27 ni Maji–2 ni Epereli

Maciu 14; Marika 6; Joni 5–6

“Dou Kakua ni Rere”

Nio wilika na Maciu 14; Marika 6; kei na Joni 5–6, vakasaqara na dina e vakaibalebale vei iko. O na rawa ni vakataroga vakai iko na taro me vaka na “E sa baleti au vakacava na itukutuku ni vei wase oqo?” “Na itukutuku cava au na kunea me baleta na noqu bula?” se “Na cava au na via wasea ki na noqu matavuvale kei ira na tani?”

Vola na Nomu Nanuma Eso

Na cava a rawa ni vakauqeti Pita me biuta kina na veitaqomaki ni nona waqa ena loma donu ni Wasawase e Kaleli ena gauna ni cava kaukauwa? Na cava e vakavuna me vakabauta o koya ni kevaka e rawa ni taubale ena wai o Jisu, ena rawa talega vua? E sega ni rawa ni da kila deivaki, ia de a kila vinaka beka o Pita ni a sega walega ni lako mai na Luve ni Kalou me mai vakayacora na vei ka totoka vei ira na tamata ia me vakaukauwataki ira na tamata me vakataki Pita me ra vakayacora na vei ka totoka talega. Na veisureti i Jisu, sa ikoya ga, na “Lako mai, mo muri au” (Luke 18:22). E sa ciqoma oti vakadua na veisureti oqo o Pita, ka sa tu vakarau me ciqoma tale, kevaka sara madaga e kena ibalebale me na sotava na veika e dau rerevaka ka vakayacora na veika e na rairai dredre me vakayacori. Ena sega beka ni kerei keda na Turaga me da sobu mai ena dua na waqa ena loma donu ni dua na cava se me da solia na keda madrai lailai ni ra via kana na udolu, ia, ena rawa beka ni kerea o Koya me da ciqoma na veidusimaki ena gauna sara madaga e sega kina ni matata vinaka tu vei keda. Se cava sara beka na Nona veisureti vei keda, ena rawa ni veivakakidacalataki ena so na gauna se vakarerevaki toka. Ia ena rawa ni yaco na caka mana kevaka eda, me vakataki Pita, biuta vakatikitiki na noda rere, vakatitiqa, kei na noda kila lailai ka muri Koya ena vakabauta.

Vakasama Eso ni Vuli iVolanikalou ni Tamata Yadua

Joni 5:16–47

E Rokova na Tamana o Jisu Karisito.

Na isema mai vua na Tamada Vakalomalagi kei ira yadua na Luvena e dodonu me ka tabu. Ena vei tikina oqo, e solia vei keda o Jisu Karisito e dua na ivakaraitaki veivakauqeti me da muria ena noda veiwekani kei na Tamada Vakalomalagi. Wilika na Joni 5:16–47, ka qai makataka se vola toka na vei gauna e basika mai kina na vosa Tamaqu. E vakarokorokotaki Tamana vakacava na Luvena, ka ko na muria vakacava na Nona ivakaraitaki? Na cava o sa vulica me baleta na vei ka e nanuma na Tamana me baleta na Luvena? Na cava o sa vakauqeti kina mo vakayacora mo vakaqaqacotaka kina na nomu veiwekani kei na Tamamu Vakalomalagi?

Raica talega na Joni 17; Jeffrey R. Holland, “The Grandeur of God,” Liaona, Nove. 2003, 70–73.

Na cakama i Jisu nona vakania e limanaudolu na tamata ena lima na ibuli madrai kei na rua na ika.

Maciu 14:15-21; Marika 6: 33-44; Joni 6:5-14

Na iVakabula e rawa ni vakalevutaka na noqu soli-ka malumalumu me rawati na Nona inaki.

O sa bau yalolailai beka ni sotava na vei gagadre kece o raica wavoliti iko—ena nomu vale, nomu isema ni veimaliwai, se ena bula raraba? Era a rairai vakila beka na yalolailai na tisaepeli i Jisu ena gauna e kerei iratou kina me ratou vakania e sivia ni lima na udolu na tamata era via kana ena lima walega na ibuli madrai ka rua na ika. Nio wilika na caka mana e qai yaco tarava, vakasamataka vakatitobu ena vakayagataka beka vakacava na Kalou na nomu isolisoli ni veiqaravi malumalumu mo vakalougatataki ira kina era wavoliti iko. Sa vakalevutaka vakacava o Koya na nomu sasaga ni ko qaravi Koya? Vakasamataka mada na itukutuku oqo mai vei Sisita Michelle D. Craig: “E rawa ni daru solia na vei ka e tu vei kedaru vei Karisito, ka na vakalevutaka o Koya na nodaru sasaga. Na ka o rawa ni solia esa levu sara—ke tu mada ga na nomu luluqa kei na malumalumu vakayago—kevaka mo na vakararavi ki na loloma soliwale ni Kalou” (“Divine Discontent,” Liaona, Nove. 2018, 54).

