ថ្ងៃទី ២៣–២៩ ខែ ធ្នូ ។ វិវរណៈ ១២–២២ ៖ ‹ អ្នកដែលយកឈ្នះ នឹងទទួលគ្រងអ្វីៗទាំងអស់ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាថ្មី ឆ្នាំ ២០១៩ ( ឆ្នាំ ២០១៩ )
ថ្ងៃទី ២៣–២៩ ខែ ធ្នូ ។ វិវរណៈ ១២–២២ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០១៩
ទីក្រុងអស់កល្បជានិច្ច ដោយ ខេត ឡាសុន
ថ្ងៃទី ២៣–២៩ ខែ ធ្នូ
វិវរណៈ ១២–២២
« ឯអ្នកណាដែលឈ្នះ នោះនឹងបានគ្រងសេចក្តីទាំងនេះទុកជាមរតក »
នៅពេលអ្នកអាន វិវរណៈ ១២–២២ សូមរកមើលរឿងស្របគ្នារវាងអ្វីដែលយ៉ូហានបានឃើញ និងអ្វីដែលបងប្អូនបានមើលឃើញនៅក្នុងពិភពលោកបច្ចុប្បន្ននេះ ។ សូមស្វែងរកការដឹកនាំខាងវិញ្ញាណដើម្បីជួយបងប្អូនឲ្យរកបានមេរៀនផ្ទាល់ខ្លួន នៅពេលបងប្អូនសិក្សាឲ្យបានស៊ីជម្រៅអំពីភាសានិមិត្តរូបរបស់យ៉ូហាន ។
កត់ត្រាចំណាប់អារម្មណ៍របស់បងប្អូន
សូមនឹកស្រមៃអំពីស្ត្រីម្នាក់ដែល « មានគ៌ត ក៏ស្រែកដោយរៀបនឹងសម្រាលចេញ » ។ ឥឡូវសូមនឹកស្រមៃអំពី « នាគដ៏ធំមានសម្បុរក្រហម ដែលមានក្បាល៧ និងស្នែង១០ » ដែលហោះពីលើស្ត្រីនោះ បានប្រុងនឹង « លេបកូននាងក្នុងកាលដែលសម្រាលចេញមក » ( វិវរណៈ ១២:២–៤ ) ។ ដើម្បីយល់អំពីខគម្ពីរទាំងនេះអំពីវិវរណៈរបស់យ៉ូហាន សូមចងចាំថា រូបភាពទាំងនេះតំណាងឲ្យសាសនាចក្រ និងនគរនៃព្រះ និងគ្រោះថ្នាក់ដែលពួកគេនឹងប្រឈមមុខ ។ សម្រាប់ពួកបរិសុទ្ធដែលជួបប្រទះនឹងការបៀតបៀនដ៏ខ្លាំងក្លានៅជំនាន់របស់យ៉ូហាន វាហាក់ដូចជាពុំអាចយកឈ្នះលើសេចក្ដីអាក្រក់បានទេ ។ ជ័យជំនះនេះក៏អាចនឹងពិបាកដើម្បីដឹងមុននៅក្នុងជំនាន់មួយដូចជាជំនាន់ពួកយើងនេះផងដែរ ជាពេលដែលមារសត្រូវ « ច្បាំងនឹងពួកបរិសុទ្ធ » ហើយមាន « …អំណាចលើគ្រប់ទាំងពូជមនុស្ស គឺអស់ទាំងគ្រួសារ និងភាសា ហើយនឹងអស់ទាំងសាសន៍ផង » ( វិវរណៈ ១៣:៧ ) ។ ប៉ុន្តែនៅចុងបញ្ចប់នៃវិវរណៈរបស់យ៉ូហាន បានបង្ហាញយ៉ាងរុងរឿងថា សេចក្ដីល្អនឹងយកឈ្នះលើសេចក្ដីអាក្រក់ ។ បាប៊ីឡូននឹងរលំចុះ ។ ព្រះយេស៊ូវគ្រីស្ទនឹងគ្រងរាជ្យជាស្ដេចនៃអស់ទាំងស្ដេច ។ « ព្រះទ្រង់នឹងជូតអស់ទាំងទឹកភ្នែកពីភ្នែកគេចេញ » ហើយពួកបរិសុទ្ធនឹងគ្រងរាជ្យជាមួយនឹងទ្រង់ ហើយ « គ្រងសេចក្ដីទាំងនេះទុកជាមរតក » ( វិវរណៈ ២១:៤, ៧ ) ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
សង្គ្រាមនៅស្ថានសួគ៌បន្ដមាននៅលើផែនដី ។
