Mga Ideya sa Pagpalambo sa Imong Personal nga Pagtuon sa Kasulatan

Aniay pipila ka mga paagi sa pagpalambo sa imong pagtuon sa pulong sa Dios sa mga kasulatan:

Pangitaa ang mga Kamatuoran bahin ni Jesukristo

Ang mga kasulatan nagtudlo nato nga ang tanang mga butang nagpamatuod ni Kristo (tan-awa sa 2 Nephi 11:4; Moises 6:63), mao nga pangitaa Siya sa mga panghitabo, mga istorya, ug mga pagtulun-an sa Bag-ong Tugon. Ikonsiderar ang pagbutang og timaan o pagmarka sa mga bersikulo nga nagtudlo bahin sa Manluluwas ug unsaon sa pagsunod Kaniya.

Pangitaa ang Makapadasig nga mga Pulong

Makita nimo nga ang piho nga mga pulong sa mga kasulatan makadani nimo, ingon og gisulat kini nga alang kanimo. Personal nimong mabati nga importante ug magdasig ug mag-awhag nimo. Ikonsiderar ang pagmarka niini diha sa imong mga kasulatan o pagsulay niini sa study journal.

Pangitaa ang mga Kamatuoran sa Ebanghelyo

Usahay ang mga kamatuoran sa ebanghelyo (sa kasagaran gitawag nga doktrina o mga baruganan) direkta nga gipahayag, ug usahay gipasabut pinaagi sa ehemplo o istorya. Pangutan-a ang imong kaugalingon, “Unsa nga mahangturong mga kamatuoran ang gitudlo niini nga mga bersikulo?”

Paminaw sa Espiritu

Bantayi ang imong mga hunahuna ug mga pagbati, bisan og kini walay kalabutan sa unsay imong gibasa. Kadto nga mga impresyon tingali mao ang mga butang nga gusto sa Langitnong Amahan nga imong makat-unan.

Ipahisama ang mga Kasulatan sa Imong Kinabuhi

Ikonsiderar sa unsa nga paagi nga ang mga istorya ug mga pagtulun-an nga imong gibasa magamit sa imong kinabuhi. Sama pananglit, mahimo nimong pangutan-on ang imong kaugalingon, “Unsa nga mga kasinatian ang akong nasinati nga susama sa unsay akong nabasa?” o “Unsaon nako sa pagsunod ang ehemplo niini nga tawo diha sa mga kasulatan?”

Pangutana samtang Ikaw Magtuon

Samtang magtuon ka sa mga kasulatan, tingali dunay mosulod nga pangutana sa hunahuna. Tingali kini nga mga pangutana may kalabutan sa unsay imong gibasa o sa imong kinabuhi sa kinatibuk-an. Pamalandungi kini nga mga pangutana ug pangita og mga tubag samtang magpadayon ka sa pagtuon sa mga kasulatan.

Gamita ang Mga Tabang sa Pagtuon sa Kasulatan

Aron dugang pa nga makasabut sa mga bersikulo nga imong gibasa, gamita ang mga footnote, sa Bible Dictionary, ang Giya ngadto sa mga Kasulatan (scriptures.lds.org), ug ubang mga tabang sa pagtuon.

I-rekord ang Imong mga Hunahuna ug mga Pagbati

Adunay daghang mga paagi nga marekord ang mga impresyon nga moabut samtang ikaw magtuon. Pananglit, mahimo nimong markahan ang makahuluganong pulong ug irekord ang imong mga hunahuna isip pahinumdom sa imong mga kasulatan. Mahimo usab nga magtipig ka og journal sa mga nasabtan, mga pagbati, ug mga impresyon nga imong nadawat.

Tun-i ang mga Pulong sa mga Propeta ug Apostoles sa Ulahing mga Adlaw

Basaha unsay gitudlo sa mga propeta ug mga apostoles sa ulahing mga adlaw bahin sa mga baruganan nga imong makit-an diha sa mga kasulatan (sama pananglit, tan-awa sa conference.lds.org ug sa mga magasin sa Simbahan).

Ipakigbahin ang mga Nasabtan

Ang paghisgot sa mga nasabtan gikan sa imong personal nga pagtuon dili lamang usa ka maayong paagi sa pagtudlo sa uban, apan makatabang usab kini nga malig-on ang imong pagsabut sa unsay imong nabasa.

Buhata Unsay Imong Makat-onan

Ang pagtuon sa kasulatan kinahanglang dili lang makadasig nato—kinahanglang mogiya nato sa pag-usab sa paagi nga kita nagpakabuhi. Paminaw sa unsay giaghat sa Espiritu kanimo sa pagbuhat unsay imong nabasahan, ug dayon pasalig sa pagbuhat niadtong mga aghat.

Si Presidente Thomas S. Monson miingon: “Kon kita magbasa ug mamalandong sa kasulatan, masinati nato ang paghunghong sa Espiritu sa atong kalag. Makaplagan nato ang mga tubag sa atong mga pangutana. Masayran nato ang bahin sa mga panalangin nga moabut pinaagi sa pagsunod sa mga sugo sa Dios. Makabaton kita og tinuod nga pagpamatuod sa atong Langitnong Amahan ug sa atong Manluluwas, si Jesukristo, ug sa Ilang gugma kanato. Kon ang pagbasa sa kasulatan ubanan sa atong pag-ampo, kita masayud uban sa kasiguroan nga ang ebanghelyo ni Jesukristo tinuod. … Kon kita mahinumdom sa pag-ampo ug mogahin og panahon sa pagbasa sa kasulatan, ang atong kinabuhi mas mapanalanginan ug ang atong palas-anon mas mogaan” (“Wala Kita Mag-inusara,” Liahona, Nob. 2013, 122).