« ថ្ងៃទី ១៦–២២ ខែ ធ្នូ ។ បុណ្យគ្រីស្ទម៉ាស ៖ ‹ ដំណឹងល្អពីសេចក្ដីអំណរយ៉ាងអស្ចារ្យ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ឆ្នាំ ២០១៩ ( ឆ្នាំ ២០១៩ )

« ថ្ងៃទី ១៦–២២ ខែ ធ្នូ ។ បុណ្យគ្រីស្ទម៉ាស » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០១៩

សុវត្ថិភាពនៅក្នុងក្រោល ដោយ ដាន ប៊ឺរ

ថ្ងៃទី ១៦–២២ ខែ ធ្នូ

បុណ្យគ្រីស្ទម៉ាស់

« ដំណឹងល្អពីសេចក្ដីអំណរយ៉ាងអស្ចារ្យ »

សម្រាប់មនុស្សមួយចំនួន បុណ្យគ្រីស្ទម៉ាស់អាចជាគ្រាដ៏រវល់មួយ ។ សូមពិចារណាអំពីរបៀបដែលការសិក្សាព្រះគម្ពីរសញ្ញាថ្មីរបស់បងប្អូនអាចជួយនាំវិញ្ញាណដ៏សុខសាន្ដ និងពិសិដ្ឋឲ្យកើតមានក្នុងជីវិតរបស់បងប្អូន ។ សូមពិចារណាអំពីឥទ្ធិពលនៃការប្រសូត និងបេសកកម្មរបស់ព្រះអង្គសង្គ្រោះដែលមានមកក្នុងជីវិតរបស់បងប្អូន ហើយកត់ត្រាចំណាប់អារម្មណ៍ខាងវិញ្ញាណនានាដែលកើតមាន ។

កត់ត្រាចំណាប់អារម្មណ៍របស់បងប្អូន

ហេតុអ្វីបានជាកំណើតទារកតូចម្នាក់អាចនាំឲ្យមានអំណរយ៉ាងអស្ចារ្យដូច្នេះ ? ប្រហែលជាដោយសារតែទារកទើបកើតថ្មីជានិមិត្តសញ្ញានៃសេចក្ដីសង្ឃឹមហើយមើលទៅ ។ មានអ្វីមួយអំពីលទ្ធភាពពេញលេញដែលជីវិតថ្មីមាន ដែលអញ្ជើញពួកយើងឲ្យពិចារណាអំពីជីវិតនាពេលអនាគតរបស់កុមារនោះ និងអ្វីៗដែលអស្ចារ្យដែលគាត់នឹងសម្រេចបាន ។ ការណ៍នេះបង្ហាញកាន់តែពិតនៅក្នុងការប្រសូតរបស់ព្រះរាជបុត្រានៃព្រះ គឺព្រះយេស៊ូវគ្រីស្ទ ។ ពុំធ្លាប់មានការដាក់ទីសង្ឃឹមច្រើនទៅលើកុមារម្នាក់ ហើយក៏ពុំធ្លាប់មានមនុស្សណាម្នាក់ចាប់កំណើតមកដោយមាននូវការសន្យាដ៏ច្រើនដូច្នេះឡើយ ។

នៅពេលទេវតាបានអញ្ជើញពួកអ្នកគង្វាលឲ្យស្វែងរកទារកទើបនឹងកើតនៅក្នុងស្នូក ទ្រង់បានប្រទានសារលិខិតមួយដល់ពួកគេអំពីទារកតូចនោះ ។ វាគឺជាសារលិខិតមួយនៃសេចក្ដីសង្ឃឹម—ថាទារកនេះបានមកលើផែនដីដើម្បីបំពេញបេសកកម្មដ៏ពិសិដ្ឋមួយ ។ ពួកអ្នកគង្វាល « ក៏រ៉ាយរ៉ាប់រឿង… ហើយអស់អ្នកណាដែលឮក៏មានសេចក្តីអស្ចារ្យពីពាក្យដែលពួកអ្នកគង្វាលបានប្រាប់មក ។ តែម៉ារា នាងរក្សាទុករឿងទាំងនោះដោយរំពឹងគិតតែក្នុងចិត្ត » ( លូកា ២:១៧–១៩ ) ។ ប្រហែលវានឹងជាការល្អដើម្បីធ្វើតាមគំរូរបស់ម៉ារាក្នុងបុណ្យគ្រីស្ទម៉ាស់នេះ ៖ ដើម្បីពិចារណាក្នុងដួងចិត្តរបស់បងប្អូននូវរឿងដែលបងប្អូនបានរៀនអំពីព្រះអង្គសង្គ្រោះក្នុងឆ្នាំនេះ ។ តើទ្រង់បានបំពេញបេសកកម្មនៃការប្រោសលោះរបស់ទ្រង់នៅក្នុងដំណើររឿងដែលបងប្អូនបានអានយ៉ាងដូចម្ដេច ? ហើយដែលសំខាន់ជាងនេះ តើបេសកកម្មរបស់ទ្រង់បានផ្លាស់ប្ដូរជីវិតរបស់បងប្អូនយ៉ាងដូចម្ដេច ?