យើងពុំដឹងច្រើនអំពីសង្គ្រាមនៅលើស្ថានសួគ៌នោះទេ ប៉ុន្តែមានភស្ដុតាងច្បាស់លាស់មួយដែលពិពណ៌នាដោយសង្ខេបនៅក្នុង វិវរណៈ ១២:៧–១១ ។ នៅពេលបងប្អូនអានខគម្ពីរទាំងនេះ សូមស្រមៃថាខ្លួនបងប្អូនស្ថិតនៅក្នុងជម្លោះនៃជីវិតមុនឆាកជីវិតនេះ ។ តើខគម្ពីរទាំងនេះបង្រៀនអ្វីខ្លះអំពីរបៀបដែលបងប្អូន និងកូនស្មោះត្រង់ដទៃទៀតរបស់ព្រះបានយកឈ្នះលើសាតាំង ? តើការណ៍នេះបញ្ជាក់អ្វីខ្លះ អំពីរបៀបដែលបងប្អូនអាចយកឈ្នះលើវានៅក្នុងជំនាន់របស់យើង នៅពេលវាបន្ដ « ច្បាំងនឹង [ អស់អ្នកដែល ] មានសេចក្តីបន្ទាល់ពីព្រះយេស៊ូវ » ? ( ខទី ១៧ ) ។
សូមមើល នីហ្វៃទី ១ ១៤:១២–១៤; « War in Heaven » Gospel Topics នៅគេហទំព័រ topics.lds.org; Bible Dictionary « Michael » « War in Heaven » ។
តើនរណាជាទេវតាដែលយ៉ូហានបានមើលឃើញថាកំពុងផ្សាយដំណឹងល្អ ?
ការបំពេញនូវការព្យាករមួយនៅក្នុងខគម្ពីរទាំងនេះបានកើតឡើងនៅពេលមរ៉ូណៃបានលេចមកឯយ៉ូសែប ស្ម៊ីធ ហើយបាននាំគាត់ឲ្យទៅកាន់កំណត់ត្រាដែលគាត់បានបកប្រែ ហើយបានបោះពុម្ពជាព្រះគម្ពីរមរមន ។ គម្ពីរវិវរណៈនេះមាននូវ « ដំណឹងល្អដ៏អស់កល្បអស់កាលជានិច្ច » ដែលយើងត្រូវទទួលខុសត្រូវដើម្បីផ្សាយទៅកាន់ « គ្រប់អស់ទាំងសាសន៍ គ្រប់ពូជអំបូរ គ្រប់ភាសា និងគ្រប់ទាំងគ្រួសារដែរ » ( វិវរណៈ ១៤:៦ ) ។
ព្រះអម្ចាស់អញ្ជើញខ្ញុំឲ្យរត់ចេញពីក្រុងបាប៊ីឡូន និងអំពើបាបរបស់វា ។
វិវរណៈ ១៧–១៨ មាននូវរូបភាពដ៏រំខានដែលពិពណ៌នាអំពីអំពើបាប សម្ភារនិយម និងតណ្ហានៃក្រុងបាប៊ីឡូន—ជានិមិត្តរូបនៃសេចក្ដីទុច្ចរិត និងខាងលោកិយ ។ សូមគិតអំពីឧទាហរណ៍នៃស្ថានភាពក្រុងបាប៊ីឡូន ដែលមាននៅក្នុងពិភពលោកសព្វថ្ងៃនេះ ហើយពិចារណាអំពីអ្វីដែលបងប្អូនអាចធ្វើដើម្បីដើរតាមការប្រឹក្សាឲ្យ « ចេញ » ពីបាប៊ីឡូន ហើយ « កុំឲ្យត្រូវមានចំណែកក្នុងអំពើបាបវាឡើយ » ( វិវរណៈ ១៨:៤ ) ។
គ្រប់កូនរបស់ព្រះនឹងត្រូវជំនុំជម្រះចេញមកពីសៀវភៅនៃជីវិត ។
សូមសន្មតថា អ្នកនិពន្ធម្នាក់បានសុំសរសេរសៀវភៅមួយអំពីជីវិតរបស់បងប្អូន ។ តើព័ត៌មានលម្អិត ឬបទពិសោធន៍អ្វីខ្លះដែលបងប្អូនចង់សរសេរចូលក្នុងសៀវភៅនោះ ? បើបងប្អូនបានដឹងថា សកម្មភាពនាពេលអនាគតរបស់បងប្អូននឹងត្រូវបានកត់ត្រាទុក តើបងប្អូននឹងប្រព្រឹត្តនៅក្នុងជីវិតរបស់បងប្អូនខុសប្លែកពីឥឡូវយ៉ាងដូចម្ដេច ? ចូរគិតអំពីរឿងនេះនៅពេលបងប្អូនអានអំពីថ្ងៃជនុំជម្រះនៅក្នុង វិវរណៈ ២០:១២–១៥ ។ តើបងប្អូនសង្ឃឹមថា គេនឹងកត់ត្រាទុកអ្វីខ្លះអំពីបងប្អូននៅក្នុងសៀវភៅនៃជីវិត ?