Maciu 14:22–33; Marika 6:45–52; Joni 6:15–21

E sureti au o Jisu Karisito me‘u vakatikitikitaka na noqu rere kei na vakatitiqa ka vakaraitaka na vakabauti Koya.

Raitayalotaka ena nomu vakasama na itukutuku matailalai ni vei ka e yaco ena Maciu 14:22–33; Mark 6:45–52; kei na Joni 6:15–21. Vakasamataka mada na vei ka e ratou a rairai vakila o Pita kei iratou na vo ni tisaepeli. Na cava o sa vulica me baleta na bula vakatisaepeli mai na nona vosa kei na vei ka e vakayacora na iVakabula mai na vei tikina oqo? Na cava o sa vulica mai na vosa kei na ivakarau nei Pita? (Raica talega na 1 Nifai 3:7.) Na cava e sa sureti iko kina na Turaga ena rawa ni vaka na butu tani mai na waqa? Na cava o kunea ena vei tikina oqo ka solia vei iko na yaloqaqa mo vakaraitaka na nomu vakabauti Jisu Karisito?

Joni 6:22–71

Ni‘u sa tisaepeli i Jisu Karisito, sa dodonu me‘u vakabauta ka ciqoma na dina, ena gauna sara madaga e dredre kina me vakayacori.

Ni vakatokai Koya vakai Koya o Jisu me “madrai ni bula” (Joni 6:48), e vuqa era kunea ni oqo e dua na “vosa dredre” (Joni 6:60). Ena vukei iko vakacava na vosa nei Pita ena Joni 6:68–69 ena vei gauna e dredre kina na nomu ciqoma se bulataka na ivunau ni iVakabula? Na cava o taleitaka me baleta na ivakadinadina nei Pita? Na cava eso na “vosa ni bula tawamudu” (Joni 6:68) ka na vukei iko mo tudei tiko ena nomu vakamuria na iVakabula?

Raica talega na M. Russell Ballard, “To Whom Shall We Go?,” Liaona, Nove 2016, 90–92.

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Maciu 14:15–21.Vakasamataka na sala o rawa ni vukea kina na nomu matavuvale me ratou raitayalotaka na levu ni madrai kei na ika ena taura me vakania e lima na udolu na tamata. Na cava e vakavulica vei keda na cakamana ena Maciu 14:15–21 me baleta na iVakabula? De rawa ni o wasea mada na gauna o a vakila kina ni sega ni veirauti na ka o solia qai vakalevutaka na iVakabula na nomu sasaga.

Maciu 14:22–33.E ratou na rairai taleitaka beka na nomu matavuvale me ratou vakabulabulataka tale na italanoa ena vei tikina oqo. Na cava ena rawa ni ratou a rerevaka na tisaepeli? A qai uabaleta vakacava o Pita na nona rere ka biuta na waqa? A vakaraitaka vakacava o koya na vakabauta dina madaga ni sa tekivu me lutu dromu? Eda vakataki Pita vakacava ena so na gauna?

Joni 5:1–16.Sureti iratou na lewe ni matavuvale me ratou kidava tiko na malanivosa oqo “sa vakabulai” ena vei tikina oqo. Ena sala cava ena rawa ni vakataucokotaki ira kina na tamata o Jisu Karisito? Ena gauna cava kei na sala cava sa vakataucokotaki keda kina o Koya?

Joni 6:28–58.Solia vei iratou na lewe ni matavuvale yadua na tiki ni madrai me ratou kania, ka qai veitalanoataka na ka yaga eda na rawata mai na madrai kei na kakana bulabula tale eso. Ka qai vakasaqara vata na vei tikina oqo, me laura se cava e vakatokai Koya kina Vakai Koya me “madrai ni bula” o Jisu Karisito (Joni 6:35). Na cava beka na ibalebale me da “kania” na madrai ni bula? (raica na D. Todd Christofferson, “The Living Bread Which Came Down from Heaven,” Liaona, Nove. 2017, 36–39).

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Serenilotu vakaturi: “Dokai na Vuku kei na Loloma,” Serenilotu, naba 101.

Vakatoroicaketaki ni Vuli ni Tamata Yadua

Vakasaqara na nomu raititobu vakayalo. Ena nomu vuli yadua kei na nomu vuvale, kakua ni yalana na nomudou vuli ki na vei tiki ni volanikalou era tiko ena idusidusi oqo. Ena rawa ni tiko eso na nona itukutuku na Turaga me baleti iko ena vei wase oqo ka sega ni tiko eke. Vasaqarai ira ena masumasu.

Vorata na Cagi, mai vei Liz Lemon Swindle