Yu No Stap Fraet, i kam long Michael Malm

13–19 Maj

Matiu 11–12; Luk 11

“Bae Mi Mekem we Yufala I Spel Gud”

Presiden Dallin H. Oaks i tijim: “Ol skripja, we oli ol revelesen blong bifo, man i no save andastanem sapos hem i no open long ol revelesen blong tedei. … Taem ol man mo ol woman oli stadi long ol skripja, nao i mekem olgeta oli save kasem ol revelesen” (“Scripture Reading and Revelation,” Ensign, Jan. 1995, 7).

Raetemdaon Ol Filing mo Tingting blong Yu

Long plante wei, Ol Farisi mo ol tija blong loa oli bin mekem se fasin blong wosipim Jehova i wan hevi samting. Plante taem, oli tokbaot bigwan ol strik rul, be i no tumas ol trutok we oli no save finis. Ol rul abaot Sabat dei, we i sapos blong stap olsem wan dei blong spel, oli kam ol hevi samting.

Mo afta, Jehova Hemwan i kam long medel blong ol pipol blong Hem. Hem i bin tijim olgeta se tru stamba tingting blong relijin, i no blong putum ol hevi samting long man, be blong karemaot ol hevi samting ia long ol man. Hem i bin tijim se God i givim yumi ol komanmen, wetem hemia blong givim ona long Sabat, i no blong putum hevi samting long man, be blong blesem yumi. Yes, rod ia we i go long God i no isi, mo i smol, be Lod i kam blong talemaot se yumi no nid blong wokbaot long rod ia, yumiwan. “Kam long mi,” Hem i singaot. Invitesen ia blong Hem, i go long evriwan we i filim “se trabol i hevi” blong eni risen, blong oli stanap long saed blong Hem, blong oli joen gud long Hem, mo blong oli letem Hem i karem sam long ol hevi trabol blong yumi. Promes blong Hem, hem i :“Bambae yufala i save faenem pis long laef blong yufala.” Sapos yu komperem wetem ol nara wei we i stap—blong traem blong tekem evri samting yuwan, o stap dipen long ol ansa blong wol ia—“yok ya we [hem] bambae [i] putum long yufala, wok blong hem i isi nomo, mo ol samting we bambae [hem i] givim long yufala blong yufala i karem, oli no hevi.” (Matiu 11:28–30.)

Sam Aedia blong Skripja Stadi blong Yuwan

Matiu 11:28–30

Jisas Kraes bae i givim spel long mi taem mi stap dipen long Hem.

Yumi evriwan i stap karem ol hevi samting—sam, oli kamaot from ol sin mo ol mistek blong yumiwan bakegen; samfala i from ol joes blong ol narawan, mo samfala oli kam we i no rong blong eniwan, be oli pat nomo blong laef ia long wol. I nomata ol risen blong ol samting we yumi gat hadtaem wetem, Jisas i plis long yumi blong go long Hem blong mekem se Hem i save helpem yumi blong karem ol hevi trabol blong yumi, mo blong yumi faenem spel (luk tu long Mosaea 24). Elda David A. Bednar i tijim: “Blong stap mekem mo kipim ol tabu kavenan, i putum long yumi yok we i joenem gud yumi i fas gud long Lod Jisas Kraes” (“Bear Up Their Burdens with Ease,” Liahona, May 2014, 88). Wetem hemia long maen, tingting hevi long ol kwestin olsem olgeta kwestin ia blong andastanem gud moa ol toktok blong Sevya long ol ves ia. ?Olsem wanem ol kavenan blong mi oli joenem mi long Sevya mo joenem mi wetem Sevya? ?Wanem nao mi nidim blong mekem blong go long Kraes? ?Long wanem wei nao yok blong Sevya i isi, mo i no hevi?

?Wanem nara kwestin nao i kam long maen blong yu taem yu stap rid i go? Raetemdaon ol kwestin ia, mo lukaotem ol ansa long ol skripja long wik ia, mo lukaotem ol ansa ia long ol toktok blong ol profet. Maet bae yu faenem ol ansa blong sam long ol kwestin ia long mesej blong Elda David A. Bednar, we refrens blong hem i stap antap ia.

Luk tu long John A. McCune, “Kam long Kraes—Stap Laef Olsem Ol Lata-dei Sent,” Liahona, Mei 2020, 36–38; Lawrence E. Corbridge, “The Way,” Liahona, Nov. 2008, 34–36.

Ol Disaepol Oli Kakae Wit long Sabat, i kam long James Tissot

Matiu 12:1–13

“Mekem gud samting long ol sabat dei.”

Ol tijing blong Ol Farisi oli bin defren long ol tijing blong Sevya long plante defren wei, be speseli, long wei blong givim ona long Sabat dei. Taem yu stap ridim Matiu 12:1–13, maet bae yu save tingting long yuwan, se hamas nao ol fasin mo ol aksen blong yu long saed blong Sabat oli go stret wetem ol tijing blong Sevya. Blong mekem hemia, yu save tingting hevi long ol toktok ia:

• “Mi mi no wantem fasin ya we man i stap kilim animol blong mekem sakrifaes long mi, mi mi wantem we oltaem man i gat sore long man” (ves 7; luk long Hosea 6:6).

