Pagtudlo sa Gagmayng mga Bata

Kon ikaw adunay gagmay nga mga bata sa imong pamilya, aniay mga kalihokan nga makatabang nila sa pagkat-on:

• Paminawon o i-aksyon ang usa ka istorya Ang gagmay nga mga bata ganahan og mga istorya—gikan sa mga kasulatan, gikan sa imong kinabuhi, gikan sa kasaysayan sa Simbahan, o gikan sa mga magasin sa Simbahan. Pangita og mga paagi sa pag-apil nila sa panag-istorya. Mahimo nilang gunitan ang mga litrato o mga butang, pagdrowing og mga litrato sa unsay ilang nadungog, i-drama ang istorya, o tabang sa pagsaysay sa istorya. Tabangi ang mga bata nga makaila sa mga kamatuoran sa ebanghelyo sa mga istorya nga imong ipakigbahin.

• Pagbasa og kasulatan. Tingali ang gagmayng mga bata dili pa kaayo makabasa, apan mapaapil nimo sila sa pagkat-on gikan sa mga kasulatan. Kinahanglan lang kang motutok sa usa ka bersikulo, o importante nga pulong. Tingali masag-ulo nila ang mubo nga mga pulong gikan sa mga kasulatan kon balik-balikon nila sa pipila ka higayon. Kon makadungog sila sa pulong sa Dios, mabati nila ang Espiritu.

• Tan-awa ang usa ka litrato o tan-awa ang usa ka video. Kon pakit-on nimo ang mga bata og litrato o video kalabut sa baruganan sa ebanghelyo o istorya sa kasulatan, pangutana nga makatabang nila sa pagkat-on unsay ilang nakita. Pananglit, makapanguta ka, “Unsay nahitabo niini nga litrato o video? Unsay imong gibati niini?” Ang Gospel Library app, Biblevideos.lds.org, medialibrary.lds.org, ug children.lds.org maayo nga dapit nga pangitaan og mga litrato ug mga video.

• Kanta. Ang mga kanta gikan sa Songbook sa mga Bata gamhanang nagtudlo og doktrina. Gamita ang indeks sa mga hilisgutan sa luyo sa Songbook sa mga Bata sa pagpangita og mga kanta nga may kalabutan sa mga baruganan sa ebanghelyo nga imong gitudlo. Tabangi ang mga bata nga makasumpay sa mensahe sa mga kanta sa ilang mga kinabuhi. Pananglit, mahimo kang mangutana bahin sa mga pulong sa kanta. Dugang sa pagkanta, ang imong mga bata makahimo og mga aksyon sa mga kanta o maminaw sa mga kanta isip background nga musika samtang nagbuhat sila og ubang mga kalihokan.

• Paghimo. Ang mga bata makahimo, makadrowing, o makakolor og butang nga may kalabutan sa istorya o baruganan nga ilang gikat-unan.

• Apil sa leksyon nga maggamit og butang [object lesson]. Usa ka yanong leksyon nga maggamit og butang makatabang sa imong mga bata nga makasabut og baruganan sa ebanghelyo nga lisud sabton. Kon maggamit og mga leksyon nga maggamit og butang, pangita og mga paagi nga makaapil ang mga bata. Mas makat-on sila gikan sa hiniusa nga kasinatian kay sa pagtan-aw lamang sa usa ka demonstration.

• Role-play. Kon ang mga bata mo-role-play sa usa ka sitwasyon nga mahimong masugatan nila sa tinuod nga kinabuhi, mas masabtan nila sa unsa nga paagi nga ang baruganan sa ebanghelyo magamit sa ilang mga kinabuhi.

• Balik-balika ang mga kalihokan. Ang gagmay nga mga bata kinahanglang makadungog og mga konsepto sa makadaghang higayon aron masabtan kini. Ayaw kahadlok sa pagbalik-balik kanunay sa mga istorya o mga kalihokan. Sama pananglit, mahimo kang mopakigbahin og istorya sa kasulatan sa makadaghang higayon sa lain-laing paagi—pagbasa gikan sa mga kasulatan, pag-summarize sa imong kaugalingong mga pulong, pagpasalida og video, pagpatabang sa mga bata sa pagsaysay sa istorya, pagdapit kanila sa pag-drama sa istorya, ug uban pa.