diha sa atong panimalay?

Pinadayag 7:9, 13–14

Unsa ang matudlo niini nga bersikulo kanato mahitungod kon ngano nga kita magsul-ob og puti alang sa mga ordinansa sa templo?

Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.

Pagpalambo sa Atong Pagtudlo

Iawhag ang mga pagpangutana. Ang mga pangutana mao ang timailhan nga ang mga sakop sa pamilya andam nga makat-on ug mopasabut kon giunsa nila sa pagtubag sa unsay gitudlo ngadto nila. Tudloi ang imong pamilya unsaon sa pagpangita og mga tubag diha sa mga kasulatan. (Tan-awa sa Pagtudlo sumala sa Pamaagi sa Manluluwas, 25–26.)

Pasudla Siya, ni Greg K. Olsen