សូមមើលផងដែរ Bible Dictionary « Book of life » ។
បើខ្ញុំស្មោះត្រង់ នោះខ្ញុំនឹងទទួលបានសិរីល្អសេឡេស្ទាល ។
ផ្ទុយពីការពិពណ៌នាអំពីក្រុងបាប៊ីឡូន វិវរណៈ ២១–២២ ពិពណ៌នាអំពីសិរីល្អសេឡេស្ទាលដែលរង់ចាំពួកអ្នកដើរតាមស្មោះត្រង់របស់ព្រះគ្រីស្ទ ។ តើរូបភាព ឃ្លា ឬការសន្យាអ្វីខ្លះនៅក្នុងជំពូកនេះ ដែលបានបំផុសគំនិតបងប្អូនឲ្យបន្ដនៅស្មោះត្រង់ទោះជាក្នុងពេលមានការលំបាកក្ដី ?
តើខគម្ពីរទាំងនេះមានន័យថា ពុំអាចមានគម្ពីរបន្ថែមក្រៅពីព្រះគម្ពីរប៊ីបឬ ?
មនុស្សខ្លះបានដកស្រង់ វិវរណៈ ២២:១៨–១៩ ធ្វើជាមូលហេតុមួយដើម្បីបដិសេធព្រះគម្ពីរមរមន និងគម្ពីរថ្ងៃចុងក្រោយដទៃទៀត ។ ទោះជាយ៉ាងណា អែលឌើរ ជែហ្វ្រី អ័រ ហូឡិន បានបង្រៀនថា ៖
« ឥឡូវនេះមាននូវឯកច្ឆន្ទដ៏លើសលុបនៅក្នុងចំណោមពួកអ្នកប្រាជ្ញខាងគម្ពីរប៊ីបស្ទើរតែគ្រប់រូបថា ខគម្ពីរនេះអនុវត្តតែចំពោះគម្ពីរវិវរណៈប៉ុណ្ណោះ ពុំមែន ព្រះគម្ពីរប៊ីបទាំងមូលនោះទេ ។ ពួកអ្នកប្រាជ្ញទាំងនោះនៅក្នុងជំនាន់របស់យើងបានទទួលស្គាល់ថា ‹ គម្ពីរ › ជាច្រើននៅក្នុងព្រះគម្ពីរសញ្ញាថ្មី ភាគច្រើនត្រូវបានសរសេរឡើងយ៉ាងពិតប្រាកដ បន្ទាប់ពី យ៉ូហានបានទទួលវិវរណៈនៅលើកោះប៉ាត់ម៉ុស ។ …
ប៉ុន្ដែមានចម្លើយកាន់តែងាយស្រួលមួយ ។ … តាមដែលយើងបានដឹង ព្រះគម្ពីរប៊ីបទាំងមូល—គឺជាការចងក្រងនូវអត្ថបទទាំងឡាយមកជាសៀវភៅតែមួយ—ហើយវាពុំមានវត្តមាននៅពេលដែលខនោះត្រូវបានកត់ត្រាទុកនោះទេ » ( « My Words … Never Cease » Ensign ឬ លីអាហូណា ខែ ឧសភា ឆ្នាំ ២០០៨ ទំព័រ ៩១ ) ។
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
នៅពេលបងប្អូនអានគម្ពីរជាមួយនឹងគ្រួសាររបស់បងប្អូន នោះព្រះវិញ្ញាណអាចជួយបងប្អូនឲ្យស្គាល់ថាគោលការណ៍អ្វីដែលត្រូវគូសបញ្ជាក់ និងពិភាក្សាដើម្បីបំពេញតាមតម្រូវការរបស់គ្រួសារបងប្អូន ។ នេះគឺជាការផ្ដល់យោបល់មួយចំនួន ៖