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

ម៉ាថាយ ១:១៨–២៥; ២:១–១២; លូកា ១:២៦–៣៨; ២:១–២០

ព្រះយេស៊ូវគ្រីស្ទបានយាងចុះមកប្រសូតនៅលើផែនដីនៅក្នុងចំណោមពួកយើង ។

ទោះជាបងប្អូនបានអាន ឬបានស្ដាប់ឮរឿងការប្រសូតរបស់ព្រះយេស៊ូវគ្រីស្ទជាច្រើនដងពីមុនមកក៏ដោយ ក៏សូមសិក្សាអំពីរឿងនេះក្នុងពេលនេះដោយមានគំនិតនេះក្នុងចិត្ត ៖ « បុណ្យគ្រីស្ទម៉ាស់ពុំគ្រាន់តែប្រារព្ធអំពី របៀប ដែលព្រះយេស៊ូវបានយាងមកកាន់ពិភពលោកប៉ុណ្ណោះទេ ប៉ុន្តែក៏ត្រូវបានដឹងដែរថាទ្រង់ជា នរណា —ជាព្រះអម្ចាស់ និងជាព្រះអង្គសង្គ្រោះរបស់យើង គឺព្រះយេស៊ូវគ្រីស្ទ—និងអំពី មូលហេតុ ដែលទ្រង់យាងមកផងដែរ » ( ក្រេហ្គ ស៊ី គ្រីស្ទីនសិន « The Fulness of the Story of Christmas » [ ការប្រជុំធម្មនិដ្ឋានបុណ្យគ្រីស្ទម៉ាសរបស់គណៈប្រធានទីមួយ ថ្ងៃទី ៤ ខែ ធ្នូ ឆ្នាំ ២០១៦ ] broadcasts.lds.org ) ។

តើបងប្អូនដឹងអ្វីខ្លះអំពីព្រះយេស៊ូវគ្រីស្ទមុនពេលដែលទ្រង់បានប្រសូតមក ? ( សូមមើល ឧទាហរណ៍ យ៉ូហាន ១៧:៥; ម៉ូសាយ ៣:៥; គ. និង ស. ៧៦:១៣–១៤, ២០–២៤; ម៉ូសេ ៤:២ ) ។ តើចំណេះដឹងនេះជះឥទ្ធិពលលើអារម្មណ៍របស់បងប្អូនយ៉ាងដូចម្ដេច នៅពេលបងប្អូនអានអំពីការប្រសូតរបស់ទ្រង់ ?

តើបងប្អូនដឹងអ្វីខ្លះអំពីមូលហេតុដែលព្រះយេស៊ូវគ្រីស្ទយាងមកកាន់ផែនដី ? ( សូមមើល ឧទាហរណ៍ លូកា ៤:១៦–២១; យ៉ូហាន ៣:១៦–១៧; នីហ្វៃទី ៣ ២៧:១៣–១៦; គ. និង ស. ២០:២០–២៨ ) ។ តើចំណេះដឹងនេះជះឥទ្ធិពលលើអារម្មណ៍របស់បងប្អូនអំពីព្រះអង្គសង្គ្រោះយ៉ាងដូចម្ដេច ? តើវាជះឥទ្ធិពលលើរបៀបដែលបងប្អូនរស់នៅយ៉ាងដូចម្ដេច ?

សូមមើលផងដែរ កូរិនថូសទី ២ ៨:៩; ហេព្រើរ ២:៧–១៨; នីហ្វៃទី ១ ១១:១៣–៣៣; អាលម៉ា ៧:១០–១៣; « The Nativity » ( វីដេអូ LDS.org) ។

កូរិនថូសទី ១ ១៥:២១–២៦; កូល៉ុស ១:១២–២២; ១ ពេត្រុសទី ២:២១–២៥

ព្រះយេស៊ូវគ្រីស្ទបានបំពេញបេសកកម្មរបស់ទ្រង់ ហើយបានធ្វើឲ្យខ្ញុំអាចទទួលគ្រងជីវិតដ៏អស់កល្បជានិច្ចបាន ។

