Meda Rokovi Koya, mai vei Dana Mario Wood

9–15 ni Janueri

Maciu 2; Luke 2

Keimami sa Lako Mai me Cuva Vua

Ni ko wilika tiko na Maciu 2 kei na Luke 2, vakarogoca matua na raititobu vakayalo o na ciqoma. Na vakasama ni vuli eso e tiko ena idusidusi oqo ena rawa ni vukei iko mo raica rawa na ivakavuvuli bibi ka yaga era tu ena vei wase oqo.

Vola na Nomu Nanuma

Mai na siga ni Nona sucu, e matata vinaka nio Jisu e sega ni dua ga na gone kawale. E sega walega ni kalokalo vou ena lomalagi se na kena seretaki vaka agilosi na itukutuku ni reki totoka ni nona sucu vakagone mai o Jisu. E dina tale ga nio ira na tamata yalodina—mai na vei matanitu eso, cakacaka eso, kei na ituvaki ni bula eso—era vakila na nodra sa semati Vua. Ni bera madaga ni cavuta na Nona veisureti me ra “lako mai, ka muri au,” era sa lako rawa tu mai (Luke 18:22). E dina, ni ra sega ni lako kece mai Vua. E vuqa era sega ni bau via kilai Koya, ka dua na iliuliu vuvu a vakasaqara sara mada ga me vakamatei Koya. Ia o ira na dauvakasaqara na ivalavala dodonu ena yalo malumalumu, savasava, ka yalodina era kila rawa se o cei o Koya—na nodra Mesaia yalataki. Na nodra yalodina e vakauqeti keda vakakina, me baleta na “itukutuku vinaka mo dou reki vakalevu kina” a kau mai vei ira na ivakatawa ni sipi e sa baleti ira “kecega na tamata,” kei na “iVakabula, ko Koya na Karisito na Turaga” e a sucu ena siga oya vei keda kece (raica na Luke 2:10–11).

Vakasama Eso ni Vuli iVolanikalou ni Tamata Yadua

Luke 2:1–7

A sucu o Jisu ena ituvaki vakaloloma.

E dina ga ni a tiko o Jisu Karisito ena lagilagi kei na Kalou na Tamana “ni sa sega ni caka ko vuravura” (Joni 17:5), e lomasoli o Koya me mai sucu vakaloloma ka bula maliwai keda e vuravura. Nio wilika na Luke 2:1–7, vakasamataka vakatitobu na cava e vakavulica vei iko me baleti Koya na itukutuku oqo ni Nona sucu. Tovolea mo raica na matailalai se raititobu ena italanoa oqo o sega ni raica e liu. Na vakilai ni vei ka oqo e tara vaka cava na nomu nanuma me baleti Koya?

Raica talega na “The Christ Child” (vidio), ChurchofJesusChrist.org.

Maciu 2:1–12; Luke 2:8–38

E levu tu na ivakadinadina me baleta na sucu i Karisito.

Na sucu kei na gone dramidrami i Karisito a vakatakilakilataki mai vei ira na ivakadinadina kei ira na dau sokalou mai na vuqa na vei ituvaki ni bula. Nio vakadikeva na kedra italanoa, na cava o sa vulica me baleta na sala eso ni sokalou kei na vakadinadinataki ni Karisito?

iVakadinadina i Karisito	Na cava au sa vulica me baleta na sokalou kei na vakadinadinataki nei Karisito?
iVakadinadina i Karisito Vakatawa ni Sipi (Luke 2:8-20)	Na cava au sa vulica me baleta na sokalou kei na vakadinadinataki nei Karisito?
iVakadinadina i Karisito Simioni (Luke 2:25-35)	Na cava au sa vulica me baleta na sokalou kei na vakadinadinataki nei Karisito?
iVakadinadina i Karisito Ana (Luke 2: 36–38)	Na cava au sa vulica me baleta na sokalou kei na vakadinadinataki nei Karisito?
iVakadinadina i Karisito Tamata Vuku (Maciu 2:1-12)	Na cava au sa vulica me baleta na sokalou kei na vakadinadinataki nei Karisito?

Raica talega na 1 Nifai 11:13–23; 3 Nifai 1:5–21; “Shepherds Learn of the Birth of Christ” kei na “The Christ Child Is Presented at the Temple” (vidio), ChurchofJesusChrist.org.

Maciu 2:13–23

Sa rawa ni ra ciqoma na itubutubu na ivakatakila me taqomaka na nodra vuvale.

E sega ni na rawa ni cakava o Josefa na vei ka a kerei me cakava—me taqomaki Jisu ena nona gauna ni gone—ke sega na veivuke mai lomalagi. Me vakataki iratou na Tamata Vuku, e ciqoma o koya e dua na ivakatakila me baleta na vei ka ni leqa ena rawa ni yaco. Nio wilika na vei ka a sotava o Josefa, ena Maciu 2:13–23, vakasamataka na vei ka vakarerevaki vakayago ka vakayalo eda sotava tu nikua. Vakasamataka vakatitobu eso na ka o sotava nio vakila kina na veidusimaki ni Kalou e veitaqomaki vei iko kei ira na nomu daulomani. Sa rawa mo wasea na vei ka o sotava oqo vei ira na tamata. Na cava o rawa ni vakayacora mo ciqoma kina na veidusimaki vakaoqo ena vei siga mai muri?