សមាជិកគ្រួសារខ្លះអាចនឹងរីករាយ ហើយទទួលប្រយោជន៍មកពីការគូររូបអំពីការនិមិត្តដែលបានពិពណ៌នានៅក្នុងគម្ពីរវិវរណៈ ។ ឧទាហរណ៍ ការគូររូបដោយផ្អែកទៅលើ វិវរណៈ ១២ អាចនាំទៅរកការពិភាក្សាអំពីសង្គ្រាមនៅលើស្ថានសួគ៌ ( សូមមើល ខទី ៧–១១ ) ។ រូបភាពទាំងឡាយដែលផ្អែកទៅលើ វិវរណៈ ២១ អាចបំផុសឲ្យមានការសន្ទនាអំពីនគរសេឡេស្ទាល ។ បងប្អូនក៏អាចបង្ហាញរូបភាពដែលមានមកជាមួយនឹងគម្រោងមេរៀននេះ ហើយសុំឲ្យសមាជិកគ្រួសារស្វែងរកខគម្ពីរនៅក្នុង វិវរណៈ ១៩ ដែលរូបភាពនេះកំពុងបង្ហាញផងដែរ ។
តើឃ្លា « សេចក្ដីបន្ទាល់របស់គេ » មានន័យយ៉ាងណា ? តើទីបន្ទាល់របស់យើងអំពីព្រះយេស៊ូវគ្រីស្ទជួយយើង និងអ្នកដទៃឲ្យយកឈ្នះលើសាតាំងយ៉ាងដូចម្ដេច ?
តើសមាជិកគ្រួសាររបស់បងប្អូនមានគំនិតអ្វីខ្លះអំពីសត្វបញ្ឆោត ? តើយើងត្រូវបានការពារ ហើយចៀសផុតពីការបញ្ឆោតដែលយើងមើលឃើញនៅជំនាន់សព្វថ្ងៃនេះយ៉ាងដូចម្ដេច ?
តើ នីហ្វៃទី ១ ២២:២៦; គោលលទ្ធិ និង សេចក្ដីសញ្ញា ៤៣:៣០–៣១ ជួយយើងឲ្យយល់អំពីអត្ថន័យថា សាតាំងនឹងត្រូវបាន « ចង » យ៉ាងដូចម្ដេចខ្លះ ?
តើអ្វីអាចជាអត្ថន័យនិមិត្តសញ្ញានៃការមានព្រះនាមរបស់ព្រះអង្គសង្គ្រោះនៅ « លើថ្ងាសរបស់ [ យើង ] » ? ( វិវរណៈ ២២:៤ សូមមើលផងដែរ វិវរណៈ ១៣:១៦–១៧ ) ។
សម្រាប់គំនិតបន្ថែមដើម្បីបង្រៀនកុមារ សូមមើល គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់ថ្នាក់អង្គការបឋមសិក្សា ។
ការកែលម្អការបង្រៀនរបស់យើង
សូមតាមដានការអញ្ជើញឲ្យធ្វើសកម្មភាព ។ « នៅពេលបងប្អូនតាមដានការអញ្ជើញមួយដើម្បីធ្វើសកម្មភាព នោះបងប្អូនបង្ហាញដល់ [ គ្រួសាររបស់បងប្អូន ] ថា បងប្អូនយកចិត្តទុកដាក់នឹងពួកគេ ហើយបងប្អូនក៏បង្ហាញពីរបៀបដែលដំណឹងល្អកំពុងប្រទានពរដល់ជីវិតពួកគេយ៉ាងណាផងដែរ ។ បងប្អូនក៏ផ្ដល់ឱកាសដល់ពួកគេឲ្យចែកចាយបទពិសោធន៍របស់ពួកគេផងដែរ ដែលពង្រឹងដល់ការតាំងចិត្ត ហើយអនុញ្ញាតឲ្យពួកគេគាំទ្រដល់គ្នាទៅវិញទៅមកក្នុងការរស់នៅតាមដំណឹងល្អ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ៣៥ ) ។
ព្រះគ្រីស្ទក្នុងសម្លៀកបំពាក់ពណ៌ក្រហមគង់នៅលើសេះសមួយ ។