ទោះជាដំណើររឿងអំពីការប្រសូតរបស់ព្រះគ្រីស្ទត្រូវបានហ៊ុមព័ទ្ធទៅដោយព្រឹត្តិការណ៍ប្រកបដោយអព្ភូតហេតុជាច្រើនក្ដី ក៏ទ្រង់នឹងដូចជាការចាប់កំណើតរបស់អ្នកដទៃទៀតផងដែរ បើពុំមែនដោយសារតែកិច្ចការដ៏មហិមាដែលទ្រង់បានសម្រេចនៅក្នុងជីវិតរបស់ទ្រង់នាពេលក្រោយមកទេនោះ ។ ដូចជាប្រធាន ហ្គរដុន ប៊ី ហ៊ិងគ្លី បានថ្លែង « ទារកយេស៊ូវនៃភូមិបេថ្លេហិម ក៏នឹងដូចជាទារកផ្សេងៗទៀតដែរ បើពុំជាព្រះគ្រីស្ទដ៏ប្រោសលោះនៅឯសួនច្បារគែតសេម៉ានី និងកាលវ៉ារី ហើយនឹងភាពពិតដ៏ជោគជ័យនៃការរស់ឡើងវិញទេនោះ » (« The Wondrous and True Story of Christmas » Ensign ខែ ធ្នូ ឆ្នាំ ២០០០ទំព័រ ៥ ) ។

ព្រះយេស៊ូវលុតជង្គង់នៅសួនច្បារគែតសេម៉ានី — សួនច្បារគែតសេម៉ានី ដោយ ជេ ឃើក រីឆាដ

ភស្ដុតាងនៃបេសកកម្មដ៏ទេវភាពរបស់ព្រះអង្គសង្គ្រោះ និងសេចក្ដីស្រឡាញ់ប្រកបដោយអានុភាពរបស់ទ្រង់ចំពោះអ្នកដទៃ គឺអាចរកបាននៅក្នុងព្រះគម្ពីរសញ្ញាថ្មី ។ តើវគ្គបទគម្ពីរ ឬដំណើររឿងណាខ្លះកើតមានក្នុងគំនិតរបស់បងប្អូន ? បងប្អូនអាចនឹងត្រឡប់ទៅមើលធនធាននេះ ឬកំណត់ហេតុការសិក្សារបស់បងប្អូន ហើយរំឭកអំពីចំណាប់អារម្មណ៍មួយចំនួនដែលបងប្អូនបានកត់ត្រា ។ បងប្អូនក៏អាចអាន កូរិនថូសទី ១ ១៥:២១–២៦; កូល៉ុស ១:១២–២២; ពេត្រុសទី ១ ២:២១–២៥ ហើយពិចារណាអំពីរបៀបដែលព្រះអង្គសង្គ្រោះ និងកិច្ចការរបស់ទ្រង់បានប្រទានពរដល់ជីវិតរបស់បងប្អូន ។ តើបងប្អូនទទួលអារម្មណ៍បំផុសគំនិតឲ្យផ្លាស់ប្ដូរអ្វីខ្លះនៅក្នុងជីវិតរបស់បងប្អូន ? តើបងប្អូននឹងប្រើប្រាស់ព្រះចេស្ដារបស់ព្រះអង្គសង្គ្រោះយ៉ាងដូចម្ដេច ?

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ

នៅពេលបងប្អូនអានគម្ពីរជាមួយនឹងគ្រួសាររបស់បងប្អូន នោះព្រះវិញ្ញាណអាចជួយបងប្អូនឲ្យស្គាល់ថាគោលការណ៍អ្វីដែលត្រូវគូសបញ្ជាក់ និងពិភាក្សាដើម្បីបំពេញតាមតម្រូវការរបស់គ្រួសារបងប្អូន ។ នេះគឺជាការផ្ដល់យោបល់មួយចំនួន ៖

ម៉ាថាយ ១:១៨–២៥; ២:១–១២; លូកា ១:២៦–៣៨; ២:១–២០

តើបងប្អូនអាចប្រារព្ធការប្រសូតរបស់ព្រះយេស៊ូវជាមួយនឹងគ្រួសាររបស់បងប្អូនយ៉ាងដូចម្ដេច ? នេះជាគំនិតយោបល់មួយចំនួន ឬបងប្អូនអាចបង្កើតដោយខ្លួនឯងផ្ទាល់ ៖

