Marso 6–12

Mateo 9–10; Marcos 5; Lucas 9

“Kining Napulog Duha Gipalakaw ni Jesus”

Ang mga ideya dinhi niini nga latid gituyo sa pagtabang kanimo sa pagpangita og personal nga kahulogan diha sa mga kasulatan. Kinahanglan nga kini dili, hinoon, mopuli sa personal nga pagpadayag nga mahimo nimong madawat mahitungod sa unsa nga mga pahina ang tun-an o unsaon sa pagtuon niini.

I-rekord ang Imong mga Panghunahuna

Ang balita sa mga milagro nga pagpang-ayo ni Jesus daling mikaylap. Mga panon sa katawhan misunod Kaniya, naglaom nga mamaayo gikan sa ilang mga sakit. Apan sa dihang ang Manluluwas mitan-aw sa mga panon sa katawhan, nakita Niya ang labaw pa kay sa ilang pisikal nga mga sakit. Napuno sa kapuangod, nakita Niya ang “karnero nga walay magbalantay” (Mateo 9:36). “Daghan unta ang anihon,” naniid Siya, “apan diyotay ra ang mga mamumuo” (Mateo 9:37). Busa mitawag Siya og napulog duha ka Apostoles, “gihatagan silag kagahom,” ug gipalakaw sila sa pagtudlo ug sa pagpangalagad “sa nangawalang karnero sa banay ni Israel” (Mateo 10:1, 6). Karon ang panginahanglan alang sa dugang nga mga mamumuo sa pagserbisyo sa mga anak sa Langitnong Amahan sama lamang sa ka importante. Sa gihapon adunay napulog duha ka Apostoles, apan adunay mas daghang mga disipulo ni Jesukristo sukad kay sa kaniadto—mga tawo kinsa makapadayag ngadto sa tibuok kalibotan, “Ang gingharian sa langit haduol na” (Mateo 10:7).

Mga Ideya alang sa Personal nga Pagtuon sa Kasulatan

Mateo 9:18–26; Marcos 5:22–43

“Ayaw kahadlok, sumalig ka lamang.”

Sa dihang si Jairo nangamuyo ni Jesus sa pag-ayo sa iyang anak nga babaye, kinsa “himalatyon,” misulti si Jairo nga dinalian apan malaumon: “Adtoa ug itapion ang imong mga kamot diha kaniya, … ug mabuhi siya” (Marcos 5:23). Apan samtang sila mipadulong, usa ka mensahero misulti ni Jairo nga kini ulahi na kaayo: “Ang imong anak nga babaye patay na: nganong imo pa mang hagoon ang Magtutudlo?” (bersikulo 35). Maingon usab, mahimong ulahi na kaayo alang sa babaye nga gihulagway diha sa Marcos 5:25–34, kinsa nag-antos og sakit sulod sa 12 ka tuig.

Samtang ikaw nagbasa niini nga mga asoy, mahimong maghunahuna ka og mga butang nga nagkinahanglan og pagkaayo diha sa imong kinabuhi o sa imong pamilya––lakip ang mga butang nga ingon og “himalatyon” o ulahi na kaayo alang sa pag-ayo. Unsa ang nakapadani kanimo mahitungod sa pagpahayag sa hugot nga pagtuo dinhi niini nga mga asoy? Timan-i usab kon unsa ang gisulti ni Jesus ngadto sa babaye ug ngadto ni Jairo. Unsa sa imong pamati ang Iyang gisulti nganha kanimo?

Tan-awa usab sa Lucas 8:41–56; Russell M. Nelson, “Pagdawat sa Gah[o]m ni Jesukristo diha sa Atong Kinabuhi,” Liahona, Mayo 2017, 39–42; Mga Pagtulun-an sa mga Presidente sa Simbahan: Gordon B. Hinckley (2016), 387–99.

Salig sa Ginoo, ni Liz Lemon Swindle

Mateo 10; Lucas 9:1–6

Ang Ginoo mihatag sa Iyang mga sulugoon og gahom sa paghimo sa Iyang buhat.

Ang mga panudlo nga gihatag ni Jesus diha sa Mateo 10 ngadto sa Iyang Apostoles, magamit usab ngari kanato, tungod kay kitang tanan adunay bahin sa buhat sa Ginoo. Unsa nga gahom ang gihatag ni Kristo sa Iyang Apostoles aron pagtabang kanila sa pagtuman sa ilang misyon? Unsaon nimo sa pagkab-ot sa Iyang gahom diha sa buhat nga ikaw gitawag sa pagbuhat? (tan-awa sa 2 Mga Taga-Corinto 6:1–10; Doktrina ug mga Pakigsaad 121:34–46).

Samtang basahon nimo ang sugo nga gihatag ni Kristo ngadto sa Iyang Apostoles, mahimong makadawat ka og mga panghunahuna bahin sa buluhaton nga gusto sa Ginoo nga imong buhaton. Usa ka tsart sama sa mosunod makatabang kanimo paghan-ay sa imong mga hunahuna:

Mateo 10	Mga panghunahuna nga akong nadawat
Ang Manluluwas mihatag sa Iyang mga tinun-an og gahom.	Ang Dios mohatag kanako sa gahom nga akong gikinahanglan sa pagbuhat sa akong buluhaton.