Me kena ikuri, sa rawa mo sarava na vidio “The First Christmas Spirit” (ChurchofJesusChrist.org) me ivakaraitaki ni vei ka a rairai vakila o Josefa me baleta na itavi me sa na qarauna na Luve ni Kalou.

Luke 2:40–52

Ena gauna madaga vakaitabagone, e sa vakanamata tu o Jisu me vakayacora na lewa i Tamana.

Ni se cauravou gone voli, a vakatavulica na iVakabula na kosipeli ena kaukauwa ka ra kidroa na qasenivuli ena valetabu ena Nona “vuku kei na nona vosa” (Luke 2:47). Na cava o rawa ni vulica mai na vei tikina oqo me baleta na iVakabula ni se cauravou voli? Era sa cakava tiko beka vakacava o ira na itabagone o kila me ra sa “tiko ena vale ni Tama[dra]”? (Luke 2:49). Era sa vukei iko vakacava o ira na itabagone kei na gone mo kila vakatitobu na kosipeli? Na cava tale o sa vulica me baleta na ivakaraitaki ni nona bula vakagone o Jisu ena Luke 2:40–52 kei na iVakadewa nei Josefa Simici, Maciu 3:24–26 ( ena Bible appendix)?

“Drau sa sega beka ni kila ni sa kilikili kei au meu tiko ena vale nei Tamaqu?” (Luke 2:49).

Na cava na iVakadewa nei Josefa Simici?

Me baleta ga ni “vuqa na tikina macala vinaka ka talei” era sa kau tani mai na iVola Tabu ena veisenitiuri sa oti (1 Nifai 13:28; raica talega na Mosese 1:41), a vakaroti Josefa Simici kina na Turaga me railesuva ena veivakauqeti na Vola Tabu, ka sa vakatokai na iVakadewa i Josefa Simici. E vuqa na railesu e vakayacora na Parofita e tiko talega ena appendix ni ivolanikalou era vakayagataka na Yalododonu Edaidai. Na iVakadewa nei Josefa Simici ena Maciu 24, e kilai ena Josefa Simici—Maciu, e rawa ni kune ena Mataniciva Talei. Me baleta na ikuri ni ivakamacala, raica na “Joseph Smith Translation (JST)” ena Bible Dictionary kei na itukutuku ena Gospel Topics “Bible, Inerrancy of” (topics.ChurchofJesusChrist.org).

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Luke 2.Sureta na lewe ni vuvale me ratou digia e dua na tamata e vakamacalataki tiko ena Luke 2, ka wilika e vica na tikina me baleta na nona veimaliwai na tamata oya kei na iVakabula, ka wasea e dua na ka e ratou vulica e vakalevutaka cake na nodratou vakabauti Jisu Karisito. Lagata vata na “Yadra Mai, Yadra Mai” se “Na Gauna Talei” (Nodra iVolanisere na Lalai, 44–45, 52–53). Na cava e rawa ni da vulica mai na vei sere oqo me baleta na sucu ni iVakabula?

Vakasamataka na sala e rawa ni vakaqaqacotaka kina na cakacaka ni liga na veitalanoataki ni sucu i Karisito. (Me vakataka, raica na Gospel Art Book se history.lds.org/exhibit/birth-of-christ.)

Maciu 2:1–12.Na cava eda sa vulica me baleta na vakasaqarai kei na kunei ni iVakabula mai na nodra ivakaraitaki na Tamata Vuku?

Luke 2:41–49.Na cava sa “inaki i Tamada”? (Luke 2:49; raica na Mosese 1:39; iVoladusidusi Raraba: Veiqaravi ena Lotu i Jisu Karisito ni Yalododonu Edaidai, 1.2, ChurchofJesusChrist.org). Na cava eda sa vulica me baleta na inaki oya mai na italanoa ena Luke 2:41–49? Sa rawa mo vola e so na sala e rawa ni vakaitavi kina na nomu vuvale ena Nona inaki na Tamada ka qai biuta ena loma ni dua na joke. Ena macawa ka tarava, ni ratou vakasamataka tiko na nomu vuvale na gaunisala me ratou vakayacora kina na cakacaka ni Tamada Vakalomalagi, e rawa ni ratou digia mai na loma ni joke. Digitaki e dua na gauna mo wasea kina na vei ka o sotava.

Luke 2:52.Na cava eda rawa ni vulica mai na Luke 2:52 me baleta na torocake ni Nona bula o Jisu? Na mataqali lalawa cava ni tamata yadua se vakamatavuvale eda rawa ni tuvanaka me da vakalevutaki “ena vuku kei na yagoda talega, a sa vinakati keda vakalevu cake tikoga na Kalou kei ira talega na tamata”?

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Veikalokalo Cila Mai,” iVolanisere ni Lalai, 24.

Vakatoroicaketaki ni Vuli ni Tamata Yadua

Vakayagataka na veivuke ni vuli ivolanikalou. Me rawati na ikuri ni raititobu ni ko vulica na ivolanikalou, vakayagataka na ivurevure me vaka na ivakamacala e ra, Topical Guide, Bible Dictionary, Guide to the Scriptures, kei na veivuke ni vuli tale eso era tiko ena ChurchofJesusChrist.org.

Na iVakabula kei Vuravura e tadu mai ki vuravura ena ituvaki vakaloloma.