សូមអាន ហើយដើរតួរឿងប្រសូតកម្មជាមួយគ្នា ។
សូមមើលវីដេអូ « The Nativity » ( LDS.org) ។
សូមរុករកធនធានមួយចំនួននៅលើ christmas.mormon.org; jesuschrist.lds.org; ឬ « Christmas » Gospel Topics នៅគេហទំព័រ topics.lds.org ។
សូមមើលការប្រជុំធម្មនិដ្ឋានបុណ្យគ្រីស្ទម៉ាស់របស់គណៈប្រធានទីមួយ ( broadcasts.lds.org ) ។
សូមច្រៀងទំនុកតម្កើងបុណ្យគ្រីស្ទម៉ាស់ជាមួយគ្នា ឬជ្រើសរើសអ្នកជិតខាង ឬមិត្តភក្ដិដើម្បីទៅសួរសុខទុក្ខ ហើយច្រៀងសម្រាប់ពួកគេ ( សូមមើល ទំនុកតម្កើង លេខ ២០១–១៤ ) ។
សូមធ្វើការបម្រើមួយ ។
ចូរសុំឲ្យសមាជិកគ្រួសារស្វែងរកព័ត៌មានលម្អិតនៅក្នុងរឿងប្រសូតកម្មដែលផ្ដល់ជាគំនិតយោបល់ដល់ពួកគេក្នុងការតុបតែង ឬដាក់តាំង ដើម្បីពួកគេអាចធ្វើការរំឭកចាំអំពីព្រះយេស៊ូវគ្រីស្ទ ។

កូរិនថូសទី ១ ១៥:២១–២៦; កូល៉ុស ១:១២–២២; ១ ពេត្រុសទី ២:២១–២៥

ហេតុអ្វីយើងមានអំណរគុណដែលព្រះយេស៊ូវគ្រីស្ទបានប្រសូតមក ? តើទ្រង់បានប្រទានអំណោយអ្វីខ្លះដល់យើង ? តើយើងអាចបង្ហាញនូវការដឹងគុណរបស់យើងចំពោះទ្រង់យ៉ាងដូចម្ដេច ?

« ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក »

បើសិនជាបងប្អូនចង់ជួយដល់គ្រួសាររបស់បងប្អូនឲ្យផ្ដោតទៅលើព្រះអង្គសង្គ្រោះនៅពេលបុណ្យគ្រីស្ទម៉ាស់ ប្រហែលជាបងប្អូនអាចចំណាយពេលខ្លះៗអាន និងសិក្សាជាមួយគ្នាក្នុង « ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » ( Ensign ឬ លីអាហូណា ខែ ឧសភា ឆ្នាំ ២០១៧ នៅខាងក្នុងក្របមុខ ) ។ ប្រហែលជាបងប្អូនអាចទន្ទេញចាំវគ្គមកពី « ព្រះគ្រីស្ទដ៏មានព្រះជន្មរស់ » ឬស្វែងរកការពិពណ៌នាអំពីជីវិតរបស់ព្រះអង្គសង្គ្រោះនៅក្នុងព្រះគម្ពីរសញ្ញាថ្មីដែលគាំទ្រដល់សេចក្ដីថ្លែងនានានៅក្នុងវគ្គនោះ ។ បងប្អូនក៏អាចអញ្ជើញសមាជិកគ្រួសារម្នាក់ៗឲ្យសរសេរទីបន្ទាល់ផ្ទាល់ខ្លួនរបស់គាត់អំពីព្រះយេស៊ូវគ្រីស្ទ ហើយបើមានការបំផុសគំនិតខ្លាំង សូមអានអំពីទីបន្ទាល់នោះទៅដល់គ្រួសារទាំងមូល ។

សម្រាប់គំនិតបន្ថែមដើម្បីបង្រៀនកុមារ សូមមើល គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់ថ្នាក់អង្គការបឋមសិក្សា ។

ការកែលម្អដល់ការសិក្សាផ្ទាល់ខ្លួន

សូមស្វែងរកព្រះយេស៊ូវគ្រីស្ទ ។ បទគម្ពីរបង្រៀនយើងថា រឿងទាំងអស់ថ្លែងទីបន្ទាល់អំពីព្រះយេស៊ូវគ្រីស្ទ ( សូមមើល ម៉ូសេ ៦:៦២–៦៣ ) ដូច្នេះយើងគួរតែស្វែងរកទ្រង់នៅគ្រប់រឿងទាំងអស់ ។ នៅពេលបងប្អូនអានបទគម្ពីរនេះ សូមពិចារណាធ្វើការកត់ចំណាំ ឬគូសចំណាំខគម្ពីរដែលបង្រៀនបងប្អូនអំពីទ្រង់ ។ សូមចំណាយពេលខ្លះក្នុងមួយថ្ងៃៗរហូតដល់ថ្ងៃបុណ្យគ្រីស្ទម៉ាស់ដើម្បីរកមើលរឿងនៅជុំវិញបងប្អូនដែលថ្លែងទីបន្ទាល់អំពីព្រះយេស៊ូវគ្រីស្ទ ។

ម៉ារា, យ៉ូសែប, និងពួកអ្នកគង្វាល និងទារកយេស៊ូវ — រឿងប្រសូតិកម្ម ដោយ ប្រាយអិន ខល