• “Mi Pikinini blong Man, mi Masta blong Sabat dei.” (ves 8).

• “From samting ya i stret nomo long Loa, blong yumi mekem ol wok blong givhan long man long Sabat dei” (ves 12).

?Olsem wanem ol tijing ia oli save lidim wei we yu lukluk long Sabat?

Luk tu long Mak 2:23–3:5; Gospel Topics, “Sabbath Day,” topics.ChurchofJesusChrist.org.

Matiu 12:34–37; Luk 11:33–44

Ol toktok mo ol aksen blong mi oli soemaot wanem i stap insaed long hat blong mi.

Wan long ol stamba toktok we Sevya i stap tokbaot Ol Farisi, i we, oli bin stap traem blong luk se oli stret mo gud, be tingting blong olgeta i no klin evriwan. Taem yu stap stadi long ol woning blong Sevya i go long Ol Farisi insaed long Matiu 12:34–37 mo Luk 11:33–44, tingting hevi long wanem i joenem hat mo aksen blong yumi. Toktok ia, “gudfala tingting” i minim wanem long yu? (Matiu 12:35). ?Long wanem wei nao ol toktok blong yumi oli jajem yumi? (luk long Matiu 12:37). ?Hem i minim wanem blong ae blong yumi “i gud” o i lukluk nomo long wan samting? (Luk 11:34). Tingting hevi long wei we yu save kam “fulap olgeta long laet” (Luk 11:36) tru long paoa blong Sevya.

Luk tu long Alma 12:12–14; Doktrin mo Ol Kavenan 88:67–68.

Ol Aedia blong Famli Skripja Stadi mo Haos Naet

Matiu 11:28–30.Yu save helpem famli blong yu i gat wan pikja long maen abaot ol tijing blong Sevya we oli stap long ol ves ia; yu mekem hemia blong yu mekem olgeta oli gat taem, wan afta narawan, blong traem pulum wan hevi samting; faswan oli traem mekem olgetawan, mo afta, oli traem pulum wetem wan we i help. ?Wanem nao sam long ol hevi trabol we yumi stap karem? ?Hem i minim wanem blong tekem nem blong Hem long yumi? Pikja we i stap long en blong aotlaen ia, i save helpem yu blong eksplenem wanem nao hem i wan yok.

Matiu 12:10–13.Taem yu stap rid abaot Jisas we i stap hilim wan man long Sabat, famli blong yu i save tokbaot moa hao yumi “kam gud bakegen” tru long Sevya. ?Olsem wanem Sabat i save stap wan dei blong stap hilim yumi?

Wetem insperesen we hem i kasem long eksampol blong Sevya long ol ves ia, bae famli blong yu i save mekem wan lis blong ol wei we yufala i save mekem “ol wok blong givhan long man long Sabat dei” (ves 12). Mekemsua blong yusum tu ol janis blong givim seves long ol narawan. Bae i save help blong kipim wan lis blong yu mo lukluk long hem long ol Sandei we oli stap kam.

Luk 11:33–36.Tingting hevi long wei we yu save tijim famli blong yu abaot mining blong stap “fulap olgeta long laet” (ol ves 34, 36). ?Bae wan lesen we yu yusum wan samting, bae i save help? Mo tu, yufala i save toktok raon long ol wei blong tekem laet blong Sevya i kam insaed long laef blong yumi, insaed long hom blong yumi, mo insaed long wol ia. Blong kasem sam aedia, luk long vidio ia: “The Light That Shineth in Darkness,” ChurchofJesusChrist.org.

Luk 11:37–44.Maet famli blong yu i save toktok raon long ol ves ia taem sam narawan oli wasem ol plet tugeta. Yu save tokbaot from wanem bae i no wan gudfala aedia blong wasem aotsaed blong ol samting olsem ol bolglas mo ol kap. Afta, yu save joenem hemia long nid blong yumi mas gat stret mo gud fasin, i no long ol aotsaed wok nomo, be tu, long ol tingting mo filing insaed long yumi.

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan Singsing: “How Gentle God’s Commands,” Hymns, namba 125.

Stap Kam Antap long Stadi blong Yuwan

Mekem samting evri taem. Maet yu gat ol dei we, blong stap stadi long ol skripja, i kam had moa, o i no tajem yu olsem we yu stap hop from. Yu no givap. Elda David A. Bednar i tijim: “Taem yumi gohed oltaem blong mekem ol samting we yumi luk se oli smol, bambae i lidim yumi long ol bigfala risal long saed blong spirit” (“More Diligent and Concerned at Home,” Liahona, Nov. 2009, 20).

“Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala” (Matiu 11:29). Foto © iStockphoto.com/wbritten