Tan-awa usab sa Marcos 6:7–13; Mga Artikulo sa Hugot nga Pagtuo 1:6; Giya ngadto sa mga Kasulatan, “Apostol.”

Mateo 10:17–20

Kon ako anaa sa pag-alagad sa Ginoo, Siya modasig kanako kon unsa ang isulti.

Nakita nang daan sa Ginoo nga ang Iyang mga tinun-an pagalutuson ug pagapangutan-on mahitungod sa ilang hugot nga pagtuo—usa ka butang nga susama sa unsay nasinati sa mga tinun-an karon. Apan misaad Siya sa mga tinun-an nga sila mahibalo pinaagi sa Espiritu unsa ang isulti. Ikaw ba dihay mga kasinatian sa dihang kining balaan nga saad natuman sa imong kinabuhi, tingali sa dihang ikaw mipamatuod, mihatag og panalangin, o nakig-istorya sa usa ka tawo? Hunahunaa ang pagpakigbahin sa imong mga kasinatian uban sa usa ka minahal o sa pagsulat niini diha sa journal. Unsa ka nadasig sa pagbuhat aron ikaw makabaton sa mao nga mga kasinatian sa kanunay?

Tan-awa sa Lucas 12:11–12; Doktrina ug mga Pakigsaad 84:85.

Mateo 10:34–39

Unsay gipasabot ni Jesus sa “Wala ako moanhi sa pagdalag pagdinaitay, kondili espada hinoon”?

Si Elder D. Todd Christofferson mitudlo: “Masaligon ako nga pipila kaninyo gisalikway ug gihinginlan sa amahan ug inahan, mga igsoong lalaki ug mga babaye samtang inyong gidawat ang ebanghelyo ni Jesukristo ug misulod ngadto sa Iyang pakigsaad. Diha sa usa o sa laing paagi, ang inyong dakong gugma ni Kristo nagkinahanglan sa sakripisyo sa mga relasyon nga mahal nganha kaninyo, ug kamo nakapaagas og daghang mga luha. Apan uban sa inyong kaugalingong gugma nga walay pagkunhod, kamo nagmakanunayon sa paghupot ubos niini nga krus, nagpakita sa inyong kaugalingon nga wala ikaulaw ang Anak sa Dios” (“Finding Your Life;” Ensign,, Mar. 2016, 28).

Kini nga pagkaandam nga mawala ang gimahal nga mga relasyon aron sa pagsunod sa Manluluwas nag-uban sa usa ka saad nga “ang magawagtang sa iyang kinabuhi tungod kanako, makakaplag ra niini” (Mateo 10:39).

Mga Ideya alang sa Pamilya nga Pagtuon sa Kasulatan ug Home Evening

Marcos 5:22–43.Samtang ang imong pamilya nagbasa niini nga istorya og dungan, mahimo kang mohunong og kadiyot sa pagpangutana sa mga sakop sa pamilya kon unsaon nila sa pagbati kon sila pa si Jairo, ang babaye, o ang ubang mga tawo diha sa istorya. Mahimo ka usab nga makapakita og mga hulagway sa istorya, sama niadtong anaa niini nga latid. Giunsa niini nga mga hulagway sa pagpakita sa hugot nga pagtuo sa mga tawo dinhi niini nga mga istorya? Mahimo usab nimong hunahunaon ang pipila ka mga hagit nga giatubang sa imong pamilya. Unsaon nato paggamit ang Iyang mga pulong nga, “Ayaw kahadlok, sumalig ka lamang”? (Marcos 5:36).

Mateo 10:39; Lucas 9:23–26.Unsa kaha ang kahulogan sa “magawagtang” sa atong kinabuhi ug “makakaplag” niini? (Mateo 10:39). Tingali ang mga miyembro sa pamilya makapakigbahin og mga kasinatian nga naghulagway sa mga pagtulon-an ni Jesus dinhi niini nga mga bersikulo.

Mateo 10:40.Kumusta ka ug ang imong pamilya sa pagdawat ug pagsunod sa tambag sa Apostoles niini nga panahon? Sa unsa nga paagi nga ang atong pagkamasulundon sa ilang tambag mas nagpaduol kanato ngadto ni Jesukristo?

Lucas 9:61–62.Unsa ang buot ipasabot sa paglingi human makakupot sa daro? Ngano nga kini nga kinaiya makahimo kanato nga dili angay alang sa gingharian sa Dios?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga himno “Kon Molahutay ang Pagtuo,” Mga Himno, nu. 74.

Pagpalambo sa Personal nga Pagtuon

Paminaw sa Espiritu. Samtang ikaw magtuon, hatagi og pagtagad ang imong mga hunahuna ug mga pagbati (tan-awa sa Doktrina ug mga Pakigsaad 8:2–3), bisan og kini ingon og walay kalabotan ngadto sa imong gibasa. Kadto nga mga panghunahuna tingali mao gayod ang mga butang nga gusto sa Dios nga imong mahibaloan ug buhaton.

Talitha Cumi, ni Eva Koleva Timothy